Leición d'hestoria.

Güéi ye la entrega de los premios “Príncipe de Asturias”, que otorga la fundación homónima a importantes personalidaes de distintos campos del mundu de la cultura. Vuelven a pasease los príncipes d’España por Uviéu, como vienen faciendo dende fai unos díes, con una banda de gaites incorporada detrás. De xuru que tienen yá la cabeza pior qu’el bombu la banda de tantes marches gaiteriles, pero ye’l preciu que se tien de pagar por una vida principesca.

Güéi, la ciudá capitalina echaráse a la cai pa ver a les alteces reales, glaya-y “¡Guapa, guapa!” a doña Leticia, a emocionase si se cruza la sorisa d’ellos cola propia y a sintir l’arguyu de tener unos “Príncipes de Asturias, que son nuestros y que son tan buenos que nos vienen a ver todos los años” (paisana enxoyada con permanente dixit).

Pero de lo que güéi poques persones s’alcordarán ye del por qué d’esti títulu principescu. Ayer, tuvieron manifestándose pela cai Uría un grupín de persones d’intereses amestaos ente’l republicanismu, l’asturianismu y l’izquierdismu más estremista, debidamente identificaos poles fuercies de seguridá, con una pancarta que dicía: “¿Príncipes d’Asturies? ¿Quién lo decidió?”. Cuando ún d’estos mozos, Iyán, colgó nel Facebook la foto, yo respondí-y que “Un rei de Castiella. ¿Paez-vos poco?”.

Adientrémonos no cabero’l sieglu XIV. La hestoria foi más o menos asina:

Alfonso Enríquez, el fíu bastardu del rei de Castiella Enrique II de Trastámara con Elvira Iñiguez de la Vega, hereda del pá toles posesiones de la Corona n’Asturies d’Uviéu, anque yá dende neñu contaba colos títulos de conde de Xixón, la so villa natal, y conde Noreña y dende bien ceo yá dio señales del so humor autoritariu: marcha n’ayuda del pá a combatir al reinu de Navarra y nun dulda en cobrar tributos que nun-y correspondíen en territorios de lo fidalgos asturianos, actitú que-y fai recular el rei, teniendo que devolver lo sustrayío.

Una vez muertu’l pá, disconforme cola política de sofitamientu de la nobleza cortesana funcionarial del so mediu-hermanu Juan I, rebélase escontra esti nos sos territorios. Apóyalu la so muyer Isabel de Portugal, fía de Fernando I de Portugal, pretendiente al tronu de Castiella. Pero, al retirase les ñeves qu’aisllaben Asturies de la Meseta, nun ye rival pal rei. Pide-y perdón al hermanu y esti, magnánimu, dá-ylu.

Años más tarde, cuenta col apoyu del inglés duque de Lancaster, tamién pretendiente al tronu casteyanu ya inmersu na Guerra de los Cien Años nel bandu inglés, nunos años cuando Castiella apoyaba a Francia. Nueva revuelta. Nuevu fracasu. Pero esta vez Juan I quita-y toles posesiones trasmontanes y déxalu namás col títulu de conde de Valencia de don Juan.

Y esti ye’l momentu cuando apaez el títulu de Príncipe d’Asturies. Al rei Juan pruye-y desfacese d’estos territorios asturianos probes y de difícil accesu -como yá ficieren años enantes los sos predecesores- y creya una figura nueva na nobiliaria hispana, el Príncipe d’Asturies, a imaxe de la inglesa col príncipe de Gales: dar el títulu y el control d’un territorio estremáu y belixerante al infante masculín de mayor edá. Nel casu d’Asturies, rebáxase la dignidá del territorio de Reinu integrante de la Corona a Principáu dependiente. Y a cuestiones de facto, al nun tener mayoría d’edá l’infante Enrique, futuru Enrique III de Castiella, el poder señorial quedó en manes del Obispáu d’Uviéu, entregándo-y al obispo Gutierre de Toledo el títulu de conde de Noreña y amenorgando’l poder de los fidalgos asturianos, anque nun sofitaren nunca al conde rebelde, en favor del funcionariáu casteyanu que s’asitiará n’Uviéu y n’Avilés.

Yá en tiempos d’Enrique III, Alfonso Enríquez volverá a faese fuerte en Xixón, villa que será sitiada por dos veces hasta que la so muyer Isabel decidió rendir la plaza, dempués d’asegurar la so vida y la de la so familia. Una vez que tuvo seguru de qu’Isabel fuxera pa Francia col so home, el rei ordenó la destruición total de la villa, condergando a los habitantes que resistieron el sitiu a pena de muerte.

Esti ye’l orixe del Principáu d’Asturies. Ambiciones personales ya económiques de les clases privilexaes, intrigues palaciegues y familiares de nobles casteyanos y sufrimientu y torgues pa la población asturiana, amás de la pérdida de dignidá del territoriu.

Pero esto, la xente, nun lo sabe. O nun lo quier saber. Anque, en verdá, pocu o ná tenga que ver el “Príncipe de Asturias” cola realidá d’Asturies –como se pue ver nel so escudu d’armes, onde nun apaez símbolu asturianu dengún-, ye más guapo ver a los príncipes. Y más, si van persiguíos de les “tan asturianes” bandes de gaites.