Liriu lariu.

Llevo unos cuantos meses, dende l’añu pasáu, enfrascáu nun proxeutu que me paez bien interesante: la recuperación del liriu como xuegu de cai y, índa más, algamar los primeros pasos pa la so esportificación.

El liriu ye un xuegu tradicional asturianu consistente en dar un güelpe a un palu pequeñu, cilíndricu y afiláu polos cabos, nomáu “liriu”, con otru de mayor tamañu, la “machorra” pa llevantalu del suelu y, una vez que tea nel aire, con otru machorrazu aventalu lo más llone posible o empobinalu pa un sitiu determináu. Esa aición motriz repitese nun refileru de xuegos bien bayurosu, con regles ya oxetivos bien estremaos ente sí dalgunes veces, y con nomes diferentes sigún la zona onde se xueguen: birlla, birya, billarda, biyarda, palu, paliyu, palill.u, bríndola, salta marrana, la gocha, liriulario...

A pesar de ser tradicional asturianu, porque se tien base documental de que yera xugáu antaño, más ellí de tres xeneraciones a la de mío, podemos dicir casi con certeza que nun ye un xuegu autóctonu d’equí: la aición motriz común a tolos xuegos asturianos repitese hasta la saciedá por tola Península y Europa, llegando a Oriente Mediu y la India. Nun ye raro que fuere tan espardía. Los materiales son bien asequibles: dos pieces de madera y ná más. El tarrén de xuegu adáutase a les condiciones de los llugares. Y ponse en competencia una habilidá que pue ser alquirida bien ceo polos participantes.

Mio pá xugaba al liriu. Yo pasé los míos años de neñu xugando malamente al balonmano y, cá vez que llegaba a casa dempués de perder, mio pá dicíame: “el que nun val pa otra cosa, que xuegue al liriu”. Hasta los 28 años nun supe qué yera tal cosa. Faltóme la curiosidá que yo siempre-y desixo a los neños colos que trabayo y, en xeneral, a la xente que m’alrodia. Foi nun cursu de xuegos y deportes tradicionales que me volví atopar con elli y, dende entós, nun lu solté.

Hai dos culpables que pueo señalar col deu índiz d’esta zuna que tengo por esti xuegu.

El primeru ye Carlos Suari, antropólogu y llicenciáu en Ciencies de la Educación Física y el Deporte, ámbitos d’estudiu que combina ente sí a la perfeición. Carlos ye una persona a la qu’almiro tanto poles coses bien granibles que fai, como pola so capacidá d’organizase pa faceles toes, porque siempre tien daqué ente manes: lo último foi L’Atlas de los bolos asturianos, trabayu mui bayurosu que saldrá, ensin dubia, ceo a la espublicación.

L’otru ye Xuacu Rodríguez, de nuevo otra persona que siempre tá maquinando daqué. Ye’l presidente del Club Espor d’Asturies dedicáu al estudiu y el sofitu de los xuegos traidicionales nesti país.

Nun ye d’estrañar que xuntos, consigan mover cualaquier cosa que se-yos ponga per delantre. Da gustu ver como les sos conversaciones van camudando en tormenta d’idees. Díes más tarde, yá tienen porpuestes concretes, que s'acabarán tornando en rotundes realidaes.

D’una d’estes idees surdió’l Conceyu Nacional de Liriu, un grupu de xente que s’averó a la idega de recuperar el xuegu del liriu y esportificalu nuna de les formes propies y privatives d’Asturies. Cola inestimable ayuda ufiertada dende la Liga Nacional de Billarda, competición d’una modalidá d’esti xuegu en Galicia, el puxu pol liriu sofitó la creación del Conceyu, que’n xunetu l’añu pasáu ya taba vertebráu en tres equipos que disputaben el primer Campionatu d’Asturies de Liriu.

Esti añu 2010, la nómina d’equipos del Conceyu yá ye de cinco y el procesu muerganizativu maduró cola estandarización de les normes del xuegu y de les competiciones, la homologación pa la organización de torneos abiertos a la participación de tol mundiu y la creación d’un campionatu individual.

El pasáu Domingu de Ramos, nel Colexu Públicu d’El LLano, cellebrose la primer xornada del Campionatu con récord de participación, aumentu pergrande d’espeutadores y ésitu organizativu del eventu, con felicitaciones provinientes de dalgunes entidades que collaboraron cola organización ensín saber bien qué yera aquello que s’ufiertaba, y de xente sorprendida y agradecida por ver qu’índa hai persones que s’esfuercien por recuperar daquel xuegu que tanto-yos divirtiera cuando yeren neños.

Falten tovía munches coses por facer. Tan dándose los primeros pasos nel averamientu del xuegu a los colexos y pal espardimientu de torneos acompañaos de talleres desplicativos. La meta final d’esti añu ye la creyación de la Federación Asturiana de Liriu. Too esto fecho d'una forma autoxestionada, pues nesta Asturies futbolera y pendiente solo de la cultura que vien de fuera, nun pue ser d'otra miente.

Pero’l proxeutu sigue con rumbu estable. Y con xente de la talla qu’hai metida dientro, llegará a buen puertu, de xuru.