L'alfombra de les galaxies.

Esta imaxe ye chocante. Avezaos comu tamos a imaginar un globu terraquiu azulón con manches marrones y dalguna pinceladuca de blanco ñube, ver tanta morralla espacial ensuciando la idega paeznos hasa mal. Pero, aunque tea realizada dixitalmente polos téunicos de l’Axencia Espacial Europea y les proporciones de los satélites espaciales nun se correspuendan coles de la Tierra, hai tanta basoria alredior nuestru.

Y nun ye pa menos. Dende que los soviéticos punxeren al Sputnik I n’órbita, van 52 años que’l ser humanu nun dexó de mandar fierros y celúles fotoelléctriques a dar vueltes al planeta. En total, tenemos penriba la cabeza unos 8.000 satélites artificiales. Y solo tán en funcionamientu 600.

Pero, con tolo grande que ye l’Universu en sí –y ensín entrar na existencia d’universos paralelos-, los satélites terrícoles garapiéllense en dos bandes, esto ye, unes órbites determinaes que son más útiles pa que les misiones seyan efeutives: una alcuéntrase a 2.000 kilómetros d’altitú y nómase “Leo” (la que apaez na recreación de la ESA) y otra, la “Geo", a 36.000 (esta utilícenla les empreses de telecomunicaciones).

Ensin embargu, la cosa nun acaba equí. Les bateries o los depósitos de combustible de los satélites frayen al final del tiempu d’usu y, anque buena parte los trozos acaben incinerándose n’atmósfera terrestre comu estrelles fugaces -asina que nun acaben por cayenos na tiesta, como la MIR-, la mayoría siguen espardiéndose hasta l’infinitu o hasta que atopen con daqué que los apare.

Asina que, dempués de que se produxeren los primeros choques espaciales (ente’l satélite rusu Kosmos 2251 y el norteamericanu Iridium 33; al más puru estilu Guerra de les galáxies) y de que se tuviera qu’evacuar la Estación Espacial Internacional pol riesgu a que chocara con basoria espacial, surde la gran entruga: ¿qué facemos con tantu fierru?

Nun hai munches soluciones y la única que lleí foi la d’introducir en los sistemas operativos de los satélites comandos guía o dispositivos direicionales, pa que, una vez inutilizáu’l satélite, tomen rumbu a “órbites cementeriu” onde nun molesten. Pero esto cuesta más perres qu’enviar el artefactu ensín más, asina que se postergará hasta que salga rentable: cuando’l nuestru cielu seya un continuu festival de fuegos artificiales.

Les soluciones más sensates tendríen que dir n’el sen d’alcontrar el consensu ente empreses y axencies pa investigar la teunoloxía necesaria pa producir satélites xeneralistes, que sirvieren pa too y, mientres, que los Estaos se punxeren d’alcuerdu pa limitar la competencia dientru del espaciu, nunca nun meyor dicho, espacial –por exemplu, proxeutos comu’l GPS y el Galileo, al producise al empar, dupliquen el númberu de satélites utilizaos pala mesma función-. Pero dame vergoña hasta escribiles col mismu tamañu de fonte, polo alloñaes de la realidá que me paecen.

Asina que propongo, comu buen asturianu y xixonés grandón, la creación d’una gran alfombra interestelar que, una vez puesta n'órbita, sirva pa esconder embaxo la puxarra cósmica, bien emburriadina a base de explosiones nucleares. Cualquier americanu de a pie comprenderá l’idega nun tris. Y asina preparémonos pa cuandu venga l’asteroide asesín qu’arrase la Tierra, con satélites y too.