Primera fábula periclética. Los cuernos de d'Hont.

Hai persones que paez que ñacen pa llevar palos y más palos. Lo d'esti home nun foi asina hasta anguaño, que va de cuera en cuera: Víctor d'Hont, belxicanu del sieglu XIX, xurista y profesor de drechu civil ya mercantil na Universidá de Gante y aficionáu a les matemátiques. Pasión y deber xuniéronse pa idegar un métodu de repartu proporcional de los votos ente les diferentes candidatures, que-y valió fama y honores pol añu 1878, nun estáu mozu'l de so, necesitáu d'un sistema que repartiere les cargues de poder de forma xusta, más ente les trés comunidaes llingüístiques -talo que denguna se pudiere sintir ferida- qu'ente les diferentes sensibilidaes polítiques burgueses del momentu (que yeren les que teníen drechu al votu).

Yera un repartu tan equitativu, que s'espardió de secute ente les nueves democracies que diben surdíendo por tolos llaos y que-y teníen rocea al tou poderosu Reinu Xuníu de so maxestá inperial (precisamente a partir de daquel añu de gracia), la Reina Victoria. Asina, los vecinos Países Baxos, que diben perdiendo la batalla comercial nes Indies Occidentales ya les Orientales, asentaron la monarquía parllamentaria embaxu esti repartu. La laica y democrática Turquía fízose pa de sí col sistema al desfacese de los sultanes y perder Palestina en manes albióniques. Nos cachinos republicanos que resultaron del francimientu del Imperiu Austro-Húngaru, resquemaos pola derrota, tamién lu elixeron, pa probar... y tovía-yos dura. La moza Finlandia tamién cayó nes rees d'hontianes. De Valera foi de cabeza al sistema pa estremase tanto como pudo de los vezos ingleses, en cuantes Irlanda algamó la independencia. En Sudamérica, l'Arxentina, l'Uruguái, Chile, el Paraguái, Colombia y el Brasil siempre usaron d'esta forma de repartu cuando tocaba democracia representativa; si no, non, claro. Israel y Xapón, acabante la II gran guerra y dempués del procesu construcción y reconstrucción, respeutivamente, del país vieron que yera una forma plausible de repartu. La floriada Portugal del 74 acoyolu con enfotu pal esperimentu democráticu republicanu, dempués de tantos años de dictadura militar y de guerres colonialistes. Y España, unos añucos más tarde, viendo que la cosa funcionaba, adautola pa de sí.

Y nesa adautación-y salieron los cuernos a d'Hont. Desplícome.

La llei d'Hont ye una formula matemática que se basa nos cocientes mayores pa repartir los puestos de representación (n'España, véanse congresistes, diputaos autonómicos y conceyales; nel casu de los Senadores, daquellos qu'elixen los ciudadanos fáenlo por un sistema de votu restrinxíu) ente'l total de los votos algamaos poles candidatures. L'asuntu ye cenciellu: divídense los votos totales de cada candidatura tantes vegaes como puestos de representación hai, saliendo elexíos daquellos resultaos mayores (por eso ye de cociente mayor).

Quiciás con un exemplu seya más fácil d'entender. Quiero dexalo nidio, porque los cuernos d'esti home tan en xuegu. Hai cuatro conceyales a repartir ente los 10000 votos de trés candidatures: la primera tuvo 4500, la segunda, 3000 y la tercera, 2500. Queda un cuadru asina:

	Ente 1 puestu	Ente 2 puestos	Ente 3 puestos	Ente 4 puestos
1 – 4500	4500	2750	1500	1125
2 – 3000	3000	1500	1000	750
3 – 2500	2500	1250	833	625

D'esti cuadro tenemos que sacar los cuatro númberos más grandes que son, ¡tachán tachán!, los sombreaos. Asina, la candidatura númberu 1, queda con dos representantes ellexíos, mientres que la 2 y la 3, lleven una dambes. (Soi buenu, que nun dexé a denguna ensin puestu).

El problema de los cuernos vien-y a la tiesta a Vitorín cuando s'adapta al sistema eleitoral vixente, onde s'estipulen dos torgues grandes: el mínimu de votos y les circunscripciones.
La primera, el mínimu porcentual p'algamar representación que, anque nunca nun sirvió de frenu a denguna candidatura a nivel de Congresu (puestu al 3%), sí que frena les aspiraciones de partíos minoritarios a nivel autonómicu y municipal (depende d'onde, pero repártese ente'l 3 y el 5%). El fechu de que los votos en blanco, al ser votu válidu, cuenten y se sumen al montante de los votos a candidatures pa establecer esti porcentax, sube l'estragal pa los partíos pequeños que, si fueren dafechu al repartu, quiciabes tendríen dalguna oportunidá, si la magnitú (esto ye, el númeru de representantes a escoyer) del distritu eleitoral fuere abondo grande.

Y equí llega la segunda torga: la tema les circunscripciones n'España. Por una parte, pal Congresu, el mapa eleitoral divídese sigún les provincies, favoreciendo, pol sistema de repartu, a les menos poblaes, hasta'l puntu de que'l votu d'un sorianu val 3'5 veces más que'l d'un madrilanu (equí n'Asturies, la cosa tá bastante compensada); ensin embargu, n'estes circunscripciones menos poblaes, hai menos puestos a repartir, y el sistema d'Hont nun ye útil, porque les dos llistes más votaes suelen repartiselos dafechu, faciendo que la xente entre na dinámica de nun considerar más candidatures. Por otra parte, a nivel autonómicu, suélen creyase circunscripciones más pequeñes y sobrerepresentaes en cuanto a magnitú, que repiten el modelu anteriormente descritu (eso sí que ye claro nel casu asturianu coles circunscripciones oriental ya occidental). A nivel municipal pasa lo mesmo, colos distritos municipales, solo qu'además son escasamente conocíos polos ciudadanos.

Asina espuesto, pue vese que la idega'l belga nun ye un rispiu mala. Y que nun afeuta lo más mínimo, más bien al contrario, a la representatividá de los ciudadanos cuando van votar. Ye'l sistema eleitoral quien tien de camudar pa que los votantes de los partidos pequeños llocales y de los medianos estatales que nun tienen una distribución xeográfica concentrada, algamen representatividá. Unes circunscripciones mayores, que permitieren la diferenciación de les sensiblidaes territoriales ensin torga pa que fueren más proporcionales a la idega "un ciudadanu, un votu", y la desapaición o reducción del tope mínimu porcentual o, cuando menos, l'establecimientu de sistemes de compensación como les alemanes, fadría más xustu'l repartu y estinguiríamos les perdices de tanto xintales.

Y, sobre too, fadríase xusticia con esti santu varón, Víctor d'Hont, a quien tantes veces, dende'l prexuiciu y la ignoracia, se-y menta la ma y se-y pinten cuernos. Gran home.

Dalgún día se fradá xusticia con esti home benditu

que, por nun salí-yos les cuentes, convirtiéronlu en cabritu.

El mayu 68 de nuesu.

Esti mayu de 2011 presumíase como un mes eleitoral más, enllenu de noticies fresques sobre los candidatos municipales, les claves autonómiques y estatales, los mítines y les pegaes de cartelos, los alderiques so los alderiques televisivos y toes eses coses que faen entretenides unes xornaes que valen pa hipotecar el futuru de los ciudadanos durante cuatro años.

Pero pasó daqué diferente: al rodiu de les idegues de revolución pacífica popular, plantegaes nel llibru d'Stéphane Hessel Indigne vous! (¡Indignáivos!), fáise una convocataria a una manifestación antisistema pal día 15 de mayu en delles ciudaes españoles, que se volvió reivindicación popular al plantase dalgunos manifestantes na Puerta del Sol de Madrid.

De mano, la nueche del domingu, apaeció como una colorista forma de protestar. Al día siguiente, la organización aumentó y les tiendes de campaña ficieron actu de presencia. Los días que siguieron, la acampada tornóse "Spanish Revolution" y, espardiéndose por toa España embaxo'l lema "Democracia Real Ya", dexó nun segundu planu la campaña eleitoral y solamente perdió les cabeceres de los telediarios pola traxedia del terremotu en Lorca.

La xente tiróse a la cai encantada de tener el so propio mayu del 68. A los madrilanos siguiéronlos los barceloneses y los valencianos. Por efeutu dominó, Xixón, Uviéu, Avilés y les cuenques, en Mieres y Sama, vieron como les sos places más importantes s'enllenaben de xente "indignada" poles polítiques oligárquiques resueltes pol Gobiernu d'España estos años. Facíense asamblees populares onde les resoluciones tomábense por consensu total, establecíense turnos de palabra bien estipulaos, pa que toos aquellos pudieren falar lo que-yos pruyera, y organizábense mini-ciudaes onde se podía alcontrar dende cartelos reivindicativos hasta cocines onde poder xintar.

Pero ensiguidina salieron a la lluz determinaes circunstancies ya idegues que me ficieron tastiar un gustu a mofu nesti movimientu.

La primera, reconozo que prexuiciu total de mío, que desconfío de los movimientos xurdíos por xeneración espontánea, que xueguen coles ilusiones de la xente pa pone-yos una bandera partidista delantre, he dicir que, pesie dalgunos intentos (como'l de dalgunos miembros de CC.OO en Xixón), nun se llegó a cumplir.

La segunda, l'asunción de la campaña #nun los votes, que pidía que la xente acudiera a les urnes el domingu, pero nun pa votar a los partíos más representaos, estoy ye, PSOE, PP y CiU. Esta campaña vinía sintiéndose dende marzu y yera independiente al movimientu antisistema que convocó les manifestaciones del domingu, pero en seguida algamó la importancia total, faciendo que les protestes fueren un mecigayu de propuestes con oxetivos mui poco concretos -por nun dicir que ná concretos-. En vez de buscar modelos alternativos y viables al sistema democráticu oligárquicu que carecemos, que yera l'oxetivu definíu de les manifestaciones, pasóse a buscar culpables a la situación de crisis y alcontráronse, ye nidio, nos políticos y nos bancos. Les decisiones tomaes a partir d'entós poles asamblees pasaron a ser d'un posibilismu tan aplastante qu'a los voceros nun-yos quedó más remediu -anque igual taben encantaos, nun sé- de dicir que les protestes nun yeren antisistema, que se quería cambiar el modelu políticu dende dientro.

Esti fechu propició la apaición de la tercera torga, pa min, d'esti movimientu: la manipulación informativa. Porque ye manipular el faer creyer a les persones coses que nun son, a sabiendes. Y pasó cola tema'l drechu al votu: #nun los votes nun yera estensible a tolos partíos, los minoritarios (ente los que s'alcontraben IU y UPyD) salvábense; asina que lo "bueno" yera dir a votar, a faer usu d'esi drechu que se tien pa camudar les realidaes y, entós, fue cuando se mintió: díxose que'l votu en blancu yera una forma de protesta, que'l votu nulu yera una realidá política y que l'abstención yera tirar el votu. ¡Increyíble! Pero cierto. La xente, nun exerciciu de credulidá irresponsable y d'ignorancia pa énte los sos drechos, creyólo de cau a rau.

El mesmu domingu de les eleiciones, pela mañana, apurriéronme un documentu coles midíes aprobaes por consensu pola asamblea madrilana. Podíen salvase un par d'elles (como la pitición de la puesta en marcha efeutiva de la llei de dependencia o la propuesta d'un repartu más equilibráu del trabayu, mediante la reducción de la xornada), pero el restu, si nun yeren inviables (como les tocantes a la regulación de les entidaes financieres) yeren absurdes dafechu (como la de dar representatividá nel Congresu al votu en blancu y al nulu). Pero, lo peor, ye que nun se trataben temes de relevancia estructural: nun se facía crítica al modelu sindical sistémicu, nin a la financiación de los partíos; nun s'atendía a los modelos enerxéticos, de salú y seguridá social, nin d'educacion (salvo temes puntuales y secundarios); tampoco se falaba de la burocratización de les alministraciones nin del sistema vitaliciu d'empeaos públicos; facíase crítica del gastu militar, que se pidía reducir pero non onde reducir; y malpenes se trataben les carencies de drechos humanos, salvo les torgues a la llibertá de prensa y al accesu a una vivienda digna.

Ensin embargu, l'analís so'l sistema eleictoral y de representación índa yera peor. Solo se facía referencia a la inxusticia de la llei d'Hont, de repartu de los representantes pol índiz de cociente mayor, pa cayer nel prexuiciu infundáu de la sobrerepresentación de los partíos nacionalistes. Nun se falaba del repartu desproporcionáu de diputaos por circunscripciones provinciales (dempués saldría la propuesta de la circunscripción única, nun exerciciu total de incongruencia, pero que volvía dar ventaya a los dos partíos anteriormente citaos), nin a la sobrerepresentación de los partíos mayoritarios PP y PSOE. Y, por último, incidíase na responsabilidá de los diputaos a la hora de dir al Congresu, pero en dengún sitiu se-yos pruyía a dir a falar colos sos representaos (claro, l'escañu del votu en blanco diba tenelo difícil). En fin... cero democracia direuta y muncho dise poles rames.

La victoria casi total de la drecha n'España y los resultaos -amenorgaos respeuto a les perspeutives- d'UPyD y d'IU nel total estatal, fizo que la xente se diera cuenta de que les parrafaes respeuto al votu en blancu y al nulu nun yeren efeutives (anque pola vergoña, por vese manipulaos o por sintise parte d'un grupu, callen). La "Spanish Revolution" vio como se reducía abando n'apoyos y n'acampaos, salvo en Madrid y Barcelona, onde un desaloxu brutal por parte los mossos d'escuadra dio un nuevu emburrión. La plaza Mayor de Xixón y La Escandalera n'Uviéu quedaron reducíes a la mínima espresión, con unos voceros que nun veíen con malos güeyos la monarquía constitucional pero que, a la escontra, nun taben d'alcuerdu col establecimientu d'asamblees nos barrios.

Anguaño, esta mesma tarde de domingu de xunu, les diferentes asamblees tan tratando la forma más honrosa de desmantelar les acampaes, calteniendo l'espiritu asambleariu dende casa, una vegada por selmana.

Énte esti movimientu puen tenese visiones positives o negatives, que van dende les qu'entienden que ye bueno que la xente se movilice hasta les qu'acolumbren que van sirvir solo pa tener a la xente tranquilino en casa durante una temporadina dempués d'entender qu'esti sistema nun se camuda d'esta forma, que los políticos, a los que nun-yos favoreció, tan sordos y que a daquellos que sí, enseguidina-yos va volver la sordera.

En definitiva, la mío xeneración yá tuvo el so mes de mayu reivindicativu. El mayu del 2011. La "Spanish Revolution".

Decálogu quevedianu pa la política astur.

Voi valime de la pluma afilada del maestru del sieglu d'oru pa faer un breve decálogu pa la política asturiana, tan desdexada de llibros d'estilu. Ha tenese en cuenta l'actualidá de la tema, coles ellecciones municipales y autonómiques en puertes; pero tamién la clarividencia de los males españoles, que se perpetúen n'Asturies hasta'l día de güéi. (La traducción ye de mío y les propuestes xurdíes del llibru Migajas sentenciosas, Círculo de Lectores, 2004)

1.- Llexitimación d'aiciones poco democrátiques.

Too val pa nun dicir m'equivoqué y pidir disculpes. Y la democracia fráncese cuando l'actitú del gobernante ye la d'escondese detrás de la xente que lu votó.

"El drechu los monarcas embrívese en viva quien vence" [2]

"Suel ser Arte de los ambiciosos solicitar, col paecer ayenu, autoridá a les sos mentires y créditu a les sos consultes." [3]

2.- Educación.

Un pueblu educáu ye señal de progresu, pero no d'aseguranza de la posición del poderosu.

"Cola ignorancia'l pueblu ta seguru'l dominiu los príncipes; l'estudiu que los alvierte, remóntalos. Vasallos doctos, más conspiren qu'obedecen, más desaminen al señor que lu respeten; entendiéndolu, osen desprecialu; sabiendo que ye llibertá, deséyenla; saben xuzgar si merez reinar quien reina, y equí escomiencen a reinar so'l príncipe." [2]

3.- Política social.

Les persones, dientro los sistemes democráticos, han mirar los unos polos otros. Los gobernantes, han mirar por toos. ¡Por toos!

"Na más que ye buen ministru quien mira a los necesitaos direutamente." [3]

"Quien a toos da y a naide quita; quien a toos da lo que necesiten y deseyen, esi rei ye, esi ye'l Prometíu, ye'l que s'espera y col que nun hai más qu'esperar." [3]

4.- Xusticia.

La xusticia ha alministrase de tal forma que'l resultáu seya xustu, esto ye, equivalente pa tol mundiu. Asina, les lleis tienen que ser equitatives y los xueces, independientes. (La segunda premisa bien que nin pintada pal casu Riopedre)

"Pa les xudicatures han escoyese los doctos y los desinteresaos. Quien nun ye cobiciosu, a dengún viciu sirve, porque los vicios inducen l'interés pol que se venden. Sepan les lleis, ensin embargu, nun más qu'ellos; faigan que seyan obedecíes, non obedientes." [2]

"Anguaño, pa prender un conseyeru, fáense xuntes y consultes; y tiénse por menos torga desacreditar un tribunal con permitir un ministru ruin, que desautorizalu a elli con un castigu xustificáu y que valga d'escarmientu; y estes charres, mientres se traten, van dexándose pa prau y, dexándose asina, dan el sitiu de la xusticia a la negociación." [7]

5.- Corrupción

El mal menor d'una sociedá democrática ye que los representantes seyan corruptos. Ye muncho peor el descubrilos ya amparalos.

"¡Qué pocos ministros saben faer desdeñu al oru, y a la playa y a les xoyes! ¡Qué pocos hai tornos al regalu!" [3]

"Muncho hai que temer daquellos ministros que son arbitrarios y meten la mano nel platu'l so señor, y solo lu saluden y agasayen y besen na güerta". [3]

6.- Males xestiones

Peor que robar ye nun saber qué faer coles perres. El lladrón fai les coses mal a sabiendes y pue ser xuzgáu si se lu alcuentra; el babayu pasa ensin purgar la culpa. Pero, ensin dulda, esti ye'l puntu más peliagudu, porque nunca nun ye oxetiva la calificación d'una xestión y lo que pa ún ye visión de futuru, pa otru ye una muria cementu que-y tapa los horizontes. Por embargu, estes dos idegues puen sirvir de guía pa resolver la entruga.

"...porque poner los tributos pa que los paguen los vasallos y los embolsen quienes los cobren, o gastalos en coses que nun se pidieron, más tien d'engañu que de cobranza y d'invención que d'imposición". [3]

"Los ministros de los reis nun han xintar otra cosa que llagostes. Esi animal consume los semaos, destrúi loes frutos la tierra, ontroduz la fame y esteriliza la bayura los campos; destrúi los llabradores, y remata los probes. L'alimentu'l ministru han ser estes llagostes; esta ha de comer, non les colleches, non los frutos la tierra, non los llabradores, non los probes. Ha comer, Señor, a quienes-yos lo comen y arruinen; porque yo digo a la vuestra maxestá que'l ministru que nun come esta llagosta, ye llagosta que consume los reinos."[3]

7.- Nepotismu, populismu y clientelismu

Los trés puntos vitales de cualquier gobiernu democráticu que quiera caltenese nel poder indefinidamente. Nesti casu, nun quisiera que quedaren les migayines quevedianes solo como crítica al políticu de turnu, sinón que van más escontra'l pueblu que les sema, les collecha y, finalmente, les sufre.

"A quien nun tien que faer, mercá-y la ocupación, y con eso mercaréis el vuestru sosiegu; teméi a quien nun tien otra cosa que facer qu'imaxinar ya escribir." [1]

"Lances y enoyu tienen a mano los reis de mal espíritu pa quien-yos llibra de la perdición, y mercedes y honres pa colos que-y faen la gayola, allarguenla y discúlpenla." [3]

"Poder y heredaes, puestos y dignidaes, son engaños opulentos y magníficos tracamundios. Munchos puen tenelos, pocos aparalos." [4]

8.-Honradez

Virtú del bon políticu, nun ta de más recordala nestos díes cuando escasea (y nun solo ente políticos) pa combatir les llacres enriba espuestes.

"Lo qu'importa ye que nun entren en concilios nin seyan xueces Pilatos nin Herodes nin Caifás, nin los que los imitaren, porque cuando tean encontraos, dempués sedrán collacios que s'ufierten a toa maldá que puean atopar, agradeciendo caún al so enemigu la parte que-y da d'autoridá n'ella contra la verdá."[3]

"¿A qué nun s'atreve el deséu de mandar? ¿Qué perdona l'ambiciosu, pues nin reserva los muertos, nin a Dios revenrencia? Toos quieren más tomar la corona qu'esperala, y la comodidá de furtiar pónenla delantre de la bayura de merecela; que nos reinos la posesión ye drechu de robu y xustifiación de delitu; y tanto ye ún traidor, cuando ta en dulda'l socesu de la so alevosía que, executáu felizmente, los gravames son disculpes." [6]

9.-Independencia

Independencia, sí. Porque les midides que han de tomase n'Asturies tienen que decidise equí. Fala mui mal d'un políticu que, lloñe d'atender a los sos ciudadanos, tea más pendiente de lo que-y dicen dende estancies qu'elli cree mayores que'l pueblu. Quevedo paez que tabe mirando al traviés de les sos lentes, más p'allá del Payares y más p'allá de los sieglos.

"Daquel señor que, ensin querer imitar a Cristo, se dexe gobernar totalmente por otru, nun ye señor, sinón guante; pues solo se mueve cuando y onde quier la mano que lu calza" [3]

"Hai reis que rixen los sos reinos colos entendimientos de les manes ayenes, o coles manes gobernaes polos entencimientos d'otres manes. Estos nun son pastores, sinón oveyes d'aquellos que, colos sos entendimientos, gobiernen les sos manes. Estos nun son reis, sinón rexidos de les manes, que dan sus entendimientos a d'aquellos a quien ellos dan mano."[3]

Y 10.- El pueblu.

Si democracia ye'l gobiernu del pueblu, esti bien ha saber a quien elexir de representante. Dos conseyes pal soberanu d'infantería.

"Si un príncipe quier saber les fieres que s'embosquen na felicidá de quienes mal lu asisten, fáiga-yos unos díes solombra, retíre-yos dalguenes veces los sos rayos, déxelos (anque seya por mui pocu tiempu) a escures, y verá en qué sacaveres desperdiciaba les sos lluces y cuánta más verdá-y debe a la so nueche" [3]

"Seya frutu útil de les repúbliques, medrosu a los monarcas, y d'ensañamientu a los súbditos, el saber tener rocea del tiranu que tien daqué bueno onde se disculpa y se desfigura, y del celosu que tien daqué malo onde perdese." [5]

[1] Discurso de todos los diablos.

[2] La hora de todos y la fortuna con seso.

[3] Política de Dios y gobierno de Cristo.

[4] La constancia y paciencia del santo Job.

[5] Marco Bruto.

[6] Mundo caduco y desvarios de la edad.

[7] Carta del rey Don Fernando el Católico a primer virrey de Nápoles.

La mani.

El vienres caberu cellebróse'l Día de les Lletres Asturianes, dientro de los actos de la Selmana de les Lletres Asturianes que sirven pa nun cayer nel escaezu de la situación actual de la cultura y la llingua asturiana nel so país. Fíxose un homenax al escritor Mánfer de la Llera y reconocióse'l llabor científicu del profesor lleonés Morala y el sofitu valeru del ciclista xixonés Chechu Rubiera, nun actu nel teatru Campoamor d'Uviéu. Y, enantes, una manifestación popular pela cai Uría de la capital.
La organización d'esti alcuentru de persones con evidente implicación pa cola causa de la llingua asturiana va a cargu de la Xunta pola Defensa de la Llingua Asturiana, organización que lo diz too col so nome. Hai otros coleutivos colos mesmos oxetivos, pero hai de reconocer qu'esti fai los dos eventos más reconocibles de la llucha pola oficialidá: la manifestación y el conciertu.
Detrás de la pancarta "L'asturianu llingua oficial. Xunta pola Defensa de la Llingua Asturiana", y de les pandereteres qu'abren la marcha, atrópense diferentes organizaciones y entidaes de calter políticu, social y sindical. Toos ellos tienen el mesmu interés pola llingua, nun voi discutir eso. Pero les formes nun siempre son les mesmes. Y muncho menos, en períodu elleitoral como tamos.
Detrás del cartelu del Bloque por Asturies-UNA, ondeaba una gran cantidá de banderes de dambos partíos coaligaos pal 22 de mayu. Detrás de la de Conceyu Abiertu, la xente formaba cola galana d'Andecha Astur. URAS-PAS, ensín escondese, yá pidíen el votu na so pancarta, a lo grande, recordando que solo ellos defendieron siempre l'asturianu. (Nun sé que ye pior, si disimular o metela dafechu)
El casu ye que siempre me fastidiaron muncho les manifestaciones de tou tipu, porque les entiendo más dixebradores que xunificadores. La xente que va, en vez d'atender l'oxetivu principal de la protesta, fai cuentes pa ver si la so parte ye más multitudinaria que la d'otros o que les persones son de mayor valía que les que van delantre o detrás. Nel casu de les "manis" de la oficialidá dase el casu, amás, de les miraes soprendíes y/o discriminatories de la xente que pasa a la escontra, ayenos al xaréu gaites y glayíos de los manifestantes de bandera al hombru, afirmándose cola sorisa aquello de "¡Tan llocos estos romanos!". (Dende dientro piénsase d'ellos o bien que son unos insolidarios, que lo son, o unos auténticos fachas).
Y yo siempre que llega esti día entrúgome pa qué voi dir. Nin tengo porqué simular, nin pertenezco afeutivamente a dengún grupu ellí representáu pa sofitalu poniéndome detrás del so cartel, nin creyo na efeutividá d'esti tipu de midíes más que pa ponese a males cola xente cola que coincidimos, al menos, nun aspeutu de la vida, nun oxetivu de los nuestros movimientos y pensamientos nun país onde somos gran minoría.
Non, yo nun voi a estos xareos. Nun me fai falta defender l'asturianu nuna manifestación porque nun dexo d'usar la mio llingua cuando falo y escribo, cuando me parto'l morru con xente que se ríe de mín por facelo o piensa que soi un llorón por defender los míos drechos "cuando hai otres coses más importantes por facer". Cuando me llamen nacionalista, asturtzale, talibán de montera picona, bablista, catetu o aldeanu. Cuando m'apunten col deu por ser diferente y tar arguyosu de selo.
Yo manifiéstome 365 díes al añu -nun descansando bisiestos-, ensin más bandera al hombru que los míos drechos.

Teatru nacional asturianu

Cayó nes mios manes l'artículu ¿Un teatru nacional asturianu? de Lluis Antón González, espublizáu na revista "La ratonera" de setiembre del 2002, qu'alderica sobre'l teatru nacional asturianu. Fai un recorríu pola hestoria del teatru n'asturianu dende Marirreguera, poles idegues de profesionalización del gran Pedro Granda,-actor llangreanu del sieglu XIX-, pol intentu del pincipiu del XX, pol Surdimientu de los 70 y pol rescate del monólogu asturianu d'anguaño. Siendo ñegativu al respeutu, acaba apuntando una serie de condiciones pa la creyación del mesmu.

Llega a les míos manes nuna selmana onde tamién llegaron les conclusiones d'un alderique sobre la tema (específicamente, trataba del monólogu), que vienen coincidir na necesidá de cumplir eses mesmes condiciones. En resumen, pues dalgunes idegues densendólquense en varios puntos, González fala de la necesidá d'un mayor apoyu instititucional, sofitu d'una escuela (supongo que teatral) asturiana averada a la realidá cultural del pueblu y a les nueves téuniques y tendencies creatives, mayor interrelación entre grupos y compañíes, usu del asturianu en toles estayes, profesionales que vinculen el ser asturianu col universal y que nun tengan les mires na emigración y, en definitiva, un teatru asturianu que gane l'apoyu'l públicu.

Entiendo que yeren solo unos apuntes, porque'l testu ye mui reduccionista respeuto a los problemas que sufre'l teatru n'Asturies, nun solo l'asturianu. Nin denuncia los prexuicios esistentes nesti mundillu (incluso los recalca, al desmarcar a les clares la idega de teatru asturianu contra'l costumista y nin siquiera citar la Compañía Asturiana de Comedias, anque lu reconoza como primer intentu de creyación de teatru nacional, al nomar autores y actores de la mesma al falar del intentu de Melás, Pría y Verde, ente otros). Nin ye realista coles condiciones sociales de la xente involucrada col teatru n'Asturies al pidir compromisos ensin cimentalos con idegues válides que solucionen los problemes (por exemplu, los pocos profesionales viven d'ello, nun d'aire, como pa dexar pasar ufiertes).

Pero'l mayor erru vien de querer sofitar esti tipu de teatru nel apoyu institucional. La idega ye que los poderes públicos sovencionen la publicación de testos, grupos de teatru, escenarios, propuestes teatrales ya escéniques y creen escenarios onde representar. Esto, yá se bien faciendo, pero pídese una mayor implicación. Más perres, supongo. Paez que la xente nun s'acaba d'enterar qu'esti tipu de teatru, el sovencionáu, dexa de ser independiente, na midía en que recibe l'apoyu d'unos gobiernos que respuenden a unes inquietudes específiques que, llexitimaes nel númebru de votos, intenten reforciase coles perres de les sovenciones. N'otres pallabres: el políticu busca los réditos ellí onde puea y sofitará les sos idegues y les de los sos averaos, porque eso ye lo que quier la xente que lu escoyó. Pensar que n'Asturies d'anguaño, les instituciones van sofitar un teatru de reivindicación nacional asturiana ye, cuando menos, d'un buenismu ablucante.

Dende dientro, ensin perres, ensin escenarios y promotores privaos, ensin públicu averáu, ensin repercusión nos medios de comunicación, calteniendo prexuicios y ensin componentes comprometíos dafechu, un teatru nacional asturianu ye imposible.

Índa más complicada ye la visión dende fuera. N'Asturies, la cultura teatral ye mui probe, como la cultural xeneral, frutu de desaniciar unes raíces propies dende onde espardise pa comprender les demás. Nesti árbol esbarrumbáu, que s'empodrez, surde mofu de tou tipu ya orixe, que medra un poco, parásitu, ufiertando conteníu pero non sustentu, nin pa elli mesmu siquier. El fracasu de Laboral Escena fala d'ello. Y predigo'l del Centru Niemeyer porque carez de les mesmes circunstancies: el puxu cegaratu de les instituciones escoyíes pol pueblu cegáu. Amás, l'espectador de teatru tipu ye una paisana de más de 50 años de poder adquisitivu mediu que va, principalmente, a pasalo bien cola obra, nun a comese la cabeza. Falai de "nación asturiana" y pensará, na mayor parte les veces, que yes un infiltráu d'ETA.

La cuestión tien difícil solución. Pueo apuntar delles idegues (cooperatives de producción teatral, rebaxa del caché pa empresarios que favorezcan la creyación d'una rede de sales privaes ya independientes, búsqueda d'escenarios y propuestes situacionales alternatives, revisión de la idega "teatru costumista/teatru de baxa calidá"...) pero diben ser solo parches porque la xente del teatru nesti país (y ye mal de munchos, pal mío desconsuelu), sigue esperando que l'ayuda caiga del cielu, en forma sovención.

Logopitos y lletrines

Fai un mes, l'alcaldesa de Xixón inauguró un nuevu monumentu, donáu por Femetal, nos Xardines de la Reina. Trátase de la plasmación en metal del caberu logotipu del Ayuntamientu, que consiste nes lletres del nome de la ciudá, pero solo n'español.
Desdexando a un lláu los gustos estéticos y les severes faltes d'ortografía (los nomes propios escomiencen en casteyanu por consonante), prestaríame comentar dos coses al respeutu: la primera, la falta de criteriu del Ayunamientu de Xixón pa sofitar un diseñu únicu y perdurable como logotipu pa la ciudá; la segunda, clara ta, ye denunciar la desvergoña d'esti consistoriu pa colos falantes de llingua asturiana del conceyu, qu'índa queda puesta de manifiestu.

Logopitos
El nuevu logotipu, una cursiva en minúscules ensín más, ñaz d'un saleru, o seya, de l'anovadora idega de faer publicidá de la ciudá baxo la fórmula "Gijón, Asturias con sal" qu'enllenó de puntos de papel blancos, al paecer representaben cristales de sal, les aceres de les zones más turístiques de la villa los primeros meses del añu pasáu, hasta que les primeres lluvies los llevaron pa consigo al alcantariyáu, dexando retazos de saleros del mesmu material, repuestos una y otra vegada.
Paez qu'anunciar Xixón d'esta forma ye la más normal, porque yá se ficiera enantes. L'anterior logotipu volvía usar les cinco lletres, nuna ramplona arial blanca sobre fondo coloráu, tamién en minúscules, pero esta vegada, al llau o embaxu l'Elogio del Horizonte. La obra de Chillida venía de ser utilizada como símbolu la ciudá, nun procesu con dos oxetivos: primeru, ufiertar Xixón como una ciudá multicultural y, segundu, algamar ciñu pa'l váter de King-Kong. Del primeru, índa nun se sabe na, porque Xixón ta bien lloñe de dexar de ser una ciudá de provincies d'espalda a la so cultura y ensín capacidá de rempuesta social pa faer frente a la universialidá que-y urxe; el segundu consiguióse xusto cuando l'Ayuntamientu decidió desanicialu como símbolu, pa comprar un anagrama coles iniciales AG enxertaes.
Toos estos logopitos d'escasu recorríu, vienen emplegándose, col centenariu escudu de la ciudá que, con escases modificaciones ye: en plata, el rei Pelayo calteniendo la Cruz de la Victoria, timbráu con corona real española. Índa s'usa anguaño, coles lletres "Ayuntamiento de Gijón" al lláu, como si ficera falta, como si la Heráldica, esi arte de ller el simbolismu de les pieces y figures, nun fora suficiente pa falar elli mesmu de la ciudá.
Ta claro que'l dibuxante nun va vinir del sieglu XV o XVI a pidir perres pol trabayu y hai que da-yosles a los diseñadores de conceutos d'anguaño, una y otra vegada, nun chollu inacabable y poco bien desplicáu. Porque val que cada nuevu equipamientu de la ciudá heba tener un logo, pero camudalu cada poco, nun ye de razón. Tovía menos cuando'l tradicional sigue en vixencia.

Lletrines
Volvemos colos drechos de los ciudadanos de Xixón. Sí, el nome ye Xixón y yá ye oficial. Pue usase Gijón tamién, pero nos documentos oficiales han usase estes dos fórmules: Xixón o Xixón/Gijón. Pola mesma que se diz A Coruña, Donostia o LLeida, l'alministración ha poner Xixón tamién nos sos escritos, seya cual seya esa alministración. Foi decidío pol conceyu de Xixón en plenu.
Asina, resulta chocante que, cuando l'Ayuntamientu de Xixón se refier a la ciudá, nun lo faiga pol so nome, sinón por ún inventáu: Gijón. El nuevu monumentu de chapa urbana, asina lo fai (insisto, con faltes d'ortografía). El diariu La Voz de Asturias titulaba la noticia como "Gijón, con todas las letras", escaeciendo que faltaben dos xes, una i, una o tildada y una ene, pa dicir, nun ataque de fantasía y ramplonería léxica, "La escultura, como no podía ser de otra manera, ya ha sido bautizada de esa manera grandilocuente y orgullosa de los gijoneses: las letronas".
La tema'l nome (nun el rollu patateru de La Voz de Asturias) yera pa denunciar, si nun fuera pola xusticia poética, que ye la queda nesti país onde se pasen los drechos de la xente pol forro. El sitiu onde los non más de 300 xixoneses que votaron na páxina web elixieron allugalu, los Xardines de la Reina, ye pasu migracional de borrachos y fiesteros de les nueches de la fin de selmana xixoniega. Asina que "las letronas" bien se van convertir en "les lletrines", minxitorios onde divertise apuntando col chorrín.

Pallabres que lleva'l vientu
Onde les tos pallabres, xorrecía,
medraba al son les tos sonrises,
respiraba del to aliendu frescu
y pelos tos güeyos veía.
Llevábesme de la mano
siguiendo les buelgues nueses nel sable,
creyando nuevos caminos pa nos,
ufiertándome vides y suaños.
Surdíes nel horizonte, col Nordés,
na borrina qu'anuncia l'orbayu,
enllenabes de salitre'l mundiu
y, a facete sol y lluna. tornabes.
Tuvísteme sollerte pela anuncia
pero, al glayalu al aire,
volviste camudar el nome
y, otra vuelta, en na quedaste.