La fueya.

Esta tarde de güelgona xeneral en TVE, pude ver la repetición d’un programa pasáu de Redes onde’l mio almiradísimu Punset charraba con una científica docta nel mundiu de la “biomimética”, que nun ye nin más nin menos que la observancia de la Naturaleza y les sos aplicaciones a la industria y a la vida cotidiana de les persones. Paecióme apasionante. Falaron de los estudios sobre les telarañes, feches de filos cinco veces más resistentes que l’aceru ya tremendamente más flexibles; de los llitimes y el futuru de la biónica; de la sostenibilidá de los edificios contemporáneos, que desanicien les posibilidaes de la piedra poles de la simiente...

Pa mín, el conceutu “biomimética” yera nuevu totalmente. Siempre oyí falar de como los homes, nel so vezu por volar, copiaren la estructura de les ales de les aves o, nel momentu de construyir les sos viviendes, diseñábenles orientando la entrada pa hacia onde’l sol rellumaba con más intensidá, aprovechando asina de meyor mou la lluz, y fabricábenles colos materiales más averaos a so y más propicios pal caltenimientu del calor n’iviernu y pa la refrixeración en branu, obteniendo asina unes habitaciones de barru similares a les que faen les golondrines nos escobios. Si nos detenemos a mirar, vemos que los teyaos formen ranures de defensa escontra l’agua similares a les estríes de la concha’l berberechu. O que los coches monovolúmenes tienen un diseñu similar al de los pexes globu, que si bien nun son los más rápidos, gasten la mesma enerxía en desplazase que los otros pexes, siendo’l so volumen muncho mayor. Pero nun sabía qu’hubiera una disciplina científica que se dedicare a proponer soluciones sofitaes na naturaleza: el diseñu orgánicu, la inspiración natural.

Dempués de muncho falar Punset y la profesora (de la que desconozo’l nome) d’exemplos d’usu d’idees que la Naturaleza punxo a la nuestra disposición gracies a la observancia del cuerpu humanu, de l’intelixencia animal, del faer vexetal y de les distintes interdependecies ente estos tres, dime cuenta que la científica siempre volvía sobre’l mesmu exemplu, el tipu ideal de creación natural: la fueya. Y creo qu’acertaba.

Resulta qu’una simple fueya permíte-y al árbol capturar la lluz y el calor ñecesarios pa que faiga la fotosíntesis pa tresformar los nutrientes de la tierra n’enerxía, como si d’una pequeña placa solar se tratare. Y, anque les plaques solares artificiales son más eficientes na captación de calor y na so tresformación n’enerxía, les fueyes son más económiques porque tan feches con materiales llocales que l’árbol pue alcontrar bien ceo (fabrícales elli). Pero, amás, la fueya permíte-y al so dueñu, formando parte d’él, autorregular la so temperatura mediante la trespiración, resguárdalu de plagues nefastes y ayúdalu a siguir en pie dempués de grandes vendavales al mudar a una postura helicoidal que lu fai más aerodinámicu. Esto, les plaques solares nin lo tienen nin lo son. Pero lo más importante de les fueyes, dempués de cumplida la so misión, ye que valen de nutriente una vegada que cai al suelu, pal so propietariu y pa tol microhábitat que se puea establecer al rodiu. Los inventos humanos, una vez desaniciaos, suelen valir pa chatarra ná más.

Finalizaba’l programa una cita del propiu Adrià Punset que dicía “el dañu que l’home-y fizo a la naturaleza ye mui pequeñu comparáu cola bayura que la naturaleza creó pal home”. Tien razón. Llevamos munchísimos años gastando los recursos de la naturaleza, en vez de deprender lo que nos enseña. Yá ye hora de que cambiemos la idega d’entender la naturaleza como despensa pa vela como modelu de vida.

La fueya de la imaxe alcontrela en http://joaquinpaneda.blogspot.com/, un sitiu de semeyes bien prestoses. (Amás, el nome del autor representa muncho pa mín: el mío güelu Fermín Casas, nomábase asina... Joaquín Fermín Casas Pañeda, claro)