Lo de les nueves tecnoloxíes tienen daqué sorpresible na forma de llegar a la xente. Lo que primero se mira con desconfianza y el llabiu torcíu, tómase comu novedá prestosa ya esnobista, pa que, ensin dase cuenta ún de que ye asina, llegue a camudar los hábitos de vida faciéndose indispensable pa les persones.
Cuandu-y punxeron el teléfonu en casa al abonáu númberu 63 de Nueva York, de xuru que quedó bobu mirando pal aparatexu colgante de la parede del vestíbulu de la so mansión, a l’espera de que la telefonista desliara el cable que lu conectaría col so vecín (el númberu 28 y que llevaba tres meses fardando de chisme nel club de golf). Pero nin ún nin otru pudieren maxinase que, un sieglu más tarde, fora de lo más normal ve-y la cara al to interlocutor, anque esti tuviera na otra punta´l planeta tomando un café. Y, anque tovía munchos nun dulden en glayar “¡bruxería!” al enterase de que coses asina son posibles, el casu ye que, anguaño, nun se trata de daqué especial. A la contra, pa munches persones ye un mediu más pa desarrollar el so trabayu, pa dar rienda suelta a los sos sentimientos, pa saciar les son inquietudes… ye daqué necesario a la hora de vivir.
Atrás quedaren pallabres anglies coles que nos tuvimos que familiarizar, como Internet, chat, Messenger, e-mail o blog. Coses, toes elles, que yá son indispensables, dempués d’haber cafiao, prestao pola vida y acostumao al usu, sucesivamente. El nuevu fenómenu –nun tan nuevu, puesto que tien más o menos un añucu yá- llámase Facebook. Trátase d’una rede social –otra pallabra de nueva tecnología- onde se puede detallar al instante les coses que tas faciendo o les que te gustaría facer pa que s’enteren toles persones a les que-yos permitiste accesu a la tu cuenta; pero, amás, puedes mandar mensaxes instantáneos, exponer semeyes y vídeos, alcontrar antigües amistades y facer nueves, apuntase a grupos de interés y tocar les ñarices a los collacios con xuegos en llínia sencillinos –comu’l “Secuestrador en serie”, onde puedes secuestrar a la xente que, pa salvase, tien de adivinar el sitiu onde lu tienes metíu-. Y más coses que toi descubriendo y que nun vienen a cuentu.
La tema ye que abrí una cuenta en Facebook fai una selmana porque la mio hermana nun callaba y un amigu nun dexaba de falar d’ello. Y toi atopáu con ello. Fáltame tiempu pa llegar a casa y ver qué punxieron los mios contactos nos muros –asina se llama onde se dexen les coses a compartir-.
La tema ye que enantes, nunca nun encontraba tiempu pa llamar a Víctor Manuel, nin a Venancio, nin a Ovidio, nin a Stella… y agora sé que tan vivos y tan bien. Y, lo meyor, ye que puedo secuestralos a toos pa ganar puntos nel xuegu.
No hay comentarios:
Publicar un comentario