El vitriolo de les tardes de domingu.

Lleí un artículu de Paulo Coelho onde falaba de l’idega del protagonista d’una de les sos noveles (Veronika decide morir). El director d’un centru psiquiátricu desendolca una tesis sobre un velenu indetectable que segrega’l cuerpu cuandu se somete a los efectos del miéu y que, comu la libido, teorizada por Freud, fai al ser humano sometese al placer sexual, consigue que les persones caigan n’un estáu de lletargu que solo s’identifica pol tastu que dexa na llingua: el sabor amargu.

Coelho díznos a traviés del “vitriolo” –qu’asina noma al humor- de la amargura vital que toles persones tenemos nel nuestru organismu pero que, comu si d’un virus infecciosu se tratara, solo aparez seriamente cuandu tamos débiles. Y denuncia que, nesta sociedá, solo los llocos y los héroes se muestren indiferentes a la galbana, puesto que dambos grupos mantienen intactes dientro d’ellos les fuercies que los faen alloñase del peligru, pos son conscientes de que ná nun ye seguro nin fixo n’esta vida. El restu, fuxe ocupando les sos hores col trabayu inaguantable, cola aburrida vida familiar, colos sos pequeños problemes insuperables y coles sos grandes soluciones a los problemes estructurales… hasta que llega’l momentu cuandu se fai consciente de que vive detrás d’una muria que lu dixebra de la verdadera realidá y que él mesmu mantién a pulsu, pa evitar afrontala: el domingu pola tarde, cuandu desapaez “la rutina qu’alivia los síntomes”.

Tien Coelho l’habilidá de faceme meditar, d’interesame colos sos discursos diferentes, de xurdime l’espiritualidá que llevo dientro, pero tan fondera. Ye verdá que les tardes del domingu son les peores hores de la selmana pa mí. Ensin embargu, anguaño, tengo más hores similares, quiciás porque’l paru pon en vigor los míos síntomes de forma más común.

Pero yo siempre dixi que tengo más de llocu, de “raru”, que de común de los mortales. Los míos baxones de moral, que foron munches últimamente, siempre vinieron siguíes d’un ánimu necesariu pa tirar p’alantre, pa dame de morros escontra la realidá otra vegada, y, si fai falta, llevantame de nuevo.

Mañana, enantes de que’l vitriolo vuelva p’apoderase de mín, voi disfrutar de la vida. Nunca nun dexé de facelo del too. Pero, parándome mirar pola ventana mientres espero’l momentu concretu de subida semanal del mio humor amargo, nun voi evitar que lo faiga. Faciendo llocures, sí: voi poneme a ller. Paezme que Miguel Strogoff, al que atopé güéi nel estante, pue ser un buen acompañante.