Un, dos, tres... palomina blanca ye.

Esta semeya qu’encabeza esti textu, bien pudiere nomase asina, comu’l xuegu infantil, pola pose de los paisanos, que paecen tar esperando a que la madre se voltie pa dar unos pasucos d’elefante. La so publicación pola axencia de noticies France-Presse, permitió al so autor, Chiba Yasuyoshi –del cual nun tengo’l permisu pa publicala nesti blog, pero ye porque ándame mal la llinia de teléfonu- conseguir el primer premiu de la World Press Photo en la categoría People in the News Singles, daqué asina comu l’Óscar al meyor actor, pero nel mundiu de la foto de prensa.

Pero non, nun se llama asina. Por desgracia, muestramos la realidá del conflictu tribal en Kenya, qu’acaeciere ente los meses de payares de 2007 y febreru de 2008. El fraude ellectoral del gobernante Mwai Kibaki lu enfrentó a les fuercies opositores. Morrieren 1.600 persones, 600.000 fueren desplazades y casi mil muyeres denunciaren violaciones poles milicies d’una y otra parte.

Esti conflictu fue ún de tantos de los que pasaren de puntiyes l’añu pasáu nos medios de comunicación. Hai otros que llamen más l’atención de la xente, alimentando l’odiu d’unos y d’otros, hasta que se tien tantu, que se reparte a los de más allá, escaeciendo estos que dos nun riñen si unu nun quier (hasta nel amor, cuando unu nun quier, l’otru calla la boca y refálfiase nel so enamoramientu). Hai conflictos que se viven dende fuera comu si se trataren de partidos de fútbol, celebrándose cada muertu enemigu como un gol y ciscándose na ma del árbitru cuando muerre ún de los suyos. Hai conflictos que faen que se pierda la perspectiva, que les pallabres dexen de tener sentíu y solo valga lo d’ún.

Esti sábadu 28 de febreru de 2008, nel Teatru Xovellanos de Xixón, actuaba la cantante israelí Noa y, al parecer, la Plataforma Asturiana con Palestina y el Comité de Solidaridad con la Causa Árabe se manifestaron en contra del conciertu d’esta artista porque apoyare l’invasión de Gaza, onde morrieron más de 1.500 persones y porque la so postura pacifista ye entendía comu pura impostura, cinismu y retórica d'una sionista activa, anque nun tean en contra de los israelíes que sí puxen pola paz y la democracia. Noa, ante otres manifestaciones asina, defendióse diciendo que ella nun ta en contra de los palestinos, sinón de Hamás, porque llucha pola despaición del pueblu d’Israel y non por defender los intereses del so pueblu. Pallabres d’unos que nun valen ná pa los otros.

Y dambes partes confunden churres con merines, porque se perdió la perspectiva de que tanto israelíes comu palestinos son persones. Hasta que la xente nun se vuelva a dar cuenta de que de dambos llaos se sufre, y con razón, y que los otros tamién son seres humanos y non perros infieles nin mosques a matar a cañonazos, l’odiu seguirá creciendo.

De lo que toi seguru ye que ni ún solu de los que tuvieron presentes tanto dientru comu fuera del teatru –nin siquiera los policíes nacionales que taben dientro’l furgón que desplegaron por si acasu la cosa se calentaba- s’alcordaba d’ún solu de los desplazaos del Sudán, de los muertos d’Abjasia o de los nenos de cuatro meses que ñacieron de les muyeres violades nos disturbios de Kenya (de los cuales faló, nel su blog de “20 minutos”, el reporteru Hernán Zin). Yá se sabe qu'hai vides que valen más qu'otres.

Noa cantaba:

“Sí, mi corazón siempre estará donde esté tu corazón,
si tú no dejas de luchar.
Y nunca pierdes la ilusión, nunca olvides que al final
habrá un lugar para el amor.
Tú no dejes de jugar, nunca pares de soñar,
que una noche la tristeza se irá sin avisar
y al fin sabrás lo bello que es vivir.”

Lástima que les pallabres nun valgan. Tal vez si escucháramos más, los guah.es de los que falaba Zin, pudieren salir n’una semeya xugando a la palomina blanca ye, en vez de a sangre (y nun me refiero precisamente al xuegu).

La noticia en La Voz de Asturias.
Viaje a la guerra, blog de Hernán Zin.