Les eleiciones europees.

La selmana pasada foron les eleiciones a la sétima llexislatura del Parlamentu de la Unión Europea. 375 millones de persones taben citaes ente el xueves y el domingu nos colexos de los 27 estaos miembros de la Unión. Malpenes llegó a votar el 43’24% dellos, tres puntos más n’España.

La cita yera clave. Dempués de cinco años onde el Partíu Popular Européu gozara d’una mayoría cómoda p’aprobar lleis de cálter conservador, y hasta retrógadu, los europeos teníen la oportunidá de decidir el so futuru más próximu, el de los cinco años siguientes, y la forma d’acabar cola crisis económica patente nel continente. Lo de menos ye’l resultáu: volvieron a ganar los conservadores y con una mayoría entá mayor y los partíos d’extrema drecha subieron comu l’espuma en bona parte de los países de Centroeuropa, los de la vieya guardia. Lo más destacable ye la desgana de los ciudadanos ante la convocatoria.

Tamién ye normal.

Los partíos políticos mayoritarios de tolos países prefirieron afrontar les eleiciones dende una perspeutiva nacional, discutiendo sobre temes más propios d’unes eleiciones estatales. Asina, la cayida en desgracia del Primer Ministru británicu Gordon Brown ente les files del so propiu partíu llaborista protagonizó la campaña n’el país euro-escéuticu por excelencia. N’Italia taben más preocupaos polos escarceos erótico-festivos de Silvio Berlusconi y el tratu ente’l Milan y el Real Madrid por Kaká. Y equí, les acusaciones populares d’inactividá ya incapacidá de reacción del Gobiernu yeren respondíes con ataques frontales a los cargos del PP investigaos pola xusticia por corrupción. Con estos exemplos, la xente diba votar más pa ver si Brown acaba d’escalabrase, si Berlusconi siguía siendo l’autoproclamáu nuevu Supermán o si Rajoy consiguía al fin ganar a Zapatero –anque dengún de los dos nun se presentaba a puestu algún-.

Los asturianos acudieron na media’l restu d’España. Y votaron un pizcañín más al PSOE qu’al PP, que se repartieron el 85% de los votos. Más de lo mesmo. Ensin embargu, cola circunscripción única a too’l Estáu, y cola minúscula importancia política que tien l’autonomía dientro’l contextu español, les eleiciones foron recibides polos asturianos –salvo los sectarios de los partíos- cola mayor desgana que yo nun viera nunca. Y esto ye lo qu’a mí me da revoltura: nun país cola población activa menor d’España y una de les mayores tases de paru, colos habitantes más vieyos d’Europa que viven de xubilaciones y prexubilaciones, cola renta per cápita y los precios más altos ,anque cola productividá por habitante más baxa… ye dicir, nun país onde se vive de prestao, gracies a les axudes procedentes d’Europa, la xente nun se dio cuenta de l’importancia d’esta convocatoria.

D’Europa vienen les axudes a los planes estructurales del Principáu, non de Madrid. N’Europa se deciden qué industries se subvencionen y cuáles non, non en Madrid. Los tipos d’interés del dineru y de les hipoteques fixénse n’Europa, non en Madrid. Y el 70% de les lleis que s’aprueben p’Asturies, vienen de forma direuta d’Estrasburgo, ensin pasar pola casiella de salida. Y si Madrid pinta poco, muncho menos Uviéu.

Dende qu’España apoyó el Tratáu de Mastricht, incorporóse de pleno a Europa, ensin capacidá dalguna d’intervención na so propia economía. Dende entós, Asturies depende única y exclusivamente de Bruselas, de lo que los diputaos de los 27 países miembros decidan.

Asina, si un eurodiputáu checu veta les axudes a la industria lláctea asturiana, yá se puede poner fuñu Zapatero –que nun lo hará-, a glayar Rajoy –que nun sabe-, a despotricar Tini –que-y da igual- o a escupitiar Villa –que tien puntería pa eso-, que tendrá más pesu el checu, porque más pesu tien la cámara onde trabaya. Y al ganaderu tocará-y desmontar el chiringuitu de les vaques llecheres, vendeles a metá de coste y, comu muncho, mercar unes xates culones pa siguir col so oficiu.

Esto nun ye un supuestu. Yá pasare. Veremos a quién se protesta cuandu empiecen a sobrar les prexubilaciones.

Cada vez veo que los asturianos nun-mos importa ná’l nuestru futuru. Que solo tamos interesaos en tener l’estómadu enllenu y enxaretámos-y al primer rapaz melgueru les nuestres reponsabilidaes, anque esti seya un aprovecháu.

Por cierto, dos eurodiputaos son asturianos, anque ún vive en Madrid. ¡Qué más da que Malta tenga más representantes que nos!

De xuru que, si les coses se ponen índa peor, se fadrá una marcha pa ver al Rei.