Monólogos.

Paez que una de les máximes de la vida cotidiana ye que les coses diferentes que saquen a ún de la rutina diaria aconcéyense por bloques temáticos. La selmana pasada sirvió pa verificar esti fechu: foi la “Semana del monólogu”.

Pa escomenzar, el sábadu pela nueche fui a ver l’actuación de dos cómicos españoles, Julián López y Raúl Cimas, ambos actores d’un programa de La 2 nomáu “Muchachada Nui”. D’humor irreverente y mui surrealista, esti programa coyó el testigu d’otru anterior presentáu na cadena Paramount Comedy y llamáu “La Hora Chanante”, también marcáu pol acentu albaceteñu de los actores y personaxes. Nel salón podía sabese quién yera siguidor de los intérpretes y quién yera acompañante d’un “fan-chanante”, porque los primeros coreaben y riíen les canciones y les gracies yá persabides y los segundos quedábense, mirando pal vecín d’asientu con cara de “yo nun conozo de ná a esti puntu, ¿eh?”. Yo yera de los primeros y aplaudí comu un llocu el baile del enano de Twin Peaks que-mos brindó Raúl Cimas.

El domingu a la nueche, La 2, esi reductu de clase que índa permanez na parrilla televisiva, ufiertó un diálogu –porque`l programa nun yera entrevista, pol ritmu cordial y desenfadáu- ente Andreu Buenafuente y el mío almiradísimu Pepe Rubianes, grabáu fai dos años. Falaron durante casi tres hores de tolo habido y por haber, de la so vida vivida y la que-yos hubiera prestao vivir, de la amistá, del trabayu… ¡Quién me diba a dicir a mí que’l xenial Rubianes me diba a sorprender otra vez col so humor, dempués de muertu! Valióme, amás, pa reencontrame con Buenafuente de nuevo: si nunca nun dexó de faceme gracia, sí que-y echaba en cara que nun-y hubiere fecho un homenaxe al so compañeru más destacáu. Metí la pata con él y ye hora de reconocelo, dempués de saber que organizó un espectáculo de monologuismo en Barcelona en reconocimientu a Rubianes. (Toi comu llocu por velu)

Pa finar le selmana temática, un compañeru de la Compañía, Armando, monologuista asturianu embaxu’l mote de “Min de Les Pieces”, pidióme’l favor de que-y tornara al asturianu un trabayu sobre’l monologuismu asturianu, qu’entamara col sofitu del Teatru Prendes de Candás, onde quedará espuestu durante’l ciclu de Teatru Asturianu qu’organiza’l centru’l mes d’agostu, na capital carreñesa. Y ellí me tiré un par d’hores tolos díes pa rematar el bayurosu trabayu del mio compañeru.

Esti arte de la tresmisión oral, en toles sos formes y temátiques, quiciás seya’l que meyor demuestra les capacidaes del intérprete y del actor que s’enfrenta’n solitario al públicu deseosu de rises, de sintise identificaos o estremaos, de salir de la so vida por unos minutos pa vivila dende otru puntu de vista. Merez la pena dedica-y, al menos, una selmana al añu.