El probe pa siempre.

Fai unes selmanes que n'Antena 3 TV tan programando un concursu que consta en mandar sms en cualisquier momentu. Primero, porque pa poder participar, tienes d'enviar al menos ún pa salir seleicionáu. Dempués, porque la audiencia ye quien elixe al ganador. Esti, ensin embargu, nun tien que facer ná más que cayer bien a la xente votante, porque'l so concursu llimítase a: sorprendese y glayar al descubrir que detrás de la so puerta ta un cámara siguíu d'un montón de téunicos; dase a conocer nun tris y glayar xunto a la marabunta vecinos que llegaren a casa en tres minutinos; y esperase a ver si gana daqué pa celebralo dando glayíos. Vamos, que´l concursu ye como un Gran Hermano, pero que dura un día namás; eso sí, al completu, porque a les nueve de la mañana marchen de los estudios de la cadena cinco caravanes de coches, teniendo caúna como destín el llar d'ún de los participantes, anque, al final, resuélvese too en media hora de programa dempués de les noticies.

El concursu en sí, que se llama acertao Rico al instante y que presenta un chaval de lo más gayoleru (Javier Estrada, que saliere de Gran Hermano, por cierto), nun tien más que contar. Habrá a quien-y preste y habrá quien fuxa comu un condergáu. Pero esti nuevu Sorpresa Sorpresa con perres tien daqué que lu fai especial: ún de los concursantes nun lleva ná. Val, tampocu nun pierde. Pero lo peor nun ye perder, sinón tener que ver comu el restu de los concursantes ganen, unos más y otros menos, una carrada perres pola cara. Amás, el perdedor nin siquiera se puede despedir de la xente, nin lleva, a una mala, ciertes pallabruques de ánimu. Les cámares céntrense nel ganador total, el que lleva el picu mayor y el que, con razón, pega los glayíos más fuertes. El que nun lleva ná, desaparez, cola esperanza perdía.
Y yo, alcordeme de Izquierda Xunida. Siempre cola esperanza de sacar daqué nes elleiciones, seyan d'onde seyan y a lo que seyan. Tener les mesmes oportunidaes que los demás, les mesmes ilusiones. Facer paecíos o peores tracamundios pa conseguir los votos. Y vese que, al final del recuentu, desapaeces, gachu, enmudecíu, ente los glayíos de les demás fuercies polítiques que sacaren tayada y, polo tanto, ganaren toes.
Aunque, al menos, IX nun tien que ver los resultaos cada sábadu. Que se consuele polo qu'Estrada sufrirá polos índices d'audiencia y en comu Antena 3 TV va véseles y deseáseles pa paga-yos a tolos ganadores, teúnicos, cámares, xóferes y demás xentiquina del programa.