De cómu la crisis me preparó pa la Selmana Santa.

Habrá quien yá escaeciera lo que ye una bombona de butano. El gas natural yá ye lo más natural del mundu y, cuandu les paredes de la casa nun tán enllenes de tuberíes dende los cimientos hasta’l llar, la llectricidá fai les sos coses pa calentar l’agua. ¡Hasta paneles solares tienen dalgunos llaos! Y ye que, la modernidá va dexando de lláu a la nuestra collacia naranxa y regordeta. Avezaos comu tamos al click pa consiguir daquelles coses que-mos peten nun tris, el tener qu’esperar a que llegue’l butaneru col productu de les sos aguyetes fáisenos, cuando menos, tercermundista.

Pos bien… yo soi de los que inda tien que mirar pola bombona cada vegada que se ducha. Y non porque seya un nostálxicu de los tiempos de cuandu neñu, non; débese a dos razones primordiales: la primera, que nun me gusta moyar el culo con agua frío; la segunda, que’n mio casa el calentador depende de la Campsa pa funcionar.

Yo pensaba que yera un bichu raru yá, rodiáu de xente moderno y con meyor tecnología que la mía. Pero esta selmana dime cuenta de que nun yera asina, que tovía hai muncha xente. Asina ye la apasionante historia:

El cuentu empieza na llonxana villa y Corte de Madrid, cuandu Sebastián, el Ministru d’Industria, Turismu y Comerciu del Reinu, tomó la decisión de baxar el preciu de la bombona de butano ún 22’4% o, lo que ye lo mesmo, 3 euros de vellón. A partir del 1 de abril de 2009, quiciás pa obviar la efeméride del fin de la Guerra Civil, la bombona pegaba la mayor baxada de preciu dende facía dieciséis años.

Mientres, n’una humilde morada asturiana, diba consumiéndose el gas nos actos comunes de la vida cotidiana, comu la cocina o l’aséu. Y, el día 31 de marzu, al fíu menor acabóse-y el agua caliente mientres se duchaba. Al revuelu inicial –cagamentos incluyíos-, sucedió una calma tensa que traxo consigo una llamada de teléfonu pa pidir otra bombona. “Pa mañana la tendrán”, díxo-y la operadora a l’hermana.

Diéron les 5 de la tarde del día 1, y tovía nun había llegao la bombona. Ye más: al día siguiente, nin siquiera el motor del camión de les bombones se sintió na cai. Y coles vacaciones al cayer, una nueva llamada dio la solución al dilema: nun foi que’l camión cayera nun sucu espaciu-temporal del estilu del Triángulu de les Bermudes, non; foi la disminución de la plantiya de butaneros. A lo que apostilló el mozu: “Y si a eso sumes, que se-mos acabó el gas el dia enantes de la baxada del preciu y aprovechó tol mundu pa pedir la bombona 500 pesetes más barata, pémeque voi tar de penitencia hasta qu’acabe la Selmana Santa: pendiente del pasu del butaneru, cantando saetes cada vez que me caiga’l chorru d’agua frío y cargando col costal de la riñonada”.