Falaben en Ser Gijón del programa "Gijón Creativo", una iniciativa del ayuntamientu xixonés pa impulsar la industria cultural y creativa de la ciudá. A parte de les polémiques pola so implantación y el so retardu o non, préstame abondo lo que diba sintiendo porque pémeque l'impautu económicu que xenera l'actividá cultural nuna ciudá, nuna sociedá, tá poco valorao n'Asturies.
Y tien el so porqué: n'Asturies, la "Cultura" vese como un énte abstrautu propiu d'unes clases erudites, que lu "comparten" col restu pa que nun caiga na vulgaridá. Pero esa forma de compartir "Cultura", amuesa y caltién un desaveramientu interesáu, que procura un estatus bultable: la "Cultura" comunícase de forma vertical y unidireicionalmente. Atopamos, poro, qu'hai un "clase culta" y una "clase non culta". D'esta miente, la xera política d'averar a les clases populares a la "Cultura" valió p'asentar el privilexu y p'acabar d'asitiar el focu xenerador. La "Democratización de la Cultura" fracasó, faciendo que creciera'l "Despotismu Illustráu" hasta faelu impresacindible.
Porque la "Cultura", n'Asturies, establécenla delles persones bien determinaes dientro una elite cultural. Esa elite cultural (endogámica y autoalimentada) ye quien pa marcar el bien faer y el bien pensar (y hasta'l bien ser). Y esta situación acéutase ciegamente pol restu la sociedá asturiana: son la fonte del Saber y, el restu, un recipiente vacíu qu'ha enllenase col so conocimientu. El problema ye qu'esta fórmula sirve, más que pa esparder la Cultura ente la xente, pa caltener el poder en dellos apellíos interesaos.
Esta situación desplica la impunidá de dellos miembros d'esta inteligentsia dientro de ciertes instituciones culturales públiques, como la Universidá d'Uviéu. Asina, nun ye difícil atopar caderalgos universitarios calificando de "paletos" a quienes nun actúen como ellos entienden que ye de razón y que nun solo nun reciban reprenda dala por parte'l rectoráu, sinón que s'escuden en la llibertá d'espresión y aición que protesten de los otros.
Y nun ye dificil atopalo porque les instituciones (polítiques, sociales, culturales) asturianes tán cómodes nesti apartheid cultural. Pesie a que, inevitablemente, tea comunicáu con otres estayes de la realidá y sofite una tapecía desigualdá social, daquella que france la másima llibertaria "naide ye igual a otru; pero toos valimos lo mesmo". N'Asturies, toos somos iguales, pero nun toos valemos lo mesmo.
Ye esti'l motivu pol que llevo tou esti camientu entecominando'l términu "Cultura". Si la Cultura nun sirve pa permitir la espresión y el crecimientu del alma individual y coleutiva (tirando del conceutu "cultura animi" de Cicerón), sinón que ta empobinada al sofitu de los privilexos d'una elite direutora, dexa de selo. N'Asturies, la "Cultura" ta caciquilmente entecominada.
Quiciabes, l'esporpolle d'una visión económica de la Cultura, almitiría nueves formes nel tratu social a la mesma. Paez mentira que, nuna época tán materialista, nun esista n'Asturies una conciencia de les Artes, y la so divulgación, como industria xeneradora de riqueza. Si esistiere, nun s'entenderíen munches polítiques fiscales, llaborales, turístiques, culturales, educatives, audiovisuales y empresariales, tanto autonómiques como llocales, que dan la espalda a esti seutor económicu. L'oxetivu sedría faer de la Cultura un factor y un mediu d'arrequecimientu económicu de tola sociedá.
D'esta manera, pol bolsiyu (que favorez en munchos l'aceutación a la trágala de delles coses aberrantes), la Cultura abriríase al enfotu de más xente, atrayío, nun solo poles sos condiciones intrínsiques animistes, tamién poles crematístiques, pero dambes diendo garraes de la mano. Asina, diben emponderase a bien de persones qu'anguaño viven les espresiones culturales que-yos son propies como un folklorismu aculturizáu y avergoñante.
Porque, seyamos sinceros: ¿quién diba ser el guapu de tar a la contra de la oficialidá del asturianu, si fuere de dominiu públicu qu'una industria cultural alrodiu diba dar perres y puestos de trabayu?
Siempre se fala de que toles estayes de la vida dependen de les perres pa ser o non ser; que los mercaos marquen l'actualidá política; que too se vende y se merca. Pues bien, faigamos posibilismu de la situación y usemos les perres como atractivu pa un oxetivu mayor: la braera democratización de la Cultura. Que la Cultura seya fecha por tola sociedá y esfrutada por tola sociedá. "Gijón Creativo" ye un empiezu.
(Que la Cultura llegue a ser democrática poles perres. Qué tristes estos medios y estos camientos. Pero qué triste ye, tamién, esta realidá que vivimos.)
Nadie te impide consumir cualquier manifestación cultural de las que se ofrecen. Nadie te impide crear una empresa de ese ámbito y ofertar esa cultura que tanto amas a otras personas con tus mismos gustos o fines. Lo que pasa es que intuyo que lo que quieres es que "lo público" se encargue de dar satisfacción a tus i terewses o gustos particulares.
ResponderEliminarFálla-y la intuición severamente. Quiciabes seya porque nun fui quien a espresame con claridá suficiente.
EliminarPrimero. En dengún momentu faigo un alegatu sobre los míos intereses particulares. Asina que, muncho menos, toi pretendiendo que se me financien con dineru públicu; dalgo que si fai la elite cultural que critico.
Segundo. Toi proponiendo l'emponderamientu de la xente como actor cultural, llueñe d'apostar por una cultura de consumu de lo ufiertao por terceros interesaos. Poro, nun se trata de gustos o fines, nin de persones afines: trátase de que caún puea ser motor de cultura y non solo un consumidor aculturizáu, como asocede anguaño n'Asturies.
Tercero. Les empreses culturales, como toes, han buscar un beneficiu económicu. Si la sociedá onde s'implanten carez de formación cultural propia, y nel casu asturianu alcuéntrase rehén de los intereses d'una elite, difícilmente va poder algamar ecu nella y, poro, sosistir.
Y cuarto. La mío tesis ye que, programes empresariales d'esti tipu, qu'apoyen l'actividá cultural como fechu d'arriquecimientu económicu, direuru y indireutu, puen valir pa que la sociedá asturiana s'interese pola creación cultural y que-y valga, anque seya per un camín tan prosáicu como'l crematísticu, pa emponderase culturalmente.
Espero que con estes desplicaciones les mis idegues-y quedaren clares pa que nun se vea obligáu a caciplar intereses que nun espreso en dengún párrafu de los escritos nesti artículu y que solo se puen comprender dende una postura aculturadora, encerrizada nun inmovilismu mui interesáu.
Un saludu.