Cuando s'acabó'l mundu.

Sigún el calendariu solar de l'antigua civilización maya, mañana 22 d'avientu de 2012 finará'l mundu. Al paecer, lo que los sacerdotes d'esa civilización, que miraba más pa les estrelles que pa la redolada (la so debacle vieno pola economía de marafundiu de recursos naturales que prauticaba), queríen dicir yera qu'esti día escomenzaría un nuevu ciclu cósmicu, l'empezar d'un nuevu orden social. 

A nosotros, los occidentales alimentaos de la moralidá xudeocristiana, por más atéu que seya l'occidental, esos camudamientos de ciclos traemos al pairu, porque tenemos una mentalidá subordinada a un condicionamientu llinial del tiempu: les coses escomiencen y finen, pero rara vez se tresformen por sí soles. D'esta miente, lo que nos dixeron los mayas solo pue entendese como la llegada d'un cataclismu, un fin del mundu españante, colos arcánxeles del cielu lluchando poles ánimes cola infernal puta de Babilonia o con un meteoritu escomanáu franciendo la corteza terrestre hasta'l magma y solmenando tsunamis a diestru y siniestru, pa tapar el sol cola povisa resultante. (Lo que vien a ser lo mesmo) El casu ye que, si les coses tienen que ser diferentes, solo van poder selo si s'acaba con tolo anterior.

Y esto ye dogma pa too, non solo pa los fines de los tiempos. Tamién pasa en política, como se pudo ver con dellos exemplos esti añu 2012 (demasiao entreteníu na precariedá como pa enllenar estes pantalles d'entraes).

Un exemplu ye'l casu de Cataluña. D'una parte y otra, de la secesión y del xunionismu, se falaba del contrariu en términos similares a los qu'usaría l'ánxel esterminador. Pa los primeros, quedar n'España yera lo mesmo que caltener la crisis y solamente rompiendo'l vínculu col estáu actual diba sirvir pa esporpollar. Pa los segundos, que Cataluña algamara la independencia yera lo mesmo que si un terremotu franciera por completo'l territoriu, quedando destrozaos texíos industriales, financieros y hasta culturales, porque los que se consideraren "españoles" diben ser enzarraos nun campu de concentración perpetuu onde, poco más, se-yos implantansen electrodos na llingua por si se-yos ocurría falar en castellán. El términu mediu del federalismu propuestu pol PSC yera tan absurdu como improvisáu y naide nun creyó n'elli. Taba claro, el cataclismu, pa un lláu o pa otru, yera (y ye pa munchos) inevitable. [Aforro dar la mio interpretación, pa nun estendeme, pero solo pueo entender que los catalanes (como cualisquier otru pueblu) han tener la responsabilidá total pal so determín, y esto nun pue conseguise nin nuna España autonómica, nin nun sistema económicu como l'actual]

Otru exemplu, ya le problemática del sistema sanitariu. D'una parte, apuéstase pola intervención d'empreses privaes na xestión de lo que, hasta agora, yera una Sanidá Pública. D'otra, qu'esti serviciu de primera necesidá ha caltenese públicu al 100%. Los apostantes primeros entienden que los gastos son tan altos que vía impuestos nun pue asumilos l'Estáu y que la so delda incrementaríase cola baxada de recursos atopaos pola Seguridá Social, nel casu de que les empreses privaes nun se metieren nel (yá) negociu. Los que piensen que cola salú nun se pue xugar denguna apuesta, camienten que l'oxetivu principal de les empreses ye ganar perres y, polo tanto, el sistema diba perder n'humanidá pa crecer en tases, desatenciones y, por supuestu, en desiguldá. Asina que si nun se privatiza la xestión, la Sanidá desapaez; y si se privatiza, la Sanidá desapaez. Tou un cataclismu, otra vuelta. [La Sanidá, la Educación y los Servicios Sociales tienen que tar por enriba de la seguridá de bancos y caxes d'aforru, asina que los recortes n'estos tres pilares , de la sociedá, de problemes comunes compuesta d'inviduos con problemes personales (que non del estáu de drechu, que ye un inventu pa apagar conciencies), van ser siempre infundaos]

Podemos atopar munchos más exemplos de cataclismos nel discursu de la vida pública (y privada) güei, ensin falta de falar con mayas. Por embargu, sabemos, anque lo deseyemos o nun seyamos conscientes, que dengún d'estos problemes va españar del too. Somos los ánxelos que quieren lluchar contra la puta d'enfrente, pero nun tenemos meteoritos pa francela. Y dexámonos llevar, ceder drechos, perder servicios y prestaciones, emponderar les perres... en definitiva, amenorganos como persones.

Los mayas nun atendíen pa lo que-yos rodeaba, de tanto mirar pal cielu y quedaron arrequexaos en delles aldegues selváticus mesoamericanes. Nosotros, occidentalinos d'esti estáu español, mirámonos tanto al ombligu que paez que nun tengamos otres coses. Y esto, a 20 d'avientu de 2012. (La pena ye que mañana, día 21, too va siguir igual: esto nun va acabar y naide nos va dicir qu'esi ombligu que miramos, en realidá, pertenez a un bancu)

La importancia de Kerenski nel sistema educativu

Nestos díes de recortes en drechos humanos y servicios sociales disfrazaos d'esfuercios pol bien común, los profesionales de la Educación van convocar un paru d'un día pa protestar y demostrar el so malestar. Bien por ellos, porque yá tardaben. Pero esti nun ye la tema (polo menos d'esta entrada). El sistema educativu yá taba mal enantes de los recortes económicos y, siéntolo, pero buena parte de la culpa tien que recayer nos propios mayestros y profesores. (Pas, profesores, alumnos, alministradores y llexisladores son toles pates del sistema y toos tienen la so parte de responsabilidá pa llegar a esta situación... pero los profesores son los que tienen que cuidar d'elli pa caltaner la calidá y, sobre too, la congruencia del mesmu y, nestos últimos años, callaron muncho cuando teníen que falar nuna mentalidá de funcionariu foína) Espero que me convenzan de que nun ye una protesta única y esclusivamente pola pérdida de drechos llaborales (que tamién sedría llexítima, claro tá; pero que se me diba quedar mui curtia).

Llevo un añu dando clases particulares a un rapaz de dieciséis años que solo tien un oxetivu pa siguir p'alantre: acabar los estudios d'una vez. Los pas tienen la decisión de ponelu a trabayar si nun atopa unos estudios de formación profesional pa setiembre que-y resulten afayaízos. Nun-y callen con que ye'l momentu d'estudiar, que de mayor va tenelo más difícil y que va arrepentise. Ye más que probatible. Pero nun camuda d'opinión. ¿Por qué? Ye nidio que-y falten motivaciones.

Tres cursos d'Infantil, seis de Primaria y cuatro de Secundaria terminen con un guah.e ensin motivación, que nun-y presta denguna asignatura y, tovía pior, que nun tien más suaños na vida qu'alcontrar un puestu de trabayu de reponedor que-y caltenga la endorga caliente y enllena.

Esti rapaz ye tímidu, de los que mira un escote y se pon coloráu, de los que-y presta salir los sábados colos collacios a privar y falar de hip hop, de los que tien en tuenti la meyor forma de comunicación col mundu, de los que, si pue, intenta engañar al mayestru que-y vien los miércoles pa que-y faiga los deberes. Ye un rapaz normal y corriente. Y, pesie a que nun vaya dexar l'institutu enantes de tiempu y salga con too aprobao, ye un completu fracasu del sistema escolar.

Pero tampoco nun m'estraña.

Fai un mes díxome que teníamos que faer sociales, que tenía un esamen. El profesor, amás de dici-yos a los sos escolinos lo que teníen que sorrallar en llibru, marcára-yos delles preguntes del testu pa que, respondiéndoles, tuvieren qué estudiar y nun quedaren tan perdíos.

Les temes yeren el Colonialismu y la Primera Guerra Mundial. Y, énte la bayura de fueyes sorrallaes por otru, y como bobu nun ye, pidióme que-y dixera qué yera lo que podía cayer nel esamen. La verdá ye que me paeció simpático, porque quinieles d'estes ficimos toos, pero claro, ficíamosles nosotros mesmos. Asina que-y respondí, pa qu'estudiara más de lo que-y pidía'l profesor con aquelles entrugues: "Causes y consecuencies". Quedó como taba, claro. Pero díxome qu'ónde les atopaba nel llibru, porque nun había un títulu al respeutu. Asina qu'aproveché pa dir desplicándo-y les intenciones de los países europeos pa espardise pol restu'l mundu, qué pasó na Conferencia de Berlín y cómo fue'l Repartu d'África, les diferencies ente los sistemes coloniales de les potencies y qué yera un dominiu, una colonia, un protectoráu o una factoría, qué fueron les Guerres del Opiu y quiénes los bóxers, por qué se montó tan gorda porque un rapaz serviu matara a un archiduque austriacu y que pasó en Brest-Litovsk y Versalles. 

Una hora de tocapelotismu en altes dósis, pero que-y valió pa saber qué estudiar, qué yera lo importante y ónde alcontralo. Munches de les coses que-y dicía, nun taben sorrallaes pol profesor y quexábase, pero yo dicía-y que si les ponía como complementu, diba sacar meyor nota. Y tampoco yeren coses complicaes. Por exemplu, una vez que se sabe que Austria, Alemania y Italia yeren un bandu, nun ye difícil saber que los llamaben la Triple Entente, porque lo complicao ye saber los países. Y dióme la razón.

Al siguiente miércoles la má díxome que-y sacara una foto col móvil al esamen pa enseña-yos a ella y al pa'l 9 y mediu. (Toi seguru de que más del 90% de los profesores asturianos de secundaria d'otres asignatures nun pasaría la mesma prueba)

Esti caberu miércoles, volvió a lo mesmo. Esamen de Sociales, períodu d'Entreguerres, Revolución rusa, Gran Depresión estadounidense, Mussolini y Hitler. Más sorrallaos de terceres persones y más entrugues del llibru. Poro, más causes y más consecuencies.

Pero, esta vez (dempués de decatame que'l profesor dexare de desplicar/sorrallar la tema del marxismu), al falar del Crack del 29, de la quiebra los bancos y la falta de créditos, de la subida'l paru y les hambrunes, solte-y un "¿Suénate a dalgo?", y elli, el hiphoperu tímidu y ensimismáu en tuenti, respondió: "Ye lo que ta pasando agora". De la qu'apuntaba en llibru los sitios onde alcontrar estes coses, pa responder dempués les entrugues del llibru, yo mirábalu con un prestu tremendu: había esperanza nun futuru de xente ensin estudios pero que piensa por sí mesma.

Al desplicá-y que Mussolini y Hitler llegaron al poder gracies a un sistema democráticu que camudaron al so albur, sofitaos polos ricos empresarios y la Banca y una sistema burocráticu y xudicial afín, controlando la prensa y criminalizando a los disidentes, soltó: "Ye lo que ta pasando agora".  Mientres facía marques onde apaecíen toes eses coses, yo quedaba encantáu cola so capacidá d'analisis. Pesie a la so desinformación, ¡hai futuru!

Y, pa finar, cuando-y falé de que la revolución rusa de febreru nun camudó la realidá zarista, pesie a sofitase na confianza d'obreros y campesinos, porque a Kerenski nun lu dexaben les clases oligárquiques, miróme y, énte les míos esperances d'una nueva y acertada comparanza cola actualidá, constantando esi bucle de que la Historia siempre se repite y que muncha xente niega dende la comodidá de les sos antegüeyos de pollín, díxome: "Pero, ¿tengo qu'estudiar a Kerenski? Son munchos nomes y, como yá saqué un 9 y mediu, nun me fai falta más nota".

De secute, rinxó'l taburete onde me siento al quedame'l culu cuadráu de desencantu. Miré la hora y llegaba tarde al teatru (a ver un Brecht inmensu polos rapazos de 4ºA de la ESAD). Y díxe-y qu'elli viera. Llevanteme a pola bolsa onde llevo los trastos y recordé-y, como siempre, que si dalgo nun-y quedaba claro, que nun duldara en llamame o mandame un mail. Despedime y elli, en vez de llevantase a zarrar rápido la puerta, hábitu normal nun adolescente cola má por casa, díxome adios dende l'escritoriu, entreteníu n'arrodiar con un círculu de boli una pallabra del llibru: Kerenski.

Una, grande y libre.

 

Ún de los tracamundios más habituales cola crisis ye'l de que sobren municipios, diputaciones y autonomíes n'España. Les razones que se dan son que dupliquen, tripliquen o cuatripliquen competencies, que se gasten perres de más n'instituciones que puen llegar a ser caciquiles y que nun se decaten de los gastos, xenerando una deuda incontrolable ya inadmisible, que torga'l gastu n'otres coses como la Educación, la Sanidá o los Servicios Sociales. Vien esta entrada a desmitificar estes idegues, a apurrir reformes consecuentes y a proponer nueves visiones que se tan escaeciendo y que ponen en peligru fonderu los drechos y les llibertaes de les persones.

Pa escomenzar, quiero dexar claro que lo ideal dientro d'un sistema braderamente democráticu ye averar la toma de decisiones al ciudadanu. Dende bien antiguo les sociedaes alministráronse dende lo cercano, dende la estaya más bultable. Cuando esa capacidá se perdía, yera porque les persones dexaben de tener la capacidá d'organizase por si mesmes, porque s'imponía una fuercia dende afuera: un pueblu invasor, una autoridá militar o relixosa, un imperiu... Si tomamos Atenes como l'exemplu históricu de democracia, alcontramos una pequeña ciudá con una serie de ciudadanos llibres (anque fueren los menos) que se rexía a sí mesma, entre toos sorteaben los cargos públicos y escoyíen al estratega militar, y lluchando escontra otres polis y/o imperios que queríen faer desapaecer esa independencia, defendíen esa responsabilidá direuta nel devenir de la coleutividá. Y esa yera la so identidá. 

Tamién quiero dexar claro, qu'estes propuestes apúrrense solamente dende seutores qu'entienden que la democracia d'anguaño nun tien ná que ver col gobiernu del pueblu y que la participación d'esti tien que quedase ná más nes votaciones cada cuatro años pa escoyer a los sos representantes. O bien persones que nun seyan conscientes de que tienen la posibilidá d'autogobernase, tando más cómodos siendo dirixíos y protestando cuando aquelles persones a les qu'entregaron la so confianza, los traicionen por defender otros intereses. Dexando pa prau, dende ún y otru sitiu, que les torgues que se faen de toes estes alministraciones públiques, puean dase na alministración central tamién.

Por último, falar a les clares de que cualisquier tipu de midía centralizadora, onde les tomes de decisión s'alloñen del pueblu, creya granibles desigualdaes xeográfiques (polítiques, sociales y económiques), amás de poner en valía unes identidaes frente a otres (nesti casu, la española escontra cualisquier otra de cualisquier tipu) y d'inmobilizar al pueblu na defensa de los sos drechos.

Escomienzo pola idega de multiplicación de competencies públiques. Si esisten diecisiete alministraciones autonómiques, ye por estes tan más averaes al ciudadanu y esti, sobre'l papel, pue acudir a elles d'una forma más granible. Si l'Estáu ufierta la mesma competencia, ye l'alministración central la que sobra porque, nel so momentu, apurrió ya, incluso, obligó a aceutar el trespasu. Amás, pa poder aguantar un sistema centralizáu habría sofitase na multiplicación d'entidaes estatales, como fai anguaño coles competencies que gobierna al traviés de les delegaciones provinciales de les respeutives entidaes. La diferencia ente un tipu d'alministración y otru nun tará nel númberu d'oficines o de trabayadores públicos, que sedrán los mesmos qu'anguaño o nun se soportará, si non nel llugar onde se tomen les decisiones polítiques, más averaes al ciudadanu cuanto más descentralizao tea. Nesti estáu, sobra alministración central.

Sigo pola idega del caciquismu. Ye nidio qu'un sistema democráticu con pequeñes circunscripciones pue ser más dau a los abusos de poder y un conceyu pequeñu pue ser un buen campu de cultivu d'estes práutiques: dánse n'Asturies anguaño con alcaldes que se sienten y actúen como propietarios de los bienes públicos, guardando'l coche oficial nel garaxe de la so casa o respondiendo a les propuestes vecinales con amenaces o marxinaciones (l'alcalde de Yernes y Tameza, ensin dir más lloñe, que nin siquier vive nel munciipiu que gobierna). Pero la solución nun bien por xuntar un ayuntamientu pequeñu con otru mayor o dellos pequeños (muncho menos obligao), lo que solo xeneraría discrepancies ente vecinos y desequilibrios estructurales nos servicios municipales (cuando dos conceyos voluntariamente quieren compartir servicios, formen mancomunidaes; ye perverso querer formar de les mancomunidaes conceyos, porque s'escaez la identidá de los ciudadanos de los mesmos, a parte del so nivel d'implicación). La solución atópase dándo-yos mayor participación a los ciudadanos, onde les decisiones seyan tomaes n'asamblea. Por embargo, l'añu pasáu apróbose una llei onde se suprimíen los conceyos abiertos en favor de consistorios con conceyales. El sofitu argumental yera la ineficacia y llentitú na toma de decisiones d'esti tipu d'asamblees; dexaba'l camín llibre pa la supresión de los municipios.

Por último, falar de la deuda, del gastu inapropiáu ya imprudente y la falta de control. Nun se pue negar la deuda astronómica de munchos conceyos, qu'acaben dexando a los vecinos ensin cobertories de servicios básicos. Pero tá claro que, dientro d'esa deuda, los ayuntamientos más habitaos (Madrid, Barcelona, Valencia...) son los qu'ayuden más. Por otru lláu, nun toles comunidaes autónomes tienen los mesmos niveles de deuda y, estos, son incomparables coles de l'alministración central, que controla la distribución de les ayudes europees como-y pruye. De lo que nun cabe dubia ye qu'estes dos alministraciones tan xestionando la deuda pública con bancos y diverses entidaes financieres, beneficiando a los especuladores y dando la espalda a los ciudadanos, que tienen que pagales a costa de recortes nos sos drechos. Ehí s'alcuentra el problema: non na esistencia de más o menos división alministrativa.

Pero, centrándonos nel casu municipal, la fusión de conceyos (eufemismu pa nomar la "supresión de conceyos") nun ye aval de reducción del gastu. Yá falé enriba de que los conceyos puen xunise en mancomunidaes pa compartir gastos y servicios, ensin perder independencia. La xunión, sobre too cuando nun ye voluntaria, que ye lo que se ta plantegando, pue causar, como tamién dixe, desigualdaes ente los territorios: desplazamientos a sitios más alloñaos pa tramitar documentos, pérdida de servicios inmediatos qu'enantes sí se teníen, más tardanza nes tramitaciones, camudamientos de nomenclatures... y pérdida d'identidá. 

Sé que nestos díes falar d'identidá tá mui mal visto y peor sintío. Ensin embargu, cuando la xente diz que nun ye momentu pa falar d'esti tipu de coses, ye porque ta faciendo propia una identidá que considera única y normativa. La identidá ye indispensable pal ciudadanu, porque nella atopa'l so significáu como persona. Y les alministraciones, sobre too les que s'autonomen democrátiques, tienen que cuidar por eses identidaes ciudadanes, ensin uniformales. Trabayando pola pérdida d'identidaes diferenciaes, afeando a quienes les defienden, les fuercies polítiques algamen la posibilidá de dir arramplando drechos ciudadanos. Y una vez perdíu ún, los demás van de secute. 

Tamién se trata, nesti casu, de nacionalismu español centralista, pero nun segundu planu, al mio entender. Anque si a dalguna d'estes mentes pensantes se-y entruga por qué, si España tien tantes deudes y anda tan mal n'empléu, en financies y en productividá, nun se fusiona con Francia, pasando a ser parte d'ella como un conxuntu de provincies más y reduciendo asina gastos alministrativos... de xuru que va responder qu'España ye un país, un estáu, que tien historia propia y común a los españoles, etc., etc. O seya que, curiosamente, tirarán d'identidá. A veces, de forma rancia. (Recordemos el lema: "Una, grande, libre")

En conclusión, la supresión de conceyos y de competencies autonómiques y diputacionales, traerán consigo la pérdida del averamientu de les alministraciones al ciudadanu, lo que fadrá que la democracia se torne nun sistema indereutu, onde les decisiones nun proceden del pueblu, amás de procura-y una peor xestión de los servicios esenciales ya inmediatos, somorguiar la identidá propia a una impuesta dende afuera -anque fueren compatibles en principiu-, y un emprobecimientu esponencial del territoriu onde vive, independientemente de la riqueza qu'esti tuviere.

Habrá camudase'l sistema d'eleición de los representantes, mientres que nun se puea reasumir como'l sistema más viable l'asambleísmu ciudadanu; habrán camudase les formes de reponsabilizar a los representantes del pueblu n'eses instituciones respeuto a los sos marafundios; habrán camudase les estayes de trabayu de cada alministración pa que nun se solapen, entendiendo que, cuanto más averao al ciudadanu, más rentable pa la sociedá; y habrán camudase idegues qu'anguaño se tomen por dogmes intocables de la fe democrática (como'l sistema partíos, la financiación por sovenciones, el centralismu como solución a los problemes...). Pero que naide piense que separtar al ciudadanu del poder ye bradera democracia, por más que les cuentes-yos salgan.

D'elefantes, terroristes y Evites Perón.

Esti mes d'abril fue bastante movíu y, a falta d'un par de díes pa que fine, índa promete siguir siéndolo. La crisis del sistema captialista, tapáu polos medios de comunicación y pol estamentu políticu como una crisis ecomómica ensin más, ta, pocoñín a poco, camudando nuna crisis del sistema democráticu español. Si dalguien tira de la manta pa tapar la tiesta, acaba destapando los pies: si se cuida de nun perxudicar a les mentes pensantes financieres, acábase por dexar mal paraos los cimientos onde se sofitaba la democracia española: rei, nexu América-Europa y drechos sociales.

La monarquía española ye la institución pola cual se caltién España xunida. Estes nun son pallabres de mío, sinón la xustificación usada mientras la Transición pa tragar col agasayu que supunxo l'aceutación del testamentu franquista: Juan Carlos I, rei d'España. Y a la Hestoria se remitíen: tolos intentos por caltener la paz fuera la monarquía, acabron mal. Y la xente, que taba familiarizada con un mozu altu, rubiu, bien educáu y con talante de diálogu, nun solo nun tragó, sinón que lo vio con buenos güeyos, hasta'l puntu de que munchos se nomaron "juancarlistas" (pol vezu de tener un referente personalista, dempués de cuarenta años col brazu al altu). Quienes falaben de República (la mayor parte, ensin xacíu pola falta de propuestes concretes) yeren vistos como fatos que nun atalantaben tolo bueno que ficiera'l monarca. Pero ye que, hasta les mínimes protestes escontra les actiúes del titular del palaciu La Zarzuela (que non "Zarzuela" a seques, por favor, qu'aldeganismu llingüísticu ye la economía de pallabres), yeren entendíes como falta gorda, de tarxeta mariella rozando la colorada, con sentencies xudiciales de multes, secuestros d'ediciones de revistes y arrestos. Y, en tolos casos, cola acusación de ser unos antiespañoles de llibru, volviendo, otra vuelta, a la conexión monarquía-nación española.

Pero estos meses, la Casa Real perdió les prebendes informatives llambeculeres y saltaron a la voz pública (de la mano de los mesmos medios que callen los tracamundios del Santander, FarmaEspaña o ENRESA) los pufos d'un xenru, les fuxides de pinza del otru col so primer nietu y los pufos y fuxides de pinza de so. En menos de tres meses, don Juan Carlos quedó como un auténticu gochu en cuantes a cabezaleru de familia, dándo-y la espalda a la fía pa salvar el so culu; quedó como un auténticu gochu como güelu, tando de cacería d'elefantes n'África cuando'l nietu se pegare un tiru nel pié; y quedare como un gochu como maríu, por andar de safaris con una princesa alemana de meyor ver que la muyer griega qu'escucha ópera y malpenes fala español. Y toes eses coses, dánme lo mesmo, porque yo nun me meto en la vida de los demás. Tampoco veo mal que cace, elefantes o lo que seya; anque nun me paezca una afición plausible. Lo que me pruye ye qu'el rei nun taba cumpliendo coles sos funciones reales, representando mal al Estáu que lu tien como Xefe, ufiertando una imaxen de desorganización al restu'l mundu... y que la xente se conforme con unes disculpes atatexaes a la puerta d'un hospital. Eso val pa un guah.e d'ocho años que-y quita los cromos a otru y lu pillen. Pero pa un rei... Si se llega a tirar el farol de poner el so cargu a disposición del Parlamentu, sabiendo como se sabe que lu diben a llevar en parigüeles, hasta Anguita y fai la ola por ser l'únicu n'España en dar la cara. Pero, claro ta, qu'el másimu representante del sistema democráticu d'esti reinu dé la cara, ye muncho pidir.

(Vuelvo a dicir que si llego a espublizar esto va un añu, diba tener delles demandes por inxuries al Rei. Y que nun s'entienda esto como un progresu nel drechu de llibre pensamientu, porque ye solo una forma de distrayer l'atención de los braeros problemes)

Por otru lláu, l'Arxentina, cola so presidente Kirschner a la tiesta, cual Evita New Age, decide nacionalizar YPF, la empresa petrolera del llugar que fuere vendía a Repsol va dellos años, cuando'l territoriu arxentinu nun yera la potencia petrolífera y gasística que ye anguaño gracies, tolo hai que dicir, al buen faer de Repsol. El Senáu arxentín acaba d'aprobar la midía, con delles voces a la escontra (que dempués me prestará comentar).

Y, enantes, Repsol tira de la pernera'l pantalón a Rajoy pa que la defienda, como empresa española que ye. De lo que s'olviden dende la cúpula de Repsol ye que yá nun ye una empresa española, porque fuere privatizada a finales de los 80; tamién escaecen que'l so crecimientu económicu nun se vio acompañáu por un repartu de beneficios ente los españoles, nin si quiera nuna meyora de les condiciones pal consumu carburantes, por exemplu; y tamién s'olviden de que, al internacionalizar la producción, la mayor parte de los impuestos como empresa, taben pagándose a otres faciendes non dependientes de la española (nel casu de los direutivos, yá nin falo). ¿Cómo se pue dicir que Repsol ye una empresa española? Ye una multinacional y los sos intereses, nun yeren españoles, sinón empresariales. Que vayan a los tribunales y lo solucionen. (La carcaxada qu'echaren los lores y los comunes británicos, si BP acudiere a ellos pa que mediaren con otru estáu polos sos conflictor (por exemplu, nel casu la plataforma que s'hundió nel Golfu de Máxicu, con Estaos Xuníos), diba sintise hasta nes Falkland malvinianes.

La idega de la Kirschner ye nacionalizar esa empresa porque Arxentina, un de los principales esportadores de petroleu, nun ye autosuciente y tien que compralo fuera, más caro. Asina dicho, solo un neciu pue entender que puen más les razones económiques de los empresarios privilexiaos por gobiernos anteriores col monopoliu petrolíferu y que yá algamaron los sos beneficios, que los drechos de los ciudadanos arxentinos a esfrutar de les sos riqueces. El pero bien (lo que me prestaba comentar más enriba) cuando les mídies van encaminaes a favorecer a grupos empresariales oligárquicos del país, que sofitaron les campañes de la presidenta (y del so maríu fallecíu), y non p'algamar una compañía petrolífera pública que beneficie a tol pueblu.

Seya como seya, la polémica prendió como un conflictu entre Arxentina y España, quedando les relaiciones ente Arxentina/Latinoamérica y España/Xunión Europea (qu'al final dexó a Rajoy solu, quien tuvo qu'acudir a doña Hillary a la gueta de sofitu internacional) bastante perxudicaes. Y en dengún sitiu se pretendió ver l'abusu de poder de Repsol pa colos arxentinos, esplotando los sos recursos ensin dexar riqueza nel país, nin pa colos españoles, a los que s'acude solo en momentos críticos (lo que nun ye nuevo ente les grandes empreses).

Pero, ensin dubia, lo más preocupante d'esti mes, por enriba d'estes dos caxigalines qu'a los ciudadanos d'infantería nun mos tienen qu'afeutar lo más mínimo, ye'l recorte de drechos sociales que se ta faciendo n'España al amparu de los axustes económicos pa iguar el déficit. Nun me voi detener nes midíes apurríes pa la Sanidá, nin pa la Educación, nin pa los Servicios Sociales, nin pa les Alministraciones Públiques non centrales, que tamién son coses mui graves relatives a los drechos humanos. Quiero falar, como exemplu, de la revisión del Drechu de reunión.

Como la mayor parte d'estes midíes van a la escontra de los drechos humanos y de los recoyíos pola Constitución, pero la Xusticia nun les echa p'atrás, la xente garró por vezu salir a la cai a protestar. Pero va de sieglos, nun ye d'anguaño. Organizándose en grupos, les mases populares protesten escontra'l poder que nun surde d'elles -por más qu'el poder asina lo diga- de les formes más diferentes. Fitos na Hestoria foron la Revolución de los Claveles, onde los portugueses poníen estes flores nos cañones de los fusiles del exércitu movilizáu pa llibrase d'una perfeutamente llegal dictadura o, n'otru exemplu estudiáu nes escueles como símbolu de llibertá, la Revolución Francesa, onde los franceses pasaron pola guillotina a los nobles y al rei, pesie a qu'estos taben llexitimaos pal so comportamientu despóticu y autoritariu poles lleis.

El casu ye que l'Estáu español quier blindase escontra esti tipu de movilizaciones, promulgando lleis que penen a los protestantes con terroristes, si s'oponen a los dictámenes policiales. Pero nun se queda ehí la cosa: pue ser hasta entendible que dalguien identifique a un violentu manifestante que ruempe un cristal o quema un contenedor, con un mozu de la kale-borroka vasca. Ye tremendo yá qu'esto seya considerao terrorismu (y ye una de delles coses poles qu'España nun pasa los esámenes de les organizaciones pro-drechos civilies más importantes, como Human Rigth Watch o Amnistía Internacional). Pero ye que, poles mesmes, la desobediencia pasiva, tamién ye terrorismu n'España.

Tengo claro que convertir España nun estáu policial nun va ser bueno pa esti sistema democráticu que ta maureciendo a los güeyos de los sos ciudadanos, ca vez más cansaos de medíes de recorte y más descontentos colos sos políticos. Pero tírome de los pelos al ver como muncha xente tovía sal en defensa'l rei, aplaudiendo los sos tatexos esculpatorios, o como la mesma y más, pide glayando represalies escontra Arxentina "por quitamos coses". Tienen suerte daquellos que viven bien col sistema equí de tener una ciudadanía tan desconocedora de los sos drechos y, lo que ye más triste, de la so realidá, inmutable salvo cuando Messi o Sergio Ramos fallen un penalty. Pero claro: yo soi un terrorista, que nin caza elefantes nin gasta un duru en gasolina.

Dempués, nun te quexes

Ayer fue día de güelga xeneral n'España. Los sindicatos mayoritarios, UGT y CC.OO. convocáronla pa protestar escontra la reforma llaboral qu'el Gobiernu del PP aprobara, pa escomenzar l'añu dando buena imaxen a los mercaos internacionales y a la Unión Europea. Con ella resulta qu'el despidu va sali-yos a los empresarios más barato qu'anantes y que los convenios coleutivos van perder vixencia, fórmules que s'entienden dende los promotores de la idega como escelentes pa creyar empléu, pero que suponen un recorte abondo importante nos drechos llaborales de los trabayadores. Paez que ye agora cuando UGT y CC.OO. dánse cuenta de la pérdida d'estos drechos y reaicionen con un paru xeneral d'un día que, dende un principiu, y pesie a tar sofitáu por otros sindicatos menores, sectoriales y llocales, tenía tola pinta de ser un fracasu.

Son tantes les torgues que se-yos puen echar enriba a estos dos sindicatos, y los que siguen les mesmes fórmules d'aición, que nun tien qu'estrañar que buena parte de la población española contestara la convocatoria con máximes esquiroles de toes toes, escaeciendo qu'el drechu al trabayu que cacaraxaben ye lo mesmo qu'el drechu a la güelga, porque les güelgues son un recursu pa caltener los drechos llaborales nel futuru. L'esquirol tien pan pa güei, y culos que llamber pa mañana.

Pero aguántome la vergoña ayena énte'l qu'índa se piensa clase media dientro d'una burbuya inmobiliaria qu'españara fai años, cuando solo ye refugaya pal que manda, pa entender los sos camientos: atemorizáu polos medios de comunicación y los sos representantes políticos, que lu impliquen a solucionar una crisis que ta enriqueciendo a otros col sacrificiu propiu, en vez de protestar realmente escontra'l sistema, sofitalu, pónlu enriba'l llombu y carrétalu pa onde-y diga.

Nun-y quito un res de la culpa pol so garrulismu, pero entiéndolo porque naide ta obligáu a facese l'héroe, prender una antorcha y guiar al pueblu. Más que nada, porque paez que les antorches amburaron fai tiempu del too o yá nun se saben prender. Y ye motivu de risa ver a dalguien dicir qu'estos dos sindicatos, pareya de fechu, comu PSOE y IU, puen guiar a naide a recuperar los sos drechos. Ente otres coses porque créyolos parte culpable de la situación.

La imaxen d'estos dos sindicatos (y del restu, pola mor de xeneralizar ensin parase a pensar) ye permala anguaño ente la xente d'infantería que tenía que vese sofitada por ellos. Cuando se fala de sindicatos nel día a día, fálase de sovenciones a cursos o a lo que seya, de rólex de dirixentes que van garraos de la mano pol xardín col empresariu, de lliberaos sindicales que solo s'alleguen al trabayador de la fábrica a la hora de dicir los acuerdos que tomaron col empresariu de turnu, de puestiquinos y perres. Cuando se fala con un sindicalista de sindicalismu, acaba ún por alcontrase charrando de les hosties de la Naval, qué buenos tiempos cuando se cortaben les carreteres y la xente salía a la cai a defender lo de so... pero poco se diz del llabor sindical d'anguaño, porque, claro, agora la xente ta acomadao, vive bien y, si protesta, tien coses que perder.

Ta claro que ye méritu d'estos sindicatos qu'esta xente viva bien agora. Pero nun puen refugar de la culpa pol so amuermecimientu nesos lloreos, porque pasáronse munchos años alloñándolos de la llucha sindical, hasta'l puntu de que se piense que too vino rodao y dao dende enriba.

Y normalizóse la idega de qu'un sindicatu nun cuente coles bases p'actuar. Colos lliberaos sindicales pasa igual que colos políticos: son profesionales que representen los nuestros intereses, pero ensin contar con nós más que cuando hai que montar barullu nes manifestaciones afines o votar nes elleiciones. Y UGT y CC.OO. encantaos con esa forma de pensar, porque ná nun faen por camudalo. Y falo tamién de les bases, que piensen que formando piquetes un día de paru, yá lo tienen too fecho, que yá tan lluchando escontra'l capital. Pero, ¿qué se fai nel día a día por movilizar a la xente? Ná.

Agora ta demodé falar d'asamblees (nin polítiques, nin sindicales). Ensin embargu, un sindicatu de clas marillea cuando fala más colos d'enriba que colos compañeros, dando la razón al empresariu por tratar a los sos afiliaos como una masa, en vez de como un individuu con capacidá d'aición individual.

Un sindicalista modernu escandalízase si te siente falar de lo contraproducente que ye caltener a los mesmos delegaos falando siempre colos empresarios. Y, erre qu'erre, votarán a los propuestos dende la cúpula, porque van ser los más preparaos. Anque cuando se crucien pol pasiellu col xefe esti lu salude pol nome de pila y, al restu, pol apeyíu.

Tocar la tema de les sovenciones ye pecáu. Paez mentira qu'un sindicatu de clase puea financiase asina, pero esisten milenta desplicaciones pa faelo. Yo solo entiendo qu'un sindicatu ha ser autosuficiente económicamente, porque asina podrá tener llibertá de movimientos y nun depender de los recortes ayenos. Pero, amás, ¿pue lluchase escontra'l tetu que te da de mamar o fadrá esto quedase nunos cuantos días de paru xeneral?

Tampoco nun me da cómo pue un sindicatu suplantar el llabor que tendría que faer el la propia alministración per se. Yá non porque se pierda un puestu de trabayu fixu (un trabayador públicu), pol precariu qu'ufierta'l sindicatu (acábase'l cursu y el monitor tien qu'esperar a otru), sinon porque un sindicatu tien que lluchar pola institucionalización de los drechos algamaos, como ye la formación de los trabayadores, y nun ser sucursal interesada del Estáu.

Hai más coses que faen que la xente s'alloñe de los sindicatos: la so vinculación con partíos políticos y la falta de crítica a esos partíos cuando gobiernen; el dir a rebufu del capital, ensin proponer fórmules distintes y propies d'organización social; l'actitú de reaición, pola que se contenten con responder solo los ataques más perceptibles, pero nun glayen a los cuatro vientos el restu de problemes sociales (que ven, pero que son secundarios); la falta d'autocrítica énte la so pérdida d'imaxe...

Porque ye una pena que la xente perciba los sindicatos como dalgo prescindible, pero nun ye raro. La xente, con toes estes coses, nun se fía del too, nun sabe de que lláu tan, nin de que lláu tar. Lo que fala'l cartelu de CC.OO. que punxe de semeya, "Es hora de decidir dónde tienes que estar. Luego, no te quejes", bien se lo podíen aplicar a sí mesmos los sindicatos, porque nun siempre ta nidio.

Y, poro, la güelga d'ayer, que yo sifité, foi un fracasu. Non porque'l siguimientu fuera más o menos grande, si non porque nun s'algamaron los oxetivos y, sobre too, porque buena parte de la población trabayadora resquéma-y más tener perdío 70 euros que decenes d'años de llucha polos sos drechos.