21 dic 2013

Albuertu


Ayer, vienres 20 d'avientu de 2013, el Gobiernu del Estáu decidió aprobar una reforma de la llei del albuertu. A partir d'esti momentu, n'España les muyeres solo van poder interrumpir el so embarazu si cumplen dalguna de les dos premises permitíes: "si ye necesariu por esistir grave peligru pa la vida o la salú física o psíquica de la muyer" o que "l'embarazu seya consecuencia d'un fechu constitutivu d'un delitu contra la llibertá sesual de la muyer". 

Esti plantegamientu fai retroceder la situación al añu 1985, cuando la primer llei del albuertu permitíalu en casu de graves malformaciones del fetu. Y dexala a años lluz de la llei de 2010, cuando s'almitía la interrupción llibre del embarazu hasta les primeres 14 selmanes y hasta les 22, en casu de graves malformaciones del fetu o peligru pa la salú de la muyer.

Precisamente nel añu 2010, cuando salió la última llei en vixencia hasta ayer, púnxeme a redactar una entrada pa esti blogue que, finalmente, nun fui quien a completar. Pesie a que, al andar a la gueta d'argumentación a favor y en contra dende puntos de vista históricos, relixosos (nun solo católicos, evidentemente), morales y filosóficos y toes llevaronme a pensar que l'abortu ye dalgo horrible, indeseyable, espantoso. Tengo que dicir que me quedé cola sensación de ser afortunáu por nunca nun tener que veme nel trance de decidir si albortar o non. Yera tan grave l'asuntu que preferí nun espublizar ná. De toes formes, aquella lleí presumíala xusta pa quien de verdá sí tenía que decidir: la muyer embarazada.

Y solo la muyer embarazada. Porque ye esa muyer la que se pue ver cola vida cambiada nunos meses ensin qu'ella lo tuviere decidío; quien cuerre con tola responsabilidá de la estabilidá física, emocional, económica y familiar respeutu al futurible neñu; y quien va tener que faer frente a una sociedá que nun siempre atiende a razones. Ye ella la única que tien que llevar dientru un ser en formación y decidir pol so futuru. Namái qu'ella.

Porque, cuando surde esti debate, pónense na mesma bañanza los drechos del non-natu y la situación d'una muyer, ensin valorar malpenes que la realidá d'una muyer pasa por plantegase la maternidá y que solo si esa decisión se fai en llibertá ye un drechu. Una muyer qu'ha de vese madre por obligación, paga una conderga. Y eso, ye inxusto. 

Anque tamién lo ye que muerra un inocente, tamién. Pueo entender dalgunes postures de los coleutivos pro-vida, que defienden el drechu a la vida del fetu por enriba del de la madre. Pero les sos postures han quedar solamente nel ámbitu priváu. Énte una madre que nun quiera albortar poniéndose en peligru ella mesma, solo pueo deseya-y que reciba tol sofitu que necesite pa la so empresa y que tenga ésitu. Pero nun voi poder entender que lo tenga que faer forzada por naide que nun seya ella mesma. Tovía más, por una llexislación que-y niega la so llibertá como muyer. Asina que siempre antepondré'l drechu a decidir de la madre sobre'l so cuerpu  al drechu a la esistencia d'un non-natu.

Poro, entiendo como un drechu, (anque nun lu recueya esplícitamente dengún país, espero que pronto lo faiga), la voluntá d'una madre pa decidir sobre'l so futuru y el de la criatura que lleva dientro, ensin que naide faiga puxu escontra esa voluntá. Y, en tolos casos d'esa suposición, habrá tener la madre la mayor proteición por parte la sociedá, facilitándo-y la toma de decisión y ufriéndo-y les condiciones necesaries pa que consiga, de la forma más ventayosa, el so propósitu: tanto si quier continuar col embarazu, apurriéndo-y los medios médicos y sanitarios, económicos, llaborales y sociales pa qu'el fetu evolucione con éxitu y ella calténgase saludable; como si quier interrumpilu, pa que nun ponga en peligru la so vida, pa que supere'l trance físicu y psicolóxicu y pa que nun seya xuzgada pola so comunidá.
 
Anguaño ábrese una situación onde les muyeres acaben de ver amenorgaes les sos llexítimes reivindicaciones d'igualdá (que solo pue ser entendida como equivalencia en'oportunidaes pa esfrutar de los drechos, non que tolos individuos seyan uniformaos): les muyeres son persones de segunda categoría n'España, porque nun tienen la potestá de decidir qué faer col so cuerpu. Toa una violación institucional, qu'obliga a les muyeres a parir. Una situación que bien podía ser recoyía como un fechu constitutivu d'un delitu contra la llibertá sesual de la muyer.

Pero amás, y d'una forma más urxente (ensin quitar un rispiu de la urxencia que tien la pérdida tanxible de drechos), ábrase una situación de peligru sanitariu al tratar de tapar con un marcu d'illegalidá, una realidá social como ye l'abuertu. Solo espero que nun muerra denguna muyer por interrumpir el so embarazu nuna situación antihixenica o por carencia de los medios necesarios. Que quede na conciencia, yá que la llexislación los exonera, d'aquellos que promovieron y aprobaron esta llei.

Mientres, les muyeres tendrán que siguir plantegándose si albortar o non, por temor a les consecuencies penales. Como si esi fechu nun carretara bien de torgues, de penalidaes y d'inxusticies.

10 sept 2013

Pola soberanía y el cambiu social: los idus de setiembre



La Roma sobre la cual edificare la mio vida nun esiste en sí mesma, menos como aglomeración d'edificios más o menos grandes, de ciudadanos más o menos industriosos que los d'otra ciudá. La inundación o la necedá, el fueu y la llocura, puen destruyila en cualisquier momentu. Yo mesmu caciplo que toi atáu a ella por herencia y crianza, pero tales llazos nun tienen más significáu que la barba qu'afeito del mi rostru. El Senáu y los cónsules llamáronme a defendela; tamién Vercingétorix defendió les Galies. Non, Roma llegó a ser una ciudá pa min solo en cuantes quise, como munchos lo ficieren enantes que yo, da-y un sintíu, y Roma pue esistir pa min solo hasta onde y diere forma na mi idega. Agora veo que por años creyí puerilmente qu'amaba Roma y que yera'l mio deber amar Roma porque yera romanu..., como si fuera posible o dignu de respetu amar acumulaciones de piedres y multitúes d'homes y muyeres. Nun tamos en relación con ná hasta que nun lo envolvemos nún significáu, nin sabemos de cierto qué ye esi significáu hasta que trabayamos con esfuerciu pa imprimilu so l'oxetu.
Esti párrafu apaez na obra "Los idus de marzo" del autor norteamericanu Thornton Wilder, que describe de forma epistolar los últimos meses de la vida y el gobiernu de Xuliu César, y trátase d'una parte del Diariu-carta de César a Luciu Mamiliu Turrinu, na islla de Capri, una de les munches obres apócrifes coles que trabaya l'autor pa dar forma a la so novela.

Esta fue una de les mios llectures braniegues y, fuera coincidencia o non, esti párrafu llegó a los mios güeyos el día 8 setiembre pela nueche, día de la conmemoración relixosa de la Virxen de Cuadonga y de la fiesta institucional del Día d'Asturies. Pero, tamién, y por primer vez en munchu tiempu, día d'averamientu de los partíos ya organizaciones soberanistes d'izquierda d'Asturies, que cellebraron una manifestación peles cais de Xixón so'l nome de "Asturies decide", xunto con dellos partios y sindicatos anticapitalistes. Esti eventu fue noticiáu de refilón polos medios de comunicación tradicionales d'Asturies, llegando, en dalgunos casos, a tracamundiar el conceutu "soberanismu" col de "nacionalismu". Y si bien, como me dixeron dalgunes persones al rodiu, hasta dientro d'esti movimientu asturianista estos conceutos nun tan suficientemente esclariaos, nun son nin muncho menos lo mesmo. Por eso traigo estes llinies que Wilder pon en manes de César, porque val de referencia p'alcontrar la diferencia ente dambes.

De la qu'estudiaba, dende esa conceición materialista histórica que lo desplica too dende un reduccionismu ablucante, definíase al nacionalismu dende una vertiente solo entendible dende'l sentimentalismu. Cribando interesadamente les influyencies revolucionaries franceses, desnudábase al nacionalismu del componente racional que-y surdía de la voluntá de los individuos al asociase en pueblos, pa quedar solo nun marafundiu d'artificios románticos, que cualisquier razonamientu lóxicu yera capaz de baltar. El patriotismu, la historia, el padremoñu o la cultura nun yeren finxos suficientes pa caltener la cohesión nacional, dalgo absurdo cuando la oposición nun s'alcuentra entre unos pueblos y otros, sinón ente unes clases y otres.

Pero a min chocábame, dempués de sintir a los mios profesores (y a otros eruditos, docentes o non, de l'Asturies de finales del sieglu pasáu) falar nestos términos, velos ablucase polos males d'España (fuere del réximen que fuere). Como si aquella nun fuere una artificiosa nación sofitada nos pegoyos del patriotismu, la historia, el padremoñu y la cultura, ensin un intentu dalu de tamizalos nel filtru la razón, que la frañaría. Si'l nacionalismu nun podía furrular pa unes realidaes, tampoco pa les otres. O nun se yera coherente. O, simplemente, nin siquiera se facía por atendeles, por miéu a cayer nel etnocidiu teóricu qu'amosaba Gustavo Bueno na so España frente a Europa, onde unes realidaes "buenes" habían acaparar l'espaciu d'otres realidaes "males". Lo natural yera la nación española y el materialismu históricu de la Universidá d'Uviéu asina lu llexitimaba, dalgo que s'espeyaba nel restu la sociedá asturiana y que llegó hasta los nuestros díes, ufriendo la idega de que nun esiste'l nacionalismu español y que cualisquier otra espresión identitaria ye negativa, impositiva y perxudicial. (Esi criteriu uniformador y aculturizante, fai que nun me choque la identificación ente los conceutos "soberanismu" y "nacionalismu")

Durante dellos años, traté de confrontar el mio sentimientu asturianista, sofitaáu nos símbolos que me llevaben a ver que la realidá de la mio tierra ye, nun ya diferente, sinón mui estremada, a les realidaes d'al rodiu y a la española, en particular, con esos principios racionalizantes que la esfoyaben de fundamentos (como al restu de les realidaes, anque nun s'aplicaren más que pa dalgunos), p'alcontrar unos finxos que me llevaren a desplicar la mio realidá d'una forma universal. Pero viendo que yo nin vivo en Nueva York, nin en Papúa, nin en Chiclana, llegué a la conclusión de que nin el propiu materialismu históricu se permite la pérdida total d'esti relativismu "nacional" (por nomalu de dalguna forma averada a la mio idega). Y alcontré nel conceutu de "soberanismu" una solución práutica a esa confrontación.

De forma mui similar a lo que s'espón nel párrafu cabeceru, la mio implicación pa con Asturies nun me la da'l llugar onde nací (la necencia), nin l'apegu pola so cultura propia (la crianza), nin l'amor patrióticu (el deber amar), nin la sensibilidá polos sos símbolos (la herencia), porque'l restu países tamién tienen los mesmos aspeutos onde poder atopase (salvo'l nacimientu, anque siempre pensé qu'esi sucesu ye una imposición y non una suerte); sinón que procede del conocimientu de la so realidá social actual, establecida por causes xeográfiques (situación, orografía, clima, númberu d'habitantes...), que desendolcaron nunes históriques (relaición col poder, relixón, movimientu obreru...) y culturales (llingua, Arte, folclor, poblamientu, vezos...). Una realidá social formada por problemes específicos (esto ye, que inciden d'una mena particular na sociedá asturiana, que nun ta aisllada del restu), qu'alcuentren dificil salida en soluciones que vienen dende afuera (lo que nun significa qu'heban desaniciase pol so orixen).

La soberanía nun ye otra cosa qu'emponderación del individuu: faese consciente de la realidá onde vive y trabayar por solucionar los sos problemes particulares pola so mano. Lo que diz César "Nun tamos en relación con ná hasta que nun lo envolvemos nún significáu, nin sabemos de cierto qué ye esi significáu hasta que trabayamos con esfuerciu pa imprimilu so l'oxetu".

Dientro d'esta soberanía nun faen falta símbolos históricos qu'espeyen un momentu gloriosu que fue, o culturales o relixosos a onde dirixise si dalgún s'alcuentra perdíu nel camín, porque se cuenta col raigón inmediatu de la realidá onde se vive, sitiu onde estos ítems tienen sintíu por sí mesmos. (Asina, la llingua asturiana nun habría guardase pa que nun s'escaeciera lo que facíen los güelos o como forma d'autoafirmación y bien cultural, sinón qu'habría respetase como drechu llexítimu de quien la quier usar; asina, les parroquies rurales nun han vese protexíes por ser una forma de gobiernu tradicional, sinón enllenes de competencies por tratase de la forma de xestión comunal más averada al individuu) Supérase esi conceutu "sentimental" de la simboloxía grupal de les coses col qu'el materialismu definía'l movimientu nacionalista, pa que l'enfotu recaiga nel grupu social, onde entra, voluntaria y emponderadamente, l'individuu.

Como consecuencia, el soberanismu nun ye solo algamar una independencia política pa un pueblu, sinón que tien como oxetivu la creyación d'una sociedá igualitaria, o nun ye soberanismu. L'emponderamientu ye pal individuu que s'alcuentra dientro la sociedá y comprometíu cola mesma, non pa un ente abstractu que caltenga desigualdaes socioeconómiques similares a les esistentes enantes.

Nun voi estendeme más. Esta idega de mío del soberanismu como emponderamientu del individuu nuna realidá social tien, evidentemente, múltiples estayes, porque afeuta a tol ámbitu social. Nun voi entrar n'elles equí, porque solo quería dar un apunte que permitiere acolumbrar la diferencia ente "nacionalismu" y "soberanismu".

La xunión del movimientu políticu soberanista asturianu l'8 de setiembre en Xixón col eventu "Asturies decide" fue ún de los primeros pasos na gueta d'esa soberanía. Yo fui al mesmu, a títulu personal y ensin sofitar a dengún convocante, pesie a lo cual vime identificáu nel cartafueyu final. Y fui dándo-y esi significáu d'escomenzar a edificar una Asturies que llegue a ser dalgo más qu'una aglomeración d'edificios más o menos grandes, de ciudadanos más o menos industriosos que los d'otru país. Una Asturies soberana.

4 jul 2013

La revolución exipcia


Nel contestu de les nomaes "Primaveres árabes" del añu 2011, Exiptu entamó un procesu remozador del sistema políticu que llevaba imperando dende la so independencia como protectoráu británicu y en sostitución del reinu: una república presidencialista consistente nel gobiernu d'un personaxe laicu toopoderosu sofitáu nel poder militar. Primero Nasser, dempués el-Sadat y, finalmente, Mubarak. Cola fin d'esti réximen, dióse pasu a un procesu democratizador, col oxetivu de qu'el pueblu, que se soblevara, algamara'l poder. El resultáu fue un proyeutu constituyente tuteláu pol exércitu y unes elecciones que dieron el poder a los Hermanos Musulmanes y la presidencia del gobiernu a Mohammed Morsi, el 24 de xunu de 2012. Un añu dempués, la xente volvió a salir a les cais a protestar pola situación social, económica y política pa pidir cambios al gobiernu, que permaneció inmóvil hasta que l'exércitu dio un golpe d'Estáu apoyando al pueblu, destituyendo a Morsi y nomando un nuevu gobiernu transitoriu.

Más o menos, estos son los fechos que tán trescendiendo dende los medios de prensa y que quedarán nos llibros d'Historia. Les interpretaciones van dende aquellos qu'entienden que los güelpes d'Estáu militares son siempre malos, ensin parase a analizar les circunstancies que los motiven nin a quiénes apoyen, a aquellos que ven con buenos güeyos quitar el poder a tou tipu de grupu islamista pol peligru que pue suponer pa Occidente, pasando polos que ven la mano d'Estaos Xuníos detrás o los que tan ateorizaos porque una revolución popular puea finar col status quo democráticu del so estáu. Pero son necesaries delles esclariaciones.

La primera ye que la situación d'Exiptu ye bien diferente a la del restu países de la redolada. Ye'l país árabe más pobláu ya influyente del mundu, controla l'importantísimu pasu estratéxicu del Canal de Suez y ye ún de los más importantes aliaos d'Occidente, siendo'l segundu estáu más financiáu polos Estaos Xuníos y la OTAN, dempués d'Israel, tanto con Mubarak como hasta agora con Morsi. En ná nun se parez a Túnez, nin a Siria.

La segunda ye la importancia del exércitu. Mursi fue'l primer gobernante desvinculáu del exércitu en tola hestoria d'exiptu, dende los faraones. L'exércitu exipciu ye ún de los principales axentes económicos del estáu, llegando los sos negocios dende'l sector industrial al comercial, pasando pol turismu y, sobre too, pol Canal de Suez. Esto vien de la dómina de Nasser, que xeneró una oligarquía propicia pa de so nel exércitu, sostituyendo la foriata d'época colonial que caltenía'l rei Faruk. Pero, amás, ye qu'esti exercitu, a diferencia d'otros de la rexón, ye un cuerpu mui competente, capaz de derrotar al d'Israel y faer frente a los apoyos americanos d'esti. Y, asina, el pueblu exipciu consideró siempre como garante nacional al exércitu y ye l'estamentu más respetáu, por encima del relixosu.

La tercera ye la realidá funcional de la Constitución que s'aprobó l'añu pasáu. A semeyanza de les occidentales, volvía a cayese nel erru de consultar al pueblu solo cada cuatro años. Lo que pue ser visto como un avance respeutu al réximen de Mubarak, que nunca nun consultaba, en realidá dexaba al pueblu indefensu pa col gobiernu, de nuevu presidencialista, con un poder llexislativu mui reducíu y casi ensin capacidá de vetu y un poder xudicial dependiente de les recomendaciones presidenciales. Yera una auténtica oportunidá pa quienes fueren los gobernantes, y estos fueron, lóxicamente, los Hermanos Musulmanes.

Digo lóxicamente y desplícolo nesta cuarta estaya. Los Hermanos Musulmanes son un grupu de presión política de más d'ochenta años (fundaos en 1928), creyaos cuando s'estaba franciendo l'Imperiu Otomanu pa dar una alternativa republicana y popular al reinu/protectoráu. Ye un grupu islamista moderáu, republicanu, económicamente defensor del lliberalismu y, sobre too, socialmente queríu pol so trabayu asociativu y de caridá nos barrios probes del país mientres tou esti tiempu. Cuando españó la "Primavera árabe", fueron los cabezaleros de les protestes nes cais. Y nel momentu de les elecciones yeren la única formación política sólida. Y ganó. Ye verdá que por muncho menos de los que s'esperaba (solo un 35% de los votos). Pero ganó. Y, col apoyu los salafistes (que se desmarcaríen bien llueu), colocaron a Morsi de presidente.
 
Con estes consideraciones, hai qu'añadir coses nueves al resumen d'enriba. Dicía que Morsi yera escoyíu presidente. Pero'l poder quedaba en manes de Mohamed Badie, el líder supremu de la organización. El Parlamentu perdía les sos prerrogatives y estes pasaben a los cuarteles xenerales rexonales de los Hermanos Musulmanes, que fueron acumulando'l poder civil gracies a los nomamientos del gobiernu central, dirixíu por Badie. Taba pasándose d'un réximen domináu polos homes de Mubarak a talo polos Hermanos Musulmanes. Y l'exércitu viera que diba perder influyencia cuando Morsi trató de sostituyir les gobernaciones (les divisiones territoriales d'Exiptu) militares por otres civiles, contralaes pol gobiernu y, poro, polos Hermanos Musulmanes. 

Que naide se lleve a engañu: l'exércitu derrocó'l gobiernu de Morsi por caltener el so lobby económicu y la so influyencia social, non porque esti fuera islamista o porque les sos polítiques económiques y sociales fueren un desastre total. Esperó a tener el sofitu del pueblu pa siguir siendo'l so abanderáu, l'ánima del Exiptu modernu y caltener el so poder na solombra. Pero, polo tanto, tamién ye verdá que tuvo al lláu del pueblu y lu defendió cuando esti lu necesitó. (Esto ye lo que pon los pelos de punta a más d'ún equí: qu'el pueblu se rebele y l'exércitu lu apoye, en vez de tirar pol más fuerte, como casi siempre na Historia d'España. Que non, por cierto, en Portugal)

El pueblu revelóse por otros motivos diferentes a los del exércitu. Fízolo énte un gobiernu llexitimáu poles urnes, sí, pero que nin cumplía les sos promeses electorales nin atendía a la Constitución p'actuar. La situación de drechos sociales calteníase igual a cuando Mubarak, porque la Constitución yera solo un papel moyáu. Pero, a diferencia d'aquella dómina, la situación económica yera tarrecible. Los Hermanos Musulmanes nun podíen caltener les sovenciones a les instituciones de caridá porque estes yeren incompatibles coles ayudes económiques que recibía de los Estaos Xuníos (recordái qu'Exiptu ye'l segundu país que más ayudes recibe d'ellos) pa la macro-economía: el dineru, como siempre, tenía que dir pa los ricos. Pero cola inestabilidá política, la deconfianza de la oligarquía empresarial anterior nel nuevu gobiernu y el recelu de los militares, la economía nun despegaba. El desempléu creció y los probes y les clases medies que sofitaben a los Hermanos Musulmanes aprobecieron índa más. Incluso surdieron voces que pidíen que volviera Mubarak. Que la xente saliere a la cai a pedir polos sos drechos y, nesta ocasión tamién, por trabayu y comida, nun se fizo esperar: un añu.

Pero, quiciabes, el principal error de los Hermanos Musulmanes fue l'afán de notoriedá. Quisieron ser los protagonistes del procesu de cambiu y écharonse a les espaldes tol trabayu, ensin compartir responsabilidaes con dengún otru partíu o sector social. Arrequexaron a los salafistes, amenorgaron a los militares y escaecieron a los poderes llexislativu y xudicial. Cuando escomenzaron les protestes, nun quisieron escuchar al pueblu que yera la so base. Y, testerones, quemáronse nel so fueu. Yo toi seguru que, d'haber abierto la mano Mohamed Badie, taríamos falando d'otros asuntos.

Pa concluyir, prestaríame falar de les reacciones a esti procesu.

La prensa en conxunto falaba de güelpe d'Estáu. Ayer vía l'especial fechu pol canal 24 horas de TVE al respeuto. Dos excelentes especialistes (Haizam Amirah Fernández, del Instituto El Cano, y el codirector del Instituto de Estudios de Conflictos y Ayuda Humanitaria, Jesús Núñez) desplicaben la situación fonderamente ya intentaben lidiar con una reciella analistes que nun s'enteraben d'úna, incapaces de camudar el chip. Ún, dempués de que se falare del acaparamientu del poder en manes de los Hermanos Musulmanes dicía: "Si el pueblu los escoyó nes urnes, qu'esperen cuatro años y voten por otros". Miéu, comu dicía enantes, a que se reproduzca equí (dalgo qu'anguaño ye imposible).

Los países occidentales tovía nun tuvieron la osadía de les sos prenses y callen la boca. Piden que s'abra un procesu democráticu cuanto enantes meyor, pero nun xuzguen nin critiquen l'acción militar/popular. Y taben buenos pa falar dempués de lo que ta pasando en Siria, onde, por cierto, l'exércitu sofita al gobiernu y ataca'l pueblu.

Y, por último, falar de la reacción del rei Abdalá d'Arabia Saudí que, dende la so quintana particular de dos millones de kilómetros cuadraos, saludó con allegría al nuevu réximen exipciu. Van dir tolos demás países por esi caleyu porque poco importa'l pueblu mientras haya un collaciu al frente (como'l rei Abdalá), poco importa la democracia (n'Arabia hai casi 30 millones de siervos) mientres el Canal de Suez siga abiertu y poco importa l'islamismu (como'l saudí) mientres haya estabilidá na zona.

Espero qu'a los exipcios-yos salga bien la so revolución.

31 may 2013

Los caballeros

Aristófanes
Tuviera viendo va un par de selmanes la versión de Teatro Kumen de La Felguera de Les troyanes, d'Eurípides, y dióme por repasar clásicos griegos. En seguidina pasé al mio favoritu Aristófanes, el másimu esponente del xéneru cómicu y satíricu del teatru clásicu. Asina que fui a una biblioteca y garré un volumen, estudiu de Carlos García Grual, con tres de les sos obres: Los acarnienses, Los caballeros y Les xaronques

La primera ye una sátira pacifista escontra la guerra del Peloponeso; la tercera, mui posterior, la visión personal del autor de les personalidaes d'Eurípides y Sófocles, muertos l'añu anterior, nuna puxa nel infiernu ente dambos (Sófocles representáu pol gran Esquilo). Pero voi quedame cola segunda, n'orden y n'edá.

Los caballeros representóse nes fiestes Leneas del añu 424 a.C. y yera un nuevu ataque escénicu contra los demagogos y los excesos de los qu'usaben el populismu pa monopolizar los altos cargos, dexando nun segundu términu les decisiones del pueblu, col oxetivu d'enriquecese y perpetuase nel poder.

La figura de Cleón, un curtidor veníu a más, que se fizo col poder de la polis ateniense gracies al oportunismu (vendióse como xeneral vencedor énte los lacedemonios, cuando fuera Clistenes quien algamara la victoria) y el nepotismu (subió l'aportación a los asambleístes d'ún óbolu a tres), sufre toa una serie d'ataques d'un vendedor de chorizos, qu'acabará por consiguir l'apreciu del Coru de caballeros (la segunda clase social d'Atenes) y del vieyu Demos (Pueblu) al algamar una tregua que beneficiará a tolos ciudadanos.

La obra gozó de gran ésitu ente'l públicu y demostró, una vuelta más, la valentía d'un Aristófanes que, con un llinguax enllenu zafiedaes y xuegos léxicos, conseguía que los ciudadanos s'identificaren colos sos presupuestos.

Préstame abondo estos dos párrafos del Coru de caballeros. Que quiciás, pa tener 2.438 años, tienen muncha actualidá:
"Fiere, fiere a esi canalla enemigu de los caballeros, recaudador ensin conciencia, abilsu de perversidá, mina de lladronicios, y canalla y cien vegaes canalla; y siempre canalla, nunca nun me cansaré de dici-ylo; pues yelo más ca día. Pero solmena-y, síguelu, xíngalu, espulsa a esi bribón; arreniega d'elli como nós y escórrelu glayando. Cuida que nun se t'escabulla; mira que conoz los caminos per onde Éucrates escapóse del salváu."

"Y sóbramos la razón, porque tu apodéreste de los bienes de toos y gástelos enantes de que seyan repartíos; y dempués tantigües y primes a quien han dar les cuentes, como se tantigua un figu pa ver si ta verde o maduru; y cuando ves a dalgún de calter débil y pacíficu, fáeslu vinir del Quersoneso, gárreslu con fuercia de la cintura, éches-y los brazos al gargüelu, faes que zarapique y, dempués de tiralu al suelu, tráguestelo too d'un bocáu namás. Tu siempres tas esperando sollerte a los ciudadanos cenciellos y mansos como oveyes, honraos y enemigos de pleitos."
 ¡2.438 años! Y la democracia sigue colos mesmos vicios.

30 mar 2013

L'escrache



L'escrache ye una forma de protesta civil pola que activistes pro-drechos humanos denuncien en público a persones o coleutivos que los torguen, averándose a los llares particulares o trabayos de los mesmos. La fórmula aniciárase durante los años 90 del pasáu sieglu n'Arxentina, como rempuesta del grupu "Hijos" a la política d'indultos d'altos cargos de la dictadura militar, executada pol presidente Menem. Ente otres aiciones, entamaron parillaes, representaciones teatrales, pegada de carteles y espliegue de pancartes, tirada de güevos y hasta representaciones teatrales.


Estes últimes selmanes, l'escrache salió a l'actualidá estatal poles aiciones protagonizaes pola Plataforma d'Afectaos pola Hipoteca (PAH), onde siguíen a cargos públicos del Partido Popular peles cais y los esperaben nos domicilios y nes sedes del partíu a que salieren. La PAH acusa esplícitamente a los políticos d'esti partíu de permitir de facto'l desaniciu del drechu a una vivienda digna, favoreciendo los intereses financieros percima de los drechos humanos. 

Como la meyor forma de defendese nun momentu onde los argumentos nun son de pesu, sinón qu'importen más l'escándalu y la repercusión mediática del comentariu, la estratexa'l PP, en boca de la delegada del Gobiernu en Madrid, Cristina Cifuentes, fue comparar a la PAH al movimientu secesionista vascu, averando los escraches a la kale borroka. Esti posicionamientu ye mui común nel PP y siempre-y diera buenos resultaos, polo menos hasta los atentaos del 11-M. Pero ye una auténtica ensinvergonzonería. (Anque de vergoña nel PP, saben poco). 

Una de les denunciantes d'esti tipu d'aiciones escontra la so persona fue Carmen Maniega, una diputada a Cortes por Asturies, que dexó constancia na Policía que fuere acosada, ente otres ocaciones, "a la salida de una reunión de Federación Asturiana de Concejos 'al grito de asesina, criminal y sinvergüenza'". La Plataforma n'Asturies, negábalo. UPyD, defendía a la diputada, solidarizándose con ella. Puntos de vista que falen de por sí respeto a la tema los drechos.

L'escrache nun almite medies tintes: o se ta a favor o se ta en contra. El casu ye que nun ye illegal. Munchos de los qu'anguaño se rasguen les vistidures pidiendo midíes contundentes pa contra esta aición de denuncia de quien persigue los drechos universales, nunca nun se pararon a pensar qu'el famosu cobrador del frac tien la mesma conducta, anque moralmente bien se diferencia del escrache: esti puxa por cobrar unes perres adeudaes y los otros, polos sos drechos.
Pela mio parte, siempre me paeció xusto que la xente denunciara públicamente a quien ye un mal xestor y se va dir de rosites y, sobre too, a quien, tando nun puestu de responsabilidá pública fai llabor pol espoxigue de privilexos a la escontra de los drechos universales. A la PAH, con estes aiciones, nun-y falten razones (anque dende'l mio puntu de vista, les aiciones habríen de compartise con más partíos y sectores sociales): les torgues d'esti sistema capitalista, onde se prima la rentabilidá particular a los beneficios xenerales y onde un euro en bolsiyu apropiáu val más qu'una persona de la cai, tan siendo defendíes a ultranza polos partíos sistémicos, porque n'ello-yos va'l presente y el futuru, y sofitaos por unos medios de comunicación y un sector financieru qu'esporpollen recios onde la xente alcuentra llamuergues.

N'Asturies l'escrache nun ye un modelu d'aición nuevu, porque lleva protagonizándolu años la Xunta pola Defensa de la Llingüa Asturiana mediante'l personaxe de "la Pita". Dempués de que la Delegación del Gobiernu n'Asturies-y prohibiera tayantemente protestar a les puertes de la Xunta Xeneral del Principáu escontra les polítques amenorgadores de los drechos de los asturfalantes protagonizaes polos distintos gobiernos socialistes, la imaxinación creyó esti personaxe, que trayía la pita en persona, pero ensin xiblatos. Canta'l grupu Skama la Rede: "Yá llegó la Pita/col déu acusador/p'apuntar al presidente/presidente represor". Esi presidente nun yera otru que Vicente Álvarez Areces.



A muncha xente socialista, qu'aplaude l'escrache a políticos del Partíu Popular, abluca-y la Pita, hasta la sientes como una payasada. Por embargu, la Pita cumple cola función social de nun dexar que'l somorgamientu los drechos d'una parte la población ye un fechu tovía güei. Igual que la PAH.
Espero que dambes lluches se superen pronto y la xente tenga la posibilidá d'acceder a una vivienda digno onde esfrutar de la so identidá ensin torgues.


20 feb 2013

Ambiente a medies nel paraísu.



Mui poques vegaes falé de mediu ambiente nesti blogue. Pero nesti comienzu d'añu, fueron desendolcándose delles propuestes y decisiones polítiques que podríen afeutar bien direutamente a Asturies. Diendo a la gueta d'un ameyoramientu enerxéticu, d'una mayor productividá forestal o d'un sistema de xestión de residuos sólidos urbanos, apaecieron tres llinies de polítiques ambientales que, en virtú d'educador mediuambiental que soi, prestaríame desplicar.

Fracking. 

Trátase d'una téunica que permite la estracción, o'l so ameyoramientu, de gas y petroliu, consistente n'inyectar materiales non sólidos a presión pa francer el sostratu rocosu y permitir una salida más bayurosa del recursu guetáu. Esta téunica, nomada "fracturación hidráulica", nun ye nueva, y bien siendo prauticada n'Estaos Xuníos dende la década de 1860, usando primero nitroglicerina, que fuera sustituyía por ácidos y, finalmente, agua con arena y productos disolventes, siguiendo la fórmula que la compañía Stanolind Oil diseñara a principios de los 50.

El coste mediuambiental d'esti modelu d'esplotación ye mui altu. El gastu d'agua ye tremendu, amás de que los productos que se disuelven n'ella pa algamar una mayor efeutividá, provoquen, direutamente, la xerenación d'agues residuales que conlleven depósitos donde puen évaporase y filtrase metales pesaos ya, n'ocasiones, radiactivos; y, indireutamente, la contaminación d'acuíferos con metano (que llegara a produz esplosiones en cases) y de cloruru de potasiu (que favorez la salinización del agua potable). Por último, señalar l'alteración d'hábitats, xeneralmente naturales, pa la construcción de carreteres, olioductos y plataformes d'estracción.

Subiendo'l preciu del barril de petróleu, desaniciáu dafechu'l carbón como combustible fósil altamente contaminante (pesie a dellos avances de captura de CO2, sigue siéndolo) y siendo España un estáu enerxéticamente dependiente, munchos políticos vieron n'estes téuniques una buena salida pal futuru. 

N'Asturies, la idega surdió dende les files d'UPyD, siguiendo la postura a favor del partíu a nivel estatal. La rempuesta nun tardó y creyóse la Plataforma Asturiana Anti-Fracking, que puxó col sofitu de Conceyu Abiertu y d'Equo Asturias, hasta algamar la aprobación d'una propuesta non de llei d'Izquierda Unida nel Parlamentu asturianu. 43 votos a favor de que, mientres dure la llexislatura, nun s'autoricen estudios de viabilidá d'esplotaciones de fractura hidráulica nel territoriu. Hubo una abstención, la d'UPyD, qu'alegó la inesistencia d'estudios que sofitaren la mala prensa del fracking.

Ocalitos.

La selmana pasada, una nueva propuesta de la formación maxenta, a traviés del so únicu diputáu autonómicu, Ignacio Prendes, volvía a poner de manifiestu'l so desconocimientu de la realidá mediuambiental d'Asturies (y apuntaba la d'otres, como'l tipu de poblamientu ya esplotación del suelu autóctonu o l'ecolóxicu). Pretendía llevar p'alantre una propuesta de creyación d'un nuevu catastru forestal col oxetivu primeru, coherente y plausible, d'evitar incendios, y segundu, de favorecer una esplotación d'especies madereres, creyando aries d'influyencia planificada (a semeyanza, dicía, de Navarra, onde la planificación de la esplotación supera'l 40% pol escasu 2% asturianu), abriendo una ventanilla única pa ayudar a los propietarios de terrenos yá esplotaos o ermos anguaño y promoviendo la plantación d'especies de rápidu crecimientu, "eucaliptos y coníferas".

Lo pior ye qu'el sábadu asoleyóse la noticia de qu'el partíu nel gobiernu, el PSOE, sofitaba la decisión, lo que nun ye nuevo, pero si preocupante. Yá fai dos llexislatures, el gobiernu d'Álvarez Areces quiso impulsar una llei pa la implantación nel territoriu asturianu del ocalitu blancu, especie más resistente n'altura qu'el ocalitu coloráu, qu'invade Asturies anguaño.
Sí, digo invasión. La Nueva España del martes 19 de febreru, espublizaba la siguiente noticia: "El eucalipto arrasa en Asturias". Y desplicaba: "La especie invasora se ha expandido en una década hasta el nivel previsto para 2053, mientras que los árboles autóctonos perdieron 18.000 hectáreas". Ná menos que 60.311 hectaries de suelu forestal asturianu tan siendo usaes pa la esplotación d'eucaliptu, d'un total de 434.800 ha, casi'l 14%. Solo'l castañu tien más implantación. Ensin embargu, toes estes hectaries tan por embaxu'l llimite de los 800 metros, tope másimu pa la supervivencia de la especie.

Yo creo que les cifren falen de por sí. UPyD anda desnortáu per Asturies, tratando d'imponer criterios productivos non apropiaos pal territoriu, de la mano d'una FSA que yá va tiempu que lo vien demostrando.


Incineradora.

La xestión de residuos ye ún de los primeros problemes del ser humanu dende qu'esiste como especie. Anguaño, la basura empuerca buena parte del planeta y, concretamente les ciudaes, xeneren un volumen tremendu de desperdicios, nomaos residuos sólidos urbanos.

Como fundamentu pa evitar que la vida se nos enllene de basoria, en tolos colexos d'Europa s'enseña a los escolinos les "3 erres": Reducir, Reutilizar y Reciclar (esiste una cuarta erre, Reparar, mui mal vista nos sistemas capitalistes que cayó nel escaezu gracies a la obsolescencia programada que domina les nuestres vides). La idega ye que, cuanto menos residuu se produzca, meyor; quien nun ensucia, nun tien que llimpiar. Enantes de desechalo, mirar por dai otru usu, ensin camudar la so estructura; un tarru de cristal bien pue usase delles veces pa guardar coses en vez d'usar fiambreres de plásticu. Por último, enantes que desfaese d'ello, ye preferible camudar la so esencia pa aprovechar los materiales que lu formen, lo que ye reciclar. Reciclar ye la pior solución, porque se gasta enerxía nel procesu, pero ye la que gocia de más puxu, porque da perres (direutamente en cuantes al cartón y al papel y gracies a ayudes públiques, respeuto a otros materiales).

En 1982, creyóse n'Asturies, por asociación d'ocho conceyos col Principáu, el Consorcio para la Gestión de Residuos Sólidos de Asturias (COGERSA) y, dende 1985, escomenzó la esplotación del vertederu central del valle la Zoreda, que captaba y aprovechaba'l biogás producíu pola descomposición de la basoria. Implementaba un programa de recoyía de residuos plategáu na incorporación de contenedores de distintos colores, asitiaos na cai de forma permanente y a la vista, y horarios zarraos, anque dexaba llibertá nestos últimos a los conceyos, sigún el so tamañu y población. L'oxetivu yera finar cola proliferación de vertederos nos soburbios urbanos y el déficit hixénicu ya ecolóxicu que trayíen consigo y concienciar a la xente de la necesidá de nun enllenar la cai de basura, separando los residuos que nun quedama más remediu que tirar.

Dio los sos frutos. El sistema de recoyía de basures de Xixón fue modélicu y la ciudá rebaxó la cantidá deresiduos sólidos urbanos producíos, amás de calar ente la xente cómo y cuándo había que tirar la bosaria. COGERSA espardió'l so llabor a nuevos planes de xestión de residuos (animales, vexetales, peligrosos, llixeros...) y solucionó el tratamientu de lixiviados. Yera un vertederu modélicu que tolos neños d'Asturies conocíen, gracies a la apertura que supusieron les aules didáutiques pa escolinos. Pero a primeros del sieglu XXI, la política comunitaria en tratamientu de basories camudó pa priorizar la incineración de residuos. Y les autoridaes asturianes, fueron detrás, como perrín sollerte a la voz del amu.

Esti sistema, dende'l puntu de vista mediuambiental, ye pior: la quema de la basoria ye indiscriminada porque, anque caltién el sistema de separación, la xente pierde la conciencia de que ta emporquiando, al non ser visible l'acumulación; por otra parte, los residuos nun desapaecen, porque los fumos espárdense incontrolaos y la ceniza, d'alta tóxicidá y que representa alrodiu'l 30% ha ser almacenada, anque non pue ser a la vista; por último, aprovéchase pa creyar enerxía llétrica, lo que supón un plus pa la xeneración de más basoria al necesitar más combustible pa ser más rentable (porque ye un tratamientu munchu más caru).

La incineradora yá ye una realidá, gracies al Gobiernu socialista del Principáu y a los sos dos socios, UPyD y IU (que s'opuso al primer proyeutu d'una planta grande n'Asturies, pero que nun dixo ná al respeuto), en connivencia del PP y a les tímides protestes de FAC. L'eufemismu pa nomala va ser "Planta de valorización enerxética". Pero los cielos d'Asturies van resintise otra vuelta.


(Nun voi falar de la tema'l tratu cinexéticu del llobu o de la xestión nefasta del osu pardu. De la marcha p'atrás de la xestión del parque de Fuentes del Narcea o la esplotación del yacimientu d'oru de Salave, tampocu. Dexaré pa prau los accidentes mediuambientales que se produxeron nos sableros de Carreño trés la fuga de galipote de la térmica d'Aboñu, o cola puesta en marcha del Altu Fornu B d'Arcelor en Veriña o poles fugues de mercuriu d'Asturiana de Zinc n'Avilés. Temes toes elles suficientes de por sí pa que, nun país civilizáu y decente, dimitieren los sos dirixentes mediuambientales. Más tovía si esi país llevara presumiendo décades de ser un paraísu natural)

15 feb 2013

La llei del embudu


Recién salidino del conseyu ministros, como si d'ún de los meteoritos qu'amenacen con cayer o, direutamente, cayen sobre nos, surde un nuevu recorte de los drechos civiles nel Estáu español. Lo malo ye qu'esti recorte va ser bien recibíu por una plebe ciudadana que, cual ciudadanu llatín de la dómina romana, piensa que tovía tien nes manes el destin del imperiu.

Trátase d'una reforma de les instituciones alministratives municipales onde, por un lláu, se llenden de competencies y, por otru, s'estipula la remuneración de los ediles.

Anque tovía nun conozco con detenimientu'l plan (porque esti puntu concretu pasara de puntiyes pelos informativos), yo nun veo con malos güeyos que les competencies municipales queden puestes de manifiestu. Nun va suponer un retrocesu significativu y sí, pol contrariu, va significar un toque d'atención a les alministraciones superiores que delegaben nos conceyos competencies que yeren de so. Un casu claru sedríen los servicios sociales n'Asturies, y concretamente, la puesta en marcha de la llei de dependencia: derivaos los casos dende los conceyos al Principáu, esti decidía sobre la so aprobación y les condiciones, pa delegar nos conceyos el tratu al dependiente; nel casu d'ayuntamientos pequeños, onde los servicios sociales nun podíen ser del too cubiertos, los dependientes quedaben al debalu, lo que suponía un aforru pa les cuentes principiegues, que se llimpiaba les manes ente la responsabilidá creyada a los ayuntamientos. Espero qu'esta delimitación igüe esti tipu de desigualdaes.

Por embargu, l'otru puntu ye un perclaru retrocesu nos drechos y llibertaes civiles. Ún de munchos, dende que se decidiera acabar colos conceyos abiertos, únicu exemplu de democracia direuta n'esi Estáu. Y esto ye porque se fraya la llibertá d'accesu a les instituciones polítiques más averaes al ciudadanu, les de la toma direuta de decisiones que más se corresponden cola so individualidá. Desplícome.

Ún de los mayores llogros de la socialdemocracia y que ficieron que les democracies europees pudieren nomase "Estaos de drechu" ye, precisamente, la remuneración de los cargos públicos electos. Por un lláu, propiciábase qu'aquelles persones que taben más preparaes non optaren por desempeñar el so papel bayurosu en beneficiu priváu, sinon pol bien de tola sociedá. Por otru, permitía qu'aquelles persones con ingresos baxos pudieren desentendese de la manutención de so y de la so familia pa defender los drechos y les inquietudes de los sos compañeros de clase. Que los cargos públicos cobren ye una necesidá democrática que defiende'l llibre accesu a les instituciones, independientemente del estatus económicu.

Pero ye que, amás, el recorte nun se produz nin en tolos conceyos nin pa tolos puestos de la mesma forma. Los ayuntamientos más grandes ven llendaos los sueldos de los ediles, pero non suprimíos, quedando la remuneración de los alcaldes como nunca non mayor que la d'un secretariu d'Estáu. Los de los pequeños, siguirán cobrando, pero muncho menos (imaxino que sigún el númberu d'habitantes). Pola parte de los conceyales, nun cobrarán.

Esto pue vese de dos maneres: cellebrándolo d'una forma populista, a lo 15 M, onde se pidía que los políticos desempeñaren la so función por amor al arte; o d'una forma reflesiva y coherente, llamentándolo. 

Primero, porque los ingresos de los partíos más pequeños, que nun disponen de representación nos parllamentos autonómicos nin estatal, puesto que munchos son de calter llocal ya, incluso, plataformes vecinales, nun van poder sofitase económicamente coles aportaciones de los sos ediles, mientres que los grandes (y equí meto PP, PSOE, FAC, IU y, sobre too, UPyD, que nun tien un solu conceyal n'Asturies) van poder soportar la so estructural llocal gracies a les aportaciones institucionales y del propiu partíu (como hasta agora). Esto supondrá la creyación d'un cártel de partíos que controlarán, definitivamente, la vida consistorial.

Segundo, porque se veta la entrada d'independientes. Si bien el sistema electoral malpenes solo permite, y con munches torgues, la participación nes eleiciones de plataformes d'eleitores a parte de los partíos, estes, ensin cadarma estatutaria definitiva, nun van poder sostenese como los partíos convencionales. La pluralidá qu'ufre la xente independiente a partíos dientro de les instituciones llocales va vese esmolecía pola necesiá d'un sofitu partidariu. Como ta mal visto que nun se vote en bloque, la independencia de los conceyales desapaeció y, poro, tamién se torga la representatividá del pueblu.

Tercero, porque la xente ensin recursos nun va poder faer frente al trabayu a tiempu completu. Los conceyales van ser siempre a tiempu parcial, dexando de la mano del alcalde y del aparatu del partíu nel gobiernu'l trabayu discrecional nel conceyu. Desapaez el trabayu de los conceyales escoyíos democráticamente y apaecerá'l de los asesores escoyíos a déu polos partíos, tan habituales nos ámbitos autonómicos.

Y, por último, volverá'l caciquismu. Pesie a los preseos de tresparencia elleitoral y les buenes intenciones de los partíos (que tovía son solo buenes intenciones), dientro de los conceyos pequeños presentaránse aquelles persones que puean permitise'l cargu, non aquelles que lu merezcan. Amás, pasando a ser un cotu de partíos y non de ciudadanos, los partíos podrán asegurase cuantiosos ingresos extra si permiten qu'estes personalidaes se presenten poles sos siegles. Esto sí que ye un negociu redondu y non los sobres de Bárcenas y copañía.

Como resultáu, les decisiones sedrán espuestes dende enriba por una minoría privilexada y refrendaes cada ciertu tiempu, cuatro años, pol restu de ciudadanos nun sufraxu universal que nun permitirá fácilmente l'accesu a les instituciones. Ye lo que se denomina "llei del embudu", onde cabe tol mundiu, pero solo deciden unos pocos.

Too esto nun ye nuevo: España fue exemplu de caciquismu mientres la Restauración borbónica, cuando se daben unes condiciones institucionales mui paecíes a les actuales. La diferencia ye que nin Cánovas nin Sagasta s'atrevieron a finiquitar los conceyos abiertos del mou que sí lo ficieron Zapatero y Rajoy amguaño. 

Norabona. Tenemos una democracia solo nel nome.

21 ene 2013

Sobres.





La noticia la selmana (y, si m'apuren, del añu) ye la implicación del antiguu tesoreru del Partido Popular nun escándalu financieru que chisca a la plana mayor del partíu, dende antiguos ministros como Cascos, hasta los actuales líderes, como'l propiu Rajoy. Al paecer, Luis Bárcenas -nome del ex-ayalgueru- fízose con una fortuna de 22 millones d'euros que guardara, a traviés d'una empresa panameña, en Suiza y, gracies a la llexislación favorable en materia de captación de valores opacos del nuevu gobiernu popular, (vamos, l'amnistía fiscal), declaró un millonucu y sacó diez en llimpio. El casu ye que nun ta claro d'onde apaecieron tantes perres y, como ye normal, piénsase que yera al recostín de la financiación del partíu, escamada la xente con casos como la trama "Gürtel". 


Yo creo que yá se tardaba en falar, n'esti estáu, de la financiación de los partíos políticos, dalgo tan visiego como les propies cuentes de los políticos na Confederación Helvética. La llei permite que se caltengan en privao los datos, lo que priva al ciudadanu de conocer la cara B. Pero non de les cuentes, que ye lo de menos; si non de los programes. Sabiendo d'u vienen les perres, conozse pa quien llexislen, a quien defienden y a quien beneficien los partíos. Tolos partíos. Y por eso dengún se quier meter a sacu n'ello: les propuestes de tramitaciones de lleis de tresparencia quédense siempre nos políticos a nivel particular, nunca nun entren a valorar los ingresos de los partíos.

Les democracies representatives tienen esos riesgos. El ciudadanu vota y piensa qu'el partíu va representalu, ensin saber (o ensin querer vreyer) que los partíos van a beneficiar intereses d'empreses farmacéutiques (calteniendo precios más elevaos que nel restu Europa, lo que fai que la Sanidá salga más caro), enerxétiques (sofitando los cárteles ya oligopolios de les mesmes) y financieres (al abrir al mercáu tou tipu de bienes, dende la factura llétrica a la deuda pública). El casu ye que les factures pagámosles ente toos y los beneficios van a los bolsiyos d'unos pocos. Dempués, sorprendíos, cayemos na cuenta de que los políticos, al finar de los sos cargos públicos, entren nuna empresa d'ún d'estos tres sectores como asesores o directivos. 

A esto yo llámolo cobrar réditos. Y paezme peor, muncho peor, que pagar con sobres. Nel primer casu (igual que cuando se fai una mala xestión no público, dalgo que tampoco sal a la lluz), los políticos nunca nun van ser imputaos y solo la presión social énte ún con moral de serviciu (o blindáu por otres empreses) va conseguir la dimisión nel nuevu puestu. Nel otru casu, al menos, pue topase con un xuez y un fiscal con ganes de complicase la vida y ser imputáu, xulgáu y condergáu. (La pena ye que les polítiques d'indultos n'España ye muncho más ventayosa p'aquellos que tan averaos al poder que pal restu de ciudadanos)

Esto va quedar como un casu personal, como un pillu que se quiso enriquecer. Nun esperemos que dengún partíu, de los que xuega na tómbola democrática colos cartones pagaos por terceros, se ponga a prender el ventilador delantre'l cuchu, porque diba chisca-yos a toos y, el primeru, elli mesmu. Y güeyu col que se mueva, que va fuera. Nun sedría la primer vez. Por llástima, tampoco nun va ser la última.

11 ene 2013

Asturies shore

D'izquierda a drecha (solo na semeya): Pilar Varela y Javier Fernández (PSOE), Moriyón (FAC) y Pardo (PP), Prendes (UPyD), Iglesias (IU), Cherines (PP) y Cascos (FAC).
Esta mañana, l'ayuntamientu de Xixón aprobaba los presupuestos pal añu 2013 colos votos afirmativos del partíu gobernante, Foro, y del Partido Popular. Tovía ayer, el votu de los populares nun taba claru: la puxa pol poder dientro la organización política n'Asturies, que vien de muncho enantes de la escisión casquista, fizo que l'actual presidenta autonómica (rexonal, diría ella), Mercedes Fernández, se negara a sofitar a Pilar Fernández Pardo, presidenta xixonesa, hasta que, nel últimu momentu, camudara'l criteriu. Dalgo lóxico puesto que les diferencies ente Foro y PP son mínimes, xirando solo alrodiu la simpatía pa cola figura de Cascos. N'Uviéu, Foro abstúvose pa permitir los presupuestos del PP, pero en Xixón nun yera suficiente, porque'l partíu con más ediles ye'l PSOE. Pero de sorprendente tenia poco: los presupuestos habíen salir sí o sí. Y, claro, salieron.

L'edil socialista en Xixón, Santiago Martínez Argüelles, denunciaba que los presupuestos viníen daos dende fuera de Xixón, lo que-y restaba llexitimidá. A finales del añu pasáu, Javier Fernández, presidente del gobiernu autonómicu, llamaba a la responsabilidá de les diferentes fuercies polítiques parllamentaries pa que nun dexaren ensin presupuestos a los asturianos, anque estos presupuestos s'asentaren sobre unos fundamentos recaudatorios ilusorios (como l'impuestu a les entidaes de créditu, anguaño recurríu pol gobiernu estatal énte'l Tribunal Constitucional) y, sobre too, dempués de que'l Principáu d'Asturies s'acoyera al Fondo de Liquidez Autonómica, una suerte de rescate que l'estáu español propón a les autonomíes a cambiu de tener la última voz p'aprobar los niveles d'endeldamientu de les mesmes. Martínez Argüelles nun rechistó. Enantes yeren llexítimos y agora non, mio neñu, agora non.

La tema ye que, pal casu xixonés, Martínez Argüelles tien tola razón de mundu. Pero nun se pue tar en misa y repicando si se quier ún pensar cola llexitimidá que da la coherencia. Esti home nun ye coherente nin nes pallabres, nin nes formes. Cuando los representantes más visibles d'un partíu se mueven d'esta mena, el partíu resiéntese. Y nel PSOE asturianu nun ye l'únicu.

Son habituales los casos como'l de Santiago Argüelles, que defendiera'l so cargu nepóticu (puestu a deu nel cargu, dempués de la privatización de Cajastur, anque nun-y correspondía siquiera optar a elli, nin cuando la entidá pública) de vicepresidente de Liberbank como útil pa la defensa de los intereses de Xixón, dimitió del cargu a la primera que-y vinieron dures (al non conceder el so bancu un créditu a la sociedá "Gijón al Norte", encargada de la supresión de la barrera ferroviaria xixonesa), pero quedóse nel puestu de conseyeru de Cajastur porque, total, solo-y quedaben unos meses pa ser destituyíu na entidá. Asina, la defensa del proyeutu arecista del Niemeyer (y nun me refiero a la Fundación Niemeyer, si non al proyeutu del presidente Areces pa faese col control de la xestión del centru desaverándola de les instituciones públiques que la sofitaben económicamente) de l'alcaldesa d'Avilés, negando cualisquier tipu d'acusación por fundada que fuera, pa dempués dicir, al rescamplar toles trampes de los xestores que defendía, qu'ella ná nun sabía y que yera inocente de tou mal porque solo miraba polos intereses de los avilesinos; o la entronación de la propia Pilar Varela, (si se la cree, la fata más grande d'Asturies dempués del petromocho) fecha por Javier Fernández, diciendo d'ella que yera'l referente del socialismu asturianu. (Díes enantes Rubalcaba dixera que Javier Fernández yera'l referente del socialismu español)

Hai que dicir, por embargu, que dengún partiu parllamentariu se salva, nin muncho menos: el Partido Popular ye una amalgama de personalidaes interesaes no propio, que rexistren nomes como Gabino de Lorenzo o Fernando Goñi; Foro Asturias de Ciudadanos nun ye otra cosa que un conxuntu de persones en torno a un gurú superprofesional de la política, que faen gala de la so falta d'esperiencia na tema (y nótase-yos a la hora de xestionar asuntos como'l conflictu Niemeyer, onde rabiaron cola verdá y perdieron el créditu social, o la tema'l FIC Xixón, onde dexaron de cobrar una sovención estatal por unviar la solicitú fuera de plazu); Izquierda Unida nun pasa de ser la tercera pata de la FSA pa caltener esta falsedá d'izquierda asturiana (sofitada nun sindicalismu mariellu y vacíu y d'idegues descomanadamente cosmopaletes no político, económico y, sobre too, cultural) pola cobardía de los sos líderes, que defrauden una y otra vuelta al so ellectoráu; y Unión Progreso y Democracia, similar a Foro en cuanto a gurú, anque esta femenina y a nivel estatal, predica la decadencia de la apariencia de la política española col exemplu de la hipocresía: criticar el gastu eleváu en cargos públicos y presentase'l diputáu Ignacio Prendes con seis asesores, manca la maera.

Asina, dempués de la desbandada d'afiliaos del PP siguiendo a Cascos, ye un regueru de xente la que marchó de FAC esti añu pasáu (y yá nel anterior), ensin que por ello'l PP recuperara'l so puxu. Asina, Izquierda Unida tien que consultar a los afiliaos si contradicen les sos promeses ellectorales de pactar col PSOE al día siguiente de les elleiciones y marcha colos banqueros socialistes peles cais de Xixón en díes de fuelga, mirando pa otru lláu cuando dalgunos "compañeros" na llucha son apresaos. Asina, UPyD vota a favor d'unos presupuestos presentaos por un partíu políticu que, sigún la propia organización, los amenorga y aislla ellectoralmente.

Pero l'exemplu más perclaru de la descomposición d'esti sistema de partíos que viven d'espaldes al ciudadanu (y más concretamente, al asturianu), xestionando intereses escuros, ye l'ayuntamientu de Cuideiru. Cinco dimisiones de conceyales socialistes, nel gobiernu, en seis meses y cola cabera candidata la llista renunciando al acta de conceyal, xunto a los tres suplentes, ficieron que la direición del PSOE en Cuideiru nomara alcalde a Ignacio Fernández, miembru de la so executiva pero que nun se presentó dientro la candidatura'l partíu.

Esto ye la democracia asturiana, onde pue mandar cualquiera ensin falta de que naide lu escueya pa que lu represente y ensin que les sos xestiones llacerioses o les sos pallabres mentiroses ya hipócrites-ys pasen factura. Y anque seya increyible, too esto ye llegal y ta asumío pola moral del sistema como perfeutamente normal. 

Pero lo pior de too ye que nun se trata d'un reallity show de la cadena MTV. Anque nun sedría d'estrañar atopar un día a Javier Fernández diciendo que Clavelito ye'l modelu a siguir pola mocedá asturiano o a Cherines dándo-y conseyos pa caltener la compostura a Ylenia, al glayíu de: "¡Asturies shore!".

9 ene 2013

La casa pol teyáu





Llevo munchu tiempu viendo como esta "democracia" va quedando nuna cadarma nominal que mui poco tien que ver colos valores etimolóxicos del términu: gobiernu del pueblu. La capacidá de decisión d'un ciudadanu nesti estáu ye mínima. Cierto que la posibilidá de presentase a unes elecciones ye llibre a tolos que cumplan unos requisitos mínimos, pero les estructures electorales son tan zarraes, que la voz del pueblu solo queda espeyada fuera de los calces sistémicos.Y tovía se tan zarrando más.


Dempués de munches negociaciones, paez qu'el día 15 de xineru, PP y PSOE van llegar a roblar el primer pactu d'Estáu de la era Rajoy: la nueva Llei de Bases de Réximen Llocal. Les grandes cabeceres estatales abríen col populismu d'una midía que llimitará'l salariu de los alcaldes de les ciudaes más importantes. Embaxu esi espíritu d'austeridá, apaecía tamién la midía de la supresión de les mancomunidaes, aplaudía pola mayor parte de los mamporreros mediáticos y polos siguidores de la doctrina "menos políticos, meyor xestión". Pero naide facía la llecura de lo que braeramente supón: más centralismu, menos capacidá pa les persones pa mirar polos sos drechos.

La hipótesis onde se sofita esti movimientu ye cenciella: cuantes menos alministraciones públiques, menos políticos, asesores, cargos públicos y funcionarios hai que sustentar, menos burocracia y, sobre too, menos duplicidaes; entós, ná meyor que suprimir instituciones y emponderar a unes poques con tolos servicios.

A simple vista, paez una política efeutiva. Mirao con detenimientu, ye un discursu simplemente efeutista, que nun entra realmente a tocar los problemes de raigón (la radicalidá que ta tan mal vista nestos tiempos). En vez de reestrucutrar, búscase cortalo too ensin estudiar en profundidá lo que se trata, como si too fuera lo mesmo, faciendo repartos a lo Conferencia de Berlín que queden con precioses llinies rectes enriba'l papel, pero que ponen más torgues tovía a les persones qu'han de vivir día a día estes midíes.

Ensin embargo, España ye un país de fatos y de vagos. De fatos, porque se nos engaña a la primera. Y de vagos, porque tol mundiu aceuta ensin rechistar esi engañu, cuando estos nun tienen que ver direutamente col so bolsiellu (más tovía cuando paez que ye bueno pal bolsiellu). La idega de que "yo soi apolíticu y que me lo den fecho too, que pa eso lo cobren", triunfa. Cuando les reformes que somorguien a ún danse seliquino, bien untaes en vaselina fresquino pa que nun roce y coles pallabrines melgueres sosurraes al oyíu polos politiquinos guais, reformistes y/o modernos y guapos a lo Cantó o a lo Cayo Lara (sobre gustos...), entren ensin dificultá. Y meyor tovía cuando vienen acompañaes de reformes dures que sí nos toquen el bolsiellu direutamente. Ná meyor que la subida del IVA pa tapar que nos ficieron esclavos.

Gracies a too ello, la hipótesis de la reducción d'instituciones en favor del bien públicu ta triunfando descomanadamente y yá ta dando los sos frutos.

Fai unos años, cuando la última etapa del gobiernu de Zapatero, aprobóse una midía que condenaba la democracia abierta a la muerte: la supresión de los conceyos abiertos, onde la xente de los municipios más pequeños de 300 habitantes podíen establecer les sos normes de forma direuta, ensin intervencionismu de partíu dalu. Pasóse a una municipalidá de tres conceyales profesionales, ún de los cuales habría ser l'alcalde, entendiendo que la dedicación esclusiva yera más rentable pal grupu qu'el grupu mesmu. La midía fue recibida con entusiasmu por tolos partíos congresuales del momentu. Suponía l'adiós de cualisquier tipu de democracia direuta n'España, pero diba dar puestinos y perres d'onde antes nun se podíen sacar.

Dempués, apaeció la teoría de la unificación de municipios. Si los conceyos son pequeños, nun son quien p'afrontar los gastos que conlleven los servicios que tienen que prestar. En vez d'apostase pola formación de mancomunidaes que los xestionasen conxuntamente y compartir empleaos y empreses municipales, entendióse que menguar el númberu de conceyos yera la solución. Esti país de fatos sabe restar y sabe que si tienes dos y te quiten ún, queda ún; pero escaez que si ente dos sumen 500 y se xunten, siguen sumando 500. La xunión sistemática de municipios nun creya un municipiu grande con meyores servicios, sinon un municipiu desestructuráu, colos servicios centralizaos nuna capital (lo que provocará una emigración a la cabecera) o repartíos en delles cabeceres (lo que implicará la mobilidá forzosa de les persones qu'enantes teníen l'accesu cercanu) o, finalmente, una multiplicidá na xestión por ufiertase too en dellos centros (polo que solo s'aforrará n'identidá). La esistencia de los conceyos nun ye caprichu (al menos n'Asturies); la historia de munchos d'ellos fala de la llucha del pueblu polos sos drechos y l'esfuerzu que supuso algamalos. Pero les identidaes culturales (y más n'Asturies) tienen mala prensa y triunfen les burocracies fates. Les xuniones han dase solamente cuando seya por consensu ente municipios, non por sistema, y una vez agotaes toles fórmules posibles de xestión conxunta.

(EQUO Avilés, defensora d'estes midíes, caltuvo conmigo una conversación pol twitter onde me dicía que la xunión de conceyos yera la rempuesta a una reivindicación ciudadana de 30 años -anque esto fuera dalgo infundao y discurrío por EQUO Avilés-, y que nun atentaba contra les identidaes culturales, porque estes calteníense nes parroquies rurales) El siguiente pasu fue l'afogamientu de les parroquies rurales. Como son entidaes non gubernamentales y ensin ánimu de lucru, nun son consideraes entidaes alministratives (anque la llexislación asturiana considerales instituciones de xestión). Amás, son asociatives, polo que los sos representantes son escoyíos por votación direuta y han rendir cuentes a la asamblea. Fieden a democracia direuta y, claro, molesten. Asina que les partides públiques van reducise si nun camuda'l modelu de xestión p'hacia una profesionalización de los responsables, dalgo que, como espuse más enriba, nun se pue faer pola propia cadarma estatutaria de les parroquies. Toca desapaecer, pero por asfixia. 

Quitando parroquies, desapaeciendo les mancomunidaes y creyando macro-conceyos, les persones queden desaveraes de la toma de decisiones dafechu (anque yá lo taben pol sistema democráticu de representación partidista, agora l'abilsu ye físicu). La siguiente estaya ye l'autonomía. Y nel Principáu d'Asturies, esta autonomía ta mui enferma: sofitáu'l Gobiernu nun partíu como UPyD que quier la so desapaición, siendo'l partíu gobernante sumamente centraliegu y teniendo al so presidente preocupáu por "faer España dende Asturies", con una oposición de dreches españolistes, y intervenida económicamente pola alministración central dende que s'aceutara el Fondo de Liquidez Autonómica. La tema "autonomía" da pa falar muncho, pero nun ye l'alministración más afayaíza pal ciudadanu asturianu, nin de lloñe.

Ún de los refranes más escaecíos, gracies a la burbuya inmobiliaria, ye aquel que diz que "nun se pue escomenzar la casa pol teyáu". Tampoco se pue sofitar el teyáu ensin cimientos. Y el cimientu de la democracia ye la xente. Esto tien qu'esbarrumbase, yá.