Un día, el díscipulu fue a visitar al so maestru, que lu mandare llamar. Al poco, picó a la puerta, el maestru entrugó quién diba y el discípulu contestó que elli, "Rinzo". De mui males formes, el maestru glayó-y que colara, que nun tenía tiempu pa elli.
Al día siguiente, el discípulu fue a visitar al so maestru, que lu mandare llamar. Al poco, picó a la puerta, el maestru entrugó quién diba y el discípulu contestó que elli, "el so discípulu Rinzo". Otra vuelta, el maestru insultólu, casi que lu cuspia, porque nun tenía tiempu pa elli.
Al tercer día, el discípulu fue a vistar al so maestru, que lu mandare llamar, trés díes dempués del avisu. Picó a la puerta y, cuando'l maestru entrugó quien diba, Rinzo contestó seliquino que saliere él a ver quien yera. Escamáu, el maestru salió a la puerta y, al ve-y la cara, convidolu a té verde per primer vez de munches.
Esti cuentu zen, de los pocoñinos que acaben zarrando la hestoria, pue tener munches llectures. Pero fala nidio sobre les munches cares del poder y de cómo camudar el sistema establecío. Rinzo, cansáu de malos modos, viendo que nun consigue na diendo-y al palu, dexa de facer casu al so maestru que, ensin discípulu, dexa de selo y pasa a ver el valor personal de Rinzo. Desllexitimáu, el poderosu nun ye más qu'otru individuu. Y, ente dos persones del mesmu valir, nel Xapón tomáben el té.
Pero, ¿qué habría pasar si Rinzo-y tuviera siguío'l xuegu al so maestru? Tamién pue tener munches llectures, pero pémeque cai de caxón que pensar nun incrementu del maltratu diba ser una opción afayaíza.
Y si estrapolamos a la realidá política esti cuentu y esta suposición, los resultaos diben ser mui similares. Pasaos estos díes onde plataformes ciudadanes pidíen l'exerciciu del votu pensáu, sintí munches voces acusatories pa escontra la otra opción, perfeutamente llegal, d'afrontar unes eleiciones: l'abstención.
Varies fueren les idegues que se llanzaron al alto la lleva pa desacreditala: que si, a efeutos estadísticos, nun se pue dixebrar l'abstención como forma de manifestación de la voluntá, de la provocada pola dexadez o por causes téuniques; que si solo tien relevancia cuando ye propuesta por un partíu mayoritariu; que si-y da sombra a los procesos eleitorales y conviértese nuna torga pa les democracies representatives; y que, n'últimu términu, nun supón un problema grave pa los partíos mayoritarios.
L'abstención nun ye otra cosa que nun colaborar col sistema y, nun sistema de democracia representativa, dir a votar ye, precisamente, tar d'alcuerdu col sistema. Nun ye congruente pidir qu'esti camude de raigón y dir a votar. L'abstención, polo tanto, ye l'únicu preséu llegal y non violentu que tien la persona pa demostrar que nun se ta pol llabor de siguir el xuegu, como Rinzo fizo col maestru.
Por supuesto, l'abstención nun ye midible en términos de motivación, pero esti argumentu de crítica ye mui sonce por dos razones: la primera, que naide s'entruga los motivos polos que la xente vota a ún o otru partíu y dase por sentao que ye porque se tá dalcuerdo con ellos, ensin poder pensar que'l votu pue ser dirixíu mediante aiciones de clientelismu, pol vezu y la costume, por ignorancia o porque, cenciellamente, el mocín que se presenta ye más gallu que la otra bruxa la ñariz achaplada; la segunda, que'l sistema democráticu tien de ser abondo curiosu como pa faer que la xente vaiga en masa a votar y ye síntoma de pudrición del mesmu tanto la dexadez del que se queda xugando a la play como la voluntá del que nun vota por convicción (incluso nos casos d'abstención téunica, salvo dalgunos esceicionales que se puean recurrir a la xunta eleitoral –como la falta de papeletes o los fallos nel sistema postal- falen de neglixencia por falta d'estímulu –porque daquel que quier votar, ha informase de los requisitos que necesita pa faer usu del so drechu-).
D'otra miente, sí son un problema importante pa los partíos mayoritarios que, dende que s'instauró la democracia n'España nun pararon de faer campaña pa que la xente vote. La ecuación ye cenciella: cuanta más xente vote, más llexitimaos están, porque más llexitimáu ta el marcu que-yos da'l poder. Pero, amás, suelen ser los desencantaos poles sos polítiques los que más s'abstienen de votar, desinformaos como tan nuna sociedá mediatizada como esta. Asina, los partíos mayoritarios d'anguaño nun dirán a defender postures abstencionistes en dengún referéndum; enantes desendolcarán discrusos diferentes pa converxer nuna mesma opción (como fue'l casu del referéndum de la OTAN o'l más reciente de la Constitución Europea).
La importancia hestórica n'España d'esti tipu d'actuación política vien de la mano del movimientu anarquista y, más concretamente, del modelu d'aición propuestu pola CNT contra les democracies burgueses de principios de sieglu XX (tanto'l de la Restauración como'l posterior republicanu, dambos de fundamentos oligárquicos). Amás, los sos planegamientos ácratas dáben-y importancia total a la persona escontra cualisquier forma d'Estáu, emponderando los drechos individuales, ente los que s'alcontraba'l de llibre decisión y votu. La fuercia'l sindicatu (con 850.000 afiliaos nel añu 31, por unos 800 al PC), facía usu de l'abstención pa desacreditar el sistema. Pola contra, la movilización voluntaria y consciente al votu d'esti continxente humanu facilitó delles victories significatives de diferentes signos (la de Melquíades Álvarez en Xixón nos años 20 y la del Frente Popular nel añu 36). Pero esa ye otra hestoria.
Pa finar l'argumentación, voi dexar un vídiu del profesor García-Trevijano que desplica muncho meyor que yo, anque ensin cuentinos y pesie que nun toi dalcuerdo coles soluciones que propón p'ameyorar el sistema democráticu actual, qué ye l'abstención y qué significa.
Rinzo camudó'l sistema de poder d'una forma cenciella: dexando de face-y casu y proponiendo nueves regles, les sos nueves regles. Y, por supuesto, ¡dende fuera la casa'l maestru!
No hay comentarios:
Publicar un comentario