Erronyous (por nun dicir na pior)

Pa les elecciones xenerales, el colectivu Anonymous sacaba la campaña "Operación 20 de noviembre" (#Op20N), col oxetivu de hackear les elecciones.

Nella, convidábase a la xente a votar partíos minoritarios o a participar usando la fórmula del votu nulu, fórmules qu'entiende como significatives pa espresar "un rechazo conjunto a la situación actual". Pero, sobre too, recalcaba la necesidá de que se votara, de que se participara nes elecciones, entendiendo que l'abstención ye un simple porcentaxe "que es despachado por el poder como un dato simplemente anecdótico", pa finar diciendo que tanto l'abstenese como el votar en blanco "benefician claramente a PP y PSOE" y, l'abstención, "incluso fomentando un vacío social que no participa en las urnas y que el bipartidismo aprovecha para legitimarse", siendo "presentada por lo medios como anecdótico o fruto de la dejadez ciudadana". Como "Anonymous sabe que eso [supónse que se refier a que la ente nun se dexa] no es cierto", propón el dir a votar, nes condiciones enantes desplicaes.

Lo que se presenta como un ataque a la partitocracia bipartidista queda, coles idegues espuestes, nuna simple campaña de desinformación que favorez l'espoxigue de los partíos políticos minoritarios, principalmente Izquierda Unida y Unión Progreso y Democracia (puesto que nunca nun entren na nómina de partíos a desaniciar), al caltenese dientro d'un sistema qu'entienden inxustu pero que, en dengún momentu, sufre un ataque significativu. Fálase que ye malo ya inxusto, pero particípase nello, anque d'unes formes que nun lu llexitimen, según el documentu claro.

Estos plantegamientos, por embargu, nun respuenden a la lóxica y caen énte'l mínimu analís. Caltener que'l votu nulu ye un votu de protesta y que l'abstención llexitima'l sistema son dos aberraciones. Esponer qu'unos partíos son más partitocráticos qu'otros escoyéndolos a déu ye una manipulación. Por último, defender que votar a los partíos pequeños o facelo nulu a posta ye la meyor forma pa camudar el sistema ye, simple y llanamente, una manipulación. Desplícome:

Anonymous diz nidio que'l votu nulu ye aquel "voto emitido de manera no válida. Rechaza todas las opciones existentes. Es contabilizado pero no es obstáculo para los partidos pequeños". El votu nulu ye una participación irregular del votante, porque nun usa papeletes homologaes na circunscripción o estes tan deterioraes. Nun queda constancia de si el votu ye de protesta o non, pero sí de qu'esi ciudadanu acudió a les urnes. Nel recuentu pa establecer los porcentaxes de votu nun cuenta (como si lo fai'l votu en blancu, que ye un votu válidu qu'espresa la voluntá del votante a aceutar la decisión de la mayoría), pero sí pa los datos de participación. Poro, nunca nun ye un votu de protesta (porque'l so radiu d'aición nun va más p'allá de la reaición de los miembros de la mesa electoral y de los interventores) y, al contabilizase dientro de la participación efeutiva de les elecciones, ye un votu llexitimador del sistema.

La primera reaición de cualisquier partíu políticu nuna democracia representativa ye felicitase pola participación, porque esta ye la única forma que tien de caltener la llexitimidá del sistema. A mayor abstención, mayores problemes pa defender les sos idegues. Asina pudo comprobase dempués del referéndum pa la Constitución europea n'España, que s'aprobó ensin problemes pero con unos amenorgaos datos de participación: España aprobóla, pero la mayor parte de los países de la xunión prefirieon aprobala direutamente nos parlamentos o dexala pa práu, pa evitar los efeutos desllexitimadores. A la fin, nun salió p'alantre nos términos predefiníos.

Y ye que l'abstención ye l'únicu mediu llegal de protesta efeutiva énte'l sistema que tienen los ciudadanos. Porque'l votu ye un drechu y non una obligación; y esti nun tien porqué dase pa que naide represente la voz d'ún (nin muncho menos, dalo pa que se lu entienda tatexando, como se fai col votu nulu). [Yá lo tuviera dicho na mío segunda fábula periclética]

Esto sábelo Anonimous y dizlo nel vidiu, pero tracamundia'l discursu algamando que, pa triunfar el cambiu, tien que ser una abstención mayoritaria, lo que ye nidio: pero si dempués los críticos pa col sistema dicen que pa protestar escontra'l mesmu ye efeutivo votar, ¿cómo va ser mayoritaria l'abstención?

Por otra parte, dízse que les abstenciones son manipulaes polos medios de prensa y los partíos mayoritarios, amenorgando los datos y la so repercusión. Ta claro qu'estos tan nel so papel de defender aquello que creen escontra lo que-yos pue faer dañu. Pero tovía nun sintí dicir a dengún democratacristianu o socialdemócrata que la xente se quede en casa y que nun vote; o que se ficieren campañes pa dicir que votar nulo o en blanco ye negativo. Ensin embargu, nun se tien por onde coyer que les plataformes crítiques escontra'l sistema partitocráticu actual defiendan que la xente vote, esto ye, que llexitime'l réximen que quieren camudar.

Y nun ye por complexu d'inferioridá, pa que nun los llamen "antisistema" nos medios de prensa, que queda mui feo y paez que, reconociéndolo, ún tenga que salir a la griesca delantre los antidisturbios. (Triste tener complexos al defender los tos drechos, como sí pasa n'otros movimientos) Falaba enriba de "campaña de desinformación" nesti casu d'Anonimous, como lo ficiera enantes de les propuestes del 15-M, coleutivos que se presenten pa camudar dende dientro'l sistema y que nun faen más que sofitalu.

Esto vese na panipulación de defender a unos partíos frente a otros. L'ideal democráticu son los partíos políticos minoritarios, estremándolos del PSOE, el PP, CiU y el PNV, que, al so entender, son los demoniones que sustenten la partitocracia n'España. Equí, yá nun s'entra na qué partíu votar, mientres "sea de tu agrado". Votar ERC, val. Votar Compromís, val. Votar Falange Española, val. Votar Plataforma por Cataluña, val. El casu ye que nun sumen los cuatro d'arriba.

Esto ta bien sobre'l papel, pero pa tragalo hai que cayer nel buenismu más absolutu: p'Anonimous nun valen tolos partíos igual, porque la intención ye promulgar un camudamientu de la realidá democrática representativa, que sofiten cola campaña pro-votu. Y qu'estos camudamientos se faigan dende dientro. Así que votar Izquierda Unida, val más. Y votar UPyD, tamién. Porque estos dos partíos son los que (ún con una visión más izquierdista y otru con una más de dreches) proponen reformes electorales y territoriales que camuden el sistema políticu, finacieru-económicu y social del Estáu, ensin baltalu del too. Como Anonymous, tamién piden que la xente vote, tamién se consideren minoritarios y amenorgaos en drechos y oportunidaes y tamién glayen pidiendo cambios sociales ensin tener gran repercusión nos medios, que los utiliza y los tracamundia. Coinciden puntu por puntu. El discursu victimista del desamparu d'estos partíos y el ciudadanu d'infantería énte'l sistema políticu que nun los quier sintir, ye cenciellu y cala fácil.

En definitiva, l'efeutista vidiu d'Anonymous que desplicaba la campaña #Op20N nun resiste'l primer emburrión. Ta enllenu d'argumentos inesuatos, tracamundios, manipulaciones y discursos prexuiciosos (qu'a estes altures tovía se menten los cuernos de d'Hont, ye llacerioso).

La pena ye que'l mensaxe llega a la xente y pude lleer y sintir comentarios del tipu "yo voto... l'abstención nunca nun gana jejejeje" o "yo voté nulo; ehí dexé clara la mío postura", en persones que pensaba conocedores de lo que ye un sistema democráticu parlamentarista y representativu como ye l'español. Munchu illustráu a la violeta que me protestará esti escritu col enfotu qu'usaben en mayu pa defendeme'l votu en blancu, qu'agora desanicien.

El conceyu los pitos del cisne

Esta selmana viera como dos monstruos de la política, como Papandreu y Berlusconi, tuvieron que plegase a los que dicíen los mercaos financieros: "Moninos, sobráis. Queremos xente que faiga lo que pidimos ensin rechistar. Equí, mandamos nosotros".
Vínome yá col griegu (y esti día, col intalianu acabó de llegame), un canciu que dende va años me presta: Cygnet committee ("El conceyu los pitos del cisne"), del álbum Space Oddity, del mío almiradísimu David Bowie. Paseme un par d'hores tornándola y espero que vos preste (anque en vez de versificala, toméme la llibertá de redactala como una narración curtia: porque Bowie nun la canta, nárrala a trés voces).
A mín abúltame un espeyu nidiu pal mundiu que nos ta tocando vivir.

"El conceyu los pitos del cisne"

Bendígovos con llocura. Trístemente, igual que m'ato los zapatos. Dacuando, quiérovos mal, anque dame que cuando toca. Por vosotros ye polo que necesito descansar. Porque sois quienes me ponéis a prueba.

Tanto se perdiere y hai tan poco nuevo... y, como'l gorrión-y fai los coros al amanecer por si dalguien lu siente, el Creyente siéntase solu, avieyando y amargándose.

"Di-yos la vida, di-yosla a toos... y baldiaron la mio alma, tan seca, y esprimí'l mio corazón pa calmar los sos dolores. Nun cuiden si me queda dalgo d'aquello, porque na nun pue sustituyilos. Y yo, ¿qué? ¿Quién empoderó los sos esfuercios por ser llibres? Les pallabres de sofitu y ciñu y afalagu. Abrí les puertes que tuvieren bloquiao'l so camín. Y apoyé la so causa pa guialos, por tan poco a cambiu.
"Yo arruineme por aquellos, aquellos que'l so clamor s'enllenaba de paz y tranquilidá, aquellos que falaben d'un mundu nuevu, de nuevos caminos siempre, aquellos que calteníen les sos promeses d'esperanzame y d'honrame."

Bendígovos con llocura. Trístemente, igual que m'ato los zapatos. Dacuando, quiérovos mal, anque dame que cuando toca. Por vosotros ye polo que necesito descansar. Porque sois quienes me ponéis a prueba.

* * *

Tanto se perdiere y hai tan poco nuevo... y, como sal el sol y parpaguía encima de mío, los míos amigos charren de la gloria, de suaños inenarrables, onde too ye Dios y Dios ye solo una pallabra.

"Teníamos un amigu, un charlatán, que falaba de los munchos poderes que tenía. Nun yera'l meyor de los homes, pero yera'l de nos. Usámoslu. Permitímos-y qu'usare los sos poderes. Dexamos que cubriera les nueses necesidaes. Anguaño, somos fuertes.

El camín ta llegando al so fin. Los condenaos yá nun tienen tiempu pa camudar agora. Nun queden fiches na bolsa de la fortuna nel nuestru camín. Les pistoles silencioses del amor van disparar al cielu. Derrumbamos la frallada estructura construyía n'años. Les nuestres armes fueron les llingües que lloraben de rabia.

"Donde taba'l dineru, plantamos la grana'l resurdimientu y apuñalamos a los nuestros padres pola espalda. Fiyos de la suciedá, metíos en negocios sucios, odiando al traviés de les nuestres mangues. Sí, y tayamos el gargüelu de la Ilesia católica, apedriando al probe, con conseñes tal que: "Prestaríamos que pudieres oyir", "Amor ye tolo que necesitamos", "Pasa de los problemes", "Pasa de la to madre", "Corta colos amigos", "Pisa al to hermanu o elli te lo fadrá a ti al final".

"Y sabemos que la bandera l'amor ta en tolo alto. Y podemos obligate a que seyas llibre. Y podemos forzate a creyas."

* * *

Y cierro los güeyos y machaco'l cerebru pa recordar que lleera una vez un llibru onde unos amantes yeren asesinaos porque nun conocíen les pallabres del estribillu de los Estaos Llibres, que dicía: "Yo creo en el Poder del Bien, creo nel Estáu del Amor, llucharé polos Drechos que seyan buenos, y mataré pola Bondá de la Llucha polos Drechos que seyan buenos".

Y abro los güeyos y miro alrodiu y veo a un neñu que xaz muertu en suelu. Mientres una desvenceyada máquina del amor pasa peles files de la desolación, destrozando homes y muyeres, sintiendo la so orden, pero ensin oyir na nun más, ensin oyir a naide. Solo los glayíos de los vieyos ricos.

Y yo quiero creyer, na llocura que se noma "Agora". Y quiero creyer qu'una lluz ta brillando al travies. D'alguna manera.

Y yo quiero creyer. Y tu quies creyer. Y nosotros queremos creyer. Y queremos vivir.

Queremos vivir.

Quiero vivir.

Vive.

Yo apoyo al Centro Niemeyer

El Centru Cultural Internacional Óscar Niemeyer d'Avilés ta en boca de tolos asturianos estos díes, pola tremenda polémica sobre'l control de la institución. Por un lláu, alcontramos a los que sofiten la xestión del centru que se vien faciendo dende la Fundación del Centro Niemeyer hasta la fecha; por otru, daquellos que defienden les postures del actual Gobiernu del Principáu que, de la mano del presidente Cascos y del conseyeru de Cultura Emilio Marcos Vallaure, tan faciendo una durísima campaña de crítica a los conteníos y l'actividá económica de la Fundación xestora.

Unos entienden que'l llabor fechu hasta'l momentu ta perclaru nes cuentes, auditaes por empreses ayenes, y que los programes culturales y les actividaes, que salen d'ellos, respuenden a los criterios d'escelencia que recueyen los estatutos de la Fundación y caltienen los oxetivos fundacionales pa considerar el Centro Niemeyer como "Una plaza abierta a todos, un lugar para la educación, la cultura y la paz".

El Gobiernu del Principáu, pela so parte, entiende que les cuentes nun tan clares, porque les factures unviaes dende la Fundación, nun cuadren colos gastos y, amás, el presupuestu d'actividaes finaba coles propuestes n'ochobre (dempués daríense delles escuses como les espublizaes nun artículu del secretariu xeneral de la Fundación, l'abogáu José Luis Rebollo en "La Nueva España" a principios de setiembre). Amás, defiende que los criterios de programación nun respuenden al oxetivu de dar a conocer al mundiu la capacidá creativa asturiana y queda curtia y probe, por anteponer los nomes renomaos a los criterios artísticos.

Esto nun ye más qu'una llucha de poder ente una casta político-social qu'andaba al rodiu de los anteriores gobernantes socialistes (o de los partíos sucursalistes) y de los nuevos amos, qu'entren nel cortín a sacu, espantando les oveyes coles sos polítiques adanistes. Unos y otros, tienen les sos razones. Unos y otros, los sos palmeros. Unos y otros, les sos males artes.

Y asina, al descréditu insultante a la programación del Niemeyer y a la so incapacidá xestora que lu ta llevando a la quiebra argumentáu pol Foro y robráu dende El Comercio, defiéndese la Fundación y l'Ayuntamientu avilesín de corte socialista (y popular, anque cola boca pequeña) metiendo miéu a la xente dende les páxines de La Nueva España, diciendo que lo quier el Gobiernu del Principáu ye zarrar el Centru porque non lu controlen ellos y, echando la culpa de tolos males y padecimientos actuales a Vallaure y la falta de sofitu de la Conseyería que preside, tan movilizando a dellos sectores de la hostelería avilesina, que ven que l'oru que viniere de Brasil, va quedar na basa la ría. (Suéname a Semana Negra munchísimo)

Llamentablemente, la cosa yá nun tien marcha atrás. Al final, la Fundación tendrá que ceder énte les pretensiones del Principáu, porque ye quien pon les perres y les instalaciones y, como ye normal, tien que ser quien escueya'l xestor de los centros que financia. Y quiciás seya lo meyor.

La Fundación nun ta faciendo bien les coses. Y nun digo a nivel institucional, porque cuenta con un Conseyu Asesor Internacional con xente de l'altor de Woody Allen, Stephen Hawkin, Paulo Coelho, Vinton Cerf o Wole Soyinka, collabora cola Fundación Cristina Masaveu y Caixa Forum, la London School of Economics y el grandiosu teatru Old Vic, tamién de Londres. Esi llabor ye tremendu.

Pero les actividaes pal públicu dexen muncho que deseyar, vertebraes más nel nome del protagonista que nes posibilidaes culturales, ensin vínculos nos criterios de trabayu ente actividá y actividá, ensin cadarma estructural p'apurrir ciclos temáticos de referencia que faigan a la xente averase a la cultura y non a lo que fai'l famosu de turnu. Les actividaes preséntense a bombu y platiyu meses enantes pa que se fale d'elles: dizse que vien Woody Allen o Kevin Spacey y rellenase'l tiempu con películes d'ellos, hasta que, un par de díes enantes del espectáculu, faen una charra maxistral. Y yá. Acabose. Ye ablucante ver les estayes d'actividaes valeres de conteníos, salvo una charra per equí, películes en versión orixinal per allá, una esposición de más d'un mes d'un famosu ensin más vinculación pa col arte espuestu que'l ser afición. Y puntu final.

A eso se dediquen los programadores del Centro Niemeyer, porque pa descubrir l'arte dientro d'Asturies, enseñar al mundiu lo que se fai equí, les capacidaes de los asturianos y de ser puerta de salida d'idegues nun tuvo'l Centru. Los asturianos qu'intervinieron nes actividaes fueron d'una forma puntutal, de refilón y con nome yá fechu; nun fuera nunca un apueste pa dar a conocer coses y esperiencies nueves feches equí. Pa eso nun ta'l Niemeyer, pesie a que los sos estatutos déxenlo bien claro. Sí esiste la estaya Panorama Astur, onde s'invita a los artistes asturianos a presentar les sos propuestes a pasar un esamen d'escelencia, mientres que los artistes d'afuera son contrataos, delles veces, solo pol nome. (¿Dalguien vio les semeyes de Jessica Lange? Cuando la traigan d'actriz, entós sí, que pongan les sos semeyes. A esto llámase "esnobismu".) Esti programa ye una vergoña de les de cayer la cara'l suelu. El qu'un centru d'esta categoría, con estos sofitos, nun tenga dellos programadores caleyando Asturies a la gueta d'artistes pelos institutos, les galeríes, los museos, etc. pa complementar -si non centrar les programaciones- les actividaes de referencia, enllenando los espacios vacíos anguaño con arte de creadores autóctonos (a non confundir con tradicionales, que tamién diben poder entrar, por qué non) fala más d'un provincianismu esmolecedor que d'un referente na xestión cultural. Ye la idega de que lo de fuera ye meyor y lo d'aquí, nun val un res. Poro, los asturianos tamos condergaos a deprender de lo que nos traen de fuera y a refugar de lo nuestro, anque dempués vuelva envueltu en papelín de regalu (véase'l casu d'Hugo Fontela, desaniciáu equí hasta que se fizo artistazu en Nueva York).

Una idega solo de lo fácil que diba ser compaxinar dambes coses, lo d'afuera y lo d'equí. Aldericando sobre la llegada de Kevin Spacey (que me paez un buen actor de cine porque, salvo dalgunes pieces breves colgaes en youtube, dalgunes precisamente del estrenu del so "Richard III" nel teatru d'Epidauro, malpenes tengo referencies d'elli como actor teatral, anque nun duldo del so valir, nin muncho menos de la compañía del Old Vic que dirixe) dempués de ver, nel teatru Jovellanos, el "Macbeth" de los xixoneses El Callejón del Gato, falábamos de la falta d'interés del Niemeyer pa colo asturiano. ¿O ye que grupos de teatru y artes escéniques asturianes nun puen tan al altor de teloneros del americanu? ¿Por qué nun se plantegó a los grupos asturianos un ciclu teatral sobre Shakespeare, con diferentes enfoques, diferentes medios y diferentes intereses pa mostrar al públicu avilesín daqué más qu'una clase maxistral: el valir de los actores asturianos? Bueno, nun ye que nun-yos diera, ye que nunca nun se lo plantegaron: ¿cómo va considerase escelente dalgo asturiano? Amás, pa qué se va trabayar cuatro veces si con una propuesta d'españar, el restu queda escaecío. Pero claro, eso nun ye bona xestión. (Si los hosteleros qu'agora se manifiesten pola pérdida del so tesoru-yos desplicaren que tuvo desaprovecháu, igual lo pensaben dos veces a quien apoyar)

Asina que sí, yo apoyo'l Centru Niemeyer. Pero non la xestión que vien faciendo. Non al esnobismu provincianista. Ye tiempu de camudar o qu'acabe pasando lo d'otres propuestes n'Asturies, véase Laboral Teatro. Y si tengo qu'apostar por daquien pa que faiga una xestión granible d'un espaciu cultural, apuesto por Vallaure, direutor del Museo de Bellas Artes de Asturias dende la so fundación hasta va pocos años y que lu upó como centru cultural de referencia de xestión y conteníos dientro y fuera del Estáu.

Y si falla, que seya porque falle otru modelu de xestión: pero que nun se repitan más erros d'esti estilu. Que ye de pena'l complexu d'inferioridá que tamos ufiertando los asturianos al mundiu. N'eso sí somos referencia.

Llárimes de cocodrilu

Tino Casal fue un heterodoxu de la música. Escomenzó a triunfar col grupu "Los archiduques", pero dexolu años dempués pa dir a Alemaña ya Inglaterra a estudiar arte.

"Lamento de gaitas" (Los archiduques)

Ellí conocerá nuevos movimientos culturales, ente los que destacará el glam asoleyáu por Brian Ferry y David Bowie, de los que beberá p'algamar el so estilu propiu que saldrá a la lluz col discu Neocasal, primeru en solitariu, nel añu 81. Diba romper asina cola idega de cantante melódicu que les discográfiques-y queríen imponer dempués de ganar nel Festival de Benidorm del 75, pa convertise nun referente absolutu de la nomada Movida Madrilana. Les crítiques fueron permales, pero'l LP vendióse mui bien, collechando un éstu de públicu sorprendente. "Champú de huevo" convirtióse nun himnu pal movimientu alternativu que taba naciendo en Madrid, por ser el primer cantar que llegara al gran públicu. Seguiríenlu otros artistes de la concida como Dómina d'oru del pop español.

"Champú de huevo"

Etiqueta Negra, espublizáu enl 83, diba suponer otru nuevu ésitu de ventes, dándo-y el discu d'oru al cantante. "Embrujada" foi'l cantar señeru de LP. En plena xira, lanza Hielo Rojo pal añu siguiente. Nuevu ésitu. Tal yera la popularidá de la música de Tino Casal, que la Vuelta España del añu 84 tendría como banda sonora l'estribiyu d'un de los cantares del discu: Pánico en el Edén.

"Pánico en el Edén"

La música del de Tudela-Agüeria gociaba d'una escelente salú. Pero llegó la so primera desgracia: nuna actuación tuerce un tobiyu y, testerón y automedicánsodse, sigue la xira mientres dos meses, ensin faer casu a los médicos, hasta que lu tienen qu'hospitalizar a vida o muerte pola necrosis na pienra. Foi tan grave la infección que s'espardió'l rumor de que tenía SIDA, enfermedá mui de moda na época y sambenitu d'aquellos artistes que se salíen de lo común.

Esti par d'años de parón sirvieron-y pa preparar el so meyor discu Lagrimas de cocodrilo, espublizáu nel añu 87, que tien como bandera la versión del canciu de Barry Ryan "Eloise", grabáu nos estudios Abbey Road de Londres, cola collaboración de la London Philarmonic Orchestra. El cantar y el discu fueron unos ésitos tremendos que llevaron a Tino Casal de nuevo a los números unos de les llistes de ventes y popularidá, perriba de grupos como Mecano o Radio Futura.

"Eloise"

Alcuérdome de canciar a glayíos "Eloise" y "Oro negro" na habitación d'atrás de la casa de la cai Caveda, mirando les semeyes del álbum onde apaecía un paisanón pintarrexeáu y vistíu con ropes anches y de brillos. Yeren sones estraños pal mío oyíu de guah.e de ocho o nueve años, acostumaos a ritmos más suaves y amables, como los de "La puerta de Alcalá" de Víctor y Ana, o'l "Venecia" de los Hombres G, o l'"Aire" de Mecano, etc. etc. Yera'l glam, que yá conociere tapecíu ente les lletres d'Alaska o la banda sonora de Dentro del laberinto (onde los diañinos de Jim Henson baillaben al son del so amu David Bowie), pero que tardare unos años más n'identificar. Pero yá me prestaren, ayenu a quien cantaba, que-y pasaba o que se rumoreaba d'elli.

"Pánico en el Edén"

Nel 90 saca Histeria, enllenu versiones, que nun asoleyaría un ésitu igual, pero que dexaría perlles como "Tal como soy", torna/camudamientu del clásicu de Roberta Flack "Killing me softly whith this song".

"Tal como soy"

De vuelta d'una fiesta na discoteca Ática, el coche onde diba de copilotu salse nuna curva por escesu de velocidá. Tino Casal dexa la vida escontra una farola de la N-501, al altor d'Aravaca el 22 de setiembre de 2011, fai venti años esti xueves. Llárimes de cocodrilu por esti artista xenial.

Pero quedó d'elli'l so trabayu musical. Y tolo que quiso tresmitir sigue vivo abondo cada vez qu'unos vigulines acompañaos d'una percusión lléctrica dexen pasu a la voz educada d'un home que-y canta a un huracán fechu muyer, vendedora d'amor y con pechos de goma-2 y nitroglecirina, de caricies que llaceren al so perru fiel, atrapáu na so propia rede.

Pulp attacks

Siepre m'interesaron por demás los pulpos, y nun solo gastonómicamente. Dende que yera pequeñu y viera nun documental de Cousteau cómo un pulpín yera quien p'abrir un bote con una tapa de rosca que llevaba una andarica dientro. El primer intentu fue un ésitu polo que tal cacipló aquel moluscu; el segundu tamién, pero diendo de fechu: el pulpu deprendiera.

Los pulpos son moluscos como los muxones y los caracoles; y cefalópodos, como les sepies o los calamares. Ensin embargu, son los invertabraos más intelixentes qu'esisten, nun solo pa decidir quién va ganar un mundial, si non pa resolver colos sos medios problemas abstractos, que simios non son capaces.

Esto ye posible porque cuenten con un sistema cerebral mui desarrolláu, formáu por nueve cerebros independientes, con ún central nel mantu (la tiesta) que coordina la información surdía de caún de los que tien por cada tentáculu. Amás, vista y tactu son los dos sentíos más desarrollaos, lo que lu permiten asitiase nel mundiu que los rodea y tener la capacidá de reaccionar a los sos estímulos de la forma adecuada: el camuflaxe ye la so meyor arma defensiva, pudiendo camudar el color gracies a les célules cromatófores de la so piel, qu'amás ye quien p'adoptar les testures más estremaes. Y esto solo lo pue conseguir observando l'entornu colos sos impresionantes güeyos que tresporten la información a un hiperdasarrolláu lóbulu ópticu del cerebru central, apalpiando colos sos tentáculos la rugosidá del tarrén que dirá analizase a caún de los cerebros tentaculares, y, sobre too, memorizando tola información p'algamar una esperiencia que-yos permita reaccionar nel menor tiempu posible.

Poro, si a estos fechos se-yos xune que son tremendamente fuertes en comparanza pa col so tamañu, que son estremadamente flexibles al carecer de partes rixides (salvo un pequeñu cartílagu ente los güeyos), que puen resistir munchu tiempu fuera l'agua mientres tengan la piel húmeda y que son una especie de les más fértiles, ¿cómo ye posible que los pulpos nun seyan los animales dominantes de los sos entornos?

Y equí bien la torga principal al so esporpolle: les nueves xeneraciones nun tienen referentes adultos. Por una parte, les femes que cuiden de protexer de depredadores y de airear les cueves onde s'almacenen los espermatóforos onde medren les larves de los futuros pulpinos, muerren d'agotamientu dempués d'un mes de cría ensin alimentase. Por otra, los pulpos son animales individuales, qu'eviten la relación colos conxeneres salvo pal momentu la reproducción.

Préstenme abondo les películes de marcianos, onde unos seres estraterrestres vienen a dominar el Mundu, llibrando al planeta Tierra de los seres humanos, que lu tan estropiando, cola so teunoloxía más avanzada, frutu d'una intelixencia superior. Y tamién me presta asgaya l'alderique sobre la vida esóxena planetaria y si esta pue ser o non intelixente y racional. Munches teoríes hai alrodiu, sobre si puen tar basaes nel carbonu o n'otros elementos conocíos equí o non; y tamién cuál diba ser el desenllaz d'un posible alcuentru con estos seres diferentes.

El casu ye que en La Tierra, yá esisten otros animales con capacidá de raciociniu, anque les sos circunstancies particulares habitacionales y evolutives nun-yos permitan competir col ser humanu n'igualdá de condiciones. Pero toes estes especies son capaces de resolver problemes por si soles y deprender de la esperiencia. Los simios, los cetáceos, los elefantes... son mamíferos superiores que comparten una intelixencia paecía a la nuestra, porque surdió del mesmu raigón evolutivu. Por otra parte, alcontramos a los pulpos, con otru tipu de conexiones neuronales, evolucionaes en paralelo coles nuestres. N'esti casu y pa nos, son unos aliens n'estáu puru. Salvamos poles sos torgues d'un Pulp attacks.

Hasta equí, lo que pensé siempre. Pero ayer vi un documental que m'ufiertó un datu nuevu: el comportamientu de los pulpos en determinaos hábitats taba camudando.

El casu ye qu'investigadores marinos de la islla de Capri observaren cómo'l vezu turísticu de da-yos de comer a los pulpos ficiera que la proporción numérica, d'esta especie nes zones de los comederos, aumentara. Por una parte, los pulpos volviéronse la especie dominante, dexando a un lláu el so recatu pa non duldar en llanzase escontra los sos depredadores naturales (la imaxen d'un pulpín atacando a una morena falaba bien a les clares d'ello: increyible). Y, por otra y tovía más importante: al tar más en contautu, los pulpos más mozos podíen deprender de los más vieyos, mediante la observación d'esperiencies; esto ye, hai tresmisión xeneracional (lo que tovía ye más increyible). La principal torga pal desendolcu de la intelixencia de los pulpos nun esiste equí, lo que nos va valir pa poder invetigar la evolución d'un sistema d'intelixencia paralelu al nuestru. Y a mín, paezme apasionante.

¿Quién mos diz que dientro d'unos años, nun van facese realidá les lleendes de los míticos krakens atacando barcos n'alta mar? Home, ye dexar volar la imaxinación (amás de que los krakens seyan calamares xigantes y non pulpos). Por embargu, sí tengo nidio qué especie va ser la prósima n'algamar la exemonía nel planeta cuando nosotros dexemos de tar incordiando per equí y d'echa-yos aceite d'oliva, sal gorda y pimentón por enriba. (Yá dixe de mano que me prestaben los pulpos por munches coses)

Don Erre qu'Erre

Esti ye'l títulu d'una película de Paco Martínez Soria, onde un honráu y rectu ciudadanu denunciaba a un multinacional bancu pola suma de 257 pesetes del añu 1970, que taba ingresando cuando se produz un atracu, y nun para hasta que'l bancu se disculpa y-y da la razón.

Esti tipu de xestos, a la escontra de lo comúnmente aceutao pola sociedá, onde la xente cede una y otra vez énte los abusos que sufre pa nun complicase la vida, siempre me paecieron dignos d'eloxu.

Y, testerón como soi, más d'una vegada lluché yo escontra los xigantes por caxigalines que me paecíen inxustes: la última, el cobru de los intereses d'un descubiertu produciu pol descuentu d'una comisión de caltenimientu de cuenta d'aforros na Caja; la mío protesta calmada dio como resultáu que quitaren esos intereses, que sumaben más de 50 euros, por un descubiertu de 10 céntimos. Tanto la caxera como'l direutor de la sucursal vieron qu'aquelles comisiones yeren escesives, porque, pesie a ser iguales pa cualquier tipu de descubiertu, nesti casu llegaben a un interés de 50.000%. Nun había bona voluntá por parte de la Caja, pero sí por parte de los emplegaos, y siendo una istitución con motivaciones sociales, nun me paecía de recibu callar.

Pero güéi desayúnome con una noticia que me paez índa d'un testeronismu mayor, ensin quita-y un res de razón al so protagonista.

Trátase de Kepa Elortza Odriozola, vecín d'Oñati, que desixó ser atendíu n'eusquera nel Hospital de Mondragón, al que taba adscritu, pesie a la gravedá de la so dolencia, que necesitaba d'una colonoscopia pal so tratemientu. Diez meses tardó en recibir l'asistencia requerida, dempués de que'l Serviciu de Salú vascu lu unviara a Vitoria pa con un médicu euskaldun, a lo que se negó por requerilu en Mondragón; dempués de faer una escena propia de los hermanos Marx, nuna consulta con traducción simultánea vía teléfono (que, sigún les sos propies pallabres, había veces que tenía que correxir al traductor); y dempués de la presión recibía dende familiares y amigos porque cada vez s'alcontraba pior, llegando a defecar sangre. Finalmente, tratáronlu de les sos almorranes internes y, una vez sanu, sal a la lluz pública el casu.

Nun primer momentu, paez una testeronada estúpida: xugar cola salú d'ún nun paez serio. Pero compréndolu: ye'l so drechu el ser tratáu na so llingua materna que, amás, ye oficial. Y la llexislación vixente n'Euskal Herria, dexa nidio qu'Osakidetza (el Sistema de Salú vascu) ha contar con médicos billingües pa cuando los pacientes requieran un tratu na llingua autóctona. Y esto nun se cumplía, hasta qu'esti home se punxo colon a la obra.

Ye norma habitual que les alministraciones llexislen dellos temes y que, dempués, estes lleis nun puean ser llevaes a la práutica por falta de medios presupuestarios, escesives mires o, más comúnmente, dexadez. La Llei del Usu de la llingua asturiana ye un exemplu bien claru d'esti tipu de lleis aprobaes pero malpenes puestes en marcha; la Llei de la Dependencia, otra. Pero si la xente nun protesta, si nun se fai na pa que furrulen daquelles coses que vienen a rexir la vida común de la xente y que son aprobaes pa toos, munches veces pasen desapercibíes y tápense. Fecha la llei, fecha la trampa y l'estáu de drechu ye más pa unos que pa otros.

Toi seguru, ensin tratalu, de que si en vez de ser una urxencia de so, ye de dalgún d'alrodiu, esti home, que ye billungüe, aceutaría de bon grau'l tratu en casteyán pa ver bien al ser queríu. Pero que tratándose de la so salú, pensó que'l so casu diba ser un buen exemplu del mal funcionamientu d'aquello que ta establecío. Y ye que los drechos d'ún, tan por encima d'ún mesmu, porque son los drechos comunes pa toos.

De vez en cuando, tenemos la suerte d'atopamos testerones que dan la cara por nos.

Panorama nacional

L'asturianismu sufrió un duru güelpe estes caberes elecciones, nun solo pol resultáu desastrosu de les formaciones polítiques que s'identifiquen con esi discursu si non, sobre too, por ver cómo ascendió meteóricamente un nuevu partíu políticu, el Foro Asturias, que, usando un discursu rexonalista de raigón cuadonguista, llevó al so campu buena parte del descontentu pa colos partíos turnistes españoles que llevaben gobernando buena parte de la democracia.

Esti "nuevu" mensaxe dexa ver a les clares que la población nun ye sorda a la introducción d'argumentos diferentes al "una, grande y llibre" que vienen defendiendo PSOE y PP n'Asturies dende los comienzos d'esti períodu democráticu. Pero dexa nidio que los ideales comunes al movimientu asturianista (defensa de la llingua, la cultura y el padremoñu asturianu, aponderamientu de les instituciones asturianes, etc.) nun llegaron a la xente que nun ye afín al mesmu. Los asturianos d'infantería aceuten de buena gana'l dichu "Asturias es España y lo demás tierra conquistada" como base del so posicionamientu nacional y sospechen de cualisquier otra cosa que nun seya esto, hasta'l puntu d'entender como daqué estraño el fechu de nomar a Asturies "país". Sicasí, présta-yos a esgaya el grandonismu, los símbolos d'asturianía (o seya, d'un patriotismu superficial sofitáu na Santina, la sidra y el Sporting) y l'allegase a héroes culturales de la tierra, como Xovellanos. Cascos supo bien cómo llegar al ciudadanu de a pie pa faer valir el so calter asturianu a la contra del foriatu de les sucursales del PSOE y del PP, ensin tener que desligase de les sos idegues nacionalistes españoles; tanto que dalgunos asturianistes de militancia histórica entraron-y al palu.

L'asturianismu políticu nunca nun fue capaz d'averase siquiera a intentalo. Al míu modu de ver, esta incapacidá pa comunicase ye una de les principales torgues d'esti movimientu, xunto a la so atomización, claro tá.

Quiciás por esta dixebra interna, atopeme con múltiples reacciones.

Incluso anantes de les elecciones, yá paecía alvertise un tufu de descontentu. Tuve nel cierre de campaña del Bloque por Asturies-UNA nel colexu d'El Llano de Xixón y les porres yeren yá mui negatives, siendo los más optimistes los que daben 8.000 votos y cinco conceyales, dempués de que se tuviere falando de dos diputaos a la Xunta. Vi cómo'l candidatu de la Unión Asturianista falaba nel so blogue personal de plantes y coríos los días anteriores a los comicios. Y siguí en Facebook cómo ún de los candidatos de la plataforma CUPX, onde taba integráu'l Conceyu Abiertu de Xixón pa les municipales, taba más pendiente del desendolcamientu del 15-M que de la campaña.

El descontentu énte'l descalabru tampoco nun fue tan grande: yera esperáu y foi asumíu como otru más de munchos anteriores. Dalgunos hasta taben satisfechos, porque nunca un partíu onde tuvieren algamare tantos votos. Otros, desapaecieron, pa volver selmanes dempués xustificándose y calteniendo'l mesmu mensaxe, escusándose na apaición de Cascos pa los malos resultaos. Unos cuantos, ficieron análisis de la situación, pero ensin aportar idegues nueves que dexen ver dalgún puntu d'iniciu pa una rexeneración o pa llevar les propuestes qu'anguaño tan fracasaes a un ésitu futuru.

Son normales estes reacciones dientro d'un asturianismu políticu que s'alcontró con que'l sofitu social que tenía nes urnes viérase amenorgáu hasta en casi dos tercios. Tar en K.O. téunicu fai entendible cierta amoriadura y los asturianistes tan taramiellando como Stallone en Rocky III.

Asina, les primeres reacciones d'espantu al ver a Cascos y los de so como principal fuercia del país dio pasu a la idega feliz de que, por fin, el tándem PSOE-PP nun diba tar al frente del gobiernu autonómicu. A naide engaña Cascos, porque la so hestoria pesa muncho y, amás, elli nun reniega d'ella; pero la so formación ye autóctona, esto ye, nun dependiente de denguna central foriata, polo que les decisiones, seyan les que seyan, van tar tomaes equí. Por otra parte, pocu asturianista hai que seya cliente de los partíos turnistes, asina que nun se vieron ente ellos escenes de pánicu, como sí alcontré ente los averaos al socialismu: dengún asturianista salió col cuentu de tener qu'emigrar. Quiciás porque si dalgo tienen en común toles partes del movimientu asturianista, ye la certeza de que'l signu políticu poco va camudar n'Asturies: ¿quién ye'l guapu que pue defender que les polítiques de la FSA son d'izquierda?

Más complicao d'asumir pa mín son dos postures que surdieron de secute: l'arribismu pa con Foro y los buenos güeyos pa col movimientu del 15-M.

El primer puntu tien que vinir desvinculáu de cualisquier tipu de connotación ideolóxica: FAC nun ye asturianista, pesie a qu'esta organización seya una amalgama de personalidaes de diferentes tendencies onde se puen alcontrar históricos asturianistes, como l'actual conceyal de cultura de Xixón, Carlos Rubiera. Nel alderique d'investidura, Cascos faló de desendolcar la Llei d'Usu, d'apoyar a los escritores n'asturianu y de favorecer na enseñanza "un conocimiento del bable/asturiano riguroso" (fórmula mui ambigua, porque nun dexa claro qué ye lo "riguroso", si el conocimientu o el bable/asturiano) y sofitar los deportes tradicionales. Esa ye tola política cultural asturiana qu'ufierta Foro. Un pasu más que col PSOE, ta nidio, pero mui alloñao d'unos criterios asturianistes de normalización llingüística, por exemplu. ¿Suficiente pa que dellos asturianstes alcuentren nuevu llar nesti partíu? Camiento que non. Pero un partíu por facer y yá nel poder, ye mui llambiono.

L'otru puntu, d'averamientu al 15-M, respuende a la idega d'aprovechar la capacidá de llamada d'esti movimientu, criticando la falta d'apegu que se vivió dende l'asturianismu, como si esta dependiera de daqué sentimientu d'envidia o de rocea y asumiendo que la falta de conteníos asturianos d'esti movimientu vien, precisamente, pola falta d'interés de les diferentes organizaciones asturianistes. Yo entiendo esto como un erru total: el 15-M asturianu aceutó como propios problemes y soluciones que procedíen de Madrid, que ye onde surdió de mano; buena parte d'estes iniciatives nun son operatives equí o, cuando menos, nun beneficiaríen nin a Asturies, en xeneral, nin al asturianismu, en particular. Idegues foriates y populistes, tomaes equí ensín el más mínimu espíritu críticu (la necesidá d'una circunscripción única, el votu en blancu como forma de rechazu al sistema electoral...), falen nidio d'una clara tendencia centralista d'esti movimientu incompatible col asturianismu, más pol rechazu que producía neses mesmes movilizaciones que pola llercia del asturianismu pa con elles (que tamién foi evidente).

A nivel internu, siento cansanciu y tristeza ente los asturianistes que conozco, que nun atopen rempuestes afayaíces dende dientro y tan a la gueta d'elles fuera, yá non de los territorios asturianos (l'adaptación, o copia lliteral, de modelos reivindicativos catalanes, aragoneses, vascos, gallegos o, últimamente, valencianos, siempre tuvieron a la orde del día), si non n'otros movimientos políticos o sociales que poco o na tienen que ver.

Amás, los referentes organizativos qu'esisten tan poco a poco dixebrándose por criterios ideolóxicos que nun tienen que ver col asturianismu. Sé que les idegues polítiques personales nun puen separtase unes d'otres, porque van a bloque y conformen el ser social de la persona; pero sí que se puen priorizar, p'algamar un consensu colos que te son afines. Los criterios personalistes qu'atomicen l'asturianismu políticu creyando divisiones unipersonales qu'amburen sigles de partíos y asociaciones, bien intencionaes de mano, o se superen o se llegará a una situación mui similar a la producía esti añu, a priesa y corriendo y de resultaos poco esperanzadores.

Ye triste que l'únicu rellumu del asturianismu nestos últimos meses fuere l'aición del seleicionador de fútbol sub-19 español, Ginés Meléndez, al quita-y la bandera d'Asturies a un xugador. Lleía a dalgunos que'esti home ficiera más pol asturianismu que dellos años de llucha. Desesperanzador, sobre too, porque la reacción masiva de la xente fue glayar la españolidá d'Asturies.

L'asturianismu políticu sigue fuera de combate.

Panorama rexonal

Diba escribir una entrada al rodiu de la situación política que dexaron los camudamientos electorales del 22 de mayu. Y tenía la intención de publicar esta entrada va tiempu, cuando'l gobiernu autonómicu tomare'l cargu. Pero tuve con otres coses en mente y dexela pa prau.

Llegué al prau y, una vez n'elli, pémeque que yá se ficieron munchos análisis de la situación a nivel políticu, de la repercusión institucional y de les posibles trescendencies económiques, como pa llegar yo equí a falar más de lo mesmo, porque poco nuevo diba apurrir.

Tamién se faló muncho de cómo les diferentes facciones polítiques teníen qu'encarar el nuevu mapa políticu, fízose autocrítica y aponderamientu sigún quien y sacáronse bien de midíes, dalgunes contradictories, pa caúna. Cualisquier comentariu de mío nun diba ser más qu'una ramina dientro de l'Amazones.

Por embargu, dempués de tantu lleer y sintir les opiniones de la xente de tou tipu y condición, alcuentro que naide nun se detuvo en ver les reacciones que supusieron a nivel individual. Ye dicir, cómo sintieron a la xente los cambios, de gobiernu/gobiernos y los resultaos electorales de les tendencies polítiques coles que s'identifiquen.

Alcuentro a la xente espectante y asustada. Son treinta años de gobiernos turnistes n'Asturies y la infantería asturiana nun sabe a qué decatase. Taba acostumada a que gobernasen los de siempre y, como l'esclavu que vivía na casa l'amu sudista, domesticada a los sos usos y vezos d'aquellos. Polítiques que se sabía cómo cellebrales, aceutales o aguantales. Llega daqué nuevo y apaez la dulda, el miéu a lo desconocío; pa dalgunos, la esperanza o el pánicu pol cambiu y, pa otros, la sospecha porque seya más de lo mesmo. Y, nestes, lleguen les reacciones.

La primera n'oyise, yá xusto al zarrase los recuentos, foi la de la xente que votó a Foro Asturias. Yo toi plenamente convencíu de que naide nun esperaba esti ésitu espectacular. Creo que nin el mesmu Cascos, que salió agradeciendo a los asturianos los votos y a Xovellanos la inspiración divina. Muncha xente se subió al carru esa mesma nueche, aprovechando que ye un partíu ensin estructura municipal denguna y fechu a base de buenes voluntaes individuales. Anguaño, paecen casquistes, xovellanistes y melquiadistes de tola vida.

Ensin embargu, la xente que votó a Foro y que fue daquella que taba farta de la pareya PSOE-PP y que vio en Cascos un revulsivu p'airear, tan cola incertidumbre de si s'equivocaríen: FAC nun tuvo pol llabor de pactar y tardó en creyar gobiernu autonómicu, casi un mes más tarde del restu de les autonomíes, tal paecía que nun quisiere echar manu de llaceria tal que-y sirvíen en bandexa los socialistes; a nivel de conceyu, y falo de Xixón en concretu, l'alcaldesa nun paez demostrar la fortaleza del cabeceru del partíu, anque faiga, hasta'l momentu, polítiques coherentes pa coles sos idegues; por últimu, ta el fechu de que malpenes tenga una cadarma de partíu visible, porque paez más una agrupación d'electores. Énte la ilusión pol cambiu que deseyaben y yá tienen, la entruga bien sola: ¿ficimos bien? A dos meses de les elecciones, quitando daquellos que ficieron FAC dende'l principiu y los arribistes d'ultima hora, nun conozco a naide que diga abiertamente que votare a l'actual alcadesa de Xixón nin al actual presidente del gobiernu asturianu.

Quiciás tenga que ver la campaña d'acosu y derribu que vien de boques socialistes. La base social de la FSA, fecha a razón d'acaparar pa de sí unos conceutos ideolóxicos, que'amiesten polítiques d'izquierda mui moderada con un españolismu ensin comparanza n'otres organizaciones socialistes españoles, y cola creación d'un sistema clientelar qu'inclúi prexubilaciones bayuroses y sovenciones xeneroses, ta bastante atemorizada y a la defensiva totalmente. Siéntese dependiente d'un gobiernu socialista pa mantener el so estatus. Les reacciones del día de les elecciones, onde munches persones falaben de tener qu'emigrar p'algamar trabayu, teniendo trabayu (dalgunes, de funcionariu), falen d'esto nidio. Y, poro, nun ye difícil entender que traguen con tolo que dende la FSA, y organizaciones afines, se diz. El sofitu a l'amenaza de Paco Ignacio Taibo II de llevar de Xixón la Semana Negra por desacuerdos col ayuntamientu casquista ye exemplu d'incondicionalidá suxetiva a una causa que s'entiende común.

Lloñe de too esto, colos puestos aseguraos, la directiva socialista ta rabiada pola so mala xestión del virus "Cascos", pero, curtia de vista como suel ser, piensen que va pasar cola mesma rapidez que lu traxo. "Autocrítica" yera la pallabra fetiche de la FSA los primeros díes; pero nun se fizo y caltiénense los mesmos nomes y les mesmes idegues que los llevaron a la derrota.

El Partido Popular n'Asturies siempre fue sosidiariu del estatal. Ensín miembros brillantes y, salvo esceiciones, ensín tiestes pensantes, yera un partíu a la contra y les pelees internes taben a l'orden del día. Les soluciones lleguen dende la see de Génova y foron siempre mui desacertaes, porque poco o nulu interés tien Madrid nuna comunidá d'ocho diputaos: rompieron l'únicu gobiernu autonómicu qu'algamaron y sirviéron-y en bandexa al PSOE el gobiernu actual (solo lu perdió por confiase y nun-y poner el cascabel al gatón de FAC, que los zampló). La xente del PP que conozco nun sabe si reir o berrar: por un lláu, los qu'hasta fai unos meses yeren correlixionarios, tan nel poder (dalgunes veces, sofitaos por de so, como en Xixón, lo que-y valió a los conceyales del PP un tirón d'oreyes) y, lo meyor, nun tan los socialistes nel gobiernu y, con munchos proyectos que salieron del so programa electoral, van facese polítiques de dreches (abiertamente); por otru, la política seguidista y foriata fízo-yos perder la oportunidá de ser ellos los que ganaren y, sobre too, saben que Cascos nun escaez a los sos rivales y ye fuerte abondo como pa facelos desapaecer. Marchó pola puerta d'atrás a pataes y eso nun ye ser precisamente agradecíu cola persona que más ratos de gloria dio al partíu n'Asturies. Tan col futuru inciertu y pendientes de que les elecciones xenerales-yos devuelva al sitiu de ser los más votaos, gracies al puxu de Rajoy y compaña.

Conozco poca xente d'Izquierda Unida (quiciás porque m'aguanten mal a mín cuando, al sabelo, fálo-yos de toles incongruencies del so partíu pa cola política cultural asturiana). Pero los tres que tovía me soporten, y que son, con tol federalismu y toles milongues, de los que piensen que en Madrid saben más y hai que face-yos casu (punxeron la voz en gritu col casu estremeñu y sorprendiéronse de que yo lo ficiere col casu Cangas), tan sollertes con Cascos, pero nun lu critiquen muncho. Tontos nun son y saben que les polítiques que vinía faciendo'l gobiernu socialista tocaben col lliberalismu en dellos estayes, anque nun lo digan porque taben tamién ellos (bueno, el so partíu) nel gobernín. Vieron con buenos güeyos la ufierta de pactu d'Iglesias y tamién vieron con buenos güeyos cuando la desmintió. Quiciás seya una visión mui negativa la que tengo d'esti partíu, nun lo discuto (cuestiones ideolóxiques a parte), pero tamién tengo claro que, díes enantes de los comicios, falábenme muncho más de les virtúes del 15-M que de les propuestes del so partíu, diciendo cola boca pequeña que yera necesariu un cambiu.

Del restu de partíos, malpenes tengo conocencia, sacando dalgún d'UPyD que conozco y que ta fastidiáu porque tuvieron a puntu de pescar en ríu revueltu y con mala opinión d'un Foro que-yos quitó protagonismu y representación por ocupar el mesmu nichu d'electores; chócame qu'una de les principales torgues que-y pon al Foro seya'l protagonismu de Cascos, escaeciendo a Rosa Díez... en fin. La xente de los partíos pequeños nun suel faer gala de selo, a nun ser que se presente y te pida'l votu con una sorisa llaína.

Falaba nel títulu de "Panorama rexonal". Quédame por faer un "Panorama nacional" con aquelles reacciones que toi atopando en xente que nun piensa que "el orgullo de sentirse asturiano está en querer hacer más grande España" (pallabres de Javier Fernández, sofitaes por Francisco Álvarez Cascos nel debate d'investidura), sinón en lluchar por Asturies.

Banderes

Ayer, la seleición española sub-19 de fútbol ganaba'l campionatu d'Europa a la República Checa. Durante la cellebración, Juan Muñiz, xugador asturianu del Sporting, llevaba sobre los hombros una bandera asturiana y el seleicionador, l'albaceteñu Ginés Meléndez, averóse a elli rápidamente y quitó-yla de malos modos. Había otros xugadores con banderes españoles, oficiales o non, pero esos nun recibieron reprimenda. Al paecer, la propia Real Federación Española de Fútbol diera orden de que naide nun portare otra bandera que nun fuera la de fraxes coloraes y mariella, ensin especificar, polo visto nes imáxenes de televisión, qu'este fueren oficiales o non.

El casu ye que l'actitú de Ginés Meléndez nun pasó desapercibía n'Asturies y, como ún de los pocos símbolos identitarios qu'índa queden nel país, la xente ta cabreada. Les reacciones nes redes sociales van dende la pataleta personal na muria'l Facebook, hasta l'apuntase en grupos del estilu "Escontra Ginés Meléndez" o "Por la declaración de Ginés Meléndez como persona non grata en Asturias", anque, polo lleído nesos mesmos canales, del revuelu inicial ta escomenzando a pasase a la comprensión, escusándolu por ser orden federativa y ensin criticar esa orden.

Yo yá espuse que nun me molestó un res lo que fizo esti home: toi mui acostumáu a que la xente, foriato o non, faiga mofa de los símbolos propios d'Asturies. Pa mín, la bandera ye un trapu con colorinos cuando pierde'l so valir como símbolu de respetu pa una comunidá. Non lo digo solamente pol pocu apreciu que se-y muestra cuando se lleva a romeríes pa que sirva de mantel o puesta como bandana pa ver a Fernando Alonso (la verdá, prestaríame qu'hubiera lleis equí de respetu a la bandera como en dellos países de la Unión Europea: en Suecia -enseña onde s'inspiró Xovellanos pa faer l'asturiana- nun se pue portar una bandera nacional pela cai si nun ta doblada convenientemente o si nun se lleva nun hasta de proporciones adecuaes; o Letonia, onde descolingar una bandera sin autorización ta penao con seis meses de cárcel). Dígolo porque esta bandera asturiana ta quedando vacía de conteníos pol pocu apreciu que los propios asturianos tenemos pa cola nuestra identidá asturiana.

Porque, seyamos claros: ¿qué representa esta bandera asturiana? La xente qu'ayer se sintía insultada, ¿por qué lo facía?

¿Porque s'escandalizaba de ver la so comunidá autonóma amenorgada? Nun creo, la verdá, porque la mayor parte de la xente nin siquiera usa nunca esi términu pa referise a Asturies, optando más bien pol de "rexón", claro ta, d'un marcu mayor, d'España.

Non. La mayor parte de la xente qu'ayer de nueche insultaba al seleicionador y pidíen la so cabeza, non lo facíen por sintise insultaos na so identidá de pueblu asturianu si non porque s'entendíen menospreciaos na so identidá española: "Asturias es España y lo demás tierra conquistada" y, polo tanto, la bandera d'Asturies sedrá la más española de toes.

Nun ye d'estrañar. El falar d'identidá asturiana como daqué diferente a identidá española ye tildao de nacionalista inmediatamente, precisamente polos nacionalistes españoles nun declaraos, pero que se denuncien a sí mesmos a la primer pallabra. Trátase de la intolerancia de los que se piensen universalistes, somorguiando la identidá d'un pueblu en favor d'una comunidá mayor, absorvente y excluyente como ye la española. Y ye que esta, surdía d'amestar delles identidaes diferentes al rodiu de la casteyana, nun pue esistir si non esborria les que-y dieron vida.

Estos últimos meses viéronse varies escenificaciones d'esti nacionalismu español n'Asturies con motivu de la campaña electoral y de la formación del gobernín.

La primera, cuando a Cascos-y dio por nomar a Asturies como "país", poco más que lu tomaron por llocu hasta que tuvo que salir a desplicar que se refería a la so concepción más afrancesada, la de territoriu, rexón.

La segunda, en contestación tamién a Cascos, Lastra, el portavoz socialista na Xunta ,dixo que "sentirse orgulloso de ser asturiano es de extrema derecha". Lo normal, supongo, es sentirse orgulloso de ser español, lo que nun pue tar al mesmu altor. Siempre hai qu'aclariar col mui políticamente correutu "siéntome asturianu, pero antes, español".

La tercera, que caltién esta idega, foi dicha por Javier Fernández y robrada por Cascos nel alderique de toma de posesión del cargu de presidente del gobiernu asturianu. "Uno solo puede sentirse orgulloso de ser asturiano cuando lucha por el bien de España".

Yo siéntome asturianu y entiéndolo como dalgo diferente a ser español. Yo compárome con un murcianu o un catalán y veo munches más diferencies que semeyances. El simple fechu de ser asturianu faime diferente a un vascu o a un gallegu, en cuantes a la forma d'entender la política, la sociedá, l'entretenimientu... La mio realidá ye mui diferente a la d'un madrilanu o un valencianu. Pa mín España ye un marcu llexislativu y organizativu, ensin más. Con Asturies sí que tengo un vínculu afectivu, porque les sos característiques permítenme entener meyor el mundu que me rodea.

Pero que yo sienta esa diferenciación nun quier dicir, nin de lloñe, que piense que la mío comunidá seya meyor o pior que denguna. Ye diferente. Caltengo aquel ideal ácrata de que los individuos son toos diferentes, pero equivalentes en cuanto a drechos. Llástima que'l "ser español" seya tan destructivu y nun puea convivir col "ser asturianu", nin con dengún otru. Como dixe anantes, la identidá española, pa sosistir, tien que destruyir les demás que la componen: ye lo que ta pasando cola asturiana anguaño. (Dalgunos, como Gustavo Bueno, xustificaron esta destrucción al camentar que la española yera superior a les demás na so obra España frente a Europa, modelu de xustificación del etnocidiu y del xenocidiu, como facía al referise al casu curdu)

Asina que nun me paez tan malu esti home, Ginés Meléndez. Ye un mandáu, una persona que toi seguru que pensaba daqué paecío a lo que muncha xente cuando Fernando Alonso ganó los sos mundiales: qu'aquello yera la bandera de Renault. Esmolézme muncho más cuando ye la propia xente d'equí la que cuspia y pisa esa mesma bandera, al vaciala de conteníos, al emprobecela, al somorguiala ensin necesidá a una identidá que nin escomenzó en Cuadonga nin ye la propia d'Asturies.

Semana Negra

La "Semana Negra" ye una feria que, al rodiu de la lliteratura policiaca, cellébrase nel mes de xunetu en Xixón dende va más de vente años.

Dende un principiu, a los alderiques lliterarios, presentaciones de llibros y puestos de llibreríes, sumose-yos una vertiente lúdica con conciertos, chiringuitos y caballitos que cada vez fueron tomando más importancia. Anguaño, la xente común que va en familia a la "Semana Negra" suel facese col llibru que compren a l'añu, d'ente los de stock qu'ufierten les llibreríes presentes, meter al guah.e nel Ratón Vacilón hasta que pierda'l sintíu, mercar unos pendientes onde'l mercadiyu, chumar cerveza tres cerveza y zampar ún de los menús de dalgún de los munchos puestos de comida rápida. Los que nun tienen críos faen lo mesmo, pero al Ratón Vacilón súbense ellos y, amás de cerveza, chumen un cacharru. Ye una feria, ye pa divertise y lo normal anguaño nun ye alcontrar diversión nun llibru de Philip Marlowe, sinón viendo culos en pantalones curtios mientres atrona Pit Bull nun chiringuitu-discoteca. Por embargu, dambes coses ufierta la "Semana Negra", anque en porcentaxes diferentes: sigún el mío güeyu en proporción 1 a 200.

Pa min, en particular, la "Semana Negra" nun representa aliciente dengún. Philip Marlowe nun me pon y los míos llibros mércolos en llibreríes de barriu de les de siempre (que van quedando poques yá). Tamién ye verdá que nun me presten un res los baruyos de xente sudándome percima y que yá sé bien yo cuáles son los sitios de Xixón a onde dir pa tomar una cerveza a gusto. Por último, nun me resulta afayaízo tar sintiendo a un paisanu nuna conferencia n'espánglis (col esfuerzu qu'eso me supón) y tar goliendo l'aceitón quemao de la freidora de la churrería que ta a cien metros d'ellí.

Y, dicho too esto, nun me paez mal n'absoluto que l'Ayuntamientu de Xixón sovencione un eventu tal. Que siga p'alantre munchos años en Xixón el formatu fiesta-culturilla de la Semana Negra, porque a la xente présta-y a esgaya. Pero, claro, non a cualisquier preciu. Y equí vienen los peros.

"Semana Negra" ye una asociación cultural, presidida por Paco Ignacio Taibo II. Ye una entidá privada. Pero nació y creció a la solombrina prestosa de les sovenciones del gobiernu socialista del ayuntamientu de Xixón, como otres tantes asociaciones y entidades del conceyu que, pesie a tener esplicatos nos sos estatutos que nun tienen ánimu de lucru, sí faen competencia deslleal a daquelles empreses qu'ufierten servicios d'ociu ya entretenimientu.

A.C. Semana Negra organiza la "Semana Negra" con un presupuestu qu'inclúi un 20% de sovenciones municipales, otru porcentax de sovenciones autonómiques, l'alquiler de suelu públicu cedíu pol ayuntamientu pa la istalación de los toldos de restauranes, chiringuitos, llibreríes, etc. más los puestos de feria, el dineru aportáu polos patrocinadores privaos y la cesión gratuita (otra vuelta pol conceyu) de los servicios de llimpieza, seguridá, agua y llectricidá.

El cambiu nel consistoriu del PSOE al FAC fizo que se revisaren a la baxa estos presupuestos, pero pa prósimos años, puesto que pa esti respetáronse los presupuestos anteriores pa les festividaes braniegues (incluso s'incrementaron les partides, como fue'l casu'l "desembarcu Normandía" portatil de tolos años). En rempuesta a esti fechu y calteniendo la so fidelidá a unes sigles que-y dieron tolo qu'algamara hasta agora, non ensin esfuerzu y trabayu, la asociación organizadora, col so presidente a la tiesta, protestaron, na mío opinión, de la pior forma posible: col chantaxe.

Porque ye un chantaxe dicir que si les condiciones actuales nun se caltienen, pal añu siguiente van a colar de Xixón pa dir a otru sitiu. Porque ye chantaxe faer un ultimátum coles condiciones y la fecha de tomar la decisión, de forma unilateral. Porque ye chantaxe allegase al sentimentalismu patrioteru de la xente pa faer presión a una istitución que fai poco escoyeron, precisamente, pol mal funcionamientu de l'anterior qu'anguaño defiende l'asociación como buenu: la idega vien siendo que si la Semana Negra marcha de Xixón, ye culpa del ayuntamientu, y esta idega ta triunfando. Ca vez me sorprende menos que triunfen n'Asturies idegues nun sopesaes y que nun pasen el primer llaváu de mierda que traen encima.

El gobiernu actual del ayuntamientu de Xixón nun dixo nunca que nun quisiera la Semana Negra: espuso que, pol acuerdu col rector de la Universidá d'Uviéu, el recintu nun podía caltenese onde se cellebró esti añu; que les sovenciones a l'asociación yeren escesives al sumales al restu servicios que cedía de forma gratuita; y que nun taben dispuestos a caltener los privilexos que Paco Ignacio Taibo II disfrutare con otros consistorios como, por exemplo, la cesión de la esplotación del teatru Xovellanos durante varios díes, con conciertos contrataos por elli mesmu, lo que, si nun m'equivoco, ye ánimu de lucru.

Amenaza Taibo con colar de Xixón. Primero dixo que Milán y Barcelona taben interesaes. Supongo que miraría los estatutos de la asociación y vería que ye d'actuación autonómica y, polo tanto, nun pue marchar d'Asturies como tal. Esto supóngolo, porque de la páxina güeb de la Semana Negra desapaecieron y nun tengo'l cuerpu pa dir al rexistru civil a consultalo. De toes formes, ye más probable qu'avisaren a Taibo de que'l so farolazu nun yera caltenible: por un lláu, la "BCNegra" catalana yá ye abondo más importante que la de so; por otru, el salir del Estáu nun impediría que Xixón pudiera faer la Semana Negra d'otra mena, ensin contar con elli, y, amás, ¿quién.y diba asegurar que les condiciones abusives qu'impón se-y diben conceder n'Italia y, más tovía, pol síndicu milanés, que marchare escaldáu del PCI p'allegase a un centru-izquierda la mar de cómodu?

Asina que fala de Mieres, Llangréu y Avilés, agora. La verdá ye que duldo muncho qu'estos conceyos seyan quien p'afrontar los más de 300.000 euros de sovención (ensín contar los gastos estra) que vinía apurriendo'l conceyu xixonés. Anque ye posible qu'Avilés, vidueñu por enllenar el mastodonte del Niemeyer por daqué más que cine en versión orixinal, faiga frente a gastos tales; pero tamién ye peligroso pa Taibo si siguen les polítiques espropiatories de festival, como pasó col "Intercélticu d'Avilés", que dio como resultáu'l "Festival de Beltaine" al nun aceutar los d'Esbardu les condiciones del consistoriu. Él verá.

El gobiernu de Foro pue equivocase o non nes sos decisiones, pero lo reprochable ye que caltenga una sovención escesiva (non pola cuantía, si non por suponer una cesión abusiva a unos intereses privaos) cuando llegó al poder, precisamente, falando de cuidar el gastu públicu y facelu conveniente al interés de los ciudadanos, non al d'unos averaos. De momentu, la coherencia ye total. Yá se verá si esto ye asina o ye un quítate tú pa poneme yo.

Lo que sí tengo claro ye que l'únicu responsable de que la Semana Negra nun quede en Xixón va ser la propia Asociación Cultural Semana Negra y de Paco Ignacio Taibo II, por faer d'ella'l so ranchu personal, en beneficiu propiu y partidista y non nel de la sociedá, como una asociación cultural tien que faer.

La mío apuesta personal ye que la Semana Negra nun marcha de Xixón. Que Taibo plegaráse a unes condiciones intermedies y tragará los faroles. Nun creo yo que teniendo ufierta en firme de Xixón, prefiera quedar ensin festival en dengún sitiu. L'ayuntamientu, pela so parte, tiénlo tan fácil como contratar otru promotor y faer un festival con otru nome ("Selmana Negra", por exemplu), con fritangues y llibros, caballitos y conciertos, Pit-Bulls y pantaloninos curtios. Porque, seyamos sinceros, ¿a cuántos xixoneses-yos dará pena que nun vengan escritores de novela policiaca a dar conferencies teniendo cerveza y patates asaes?

25 estrelles

Pol 25 cumpleaños de l'Academia del Cine, inauguróse un paséu de la fama en Madrid con 25 estrelles de mármol y aceru colos nomes d'importantes personalidaes del cine español. Paezme una anicitiva que, anque poco novedosa, val pa homneaxear a aquelles persones que nos faen y nos ficieron suañar nuna sala de cine coles hestories que nos son más cercanes.

Solo tengo peros pa la seleición de les figueres, fecha pola xunta direutiva. Non porque la xente escoyía nun lo merezca, nin mucho menos. Si non porque quedaron nomes fundamentales pa pescanciar lo que significa'l cine español. Sé, no obstante, que se correxirá, porque tolos años va aumentar el númberu d'estrelles, asina que la mío quexa ye menor.

Tan n'acera la gloria del cine español:

Los direutores y realizadores Pedro Almodóvar, Alejandro Amenábar, Juan Antonio Bardem, Luis García Berlanga, Luis Buñuel, José Luis Garci, Pilar Miró, Carlos Saura y Fernando Trueba.

Les actrices Imperio Argentina, Penélope Cruz, Carmen Maura, Sara Montiel, Emma Penella, Amparo Rivelles, Carmen Sevilla y Concha Velasco.

Y los actores Antonio Banderas, Javier Bardem, Fernando Fernán Gómez, Pepe Isbert, Alfredo Landa, Toni Leblanc, Paco Rabal y Fernando Rey.

Son, ensin dubia, 25 grandes nomes que ficieron, y faen, del so trabayu, arte. Yo creo que son indiscutibles. Pero inda pensando esto, pa min nun tan los meyores.

Repaso la llista otra vuelta por si voi colame cola aseveración: tan grandísimos internacionales de la talla de Rey, Cruz, Montiel, Banderas y Bardem, camalleones del tamañu de Maura o Landa, clarividentes como Saura o Amenábar, monstruos de la interpretación como Velasco, Isbert y Rivelles, narradores como Garci, Miró o Saura, rompedores como Imperio Argentina o Almodóvar y xenios como Berlanga, Fernán Gómez y Buñuel.. Y sí, sigo pensando lo mesmo.

Queden fuera grandes como los tres Ozores, Manuel Aleixandre, Jesús Franco, Gracita Morales, Rafaela Aparicio, Agustín González, Manolo Morán, Jesús Puente, José Bódalo, José María Rodero, María Asquerino, Vicente Parra, Alfredo Mayo, Laszlo Nagy, Victoria Abril, Eusebio Poncela y el sublime, actor de referencia, Paco Martínez Soria.

Ensín embargu, pesie a la so talla de profesionales, toos ellos puen esperar pola so estrella.

Pero que dalguien m'esplique ¡cómo pue tar fuera José Luis López Vázquez!

Anque solo fuera por reiteración yá tenía qu'incluyise al más capaz de los actores españoles de la historia. ¿A qué personaxe nun-y dio vida López Vázquez? En fin, cómo non seya la siguiente estrella, amenazo con dir con un esprái l'añu que bien al paséu la fama del cine español.

Los míos 25:

Coinciden muncho, anque dalgunos (los que salieron escoyíos por triunfar en Hollywood o por conveniencia política, más que pol talentu) queden fuera pa meter otros (que triunfaron en casa porque yeren tremendamente buenos).

Buñuel, Berlanga, Almodóvar, Garci, Amenábar, Saura y Trueba, como direutores; Bardem como direutor y productor; Carmen Maura, Amparo Rivelles, Concha Velasco, Gracita Morales, Sara Montiel y Victoria Abril, como actrices; Javier Bardem, Pepe Isbert, Alfredo Landa, Tony Leblanc, Eusebio Poncela, José Luis Ozores, Paco Rabal, Fernando Rey, Paco Martínez Soria y José Luis López Vázquez, como actores. Y Fernándo Fernán Gómez, como lo que queráis.