15 d'abril de 1980: l'otru Crimen de Cuenca

Efeméride: 

"15 d'abril de 1980: Xuzguen a Pilar Miró pola xurisdicción militar, al reconocese autora de la película El crimen de Cuenca."

Fechos:

• En 1910, desapaez José María Grimaldos, "El Cepa", un pastor d'Osa de la Vega, un pueblín de Cuenca, y so madre acusa a dos vecinos, Gregorio Valero y León Sánchez, de que lu mataren pa robá-y lo que consiguiera por una venta d'oveyes, pero'l xuez de Belmonte archiva la causa. 
• En 1913, llega a Belmonte un xuez nuevu, que reabre'l casu y manda que se detenga a los dos acusaos. La Guardia Civil tortúralos durante seis meses y confiesen l'asesinatu. Les pesquises siguen durante años y nun son quien p'atopar el cuerpu de Grimaldos. Ensin importa-y tal fechu, el fiscal de la Audiencia de Cuenca pide pa ellos la pena de muerte. 
• En 1918, el xuráu popular del xuiciu alcuéntralos culpables y el xuez condénalos a 18 años de cárcel.
• En 1924, Valero y Sánchez van ser indultaos, momentu cuando consiguen una llibertá condicional.
• En 1926, el cura de Tresjuncos recibe una carta del cura de Mira, a 200 quilómetros de distancia, pa que-y mandara la partía de nacimientu de José María Grimaldos. Necisátabala porque "El Cepa" tenía intención de casase.
• En 1939, Ramón J. Sender, espubliza la obra "El lugar del hombre", que cuenta los fechos, denunciando'l caciquismu que se viviera na España de primeros de sieglu. Ha de faelo en Méxicu, porque l'autor hubo fuxir de la dictatura franquista.
• En 1968, "El lugar de un hombre" (títulu remozáu de la obra de Sender) edítase per vez primera n'España. La editorial barcelonesa Destino gana'l puxu a la censura del réximen.
• En 1969, Ramón J. Sender pue regresar a España a recoyer el Premiu Planeta pola obra "En la vida de Ignacio Morell". Vuelta y galardón puen dase pol decretu d'Amnistía que Franco promulga pa "los criminales de la Guerra Civil".
• En 1977, cola instauración de la Democracia española, desapaez la censura civil de les publicaciones.
• En 1979, la direutora Pilar Miró, firma la película "Los crímenes de Cuenca", con guión de Lola Salvador, narrando con pelos y señales les tortures de la Guardia Civil y los abusos de poder del xuez Emilio Isasa. Estes crítiques xabaces faen que'l ministru del gobiernu d'Adolfo Suárez, Ricardo de la Cierva, ponga la película en manes de la autoridá militar competente, que secuestra la película y abre dilixencies escontra la direutora.
• En 1981, Pilar Miró queda llibre de cargos y la película estrénase n'agostu, pero calificada como "S". Algama 461.037.195 pesetes, cuando s'esperaben poco más de 2'5M.

De llibertaes y privilexos

Dempués de que los argumentos d'índole social, llingüísticu, políticu y cultural contra la oficialidá del idioma asturianu quedaren francíos pola lóxica aplastante de que los Drechos han respetase en sociedá, atalántase un nuevu requexu pa caltener el paradigma del privilexu: "los drechos amenacen la nuestra llibertá". 

Yá nun son los drechos los garantes de la llibertá del individuu dientro de la sociedá, como reza'l Preámbulu de la Declaración Universal de los Drechos Humanos:

"Considerando que la llibertad, la xusticia y la paz nel mundo tienen por base'l reconocimientu de la dignidá intrínseca y de los drechos iguales e inalienables de tolos miembros de la familia humana...

"Considerando esencial que los drechos humanos seyan protexíos por un réximen de Derecho, a fin de que l'homre nun se vea emburriáu al recursu supremu de la rebelión contra la tiranía y la opresión..."

Non. Agora los drechos francen les llibertaes, como defiende un abogáu, Javier Jové. Y como espeya "El Comercio".

Bien ye cierto qu'esti adalid de les llibertaes nun dulda en insultar impunemente a quien defiende los sos drechos fundamentales y pon en tela xuiciu los privilexos qu'él considera indespensables. Un exemplu: dende la so élfica posición, afila tovía más les sos oreyines y denomina "orcos bablistas" a quienes lluchen pola igualdá de drechos llingüísticos; dende la so morcillesca, por repetitiva, postura, noma "butifarros" a los catalanes...

Eso sí, que quede claro que los fanáticos son los demás, que nun lu lleguen a entender polos sos prexuicios ideolóxicos (los d'ellos, claro, que nun permiten entender los de so):

Bueno. L'artículu en sí ye cenciellu d'entender: trátase de la defensa d'una serie de privilexos elitistes, qu'entiende peligrar ente'l fechu de que tolos prexuicios que los sofiten, como toles mentes bienpensantes de la sociedá asturiana que los prumalgaren (véase Alarcos, Mercedes Fernández, Lastra, Bueno...) van siendo derrotaos por un argumentariu sólidu sofitáu na Declaración de los Drechos Humanos. Entós, hai que dir escontra los Drechos y en favor d'una supuesta llibertá individual, anque más bien había ser entendida como particular, porque namái cuenta la de so: que'l restu nun seya llibre nun va con él, porque la desigualdá social ye'l fundamentu del artículu. Recordemos que Javier Jové ye lliberal, non llibertariu, asina que la másima ácrata de que "toos somos diferentes, toos somos equivalentes" queda obsoleta pol conceutu jovianu "si pienses como yo, sedrás llibre y, sinón, un orcu prexuiciosu".

Evidentemente, voi a respondé-y encerrizándome na Declaración Universal de los Drechos Humanos, códigu que siento de mayor autoridá que cualisquier otru. Pa que quede claru que'l drechu de los asturianos, de cualisquier persona, a espresase n'asturianu nun ye un inventu nuevu, sinón un drechu humanu básicu y una llibertá fundamental.

Artículu 1.- Tolos seres humanos nacen llibres e iguales en dignidá y drechos y, dotaos como tan de razón y conciencia, han comportase fraternalmente los unos colos otros.

Si los drechos francen la nuestra llibertá, sedrá porque esa llibertá ye particular, non universal; esto ye, un privilexu. Nun permitir que delles persones desendolquen en llibertá los sos drechos, argumentando qu'estos van a la contra de los sos intereses personales, ye too menos fraternal.

Artículu 2.- Toa persona tien tolos drechos y llibertaes proclamaos nesta Declaración, ensin distinción de raza, color, sexu, idioma, relixón, opinión política o de cualaquier otra índole, orixen nacional o social, posición económica, nacimientu o culaquier otra condición. Amás, nun se va faer distinción dalguna fundada na condición política, xurídica o internacional del país o territoriu d'onde dependa xurisdiccionalmente una persona, tanto si ye un país independiente, como si ye un territoriu baxo l'aministración fiudiciara, non autónomu o sometíu a calaquier otra llimitación de soberanía.

Los Drechos sirvan pal esfrute de toos, lo que quier dicir que cualaquier persona ta na llibertá de faer usu o non d'ellos. Un Drechu Humanu ye'l fundamentu pa la convivencia en llibertá dientro de la sociedá. De la mesma forma que se tien drechu al votu y votase o non ensin inxerencia y coerción dalguna. l'individuu ha poder escoyer espresase n'asturianu, si asina lo deseya, en cualisquier ámbitu de la so vida, tanto particular como social, ensin dengún tipu d'inxerencia o coerción social. 

Artículu 3.- Tou individuu tien drechu a la vida, a la llibertá y a la seguridá de la so persona.

Lo que nun ye un fechu de llibertá ye que se vea obligáu a espresase nuna llingua que nun quier. Anguaño, n'Asturies, la llexislación obliga a conocer el casteyán y, como les alministraciones nun apurren calces pa que s'espresen n'asturianu, los asturfalantes sufren amenorgamientu al recibir los servicios públicos. Esto ye, incúmplensen l'artículu 2, porque sí hai distinción en cuantes al idioma esfrutar de tolos drechos y llibertaes y l'artículu 3, porque, como individuu, nun pue espresase en tolos ámbitos de la vida como quier.

Artículu 5.- Naide nun va ser sometíu a tortures, nin a penes o tratos crueles, inhumanos o degradantes.

Yo nun soi un orcu. Déxolo claro nesti puntu.

Artículu 7.- Toos son iguales énte la Llei y tienen, ensin distinción, drechu a igual proteición de la Llei. Toos tienen drechu a igual proteición contra toa discriminación qu'infrinxa esta Declaración y contra toa provocación a tal discriminación.

Los asturfalantes, pol fechu d'escoyer un idioma pa vivir, alcontrámonos somorguiaos por una Alministración que nun reconoz como válidos los nuestros drechos. Esa Alministración nun fai lo suficiente pa que los nuestros Drechos Humanos seyan reconocíos y pa que podamos vivir en llibertá xunto con aquellos qu'escoyeron otru idioma amparáu pol Estáu. Y tampoco nun mos defiende de les provocaciones que se nos faen dende'l grupu social privilexáu. (Vuelvo a repetir que yo no soi un orcu) Esto avérase al siguiente artículu a analizar:

Artículu 12.- Naide nun va ser oxetu d'inxerencies na so vida privada, la so familia, el so domiciliu o la so correspondencia, nin d'ataques a la so honra o la so reputación. Toa persona tien el drechu a la proteición de la llei contra tales inxerencies o ataques.

(Tamién ye inxerencia que los nomes de les llocalidaes tengan un topónimu non tradicional y que l'usu del tradicional nun seya xeneralizáu)

Artículu 19.- Tou individuu tien drechu a la llibertá d'opinión y d'espresión; esti drechu inclúi el de nun ser molestáu a causa de les sos opiniones, el d'investigar y recibir informaciones y opiniones, y el de difundiles, ensin llimitación de fronteres, por cualisquier mediu d'espresión.

Los asturfalantes tenemos el drechu pa espresanos n'asturianu, too aquello que queramos dicir; y el drechu a espardelo n'asturianu; y al d'investigar n'asturianu; y al de recibir información n'asturianu. Porque l'asturianu ye la llingua de Cultura pa los asturfalantes.

Esti artículu préstame especialmente, porque da na llinia de flotación al argumentu aquel de que l'asturianu ye una llingua d'andar per casa, que nun ye de cultura. (Siempre me fizo gracia la ignorancia supina de la elite cultural asturiana cuando defendía que la "Vía Láctea" castellana, tan cultista ella, había ser tornada al bable como "Camín de Llechi", dalgo que-yos causaba una risa granible, al esacaecer que la fórmula inglesa ye "Milky Way")

Artículu 21.2.- Toa persona tien el drechu d'accesu, en condiciones d'igualdá, a les funciones públiques del so país.

P'acceder a un puestu funcionaral n'Asturies (y n'España), l'asturfalante ha de desprendese del so idioma. Y nun me gustararía qu'entendieren que'l fechu d'usar l'idioma casteyán ye un fechu d'igualdá, porque ye un fechu d'uniformación aculturizadora. La igualdá de condiciones sedría que se permitieren usar toles llingües estatales (y en cualisquier llugar). Lo que s'esperimenta agora ye una situación de privilexu.

Artículu 22.- Toa persona, como miembru de la sociedá, tien drechu a la seguridá social, y a obtener, mediante l'esfuerciu nacional y la cooperación internacional, habida cuenta de la organización y los recursos de cada Está, la satisfaición de los drechos económicos, sociales y culturales, indispensables a la so dignidá y al llibre desendolcu de la so personalidá.

Paez mentira, viendo l'argumentación de Jové, qu'un drechu mire pal "llibre desendolcu de la so personalidá". Pero asina ye. El problema atópalu al tener qu'almitar qu'atiende pal desendolcu de la so personalidá y tamién de la del restu. Evidentemente, un rasgu bien bultable de la personalidá del individuu ye l'idioma escoyíu pa vivir. Poro, nun ye de recibu cualaquier torga al asturianu n'Asturies, en virtú de drechos humanos y llibertaes individuales.

Artículu 26. 1. Toa persona tien drechu a la educación. La educación ha ser gratuita, al menos no concerniente a la instrucción elemental y fundamental. La instrucción elemental va ser obligatoria. La instrucción téunica y profesional habrá ser xeneralizada; l'accesu a los estudios superiores va ser igual pa toos, en función de los méritos respeutivos.

Artículu 26. 2. La educación va tener por oxetu el plenu desendolcu de la personalidá humana y el fortalencimientu del respetu a los drechos humanos y les llibertaes fundamentales; va favorecer la comprensión, la tolerancia y la amistá ente toles naciones y los grupos étnicos y relixosos, y va promover el desendolcu de les actividaes de les Naciones Xuníes pal caltenimientu de la paz.

N'ocasiones, escaezse pa que val la educación: pal plenu desendolcu de la personalidá humana y pal fortalecimientu del respetu a los drechos humanos y les llibertaes fundamentales.

¿Quién nun sintió dalguna vez, al falar del asturianu nes escueles, la frase esa de "el bable nun ye útil"? Y dízse ensin que se-y caiga la cara de vergoña al locutor pola ignorancia qu'amosen eses palabres. El deprendimeintu de l'asturianu val pa escoyer qué tipu de persona asturiana se quier ser. Y esa ye una llibertá fundamental que se ve torgada nuna asignatura optativa y maría d'una hora selmanal.

Si dalgo tengo claro ye que la educación actual nun favorez la comprensión a los otros, la tolerancia pa colo diferente y l'amistá pa con quienes son distintos, polos motivos que seyan. Preferimos trabayadores de cualificación media-baxa que se conviertan en mano d'obra barato, a persones capaces de decidir qué quieren ser. 

Artículu 26. 3. Los padres van tener drechu preferente a escoyer el tipu d'educación qu'habrá dase a los sos fíos.

Esto tamién se refier al idioma vehicular col que han ser escolarizaos. Asina, los asturfalantes, y tolos padres qu'asina lo quieran, habríen vese correspondíos nel so deseyu d'escolarizar a la so reciella n'asturianu como llingua vehicular de la instrucción elemental y fundamental. Y esta correspondencia habría ser gratuita, como se diz nel artículu 26.1. Por contra, tolos años vemos cómo la Conseyería d'Educación pon torgues pa establecer clases de l'asignatura d'asturianu, disculpándose na baxa ratio. 

Artículu 28. Toa persona tien drechu a que s'establezca un orden social y internacional onde los drechos y les llibertaes proclamaos nesta Declaración se faigan plenamente efeutivos.

Y equí entra en xuegu la implantación d'una llei d'oficialidá, onde s'estipulen les articulaciones alministratives necesaries pa que cuide pola equivalencia de les persones n'Asturies, llibrándoles de les torgues llingüístiques. La oficialidá sedría parte d'esi orden social onde los asturianos algamaríen la llibertá de poder espresase nel so idioma llariegu en tolos ámbitos de la vida pública; llibertá de la qu'anguaño carecen al nun poder comunicase n'asturianu cola alministración en toles estayes de la mesma, al tener que soportar les inxerencies de funcionarios y emplegaos públicos que puen negase a atendelos por dirixise a ellos nun idioma pal que nun tan capacitaos a ufrir el serviciu, al nun poder escolarizar n'asturianu a la so reciella oal tener qu'aguantar, como ciudadanos de segunda categoría que son, cualquier tipu d'humillación, insultu, calumnia o vexación pol meru fechu d'usar un idioma minorizáu.

Artículu 29. 1. Toa persona tien deberes respeutu a la comunidá, puesto que namái nella pue desendolcar llibre y plenamente la so personalidá.

Artículu 29. 2. Nel exerciciu de los drechos y nel esfrute de les sos llibertaes, toa persona tará suxeta, namáis, a les llimitaciones establecíes pola llei col únicu fin d'asegurar el reconocimientu y el respetu de los drechos y llibertaes de los demás, y de satisfaer les xustes desexencies de la moral, del orden públicu y del bienestar xeneral nuna sociedá democrática.

Que quede con esto claro que los drechos nun son llímite a denguna llibertá indivudal. Los drechos son los garantes de les llibertaes fundamentales, los instrumentos onde s'articulen y onde puen atopase cuando l'individuu vive en sociedá. Diferente ye entender, nuna interpretación tendenciosa y interesada, que les llibertaes vayan más p'allá del respetu a los drechos y les llibertaes de los demás. A eso conocémoslo como privilexu. Y por más que la antigua Prima Nocte, fuera conocía como "Drechu de pernada", yera un privilexu que somorguiaba a buena parte de la población, non un drechu universal. Y la so abolición valió pa faer una sociedá d'individuos más llibres.

Artículu 30. Ná nesta Declaración va poder interpretase nel sintíu de que confiere drechu dalgún al Estáu, a un grupu o a una persona, pa emprender o desendolcar actividaes o realizar actos tendentes a la supresión de cualaquier de los drechos y llibertaes proclamaos nesta Declaración.

Porque dengún drechu universal torga otru drechu universal, de la mesma forma qu'una llibertá fundamental nun torga denguna llibertá fundamental, sinón que toes se complementen pa establecer una sociedá ensin somorguiamientos d'individuos o coleutivos. 

Y porque nin l'Estáu español, nin el Principáu d'Asturies, nin "El comercio", nin el señor Jové tienen drechu dengún pa torgame los míos drechos humanos nin les míes llibertaes fundamentales, nun pienso callar énte dengún tipu d'argumentación falaz, como la que toi denunciando nesti artículu. Colos míos drechos nun almito xuegos. Yá ta bien.

Xeometría polisentimental d'un cuadráu antisistema

Ún, que tien lleío y sintío dalguna cosuca y, a veces, alcuérdase d'ello, asocia ciertes idegues. Tengo metía na cabeza la nueva canción de Fangoria, "Geometría sentimental". (La verdá ye que suena como les canciones de los pegamoides que más se recuerden d'Alaska y préstame)

Y alcordéme d'un novela que lleera va veinte años, una de les primeres noveles de ciencia ficción, titulada "Flatland, romance of many dimensions" (Yo atopela en casteyán como "Planilandia: Una novela de muchas dimensiones"), del matemáticu y teolólogu británicu Edwin Abbott Abbott, publicada en 1884.

Claro, con dieciséis años, aquello yera una fricada másima: un cuadráu de la bidimensional Planilandia, visita la unidimensional Llinialandia ensin conseguir que'l so rei crea qu'esisten más dimensiones, recibe la visita d'una tridimensional esfera (que nun compende hasta que nun visita'l so mundu) y suaña cola vida autocomplaciente del puntu, únicu habitante de Puntilandia.

Pero, col pasu los años, ún dase cuenta de que la novela yera una crítica plasmante de la sociedá victoriana. Y, si nun mos quedamos nun puntillosu análisis, podemos estrapolala a la sociedá actual.

Y, asina, podemos atopar na estaya inferior a les muyeres de Planilandia, que son simples llinies, ensin otru cometíu que'l de xenerar nuevos seres xeométricos, como los triángulos isósceles, les figueres más numberoses, que representen el estatus más baxu, el proletariu y la carne de cañón bélica, que son más xabaces cuanto más apuntaos seyan los ángulos y que tienen poca cohesión interna, gracies a que les elites sofiten les puxes internes. Perriba tan los artesanos y comerciantes triángulos equiláteros y los cuadraos y pentágonos, que representen les profesiones lliberales. Finalmente, los polígonos son aquelles figures con tantos o más llaos que los hexágonos, y que formen les clases dominantes, siendo más influyentes cuantos más llaos tengan. Hasta llegar al gran jefe supremu: el círculu, perfeutu na so perfeición insuperable.

Nun se puen negar los paralelismos ente esta sociedá imaxinaria y la realidá social del sieglu XXI. Más tovía cuando tanto una como la otra refuguen de les irregularidaes, d'aquellos individuos que nun puen ser clasificaos dientro d'una estaya social concreta y que, por ello, escápense al sistema: son los polígonos irregulares en Planilandia y los antisistema del Capitalismu. A ellos, enciérraselos, sepártaselos de la sociedá pa que nun lluchen a la so contra, son entendíos como seres problemáticos y, por supuesto, como peligros sociales.

Pero son ellos quienes consiguieron llevar p'alantre la Revolución Cromática nel país imaxináu por Abbott, faciendo que les figures xeométriques acolumbraren los colores y quisieren usalos pa guetar una igualdá social, más p'allá de les aristes y los llaos, ente homes y muyeres. Pero un triángulu isósceles que violó a una muyer-llinia fue asociáu pola prensa del réximen al llíder revolucionariu cromatísticu, un círculu irregular a quien se-y permitiere la vida tres el nacimientu, y perdió'l favor del granible y decisivu coleutivu femenín. La masa dexó domase.

Inevitablemente, Cuadráu acabará la so vida nuna prisión por corromper los cimientos de la sociedá fonderamente estratificada de Planilandia. Cual titireru. Paez sinu de cualisquier sociedá, hasta de les ficticies, que'l perfeutu d'enriba quede nel so sitiu énte la incapacidá del irregular por motivar una revoluciónque camude la plácida inmovilidá del polígonu regular, que prefier quedase en casa sintiendo a cuatro pentágonos contar cómo se relaiciones ente sí un dodecaedru folclóricu y un deportista de quince llaos.

Ná que nun sepamos yá, nin que nos cante Alaska nel so nuevu cenciellu.

Arbeyinos perversos

Cuando diba al colexu, yera difícil alcontrar un compañeru que nun tuviere un rol definíu que toos esperábemos que desendolcase. Anque la mayor parte díbemos pasando d'un rol a otru, siempre podíemos atopar un empollón, un gallu, un pringáu, ún que llevaba les hosties y un bufón. A toos nos daba ascu l'empollón, a toos nos prestaba les salíes de tonu del gallu pa col profesor, toos nos riiamos del pringáu, toos puñábemos al que llevaba les hosties y toos nos escoyonábemos coles chancies del bufón. Eso sí: tou dios quería faer los trabayos col empollón, pa sacar buena nota; dir pela calle col gallu, porque te subía'l caché; cambiar cromos col pringáu pa garrar los más difíciles de conseguir, que siempre tenía él; y hasta xugar al fútbol col que les llevaba, nel mesmu equipu, pa llibrase de los hachazos. 

Pero al bufón nun lu tragaba nin el tato. Quiciás porque yera tán deslleal que, pa llibrase de dalgún peligru, l'oxetu de les burlles podíes ser tu. Y eso nun prestaba, claro. Solía ser tamién un gorrón que te pidía un mordiscu de la palmera, llevábate la metá y, pa enriba, facía que los demás s'entareren y se rieren de ti. Pero lo pior yera la so cabardía: fuera cual fuera'l motivu de chancia, acababa siempre metiéndose col más débil: l'empollón podía dexalu n'evidencia y el gallu, solmená-y una hostia; incluso'l pringáu podía mosquease y dexar de confiar los sos cromos. El bufón acababa dándo-y una hostia verbal al que les llevaba siempre. Y eso, anque los demás-y riéremos les gracies, convertíalu nun ser despreciable. El bufón yera l'instrumentu pa sacar tolo malo que llevábemos dientro, ensin sentimos culpables por protagonizar l'abusu.

Porque, nun mos engañemos: el bufón vivía de les zunes, de los prexuicios y de los mieos de los más. Mayoría que'l bufón usaba pa vivir el so papel ensin censura, nesa cotidiana llibertá que permitía que se dixera de too cuando se facía con humor. Pero esa mayoría, nun quería como parte de so al bufón. Yera dalgo ayeno, que s'aceutaba como ferramienta pal descoyone, pero namái. 

Y podía cayer en desgracia si dalguien tenía más interés. Por eso, pa provocar una risotada de la clase, el bufón escolar acababa dándo-y siempre al más débil, consiguiendo volver a ser el centru d'atención nuna fácil estrataxema: el grupu taba dispuestu a da-y lo que  fuere al que les llevaba, de forma incansable y de manera inagotable, pal so desfuegu. 

Esta realidá que se daba y da nes escueles, que yera negada y sigue negándose agora, dase por espeyu de la sociedá. Nos colexos, namái se repiten actitúes socialmente aceutaes. 

Pero, anque l'exemplu seya del comportamientu nun colexu, nun voi falar d'acosu escolar. Sinón d'acosu, en xeneral. Porque los bufones del colexu, poques veces son quienes a madurar y falar con respetu al restu. Siguen siendo despreciables anque cuiden les formes, non pa quedar n'evidencia o por llevar un moquetazu (por suerte pa ellos, la sociedá respéta-yos la so llibertá d'espresión muncho más qu'ellos la de los demás). Sinón porque la escusa de la risotada fácil choca na madurez de la realidá actual col conceutu "políticamente correuto". Y metese muncho colos actores de la sociedá, distrái l'atención, por sobao. Asina que, de xemes en cuando, dan una hostia al más débil. Ye una forma de caltener les postures de poder faciendo chancia de coleutivos amenorgaos y de recuperar l'atención de la mayoría. 

Dalgo que-yos vien xenial, porque la sociedá mayoritaria, tan políticamente correuta pa la mayor parte de los casos, necesita una válvula d'escape pa la so sórdida realidá y baxa'l nivel del respetu a los demás a niveles que faen aceptables les referencies de los bufones. Porque esa minoría, de la que nun se forma parte, conozse namái si vien recubierta de zunes, prexuicios y mieos. Ta claro que, ensin esi envoltoriu, cuando se ruempe col tópicu y la xeneralización, les minoríes vuélvense grupos de persones y caltener el nivel de chancia rompería lo políticamente correuto. Pero pa eso tán los bufones. Pa que sigan vixentes. 

Y na so vixencia, y solo nella, los bufones tienen vida. Porque, nesta sociedá onde vivimos, eses minoríes prexuzgaes nun tienen almitía la capacidá de réplica. Puen espresase, faltaría más. Pero esa rempuesta pue ser manipulada la cantidá de veces que se quiera, entiéndose como imposición al bufón, cuando non censura o violanción de les sos llibertaes. Porque, claro, el bufón pue dicir lo que quiera respeuto al coleutivu; pero'l coleutivu nun pue responder más que nunes formes socialmente aceutaes y de les que se val el bufón pa victimizase. Ye entós cuando la sociedá defiende al so instrumentu d'escape énte'l débil con sentencies del tipu "hai llibertá d'espresión", "nun tienen sintíu del humor" o "nun saben aceutar sarcasmos".

Esti procesu de retroalimentación despreciable ente'l bufón y la sociedá, dase n'Asturies constantemente cola tema l'asturianu. Faer chistes sobre aquelles persones que quieren vivir n'asturianu ta al orden del día en tolos estratos sociales. Y, evidentemente, los bufones d'Asturies nun queden al marxen. Asina que, dacuando, saquen a la lluz dalgún prexuiciu al respeutu porque ye una forma fácil de llamar l'atención: estos prexuicios son xeneralizaciones que nun necesiten muncha elaboración, tópicos que nun piden razonamientu dengún, y zunes que s'esparden rápido y calen na mayoría pa faer comuña al rodiu. "Que si imponen el bable a quien nun quier falalu"; "que si se quexen por ná cuando lu puen usar cuando quieran"; "que si viven de sovenciones"... Afirmaciones que nun pasen razonamientu dengún, pero que, como son contra'l débil, valen. Amás, como los argumentos d'esi coleutivu nunca nun son aprobaos socialmente, tienen más vigor, porque cualisquiera que salga desmontando esos prexuicios, nun solo tá dándo-yos validez, sinón que lo fai d'una forma non-correuta polítcamente, imponiendo, obligando, censurando y franciendo llibertaes. Too por nun saber riise d'ellos mesmos.

Unos d'estos bufones asturianos son los creadores d'"Al platu vendrás" (APV). (Nun porque lo diga yo, sinón porque asina se definen ellos nesti reportax d'"Asturias24") El proyeutu nació cuando dos guionistes asturianos, Jorge Escudero Tena y Marco Imargues Toraño, quedaron ensin trabayu al ser retiráu de la pantalla de la TPA'l programa d'humor "Terapia de grupo". Dende una páxina dixital y les rees sociales, escomenzaron a faer sátira política y social, con tremendu ésitu de públicu, que los siguía y tovía los sigue. Gracies a esa popularidá, la propia TPA xeneró un programa nuevu col mesmu nome: "Al platu vendrás". Nél, creáronse dellos personaxes y colaboraron bien de profesionales del sector actoral asturianu. 

El problema, pa la sociedá, non pa ellos, yera l'usu diglósicu del asturianu: pa faer "les gracies", los personaxes usaben del asturianu, amestáu o non; pero pal discursu habitual, la llingua vehicular yera siempre l'español. Nes rees sociales, recibieron crítiques abondes, siempre respondiendo coles frases qu'atribuyía más p'arriba a cualisquier bufón, fuere escolar, fuere adultu y asturianu. Siempre quitando importancia, como si nun hubiere un problema de diglosia n'Asturies, como si nun hubiere una sola persona amenorgada nos sos enfotos de vivir los sos drechos plenamente y ensin torga social dala. Y hubo xente (recordemos que son instrumentu de la mayoría)  que los apoyó, reforzándo-yos la conducta.

Esti día  veo que vuelven a la carga en Twitter con esti tuit:

Sigue la estructura normal d'un ataque a una minoría: victimismu inicial, sarcasmu posterior, prexuiciu insultante final.

Victimismu porque, al paecer d'@ALPLATU, son atacaos por falar n'amestáu; la realidá ye distinta y bien desplicada anteriormente pal programa televisivu: usen los idiomes d'una forma diglósica: l'asturianu pa la chancia, l'español pa los discursos serios (como les sos respuestes a les crítiques). De secute, un exemplu (por ciertu, nun se faía ironía, sinón que s'usaba la noble figura retórica del sarcasmu):

Sarcasmu, bien formuláu, desde llueu. Y efeutivu. Pero firiente, al faelu pa con un coleutivu amenorgáu. Cualisquier sarcasmu d'esti tipu con el coleutivu LGTB, les muyeres, los inmigrantes illegales o los refuxaos bélicos, sedría mal vistu pola mayoría. Nun pasó n'otros momentos. Recuerden cómo los chistes de maricas d'Arévalo o de Martes y Trece yeren mui celebraos y tamién s'escusaben en que nun yeren firientes y que, de sintise molestos los maricas, ye porque nun teníen sintíu del humor. Anguaño, a APV nun se-y ocurriría dicir sarcásticamente que "Ser machu ye de ser mala persona. Ser muyer maltratada date superpoderes y, con suerte, una ayuda #YeLoQueHay #PuestinosYPerres". Si APV llega habese creyao nos 50, nun tendría problemes pa roblalo.

Y prexuiciu insultante porque repite'l mantra de que les persones que defienden los sos drechos llingüísticos fáenlo por interéses crematísticos. Mantra, como toos, que nun necesita argumentación: el fechu ye que'l Gobiernu del Principado ufre sovenciones a la llingua y qu'hai quien les cobra. Da igual quién les cobre (nun acusa a "La Nueva España" de cobrales), nin cual seya la so utilización (l'esporpolle d'una llinia editorial n'asturianu, por exemplu), nin cual ye la comparativa pa con  otres espresiones culturales (pue ponése-yos una tabla col dineru públicu recibíu pola Fundación Princesa, la Fundación Gustavo Bueno o la Cátedra Alarcos y el recibíu pola ALLA, por exemplu y nun atalantarán qué significa). Dan igual los argumentos.

Pero'l problema nun ta nestos bufones de xera patética. Caún fai lo que sabe, lo qu'entiende y lo que pue. Hai humoristes capaces de faer gracia ensin metese con terceros, pero non son d'"humor fatu". L'humor intelixente necesita intelixencia detrás y los bufones nun han ser intelixentes: han ser ferramientes pa riise y punto. Y APV, consíguelo. Norabona por ellos. 

Agora, por favor, que naide me diga que-yos he respetar el trabayu, o lo que dicen, o cómo lo que faen, porque la forma de faer el so trabayu, les coses que dicen y les argucies qu'intriguen,  paécenme denigrantes. Pa ellos (dalgo que nun me preocupa, porque caún ye llibre de faer cola so vida lo que quiera) y pa munches persones que merecen respetu y son motivu de chiste, ensin merecelo. Eso sí, respeto fonderamente que lo faigan, que ye bastante, y respeto que nun seyan quien pa ver que puen causar dañu cola so obcecación. Y tampoco nun los responsabilizo del resultáu. 

El problema ta na rempuesta qu'esti tipu "d'humor" tien na sociedá asturiana. Riise d'un cachopu ye de fatos; pero ser un fatu nun fai mal a naide y quien nun se rió dalguna vez colos gritinos de Chiquito de La Calzada. Pero riise d'otres persones, más cuando cobardemente nun se va de frente (cuando la sátira ye política, con nomes y apeyíos, l'humor ye valiente), más cuando se xeneraliza (cuando la ironía ataca un fechu en concretu ha ser midía pa que la rempuesta posible quede albuertada), más cuando va contra'l débil (contra un coleutivu amenorgáu socialmente ye más cenciello)... riise d'otres persones neses circunstancies ye perverso. 

Y da igual que los perversos seyan unos "arbeyinos" o unos críos nel colexu acosando a quien les llevaba siempre.

D'ascu.

L'Asturies bien pensante y la "Cultura", ente comines

Falaben en Ser Gijón del programa "Gijón Creativo", una iniciativa del ayuntamientu xixonés pa impulsar la industria cultural y creativa de la ciudá. A parte de les polémiques pola so implantación y el so retardu o non, préstame abondo lo que diba sintiendo porque pémeque l'impautu económicu que xenera l'actividá cultural nuna ciudá, nuna sociedá, tá poco valorao n'Asturies.

Y tien el so porqué: n'Asturies, la "Cultura" vese como un énte abstrautu propiu d'unes clases erudites, que lu "comparten" col restu pa que nun caiga na vulgaridá. Pero esa forma de compartir "Cultura", amuesa y caltién un desaveramientu interesáu, que procura un estatus bultable: la "Cultura" comunícase de forma vertical y unidireicionalmente. Atopamos, poro, qu'hai un "clase culta" y una "clase non culta". D'esta miente, la xera política d'averar a les clases populares a la "Cultura" valió p'asentar el privilexu y p'acabar d'asitiar el focu xenerador. La "Democratización de la Cultura" fracasó, faciendo que creciera'l "Despotismu Illustráu" hasta faelu impresacindible. 

Porque la "Cultura", n'Asturies, establécenla delles persones bien determinaes dientro una elite cultural. Esa elite cultural (endogámica y autoalimentada) ye quien pa marcar el bien faer y el bien pensar (y hasta'l bien ser). Y esta situación acéutase ciegamente pol restu la sociedá asturiana: son la fonte del Saber y, el restu, un recipiente vacíu qu'ha enllenase col so conocimientu. El problema ye qu'esta fórmula sirve, más que pa esparder la Cultura ente la xente, pa caltener el poder en dellos apellíos interesaos. 

Esta situación desplica la impunidá de dellos miembros d'esta inteligentsia dientro de ciertes instituciones culturales públiques, como la Universidá d'Uviéu. Asina, nun ye difícil atopar caderalgos universitarios calificando de "paletos" a quienes nun actúen como ellos entienden que ye de razón y que nun solo nun reciban reprenda dala por parte'l rectoráu, sinón que s'escuden en la llibertá d'espresión y aición que protesten de los otros. 

Y nun ye dificil atopalo porque les instituciones (polítiques, sociales, culturales) asturianes tán cómodes nesti apartheid cultural. Pesie a que, inevitablemente, tea comunicáu con otres estayes de la realidá y sofite una tapecía desigualdá social, daquella que france la másima llibertaria "naide ye igual a otru; pero toos valimos lo mesmo". N'Asturies, toos somos iguales, pero nun toos valemos lo mesmo.

Ye esti'l motivu pol que llevo tou esti camientu entecominando'l términu "Cultura". Si la Cultura nun sirve pa permitir la espresión y el crecimientu del alma individual y coleutiva (tirando del conceutu "cultura animi" de Cicerón), sinón que ta empobinada al sofitu de los privilexos d'una elite direutora, dexa de selo. N'Asturies, la "Cultura" ta caciquilmente entecominada.

Quiciabes, l'esporpolle d'una visión económica de la Cultura, almitiría nueves formes nel tratu social a la mesma. Paez mentira que, nuna época tán materialista, nun esista n'Asturies una conciencia de les Artes, y la so divulgación, como industria xeneradora de riqueza. Si esistiere, nun s'entenderíen munches polítiques fiscales, llaborales, turístiques, culturales, educatives, audiovisuales y empresariales, tanto autonómiques como llocales, que dan la espalda a esti seutor económicu. L'oxetivu sedría faer de la Cultura un factor y un mediu d'arrequecimientu económicu de tola sociedá.

D'esta manera, pol bolsiyu (que favorez en munchos l'aceutación a la trágala de delles coses aberrantes), la Cultura abriríase al enfotu de más xente, atrayío, nun solo poles sos condiciones intrínsiques animistes, tamién poles crematístiques, pero dambes diendo garraes de la mano. Asina, diben emponderase a bien de persones qu'anguaño viven les espresiones culturales que-yos son propies como un folklorismu aculturizáu y avergoñante.

Porque, seyamos sinceros: ¿quién diba ser el guapu de tar a la contra de la oficialidá del asturianu, si fuere de dominiu públicu qu'una industria cultural alrodiu diba dar perres y puestos de trabayu?

Siempre se fala de que toles estayes de la vida dependen de les perres pa ser o non ser; que los mercaos marquen l'actualidá política; que too se vende y se merca. Pues bien, faigamos posibilismu de la situación y usemos les perres como atractivu pa un oxetivu mayor: la braera democratización de la Cultura. Que la Cultura seya fecha por tola sociedá y esfrutada por tola sociedá. "Gijón Creativo" ye un empiezu.

(Que la Cultura llegue a ser democrática poles perres. Qué tristes estos medios y estos camientos. Pero qué triste ye, tamién, esta realidá que vivimos.)

Albuertu

Ayer, vienres 20 d'avientu de 2013, el Gobiernu del Estáu decidió aprobar una reforma de la llei del albuertu. A partir d'esti momentu, n'España les muyeres solo van poder interrumpir el so embarazu si cumplen dalguna de les dos premises permitíes: "si ye necesariu por esistir grave peligru pa la vida o la salú física o psíquica de la muyer" o que "l'embarazu seya consecuencia d'un fechu constitutivu d'un delitu contra la llibertá sesual de la muyer". 

Esti plantegamientu fai retroceder la situación al añu 1985, cuando la primer llei del albuertu permitíalu en casu de graves malformaciones del fetu. Y dexala a años lluz de la llei de 2010, cuando s'almitía la interrupción llibre del embarazu hasta les primeres 14 selmanes y hasta les 22, en casu de graves malformaciones del fetu o peligru pa la salú de la muyer.

Precisamente nel añu 2010, cuando salió la última llei en vixencia hasta ayer, púnxeme a redactar una entrada pa esti blogue que, finalmente, nun fui quien a completar. Pesie a que, al andar a la gueta d'argumentación a favor y en contra dende puntos de vista históricos, relixosos (nun solo católicos, evidentemente), morales y filosóficos y toes llevaronme a pensar que l'abortu ye dalgo horrible, indeseyable, espantoso. Tengo que dicir que me quedé cola sensación de ser afortunáu por nunca nun tener que veme nel trance de decidir si albortar o non. Yera tan grave l'asuntu que preferí nun espublizar ná. De toes formes, aquella lleí presumíala xusta pa quien de verdá sí tenía que decidir: la muyer embarazada.

Y solo la muyer embarazada. Porque ye esa muyer la que se pue ver cola vida cambiada nunos meses ensin qu'ella lo tuviere decidío; quien cuerre con tola responsabilidá de la estabilidá física, emocional, económica y familiar respeutu al futurible neñu; y quien va tener que faer frente a una sociedá que nun siempre atiende a razones. Ye ella la única que tien que llevar dientru un ser en formación y decidir pol so futuru. Namái qu'ella.

Porque, cuando surde esti debate, pónense na mesma bañanza los drechos del non-natu y la situación d'una muyer, ensin valorar malpenes que la realidá d'una muyer pasa por plantegase la maternidá y que solo si esa decisión se fai en llibertá ye un drechu. Una muyer qu'ha de vese madre por obligación, paga una conderga. Y eso, ye inxusto. 

Anque tamién lo ye que muerra un inocente, tamién. Pueo entender dalgunes postures de los coleutivos pro-vida, que defienden el drechu a la vida del fetu por enriba del de la madre. Pero les sos postures han quedar solamente nel ámbitu priváu. Énte una madre que nun quiera albortar poniéndose en peligru ella mesma, solo pueo deseya-y que reciba tol sofitu que necesite pa la so empresa y que tenga ésitu. Pero nun voi poder entender que lo tenga que faer forzada por naide que nun seya ella mesma. Tovía más, por una llexislación que-y niega la so llibertá como muyer. Asina que siempre antepondré'l drechu a decidir de la madre sobre'l so cuerpu  al drechu a la esistencia d'un non-natu.

Poro, entiendo como un drechu, (anque nun lu recueya esplícitamente dengún país, espero que pronto lo faiga), la voluntá d'una madre pa decidir sobre'l so futuru y el de la criatura que lleva dientro, ensin que naide faiga puxu escontra esa voluntá. Y, en tolos casos d'esa suposición, habrá tener la madre la mayor proteición por parte la sociedá, facilitándo-y la toma de decisión y ufriéndo-y les condiciones necesaries pa que consiga, de la forma más ventayosa, el so propósitu: tanto si quier continuar col embarazu, apurriéndo-y los medios médicos y sanitarios, económicos, llaborales y sociales pa qu'el fetu evolucione con éxitu y ella calténgase saludable; como si quier interrumpilu, pa que nun ponga en peligru la so vida, pa que supere'l trance físicu y psicolóxicu y pa que nun seya xuzgada pola so comunidá.

 

Anguaño ábrese una situación onde les muyeres acaben de ver amenorgaes les sos llexítimes reivindicaciones d'igualdá (que solo pue ser entendida como equivalencia en'oportunidaes pa esfrutar de los drechos, non que tolos individuos seyan uniformaos): les muyeres son persones de segunda categoría n'España, porque nun tienen la potestá de decidir qué faer col so cuerpu. Toa una violación institucional, qu'obliga a les muyeres a parir. Una situación que bien podía ser recoyía como un fechu constitutivu d'un delitu contra la llibertá sesual de la muyer.

Pero amás, y d'una forma más urxente (ensin quitar un rispiu de la urxencia que tien la pérdida tanxible de drechos), ábrase una situación de peligru sanitariu al tratar de tapar con un marcu d'illegalidá, una realidá social como ye l'abuertu. Solo espero que nun muerra denguna muyer por interrumpir el so embarazu nuna situación antihixenica o por carencia de los medios necesarios. Que quede na conciencia, yá que la llexislación los exonera, d'aquellos que promovieron y aprobaron esta llei.

Mientres, les muyeres tendrán que siguir plantegándose si albortar o non, por temor a les consecuencies penales. Como si esi fechu nun carretara bien de torgues, de penalidaes y d'inxusticies.

La revolución exipcia

Nel contestu de les nomaes "Primaveres árabes" del añu 2011, Exiptu entamó un procesu remozador del sistema políticu que llevaba imperando dende la so independencia como protectoráu británicu y en sostitución del reinu: una república presidencialista consistente nel gobiernu d'un personaxe laicu toopoderosu sofitáu nel poder militar. Primero Nasser, dempués el-Sadat y, finalmente, Mubarak. Cola fin d'esti réximen, dióse pasu a un procesu democratizador, col oxetivu de qu'el pueblu, que se soblevara, algamara'l poder. El resultáu fue un proyeutu constituyente tuteláu pol exércitu y unes elecciones que dieron el poder a los Hermanos Musulmanes y la presidencia del gobiernu a Mohammed Morsi, el 24 de xunu de 2012. Un añu dempués, la xente volvió a salir a les cais a protestar pola situación social, económica y política pa pidir cambios al gobiernu, que permaneció inmóvil hasta que l'exércitu dio un golpe d'Estáu apoyando al pueblu, destituyendo a Morsi y nomando un nuevu gobiernu transitoriu.

Más o menos, estos son los fechos que tán trescendiendo dende los medios de prensa y que quedarán nos llibros d'Historia. Les interpretaciones van dende aquellos qu'entienden que los güelpes d'Estáu militares son siempre malos, ensin parase a analizar les circunstancies que los motiven nin a quiénes apoyen, a aquellos que ven con buenos güeyos quitar el poder a tou tipu de grupu islamista pol peligru que pue suponer pa Occidente, pasando polos que ven la mano d'Estaos Xuníos detrás o los que tan ateorizaos porque una revolución popular puea finar col status quo democráticu del so estáu. Pero son necesaries delles esclariaciones.

La primera ye que la situación d'Exiptu ye bien diferente a la del restu países de la redolada. Ye'l país árabe más pobláu ya influyente del mundu, controla l'importantísimu pasu estratéxicu del Canal de Suez y ye ún de los más importantes aliaos d'Occidente, siendo'l segundu estáu más financiáu polos Estaos Xuníos y la OTAN, dempués d'Israel, tanto con Mubarak como hasta agora con Morsi. En ná nun se parez a Túnez, nin a Siria.

La segunda ye la importancia del exércitu. Mursi fue'l primer gobernante desvinculáu del exércitu en tola hestoria d'exiptu, dende los faraones. L'exércitu exipciu ye ún de los principales axentes económicos del estáu, llegando los sos negocios dende'l sector industrial al comercial, pasando pol turismu y, sobre too, pol Canal de Suez. Esto vien de la dómina de Nasser, que xeneró una oligarquía propicia pa de so nel exércitu, sostituyendo la foriata d'época colonial que caltenía'l rei Faruk. Pero, amás, ye qu'esti exercitu, a diferencia d'otros de la rexón, ye un cuerpu mui competente, capaz de derrotar al d'Israel y faer frente a los apoyos americanos d'esti. Y, asina, el pueblu exipciu consideró siempre como garante nacional al exércitu y ye l'estamentu más respetáu, por encima del relixosu.

La tercera ye la realidá funcional de la Constitución que s'aprobó l'añu pasáu. A semeyanza de les occidentales, volvía a cayese nel erru de consultar al pueblu solo cada cuatro años. Lo que pue ser visto como un avance respeutu al réximen de Mubarak, que nunca nun consultaba, en realidá dexaba al pueblu indefensu pa col gobiernu, de nuevu presidencialista, con un poder llexislativu mui reducíu y casi ensin capacidá de vetu y un poder xudicial dependiente de les recomendaciones presidenciales. Yera una auténtica oportunidá pa quienes fueren los gobernantes, y estos fueron, lóxicamente, los Hermanos Musulmanes.

Digo lóxicamente y desplícolo nesta cuarta estaya. Los Hermanos Musulmanes son un grupu de presión política de más d'ochenta años (fundaos en 1928), creyaos cuando s'estaba franciendo l'Imperiu Otomanu pa dar una alternativa republicana y popular al reinu/protectoráu. Ye un grupu islamista moderáu, republicanu, económicamente defensor del lliberalismu y, sobre too, socialmente queríu pol so trabayu asociativu y de caridá nos barrios probes del país mientres tou esti tiempu. Cuando españó la "Primavera árabe", fueron los cabezaleros de les protestes nes cais. Y nel momentu de les elecciones yeren la única formación política sólida. Y ganó. Ye verdá que por muncho menos de los que s'esperaba (solo un 35% de los votos). Pero ganó. Y, col apoyu los salafistes (que se desmarcaríen bien llueu), colocaron a Morsi de presidente.

 

Con estes consideraciones, hai qu'añadir coses nueves al resumen d'enriba. Dicía que Morsi yera escoyíu presidente. Pero'l poder quedaba en manes de Mohamed Badie, el líder supremu de la organización. El Parlamentu perdía les sos prerrogatives y estes pasaben a los cuarteles xenerales rexonales de los Hermanos Musulmanes, que fueron acumulando'l poder civil gracies a los nomamientos del gobiernu central, dirixíu por Badie. Taba pasándose d'un réximen domináu polos homes de Mubarak a talo polos Hermanos Musulmanes. Y l'exércitu viera que diba perder influyencia cuando Morsi trató de sostituyir les gobernaciones (les divisiones territoriales d'Exiptu) militares por otres civiles, contralaes pol gobiernu y, poro, polos Hermanos Musulmanes. 

Que naide se lleve a engañu: l'exércitu derrocó'l gobiernu de Morsi por caltener el so lobby económicu y la so influyencia social, non porque esti fuera islamista o porque les sos polítiques económiques y sociales fueren un desastre total. Esperó a tener el sofitu del pueblu pa siguir siendo'l so abanderáu, l'ánima del Exiptu modernu y caltener el so poder na solombra. Pero, polo tanto, tamién ye verdá que tuvo al lláu del pueblu y lu defendió cuando esti lu necesitó. (Esto ye lo que pon los pelos de punta a más d'ún equí: qu'el pueblu se rebele y l'exércitu lu apoye, en vez de tirar pol más fuerte, como casi siempre na Historia d'España. Que non, por cierto, en Portugal)

El pueblu revelóse por otros motivos diferentes a los del exércitu. Fízolo énte un gobiernu llexitimáu poles urnes, sí, pero que nin cumplía les sos promeses electorales nin atendía a la Constitución p'actuar. La situación de drechos sociales calteníase igual a cuando Mubarak, porque la Constitución yera solo un papel moyáu. Pero, a diferencia d'aquella dómina, la situación económica yera tarrecible. Los Hermanos Musulmanes nun podíen caltener les sovenciones a les instituciones de caridá porque estes yeren incompatibles coles ayudes económiques que recibía de los Estaos Xuníos (recordái qu'Exiptu ye'l segundu país que más ayudes recibe d'ellos) pa la macro-economía: el dineru, como siempre, tenía que dir pa los ricos. Pero cola inestabilidá política, la deconfianza de la oligarquía empresarial anterior nel nuevu gobiernu y el recelu de los militares, la economía nun despegaba. El desempléu creció y los probes y les clases medies que sofitaben a los Hermanos Musulmanes aprobecieron índa más. Incluso surdieron voces que pidíen que volviera Mubarak. Que la xente saliere a la cai a pedir polos sos drechos y, nesta ocasión tamién, por trabayu y comida, nun se fizo esperar: un añu.

Pero, quiciabes, el principal error de los Hermanos Musulmanes fue l'afán de notoriedá. Quisieron ser los protagonistes del procesu de cambiu y écharonse a les espaldes tol trabayu, ensin compartir responsabilidaes con dengún otru partíu o sector social. Arrequexaron a los salafistes, amenorgaron a los militares y escaecieron a los poderes llexislativu y xudicial. Cuando escomenzaron les protestes, nun quisieron escuchar al pueblu que yera la so base. Y, testerones, quemáronse nel so fueu. Yo toi seguru que, d'haber abierto la mano Mohamed Badie, taríamos falando d'otros asuntos.

Pa concluyir, prestaríame falar de les reacciones a esti procesu.

La prensa en conxunto falaba de güelpe d'Estáu. Ayer vía l'especial fechu pol canal 24 horas de TVE al respeuto. Dos excelentes especialistes (Haizam Amirah Fernández, del Instituto El Cano, y el codirector del Instituto de Estudios de Conflictos y Ayuda Humanitaria, Jesús Núñez) desplicaben la situación fonderamente ya intentaben lidiar con una reciella analistes que nun s'enteraben d'úna, incapaces de camudar el chip. Ún, dempués de que se falare del acaparamientu del poder en manes de los Hermanos Musulmanes dicía: "Si el pueblu los escoyó nes urnes, qu'esperen cuatro años y voten por otros". Miéu, comu dicía enantes, a que se reproduzca equí (dalgo qu'anguaño ye imposible).

Los países occidentales tovía nun tuvieron la osadía de les sos prenses y callen la boca. Piden que s'abra un procesu democráticu cuanto enantes meyor, pero nun xuzguen nin critiquen l'acción militar/popular. Y taben buenos pa falar dempués de lo que ta pasando en Siria, onde, por cierto, l'exércitu sofita al gobiernu y ataca'l pueblu.

Y, por último, falar de la reacción del rei Abdalá d'Arabia Saudí que, dende la so quintana particular de dos millones de kilómetros cuadraos, saludó con allegría al nuevu réximen exipciu. Van dir tolos demás países por esi caleyu porque poco importa'l pueblu mientras haya un collaciu al frente (como'l rei Abdalá), poco importa la democracia (n'Arabia hai casi 30 millones de siervos) mientres el Canal de Suez siga abiertu y poco importa l'islamismu (como'l saudí) mientres haya estabilidá na zona.

Espero qu'a los exipcios-yos salga bien la so revolución.

Los caballeros

Aristófanes

Tuviera viendo va un par de selmanes la versión de Teatro Kumen de La Felguera de Les troyanes, d'Eurípides, y dióme por repasar clásicos griegos. En seguidina pasé al mio favoritu Aristófanes, el másimu esponente del xéneru cómicu y satíricu del teatru clásicu. Asina que fui a una biblioteca y garré un volumen, estudiu de Carlos García Grual, con tres de les sos obres: Los acarnienses, Los caballeros y Les xaronques. 

La primera ye una sátira pacifista escontra la guerra del Peloponeso; la tercera, mui posterior, la visión personal del autor de les personalidaes d'Eurípides y Sófocles, muertos l'añu anterior, nuna puxa nel infiernu ente dambos (Sófocles representáu pol gran Esquilo). Pero voi quedame cola segunda, n'orden y n'edá.

Los caballeros representóse nes fiestes Leneas del añu 424 a.C. y yera un nuevu ataque escénicu contra los demagogos y los excesos de los qu'usaben el populismu pa monopolizar los altos cargos, dexando nun segundu términu les decisiones del pueblu, col oxetivu d'enriquecese y perpetuase nel poder.

La figura de Cleón, un curtidor veníu a más, que se fizo col poder de la polis ateniense gracies al oportunismu (vendióse como xeneral vencedor énte los lacedemonios, cuando fuera Clistenes quien algamara la victoria) y el nepotismu (subió l'aportación a los asambleístes d'ún óbolu a tres), sufre toa una serie d'ataques d'un vendedor de chorizos, qu'acabará por consiguir l'apreciu del Coru de caballeros (la segunda clase social d'Atenes) y del vieyu Demos (Pueblu) al algamar una tregua que beneficiará a tolos ciudadanos.

La obra gozó de gran ésitu ente'l públicu y demostró, una vuelta más, la valentía d'un Aristófanes que, con un llinguax enllenu zafiedaes y xuegos léxicos, conseguía que los ciudadanos s'identificaren colos sos presupuestos.

Préstame abondo estos dos párrafos del Coru de caballeros. Que quiciás, pa tener 2.438 años, tienen muncha actualidá:

"Fiere, fiere a esi canalla enemigu de los caballeros, recaudador ensin conciencia, abilsu de perversidá, mina de lladronicios, y canalla y cien vegaes canalla; y siempre canalla, nunca nun me cansaré de dici-ylo; pues yelo más ca día. Pero solmena-y, síguelu, xíngalu, espulsa a esi bribón; arreniega d'elli como nós y escórrelu glayando. Cuida que nun se t'escabulla; mira que conoz los caminos per onde Éucrates escapóse del salváu."

"Y sóbramos la razón, porque tu apodéreste de los bienes de toos y gástelos enantes de que seyan repartíos; y dempués tantigües y primes a quien han dar les cuentes, como se tantigua un figu pa ver si ta verde o maduru; y cuando ves a dalgún de calter débil y pacíficu, fáeslu vinir del Quersoneso, gárreslu con fuercia de la cintura, éches-y los brazos al gargüelu, faes que zarapique y, dempués de tiralu al suelu, tráguestelo too d'un bocáu namás. Tu siempres tas esperando sollerte a los ciudadanos cenciellos y mansos como oveyes, honraos y enemigos de pleitos."

 ¡2.438 años! Y la democracia sigue colos mesmos vicios.

L'escrache

L'escrache ye una forma de protesta civil pola que activistes pro-drechos humanos denuncien en público a persones o coleutivos que los torguen, averándose a los llares particulares o trabayos de los mesmos. La fórmula aniciárase durante los años 90 del pasáu sieglu n'Arxentina, como rempuesta del grupu "Hijos" a la política d'indultos d'altos cargos de la dictadura militar, executada pol presidente Menem. Ente otres aiciones, entamaron parillaes, representaciones teatrales, pegada de carteles y espliegue de pancartes, tirada de güevos y hasta representaciones teatrales.

Estes últimes selmanes, l'escrache salió a l'actualidá estatal poles aiciones protagonizaes pola Plataforma d'Afectaos pola Hipoteca (PAH), onde siguíen a cargos públicos del Partido Popular peles cais y los esperaben nos domicilios y nes sedes del partíu a que salieren. La PAH acusa esplícitamente a los políticos d'esti partíu de permitir de facto'l desaniciu del drechu a una vivienda digna, favoreciendo los intereses financieros percima de los drechos humanos. 

Como la meyor forma de defendese nun momentu onde los argumentos nun son de pesu, sinón qu'importen más l'escándalu y la repercusión mediática del comentariu, la estratexa'l PP, en boca de la delegada del Gobiernu en Madrid, Cristina Cifuentes, fue comparar a la PAH al movimientu secesionista vascu, averando los escraches a la kale borroka. Esti posicionamientu ye mui común nel PP y siempre-y diera buenos resultaos, polo menos hasta los atentaos del 11-M. Pero ye una auténtica ensinvergonzonería. (Anque de vergoña nel PP, saben poco). 

Una de les denunciantes d'esti tipu d'aiciones escontra la so persona fue Carmen Maniega, una diputada a Cortes por Asturies, que dexó constancia na Policía que fuere acosada, ente otres ocaciones, "a la salida de una reunión de Federación Asturiana de Concejos 'al grito de asesina, criminal y sinvergüenza'". La Plataforma n'Asturies, negábalo. UPyD, defendía a la diputada, solidarizándose con ella. Puntos de vista que falen de por sí respeto a la tema los drechos.

L'escrache nun almite medies tintes: o se ta a favor o se ta en contra. El casu ye que nun ye illegal. Munchos de los qu'anguaño se rasguen les vistidures pidiendo midíes contundentes pa contra esta aición de denuncia de quien persigue los drechos universales, nunca nun se pararon a pensar qu'el famosu cobrador del frac tien la mesma conducta, anque moralmente bien se diferencia del escrache: esti puxa por cobrar unes perres adeudaes y los otros, polos sos drechos.

Pela mio parte, siempre me paeció xusto que la xente denunciara públicamente a quien ye un mal xestor y se va dir de rosites y, sobre too, a quien, tando nun puestu de responsabilidá pública fai llabor pol espoxigue de privilexos a la escontra de los drechos universales. A la PAH, con estes aiciones, nun-y falten razones (anque dende'l mio puntu de vista, les aiciones habríen de compartise con más partíos y sectores sociales): les torgues d'esti sistema capitalista, onde se prima la rentabilidá particular a los beneficios xenerales y onde un euro en bolsiyu apropiáu val más qu'una persona de la cai, tan siendo defendíes a ultranza polos partíos sistémicos, porque n'ello-yos va'l presente y el futuru, y sofitaos por unos medios de comunicación y un sector financieru qu'esporpollen recios onde la xente alcuentra llamuergues.

N'Asturies l'escrache nun ye un modelu d'aición nuevu, porque lleva protagonizándolu años la Xunta pola Defensa de la Llingüa Asturiana mediante'l personaxe de "la Pita". Dempués de que la Delegación del Gobiernu n'Asturies-y prohibiera tayantemente protestar a les puertes de la Xunta Xeneral del Principáu escontra les polítques amenorgadores de los drechos de los asturfalantes protagonizaes polos distintos gobiernos socialistes, la imaxinación creyó esti personaxe, que trayía la pita en persona, pero ensin xiblatos. Canta'l grupu Skama la Rede: "Yá llegó la Pita/col déu acusador/p'apuntar al presidente/presidente represor". Esi presidente nun yera otru que Vicente Álvarez Areces.

A muncha xente socialista, qu'aplaude l'escrache a políticos del Partíu Popular, abluca-y la Pita, hasta la sientes como una payasada. Por embargu, la Pita cumple cola función social de nun dexar que'l somorgamientu los drechos d'una parte la población ye un fechu tovía güei. Igual que la PAH.

Espero que dambes lluches se superen pronto y la xente tenga la posibilidá d'acceder a una vivienda digno onde esfrutar de la so identidá ensin torgues.

Ambiente a medies nel paraísu.

Mui poques vegaes falé de mediu ambiente nesti blogue. Pero nesti comienzu d'añu, fueron desendolcándose delles propuestes y decisiones polítiques que podríen afeutar bien direutamente a Asturies. Diendo a la gueta d'un ameyoramientu enerxéticu, d'una mayor productividá forestal o d'un sistema de xestión de residuos sólidos urbanos, apaecieron tres llinies de polítiques ambientales que, en virtú d'educador mediuambiental que soi, prestaríame desplicar.

Fracking. 

Trátase d'una téunica que permite la estracción, o'l so ameyoramientu, de gas y petroliu, consistente n'inyectar materiales non sólidos a presión pa francer el sostratu rocosu y permitir una salida más bayurosa del recursu guetáu. Esta téunica, nomada "fracturación hidráulica", nun ye nueva, y bien siendo prauticada n'Estaos Xuníos dende la década de 1860, usando primero nitroglicerina, que fuera sustituyía por ácidos y, finalmente, agua con arena y productos disolventes, siguiendo la fórmula que la compañía Stanolind Oil diseñara a principios de los 50.

El coste mediuambiental d'esti modelu d'esplotación ye mui altu. El gastu d'agua ye tremendu, amás de que los productos que se disuelven n'ella pa algamar una mayor efeutividá, provoquen, direutamente, la xerenación d'agues residuales que conlleven depósitos donde puen évaporase y filtrase metales pesaos ya, n'ocasiones, radiactivos; y, indireutamente, la contaminación d'acuíferos con metano (que llegara a produz esplosiones en cases) y de cloruru de potasiu (que favorez la salinización del agua potable). Por último, señalar l'alteración d'hábitats, xeneralmente naturales, pa la construcción de carreteres, olioductos y plataformes d'estracción.

Subiendo'l preciu del barril de petróleu, desaniciáu dafechu'l carbón como combustible fósil altamente contaminante (pesie a dellos avances de captura de CO2, sigue siéndolo) y siendo España un estáu enerxéticamente dependiente, munchos políticos vieron n'estes téuniques una buena salida pal futuru. 

N'Asturies, la idega surdió dende les files d'UPyD, siguiendo la postura a favor del partíu a nivel estatal. La rempuesta nun tardó y creyóse la Plataforma Asturiana Anti-Fracking, que puxó col sofitu de Conceyu Abiertu y d'Equo Asturias, hasta algamar la aprobación d'una propuesta non de llei d'Izquierda Unida nel Parlamentu asturianu. 43 votos a favor de que, mientres dure la llexislatura, nun s'autoricen estudios de viabilidá d'esplotaciones de fractura hidráulica nel territoriu. Hubo una abstención, la d'UPyD, qu'alegó la inesistencia d'estudios que sofitaren la mala prensa del fracking.

Ocalitos.

La selmana pasada, una nueva propuesta de la formación maxenta, a traviés del so únicu diputáu autonómicu, Ignacio Prendes, volvía a poner de manifiestu'l so desconocimientu de la realidá mediuambiental d'Asturies (y apuntaba la d'otres, como'l tipu de poblamientu ya esplotación del suelu autóctonu o l'ecolóxicu). Pretendía llevar p'alantre una propuesta de creyación d'un nuevu catastru forestal col oxetivu primeru, coherente y plausible, d'evitar incendios, y segundu, de favorecer una esplotación d'especies madereres, creyando aries d'influyencia planificada (a semeyanza, dicía, de Navarra, onde la planificación de la esplotación supera'l 40% pol escasu 2% asturianu), abriendo una ventanilla única pa ayudar a los propietarios de terrenos yá esplotaos o ermos anguaño y promoviendo la plantación d'especies de rápidu crecimientu, "eucaliptos y coníferas".

Lo pior ye qu'el sábadu asoleyóse la noticia de qu'el partíu nel gobiernu, el PSOE, sofitaba la decisión, lo que nun ye nuevo, pero si preocupante. Yá fai dos llexislatures, el gobiernu d'Álvarez Areces quiso impulsar una llei pa la implantación nel territoriu asturianu del ocalitu blancu, especie más resistente n'altura qu'el ocalitu coloráu, qu'invade Asturies anguaño.

Sí, digo invasión. La Nueva España del martes 19 de febreru, espublizaba la siguiente noticia: "El eucalipto arrasa en Asturias". Y desplicaba: "La especie invasora se ha expandido en una década hasta el nivel previsto para 2053, mientras que los árboles autóctonos perdieron 18.000 hectáreas". Ná menos que 60.311 hectaries de suelu forestal asturianu tan siendo usaes pa la esplotación d'eucaliptu, d'un total de 434.800 ha, casi'l 14%. Solo'l castañu tien más implantación. Ensin embargu, toes estes hectaries tan por embaxu'l llimite de los 800 metros, tope másimu pa la supervivencia de la especie.

Yo creo que les cifren falen de por sí. UPyD anda desnortáu per Asturies, tratando d'imponer criterios productivos non apropiaos pal territoriu, de la mano d'una FSA que yá va tiempu que lo vien demostrando.

Incineradora.

La xestión de residuos ye ún de los primeros problemes del ser humanu dende qu'esiste como especie. Anguaño, la basura empuerca buena parte del planeta y, concretamente les ciudaes, xeneren un volumen tremendu de desperdicios, nomaos residuos sólidos urbanos.

Como fundamentu pa evitar que la vida se nos enllene de basoria, en tolos colexos d'Europa s'enseña a los escolinos les "3 erres": Reducir, Reutilizar y Reciclar (esiste una cuarta erre, Reparar, mui mal vista nos sistemas capitalistes que cayó nel escaezu gracies a la obsolescencia programada que domina les nuestres vides). La idega ye que, cuanto menos residuu se produzca, meyor; quien nun ensucia, nun tien que llimpiar. Enantes de desechalo, mirar por dai otru usu, ensin camudar la so estructura; un tarru de cristal bien pue usase delles veces pa guardar coses en vez d'usar fiambreres de plásticu. Por último, enantes que desfaese d'ello, ye preferible camudar la so esencia pa aprovechar los materiales que lu formen, lo que ye reciclar. Reciclar ye la pior solución, porque se gasta enerxía nel procesu, pero ye la que gocia de más puxu, porque da perres (direutamente en cuantes al cartón y al papel y gracies a ayudes públiques, respeuto a otros materiales).

En 1982, creyóse n'Asturies, por asociación d'ocho conceyos col Principáu, el Consorcio para la Gestión de Residuos Sólidos de Asturias (COGERSA) y, dende 1985, escomenzó la esplotación del vertederu central del valle la Zoreda, que captaba y aprovechaba'l biogás producíu pola descomposición de la basoria. Implementaba un programa de recoyía de residuos plategáu na incorporación de contenedores de distintos colores, asitiaos na cai de forma permanente y a la vista, y horarios zarraos, anque dexaba llibertá nestos últimos a los conceyos, sigún el so tamañu y población. L'oxetivu yera finar cola proliferación de vertederos nos soburbios urbanos y el déficit hixénicu ya ecolóxicu que trayíen consigo y concienciar a la xente de la necesidá de nun enllenar la cai de basura, separando los residuos que nun quedama más remediu que tirar.

Dio los sos frutos. El sistema de recoyía de basures de Xixón fue modélicu y la ciudá rebaxó la cantidá deresiduos sólidos urbanos producíos, amás de calar ente la xente cómo y cuándo había que tirar la bosaria. COGERSA espardió'l so llabor a nuevos planes de xestión de residuos (animales, vexetales, peligrosos, llixeros...) y solucionó el tratamientu de lixiviados. Yera un vertederu modélicu que tolos neños d'Asturies conocíen, gracies a la apertura que supusieron les aules didáutiques pa escolinos. Pero a primeros del sieglu XXI, la política comunitaria en tratamientu de basories camudó pa priorizar la incineración de residuos. Y les autoridaes asturianes, fueron detrás, como perrín sollerte a la voz del amu.

Esti sistema, dende'l puntu de vista mediuambiental, ye pior: la quema de la basoria ye indiscriminada porque, anque caltién el sistema de separación, la xente pierde la conciencia de que ta emporquiando, al non ser visible l'acumulación; por otra parte, los residuos nun desapaecen, porque los fumos espárdense incontrolaos y la ceniza, d'alta tóxicidá y que representa alrodiu'l 30% ha ser almacenada, anque non pue ser a la vista; por último, aprovéchase pa creyar enerxía llétrica, lo que supón un plus pa la xeneración de más basoria al necesitar más combustible pa ser más rentable (porque ye un tratamientu munchu más caru).

La incineradora yá ye una realidá, gracies al Gobiernu socialista del Principáu y a los sos dos socios, UPyD y IU (que s'opuso al primer proyeutu d'una planta grande n'Asturies, pero que nun dixo ná al respeuto), en connivencia del PP y a les tímides protestes de FAC. L'eufemismu pa nomala va ser "Planta de valorización enerxética". Pero los cielos d'Asturies van resintise otra vuelta.

(Nun voi falar de la tema'l tratu cinexéticu del llobu o de la xestión nefasta del osu pardu. De la marcha p'atrás de la xestión del parque de Fuentes del Narcea o la esplotación del yacimientu d'oru de Salave, tampocu. Dexaré pa prau los accidentes mediuambientales que se produxeron nos sableros de Carreño trés la fuga de galipote de la térmica d'Aboñu, o cola puesta en marcha del Altu Fornu B d'Arcelor en Veriña o poles fugues de mercuriu d'Asturiana de Zinc n'Avilés. Temes toes elles suficientes de por sí pa que, nun país civilizáu y decente, dimitieren los sos dirixentes mediuambientales. Más tovía si esi país llevara presumiendo décades de ser un paraísu natural)

Sobres.

La noticia la selmana (y, si m'apuren, del añu) ye la implicación del antiguu tesoreru del Partido Popular nun escándalu financieru que chisca a la plana mayor del partíu, dende antiguos ministros como Cascos, hasta los actuales líderes, como'l propiu Rajoy. Al paecer, Luis Bárcenas -nome del ex-ayalgueru- fízose con una fortuna de 22 millones d'euros que guardara, a traviés d'una empresa panameña, en Suiza y, gracies a la llexislación favorable en materia de captación de valores opacos del nuevu gobiernu popular, (vamos, l'amnistía fiscal), declaró un millonucu y sacó diez en llimpio. El casu ye que nun ta claro d'onde apaecieron tantes perres y, como ye normal, piénsase que yera al recostín de la financiación del partíu, escamada la xente con casos como la trama "Gürtel". 

Yo creo que yá se tardaba en falar, n'esti estáu, de la financiación de los partíos políticos, dalgo tan visiego como les propies cuentes de los políticos na Confederación Helvética. La llei permite que se caltengan en privao los datos, lo que priva al ciudadanu de conocer la cara B. Pero non de les cuentes, que ye lo de menos; si non de los programes. Sabiendo d'u vienen les perres, conozse pa quien llexislen, a quien defienden y a quien beneficien los partíos. Tolos partíos. Y por eso dengún se quier meter a sacu n'ello: les propuestes de tramitaciones de lleis de tresparencia quédense siempre nos políticos a nivel particular, nunca nun entren a valorar los ingresos de los partíos.

Les democracies representatives tienen esos riesgos. El ciudadanu vota y piensa qu'el partíu va representalu, ensin saber (o ensin querer vreyer) que los partíos van a beneficiar intereses d'empreses farmacéutiques (calteniendo precios más elevaos que nel restu Europa, lo que fai que la Sanidá salga más caro), enerxétiques (sofitando los cárteles ya oligopolios de les mesmes) y financieres (al abrir al mercáu tou tipu de bienes, dende la factura llétrica a la deuda pública). El casu ye que les factures pagámosles ente toos y los beneficios van a los bolsiyos d'unos pocos. Dempués, sorprendíos, cayemos na cuenta de que los políticos, al finar de los sos cargos públicos, entren nuna empresa d'ún d'estos tres sectores como asesores o directivos. 

A esto yo llámolo cobrar réditos. Y paezme peor, muncho peor, que pagar con sobres. Nel primer casu (igual que cuando se fai una mala xestión no público, dalgo que tampoco sal a la lluz), los políticos nunca nun van ser imputaos y solo la presión social énte ún con moral de serviciu (o blindáu por otres empreses) va conseguir la dimisión nel nuevu puestu. Nel otru casu, al menos, pue topase con un xuez y un fiscal con ganes de complicase la vida y ser imputáu, xulgáu y condergáu. (La pena ye que les polítiques d'indultos n'España ye muncho más ventayosa p'aquellos que tan averaos al poder que pal restu de ciudadanos)

Esto va quedar como un casu personal, como un pillu que se quiso enriquecer. Nun esperemos que dengún partíu, de los que xuega na tómbola democrática colos cartones pagaos por terceros, se ponga a prender el ventilador delantre'l cuchu, porque diba chisca-yos a toos y, el primeru, elli mesmu. Y güeyu col que se mueva, que va fuera. Nun sedría la primer vez. Por llástima, tampoco nun va ser la última.

La casa pol teyáu

Llevo munchu tiempu viendo como esta "democracia" va quedando nuna cadarma nominal que mui poco tien que ver colos valores etimolóxicos del términu: gobiernu del pueblu. La capacidá de decisión d'un ciudadanu nesti estáu ye mínima. Cierto que la posibilidá de presentase a unes elecciones ye llibre a tolos que cumplan unos requisitos mínimos, pero les estructures electorales son tan zarraes, que la voz del pueblu solo queda espeyada fuera de los calces sistémicos.Y tovía se tan zarrando más.

Dempués de munches negociaciones, paez qu'el día 15 de xineru, PP y PSOE van llegar a roblar el primer pactu d'Estáu de la era Rajoy: la nueva Llei de Bases de Réximen Llocal. Les grandes cabeceres estatales abríen col populismu d'una midía que llimitará'l salariu de los alcaldes de les ciudaes más importantes. Embaxu esi espíritu d'austeridá, apaecía tamién la midía de la supresión de les mancomunidaes, aplaudía pola mayor parte de los mamporreros mediáticos y polos siguidores de la doctrina "menos políticos, meyor xestión". Pero naide facía la llecura de lo que braeramente supón: más centralismu, menos capacidá pa les persones pa mirar polos sos drechos.

La hipótesis onde se sofita esti movimientu ye cenciella: cuantes menos alministraciones públiques, menos políticos, asesores, cargos públicos y funcionarios hai que sustentar, menos burocracia y, sobre too, menos duplicidaes; entós, ná meyor que suprimir instituciones y emponderar a unes poques con tolos servicios.

A simple vista, paez una política efeutiva. Mirao con detenimientu, ye un discursu simplemente efeutista, que nun entra realmente a tocar los problemes de raigón (la radicalidá que ta tan mal vista nestos tiempos). En vez de reestrucutrar, búscase cortalo too ensin estudiar en profundidá lo que se trata, como si too fuera lo mesmo, faciendo repartos a lo Conferencia de Berlín que queden con precioses llinies rectes enriba'l papel, pero que ponen más torgues tovía a les persones qu'han de vivir día a día estes midíes.

Ensin embargo, España ye un país de fatos y de vagos. De fatos, porque se nos engaña a la primera. Y de vagos, porque tol mundiu aceuta ensin rechistar esi engañu, cuando estos nun tienen que ver direutamente col so bolsiellu (más tovía cuando paez que ye bueno pal bolsiellu). La idega de que "yo soi apolíticu y que me lo den fecho too, que pa eso lo cobren", triunfa. Cuando les reformes que somorguien a ún danse seliquino, bien untaes en vaselina fresquino pa que nun roce y coles pallabrines melgueres sosurraes al oyíu polos politiquinos guais, reformistes y/o modernos y guapos a lo Cantó o a lo Cayo Lara (sobre gustos...), entren ensin dificultá. Y meyor tovía cuando vienen acompañaes de reformes dures que sí nos toquen el bolsiellu direutamente. Ná meyor que la subida del IVA pa tapar que nos ficieron esclavos.

Gracies a too ello, la hipótesis de la reducción d'instituciones en favor del bien públicu ta triunfando descomanadamente y yá ta dando los sos frutos.

Fai unos años, cuando la última etapa del gobiernu de Zapatero, aprobóse una midía que condenaba la democracia abierta a la muerte: la supresión de los conceyos abiertos, onde la xente de los municipios más pequeños de 300 habitantes podíen establecer les sos normes de forma direuta, ensin intervencionismu de partíu dalu. Pasóse a una municipalidá de tres conceyales profesionales, ún de los cuales habría ser l'alcalde, entendiendo que la dedicación esclusiva yera más rentable pal grupu qu'el grupu mesmu. La midía fue recibida con entusiasmu por tolos partíos congresuales del momentu. Suponía l'adiós de cualisquier tipu de democracia direuta n'España, pero diba dar puestinos y perres d'onde antes nun se podíen sacar.

Dempués, apaeció la teoría de la unificación de municipios. Si los conceyos son pequeños, nun son quien p'afrontar los gastos que conlleven los servicios que tienen que prestar. En vez d'apostase pola formación de mancomunidaes que los xestionasen conxuntamente y compartir empleaos y empreses municipales, entendióse que menguar el númberu de conceyos yera la solución. Esti país de fatos sabe restar y sabe que si tienes dos y te quiten ún, queda ún; pero escaez que si ente dos sumen 500 y se xunten, siguen sumando 500. La xunión sistemática de municipios nun creya un municipiu grande con meyores servicios, sinon un municipiu desestructuráu, colos servicios centralizaos nuna capital (lo que provocará una emigración a la cabecera) o repartíos en delles cabeceres (lo que implicará la mobilidá forzosa de les persones qu'enantes teníen l'accesu cercanu) o, finalmente, una multiplicidá na xestión por ufiertase too en dellos centros (polo que solo s'aforrará n'identidá). La esistencia de los conceyos nun ye caprichu (al menos n'Asturies); la historia de munchos d'ellos fala de la llucha del pueblu polos sos drechos y l'esfuerzu que supuso algamalos. Pero les identidaes culturales (y más n'Asturies) tienen mala prensa y triunfen les burocracies fates. Les xuniones han dase solamente cuando seya por consensu ente municipios, non por sistema, y una vez agotaes toles fórmules posibles de xestión conxunta.

(EQUO Avilés, defensora d'estes midíes, caltuvo conmigo una conversación pol twitter onde me dicía que la xunión de conceyos yera la rempuesta a una reivindicación ciudadana de 30 años -anque esto fuera dalgo infundao y discurrío por EQUO Avilés-, y que nun atentaba contra les identidaes culturales, porque estes calteníense nes parroquies rurales) El siguiente pasu fue l'afogamientu de les parroquies rurales. Como son entidaes non gubernamentales y ensin ánimu de lucru, nun son consideraes entidaes alministratives (anque la llexislación asturiana considerales instituciones de xestión). Amás, son asociatives, polo que los sos representantes son escoyíos por votación direuta y han rendir cuentes a la asamblea. Fieden a democracia direuta y, claro, molesten. Asina que les partides públiques van reducise si nun camuda'l modelu de xestión p'hacia una profesionalización de los responsables, dalgo que, como espuse más enriba, nun se pue faer pola propia cadarma estatutaria de les parroquies. Toca desapaecer, pero por asfixia. 

Quitando parroquies, desapaeciendo les mancomunidaes y creyando macro-conceyos, les persones queden desaveraes de la toma de decisiones dafechu (anque yá lo taben pol sistema democráticu de representación partidista, agora l'abilsu ye físicu). La siguiente estaya ye l'autonomía. Y nel Principáu d'Asturies, esta autonomía ta mui enferma: sofitáu'l Gobiernu nun partíu como UPyD que quier la so desapaición, siendo'l partíu gobernante sumamente centraliegu y teniendo al so presidente preocupáu por "faer España dende Asturies", con una oposición de dreches españolistes, y intervenida económicamente pola alministración central dende que s'aceutara el Fondo de Liquidez Autonómica. La tema "autonomía" da pa falar muncho, pero nun ye l'alministración más afayaíza pal ciudadanu asturianu, nin de lloñe.

Ún de los refranes más escaecíos, gracies a la burbuya inmobiliaria, ye aquel que diz que "nun se pue escomenzar la casa pol teyáu". Tampoco se pue sofitar el teyáu ensin cimientos. Y el cimientu de la democracia ye la xente. Esto tien qu'esbarrumbase, yá.