Sucursal Norte

Estes caberes selmanes tuve calladín ya espectante: convocáronse les eleiciones y, dempués d'una campaña d'un baxu nivel intelectual y de propuestes, pero enllena de personalidaes non asturianes y de descalificaciones (porque los políticos nun s'insulten ente ellos, insulten la nuestra intelixencia que va xustiquina), llegaron les votaciones.

El resultáu yera l'esperáu. Ganaba'l PSOE, baxaba'l FORO, el PP quedaba más o menos igual, subía IU y entraba UPyD. Ye lo que pasó el domingu y, dende un primer momentu, echáronse p'atrás les promeses eleitorales pa escomenzar a falase de dos bloques de posible gobiernu: el d'izquierdes (sic) ente PSOE y IU y el de dreches, con FORO y PP de protagonistes. A falta del votu emigrante y del disputáu escañu na circunscripción occidental, la mayoría tenía la suma de los partíos de dreches. Dende esta mañana, cuando'l PSOE algamaba'l so diputáu númberu 17, quitándo-ylu a FORO, tien la oportunidá real de gobernar si pauta.

Anque les llectures ye que ganaron toos, como siempre, les sumes braeres son les siguientes: PSOE (17) más IU (5) más UPyD (1), igual a 23; FORO (12) más PP (10) más UPyD (1), igual a 23. Esto ye: la clave del futuru gobernín tiénla UPyD.

Yo sumaba'l domingu y les cuentes salíenme mui mal. Agora, col pequeñu camudamientu, sálenme igual de mal. Soi asturianu y veo que les fuerces propies d'Asturies saquen 12 escaños de 45; amorio al dame cuenta qu'esos escaños son de FORO. Y soi d'iquierdes, y gueto solo 5, los d'una IU doblemente sucursal, de Madrid y del PSOE; duélme tanto o más.

Nun dexa de ser curioso que too se decida gracies a xente que nun vive la realidá cotidiana asturiana: el votu emigrante foi decisivu; un partíu hipersucursalista, hasta'l puntu de declarar que tien qu'establecese "un gobierno asturiano, que piense en clave nacional" (entiendo que la nación ye la española, porque si non diba ser un nuevu puntu d'incoherencia nel programa "pragmático e idealista" que cacarexaba Ignacio Prendes).

Ver veremos pa ónde tirará Rosa Díez del so validu, porque les decisiones nun se van tomar "en clave asturiana". Van ser decidíes sigun criterios centralistes. Quien más torgue l'autonomía asturiana, recibirá'l sofitu del partíu maxenta. Y dambos bloques tienen esperiencia en facelo. Nun sedría d'estrañar el camudamientu del nome del país, otra vuelta: suena bien una vuelta a la "Provincia de Oviedo". Pero queda mui guapo tamién encarar la realidá y poné-y un perclaru "Sucursal Norte".

Cu-cu. Cu-cu.

P'anunciar la primavera, lleguen a los campos d'Europa, emigraos dende África, los cucos col so monótonu cantar. Cu-cu. Cu-cu. Esti cantar nun ye otra cosa qu'una marca territorial, un finxu que los machos ponen dende lo alto los árboles pa qu'otros machos de la so especie se dean por avisaos.

Un cachu más tarde, llegarán les femes. Daquellos machos que s'establecieren nos meyores sitios d'observación, copularán más. Dempués, vivirán unos meses d'auténtica voráxine gastronómica, cola bayura d'insectos primaveral. Ye'l tiempu pa que les femes faigan daquello polo que son más conocíos los cucos: el dexar los sos güevos dientro los ñeros d'otres especies pa que los cuiden ellos.

Esti procesu nun ye cenciellu. La cuca tien qu'andar sollerte a les niarades de les sos víctimes (n'Asturies, llavanderes y carriceros, sobre too). Si mete'l so güevu enantes de qu'estes pongan, van velo sospechoso y, si lo faen l'últimu, igual nun cabe. Poro, tienen que faelo xusto cuando la puesta tea escomenzada, xintando ún de los llexítimos, pa dexar el de so. Tamién tien que tar bien especializada en poner güevos d'una forma, un tamañu y un color lo más asemeyaos que seya posible, porque los dueños puen escamase. Si lo fai mal, el güevu acaba fuera'l ñeru. Amás, una cuca pue poner hasta una decena de güevos, polo que'l so tracamundiu tien que repitise en dellos ñeros: nún solu, la so descendencia nun diba sobrevivir.

El casu ye que, si cuela'l güevu, los paxarinos echaron pelu (n'esti casu, pluma).

Primero, porque dende'l nacimientu, el nuevu cucu, índa ensin plumes y ciegu, ye quien pa emburriar tolos güevos del anfitrión p'afuera'l ñeru. Nun esfuerciu titánicu, el so llombu abombiáu y les sos fuertes zanques, valen-y pa llevantar tol pesu de los sos compañeros. Tamién pasa cuando estos yá nacieren y, por más que puxen pa quedar, ye más quien l'instintu'l cucu.

Dempués, porque ye una auténtica máquina de comer. El so piar ye enforma agobiante, hasta'l puntu qu'estresa a los pas adoptivos pa que trabayen pa elli hasta 16 hores al día. Tien que ser asina: el cucu, a los díez díes de ñacer, ye tan grande como tola pollada d'un carriceru o d'una llavandera y, pa recibir los alimentos, tien que sonar como si d'una niarada completa se tratare. Y los probes pas que críen al recoyíu, nin se dan cuenta de que nun ye d'ellos: l'instintu fáilos dar de comer a tou páxaru que salga del so ñeru, anque esti seya tres veces más grande qu'ellos a los 15 díes. El piar del guah.e que creyen de so, ye'l so únicu enfotu y esti piar, nun acaba nunca, hasta que marcha'l ñeru p'África, un mes dempués de que saliera'l cascarón.

Víalo esti día nun documental d'Odisea, onde se despeyaben, de forma esperimental, numberoses duldes qu'había so'l páxaru esti. Y viniéroseme a la cabeza les elecciones de marzu n'Asturies y les movilizaciones d'esti fin de selmana caberu. ¿A dalguien-y sorprende que puea faer comparanza ente'l proceder de los cucos y tou'l sistema democráticu que carecemos?

Con cucos machos cantando dende la prensa pa marcar territoriu, con cuques femes repartiendo a los sos candidatos nes llistes electorales o en manifestaciones al so convenir y con cuquinos que, por instintu y ensin caciplar más que'l caltener la endorga enllena, traten d'echar fuera a la so competencia y de faer que la xente honrada trabaye lo que faiga falta pa mantenelos. El paralelismu ye evidente.

Solo me fallaba una cosa: cada vez queden menos cucos y cada vez esporpollen más los políticos caradures y de barriga agradecía. ¿Cómo pue ser?

Los paxarinos que sirven de víctima a los cucos nun dulden n'echar del ñeru daquellos güevos que nun seyan como los de so. La más pequeña diferencia, failos actuar. Y, como estos son los que se reproducen, los sos fíos van ser más observadores tovía. Los más confiaos, los que piquen y trabayen a estayu, paguen colos sos xenes finando con ellos. Los cucos, pela so parte, tienen que tar en constante camudamientu pa mimetizar los sos güevos, pero esti cambéu evolutivu depende de la capacidá d'observación del páxaru anfitrión, non de les sos posibilidaes. Nun ye estraño que solo cien especies d'aves, de les diez mil qu'hai (aproximadamente), tengan estes conductes parásites.

Pola contra, los políticos tiénenlo fácil, porque enfréntese a los ciudadanos, especie capaz de salir a la cai en masa a protestar poles reformes d'un partíu políticu que ta nel gobiernu en mayoría absoluta, precisamente, porque lu votaron ellos nun va nin tres meses; nunes manifestaciones entamaes por organizaciones sindicales pautistes colos reformadores; acompañaos por miembros d'otros partíos políticos, que nun duldaron en faer ellos mesmos recortes en drechos similares. Paez ser qu'el ciudadanu d'anguaño ye un ser acomodaticiu, ensin visión de futuru y que refuga de pensase con capacidá de movimientu autónomu. Ye una clara involución en manada de la anterior especie "ser humanu", que pensaba por sí mesma.

En definitiva, anque la mayor parte los ciudadanos tan convencíos de que los políticos son lo peor, acaben confiando n'ellos, votando (la máxima ciudadana ye l'"hai que votar") ensin pensar les consecuencies, pa que venga dalguien a que los saque de les crisis. La mayor parte los carriceros son más intelixentes: tiren fuera'l ñeru'l problema enantes de que se faiga grande, pa nun tener que pasar la vida trabayando pa otros.

Malditos gabachos

Nos momentos de másima tensión social, una de les fórmules qu'alcuentra'l poder pa caltener el sistema ye la sublimación d'un sentimientu identitariu. D'esta miente, la fortaleza de la comunidá social va camudándose p'hacia unes postures viscerales de pertenencia a una comunidá sentimental. Y, como se diz nos casinos, "gana la banca": l'enemigu internu, que cada vez se ve más común pol pueblu, dexa de ser puntu de mira porque s'alcuentra un enemigu exóxenu a quien odiar.

La cortina de fumu n'España estes últimes selmanes vinía siendo la Xusticia. Nun sistema democráticu inxustu como ye'l d'esta "democracia" española, los poderes fácticos puen usar y abusar del so sistema xudicial y tapar les sos vergoñes. Asina, si la xente s'echa a la cai a denunciar la sentencia del casu Marta del Castillo, nun va protestar los desahucios; si se focaliza l'atención cola revisión de la llei del abortu o'l matrimoniu notarial, nun se centra na institucionalización de la dixebra en divisiones de la ciudadanía por motivos económicos (cola normativa pola que los recursos xudiciales yá nun son gratiutos que fai que la Xusticia nesti Estáu yá nun participe de los criterios d'igualdá d'accesu); si falamos de la politización de los tribunales nes sentencies del xuez Garzón o de la trama Gürtel nun falamos de les inxusticies cotidianes del sistema, que son les que braeramente afeuten al ciudadanu.

Pero la desconfianza que se taba creyando con estos toques a la rama más débil del árbol, constitucional podía francelu. Asina que s'acude al patrioterismu más españolista pa salvalo too (sicasí, ensin conseguir tapar el restu de temes, pero casi). Tirar d'esi nacionalismu uniformador que ye'l fundamentu que-y da cadarma al estáu español (porque, nel momentu que permite otres sensibilidaes, al vivir d'elles y tresformales, desapaez por inútil), xenera una movilización interclasista que tolo alivia y tolo soluciona. Y esi "e pluribus unum" a la fuercia, atopó escusa nes acusaciones de dopaxe a los deportistes españoles dende los guiñoles del Canal+ France.

Surde la tema con una sentencia del Tribunal Arbitral del Deporte, pola que'l ciclista madrilanu Alberto Contador yera sancionáu por dos años y col pérdida de dellos triunfos (ente ellos un Tour y un Giro) por dar positivu nun control antidoping. Apaeció na so sangre una sustancia que ta terminantemente prohibida (el clembuterol), anque nun-y sirva a un ciclista pa meyorar el so rendimientu, anque la cantidá seya mínima y anque quedare claro qu'elli nun tenía la intención de drogase, porque la sustancia llegare al so cuerpo al traviés d'un complementu alimenticiu contamináu. La llei deportiva diz que un ciclista nun pue presentar esta sustancia en sangre cuando compite y punto.

Tol deporte español, y buena parte de la sociedá, cerró files delantre'l ciclista. "Nun ye de xusticia". "Van a la nuestra contra". "Tienen envidia de los deportistes españoles polos sos ésitos". "Molamos muncho y llegámonos cola boca".

Nesto, saltaron los guiñoles del Plus franchute. De la mesma forma que durante años n'España caricaturizaron a tou personaxe públicu y viviente (dende Bush y Ben Laden, hasta Raúl, Ronaldo, Beckham o Van Gaal), los franceses faen lo mesmo, buscando la mayor repercusión posible nos escándalos de cualquier estaya. Tuvieron meses sacando'l muñegote de Zidane dando cabezazos a la xente como saludu. Pasaron años riéndose del so Presidente Sarkozy, al que presentaben cola cabeza al altor d'unes caderes femenines. Y, finalmente, vistieron con traxe de rayes y bola de presu al anterior Presidente, Jaques Chirac. ¿Dalguien podía pensar que diben dexar pasar esti percance d'un ganador del Tour? (Podía entrugar si dalguien n'España se diba atrever a sacar al rei vistíu como un presidiariu. Bueno, igual sí que iba haber quien, pero sedría demandáu automáticamente nun estáu con una llibertá d'espresión tan curiosa) Y, detrás de Contador, llegaron otros: Nadal, Piqué, Gasol, etc.

La repercusión fue tan grande qu'hasta'l Ministru d'Educación saltó a cargar contra Francia. (Pensaría qu'esta yera una bona ocasión pa tapar les sos midíes y convertise n'abanderáu del sentimientu españolista) Y, detrás, como borreguinos ensin xuiciu, el restu la nación, dolíos nel so fueru internu. Espresiones del altor "Soi español, ¿a qué te gano?" o "Los franceses tiénenos envidia porque nunca nun ganaron ná" (anque en perfeutu, o non tan perfeutu, castellanu, claro ta) revolvieron les redes sociales estos díes. Y una curiosa semeya d'un puntu llimpiando'l culu cola tricolor recibió milenta "me gusta" en Facebook. (Curiosamente, la nueva d'un ciudadanu de Xirona a quien multaron con 3.000 euros por llimpiar el so pandín con una d'España, llevaba otros tantos milentes; nun se ve la viga propia, pero si la paya ayena)

Casualidaes de la vida, déxame'l mio collaciu Jose, emigráu a Madrid de visita en so tierra estos díes, un llibru de Buenafuente y el Terrat nomáu Lo que vendría a ser la Historia de España. Nel capítulu "La Marca Hispánica. Cuando fuimos franceses" apaez un cuadru con una serie de frases chistoses en fracés pa comunicase en casu de viaxe a la Patrie. Una d'elles diz: "Comment pouvez-vous nous mépriser d'une façon si vaniteuse? Nous voudrions l'appliquer au Portugal." Que traducen como: "¿Cómo podéis despreciarnos de un modo tan vanidoso? Nos gustaría aplicarlo a Portugal." Nun se pue escaecer, y Buenafuente nun lo fai, que'l nacionalismu español ye, amás d'uniformador, fonderamente victimista y abusón, alcontrando los sos finxos en Xibraltar, el 98 cubanu-filipinu y el metese con "rivales" más pequeños (los nacionalismos periféricos) o, cenciellamente, inventaos (los asturtzales, los xudíos, los masones y los xudíos masónicos, por exemplu).

El casu ye qu'esti tipu d'agresiones foriates, faen que se descuiden les agresiones reales. Y más, n'Asturies, ye dicir, la España braera, que lo demás ye tierra conquistao. Dos noticies "nun" hubo esta selmana y nun pasó ná:

La primera, un suicidiu nun centru comercial de Xixón que nun recoyeron los medios de prensa hasta dos díes dempués y con increyibles tracamundios na so redacción. Al paecer, un paisanu tiróse al patiu del Centro Comercial Los Fresnos con un cartel onde denunciaba la so situación personal énte un desahuciu. Nun primer momentu, los periódicos nun se ficieron ecu de la noticia. Dempués de les protestes de la xente testigo y el boca a boca, fue descrita como que l'home "se precipitó" accidentalmente y solo sufriera una rozadures, hasta que yá nun tuvieron más salida que'l reescribila, anque ensin citar espresamente'l sitiu. Pa evitar suspicacies, tamién se camudó la versión dixital, poniendo fecha del mesmu día que pasare'l sucesu. Ye másima que si un fechu nun apaez na prensa, nun esiste: pero una cosa ye una rueda de prensa de Bloque po Asturies y otra, mui diferente, un suicidiu nun centru comercial.

La segunda, la campaña publicitaria de los 40 Principales, onde s'ufren 5.000 euros pa dir de viaxe de fin de cursu. Nel día que más taba lloviendo en Les Arriondes, con un hospital evacuáu y la villa n'estáu de sitiu, saquen el siguiente eslogan: "Chaparrón y bocata en el Sella o cervecita fresca en Cancún". Nun pasó ná, porque nun fue noticia. Si fuera idega de los guiñoles franceses, igual fuera un escándalu. Pero como ye una invención española que pon pingando (y nunca meyor dicho) a dalgo asturiano, ye normal y asumible.

Asina que, amás de tapar les barbaridaes del sistema democráticu que cadecemos, les puñaes sarcástiques franceses valen pa tapar la censura y los insultos reales d'equí. Porque ye más importante pa la mio vida que nun se toque la integridá de Nadal que, por supuesto, la de mío.

Dicía Marx que la relixón yera'l opiu de los pueblos. N'España, esi opiu ye'l deporte. Y, por eso, los franceses tienen tola razón: vamos toos drogaos hasta'l culo. Y, cuando nos güel muncho, llimpiamoslu con Francia.

Cortina de fumu algamada: borreguinos de Norit, controlaos.

Kelly's Asturians

Pica na semeya pa ver la escena orixinal ensin caciques.

Una de les escenes que más me presten del cine vien de la película Kelly's Heroes (tornada al español como "Los valientes de Kelly"), del añu 1970. Al final d'una interminable serie de peripecies, el soldáu norteamericanu Kelly (Clint Eastwood) alcuéntrase con que, ente elli y l'oru que guarda'l bancu d'un pueblu destrozáu detrás de les files enemigues, hai un tremendu tanque Tiger alemán. Kelly dirá xunto al sarxentu mayor "Big Joe" (Telly Savalas) y al sarxentu de blindaos Oddball (Donald Sutherland), a falar col pilotu de tan temible arma de guerra (Karl-Otto Alberty), pa convencelu de que se xuna a ellos.

Poníenla (reponíenla por 20ª en TCM) esti llunes pela nueche. Y la mente de mio, que ta enllena de males inteciones, vía n'aquel enfrentamientu ente tres llocos cegaos poles perres y un llocu dientru'l tanque qu'acabará igual, la repetición de lo que pasara pela tarde: dempués de que los tres partíos de la oposición se negaren a sofitar los presupuestos autonómicos y de que Rajoy dixera que nun diba presentar énte la Unión Europea les sos propuestes de recortes hasta finales de marzu, porque esta dixera que nun diba dar denguna previsión sobre la economía d'España hasta finales de febreru (colo que los fondos mineros europeos p'Asturies nun se denegarán esti añu hasta'l mes de xunu), Cascos dio'l bombazu de que convocaba eleiciones autonómiques.

La decisión, una salida lóxica, intelixente y consecuente a la situación de despropósitu presupuestariu, pilló n'orsai a les sucursales (dalgunos, esperando que s'escueyan mandos al partíu central pa escoyer los del so terrón) y non sucursales (que taben descansando dempués del esfuerciu que supón inventar unes nueves sigles cada cuatro años). Son tan demócrates que, el simple fechu d'acarase a los ciudadanos, taréce-yos la cadarma.

Taba cola película y, col ritmu del meyor duelu al sol de les películes del Oeste, vía a un Telly Savalas del PP, un Clint Eastwood del PSOE y un Donald Sutherland d'IU averándose pee una cai enllena cascotes y folla, medio cagaos pero con pasu firme, al tanque nazi del xovellanista Cascos que, dempués de sacar la patina, salía enteru al encuentru de los tres oponentes. Telly, al más puru estilu popular de querer fumar en cualisquier lláu, apurría-y un pitu, que Karl-Otto nun quería, alvirtiendo de que la bomba la gasolina taba rota, el tarrén enllenu gasolina y que podía españar too. Telly, ensin prender el cigarru, pero con elli na boca, suélta-y que si puen falar, que tien coses que dicí-y de soldáu a soldáu, que solo saben lluchar y morrer y, ¿pa qué? Si dempués naide nun los echa en cuenta. Y que vien l'exércitu americanu detrás, que tienen priesa. Y prende'l pitu. L'otru escucha y sorpréndese: "Si l'exércitu americanu soi vosotros". Entós fala Clint al más puru estilu FSA: "Esto ye un asuntu particular". Insiste Karl. Y respuende Donald: "Non, chato. Tamos equí poles perres. ¿Sabes cuántes hai? 16 millones de dólares." L'alemán abre los sos güeyinos como platos y, dempués d'acabar de convencelu, bombazu que te crío.

Ente los intereses d'unos y los d'otros, ente les incapacidaes de FORO, l'autismu del PP, la mala fe del PSOE y'l seguidismu d'IU tan dexando Asturies como'l pueblu de la película: en ruines y espoliau. Porque esti añu ye la tercera vez en menos de doce meses que los asturianos tamos llamaos a participar na "fiesta de la democracia", pero la primera na Historia d'esti sistema de gobiernu onde naide nun quier gobernar: ¿quién va querer facese cargu d'esta llaceria de país?

Si polo menos dalgún tuviera l'altor moral de Kelly...

Identidá cultural xixonesa

La selmana pasada l'Ayuntamientu de Xixón destituyó a José Luis Cienfuegos como direutor del Festival Internacional de Cine de Xixón. Anque creyo qu'esta decisión ye un erru total, les mios idegues al respeutu quedaron versaes na entrada "Rubiera y Cienfuegos" del blogue "Memoria de un silencio/Memoria d'un silenciu", obra de Pablo R. Alonso. Soscribo puntu por puntu lo qu'ellí se diz, asina que, pa saber lo qu'atalanto al respeutu, val con siguir l'enllaz.

Yo quiero falar d'otra cosa que, siéntolo, prúyeme muncho más que'l camudar el titular d'un puestu de confianza política (por bien que lo tenga fecho) por otru (por más incognita que seya). Quiero falar d'identidá cultural.

Llégame'l miércoles una invitación p'acudir a una protesta popular na plaza Mayor de Xixón, nos siguientes términos:

"Queremos convocar a través de éste evento a tod@s los ciudadan@s que no entienden el ataque y derribo a los eventos culturales importantes que hacen grande a ésta ciudad como el reciente cese de José Luis Cienfuegos, director de Festival Internacional de Cine de Gijón, multitudinario en participación y prestigio.
NO podemos permitir que destruyan la identidad cultural de ésta ciudad.
Que se enteren de que no estamos de acuerdo con la política que se está llevando a cabo desde la concejalía de cultura !!!
POR FAVOR COMPARTIR ÉSTE EVENTO CON TODOS VUESTROS CONTACTOS"

Evidentemente, nun acudí: primero, porque, tando d'alcuerdo colo espresao respeuto a Cienfuegos y el FICXixón, nun comparto tolo demás, nin tampoco les formes de los comentarios totalmente politizaos, onde se discriminaben y s'insultaben a los comentaristes diverxentes (l'insultu fue un arma bayurosa esta selmana); segundo, y más importante, porque taba nun eventu cultural de primer orde nel Teatru Xovellanos (y del que yá falé dende "El blogue d'un teatreru asturianu").

Pero quedóme na tiesta la siguiente frase: "NO podemos permitir que destruyan la identidad cultural de ésta ciudad". ¿Cuála ye esa "identidá cultural" propia de Xixón? Imaxínome que se referiríen a les espresiones culturales qu'esporpollaron nel conceyu mientres l'alministración socialista: eses que se presumen cosmopolites, espardidores de la gran Cultura ente la xente, fonderamente públiques y desendolcadores de los meyores instintos de los seres humanos illustraos.

Ye prestoso pensar eso. Por embargu, en realidá, consistieron na medra de la llucha ente espresiones forasteres y alloñaes de la realidá asturiana y les tradicionales del país y la desapaición del sector empresarial priváu y competitivu, mediante una xestión sofitada nes sovenciones y la incontinencia presupuestaria, y orientada a texer una rede clientelar d'entidaes, grupos y asociaciones culturales y persones a títulu individual qu'estuvieren dispuestos a la movilización y la manifestación favoratibles a los sos intereses partidistes.

Asina, espropióse la Universidá Popular, que pasó de ser unes aules abiertes pal intercambiu de conocimientos y saberes ente los ciudadanos p'acabar nuna serie de talleres socontrataos a empreses d'educación afines, que nin miren pola calidá de les materies, nin atienden a los drechos llaborales del profesoráu, porque los paquetes d'ufierta salen p'alantre baremaos pol presupuestu más ruín y, sobre too, polos puntos d'esperiencia de les empreses, colo que se zarraben les posibilidaes pa les nueves.

Asina, asistimos al sofitu incondicional de la obra personalista de Paco Ignacio Taibo II, la Semana Negra: eventu que se fizo imprescindible en Xixón gracies a que l'Ayuntamientu nun proponía denguna actividá cultural paralela al dexar en manes privaes (porque Semana Negra ye una asociación privada) la responsabilidá xestora; y non gratis, precisamente, al faese cargu de tolos gastos de mantenimientu (dende la llimpieza al agua, dende la seguridá a la lletricidá), cediendo'l suelu (yera la organización del eventu quien s'encargaba de rentabilizalu) y ufriendo compensación pol llabor realizáu (como los quince díes de programación llibre de Taibo nel Xovellanos). N'agradecimientu a Xixón y los xixoneses, el mexicanu respondió chataxeando a un nuevu ayuntamientu que dexó clares les sos intenciones de rebaxar la sovención direuta, creyar un festexu paralelu y, sobre too, quita-y les sos prerrogatives.

Asina, asistimos al cierre de teatros y cines qu'enllenaben d'ufiertes culturales la ciudá, pa quedamos con una sola propuesta: la del Ayuntamientu, al traviés del Teatru Xovellanos y los Centros Municipales. Paez que nun ta mal tener unes actividaes mui barates (o gratuites na mayor parte de los casos) y espardíes por tola ciudá. Pero esta ye un arma de doble filu, porque si bien avera la cultura a la xente, munches veces les actividaes nun son atractives pa la xente, o tan mal desplicaes, o tan mal espublizaes o, simplemente, nun se-yos da'l valir que puean tener; porque si bien son barates, compiten coles propuestes privaes de forma illexítima, porque van a fondu perdíu.

Asina, (y esto ye mal de toa Asturies) vivimos un procesu d'amordazamientu del sector cultural, que dependía d'unes sovenciones y d'unos ingresos procedentes, principalmente, del sector públicu, énte la inesistencia d'un sector priváu granible. Por supuesto, dempués vinía'l momentu del agradecimientu, como la invitación envelenada a los actos de partíu (y esto vivilo yo personalmente cola candidatura de Santiago Argüelles). Da miéu perder les sovenciones y el miéu, atenaza la creatividá. Esto nun ye sofitar la cultura del llugar, ye faela clientelar y esi mal usu, ye dañín de por sí.

Sigo, en breves:

- La cultura asturiana, la que de verdá se correspuende cola "identidá xixonesa", quedaba reducía a l'asturianía (ye dicir, los símbolos esternos: sidra, madreñes y gaita col Festival de la Sidra, Mercaos artesanos y Festival de Tonada) o'l celtismu (col Festival 5º40). ¡Ah! Y los trés díes de la Compañía Asturiana de Comedies nel Xovellanos que, con Arturo Fernández, yeren les úniques muestres qu'enllenaben añu tres añu'l coliséu xixonés (pero non, de xuru qu'esto nun ye "identidá xixonesa").

- La importación de tradiciones foriates, como la Feria d'Abril sevillana (iniciativa d'El Comercio), vista como exemplu de la multiculturalidá xixonesa, cuando la falta de sofitos fizo que la creyada por una agrupación rociera en Xixón nun saliere p'alantre.

- La conformidá pa colos xestores multiusos, desastrosos como Carmen Veiga a la tiesta'l teatru Xovellanos, dempués de ser conceyal y directora de Cruz Roja Gijón, anguaño ye conceyal otra vuelta. (Carmen Veiga atacaba esta selmana la decisión de FAC, desprestixando "la cultura tradicional asturiana" nunes vergoñoses declaraciones; anque nun foi la única: Jesús Iglesias o Alfonso Peláez acompañáronla)

Nun voi falar d'otres iniciatives mal xestionaes, como los museos, el botánicu o, sobre too, l'acuariu. Espacios desaprovechaos, d'altu coste económicu y escasa repercusión.
Tampoco de la ayuda hinchada a determinaes asociaciones culturales del palu, como Abierto Hasta el Amanecer, a quien se-y cedíen tolos equipamientos que necesitaren de forma gratuita pol so interés social. A El Garrapiellu, por contra, negóse-y'l patiu del Antiguu Institutu pa cellebrar el so 20 aniversariu.

Tamién se ficieron coses bien: el Festival de Cine de Xixón fue un exemplu, o los grandes conciertos de branu, hasta que petaron les arques. Pero poco más y/o con escasa pervivencia nel tiempu.

¿Qué fizo too esto? Creyar una idea politizada de la cultura (onde aquello qu'atente a la forma de faer socialista ye "enemigu de la Cultura"), sofitada en premises prexuicioses como'l personalismu (nel sen más ranciu del Despotismu Illustráu, onde tien más valir cuando esta tien el sofitu de quien gobierna, que si ye simplemente popular), l'elitismu (non solo pola escasa repercusión de la mayor parte d'iniciatives ente los vecinos: y equí nun se pue escluyir, nin muncho menos, el FICXixón; si non, sobre too, porque nunca nun yera desplicada, nin se facía atractiva pa daquellos que nun conocíen en qué consistíen), el más fonderu provincianismu (nel sentíu más romanu, de poder sucursalista d'otru mayor) y la segregación (daquello que venga d'afuera ye meyor, seya lo que seya y ensin mirar; y hai patente de corsu pa insultar, tracamundiar y echar mierda en too aquello o en tou aquel que s'atreva a defender lo contrario).

Esta y non otra, ye la "identidá xixonesa" que se pidía defender. La incompetencia de FAC nun va ser quien pa camudala y volverá la convivencia de los últimos 30 años PSOE-IU-PP (tres partíos sucursales y d'usos y costumes provincianes) pa caltener esa idega de cultura acomplexada.

La imaxen qu'acompaña l'artículu ye una propuesta pal cartel del FICXixón 2009, fecha por Yle García y tomaba del blogue C&C Diseño Gráfico.

San Adrianu, por exemplu.

Yá finé d'asoleyar nel blogue parroquies.blogspot.com los mapes parroquiales de los conceyos d'Asturies, una estaya que quedaba pendiente nel mundiu virtual y que, espero, sirva p'ayudar a completar dellos trabayos sobre temes asturianes.

En cada entrada, amás de los mapes en blancu y negru y en color, sumaba una pequeña descripción de les carauterístiques poblacionales, xeográfiques ya históriques de los conceyos. Y apurría, amás, una tabla cola superficie y la población de cada parroquia. Nel últimu bloque de conceyos espublizaos taba'l de Grau y, anque viere que munches parroquies teníen mui pocos habitantes, apaeció la de San Adrianu: 8,88 km², 0 habitantes. Abluqué.

San Adrianu fuera parroquia del conceyu de Santu Adrianu hasta que, nel añu 1859 se dixebrara pa entrar a formar parte del de Grau. Contaba con dos noyos de población, La Condesa y Santu Adrianu'l Monte, aguaño (y según la SADEI, yá dende anates del añu 2001) vacíos.

La Nueva España espublizaba'l día 10 de xineru el siguiente artículu "Asturias tiene ya 672 pueblos abandonados y suma cinco núcleos deshabitados cada año". Falen determinaos espertos sobres les causes (avieyamientu de la población y emigración interna nos conceyos pa les cabeceres comarcales) y les consecuencies (degradación del caseríu, ruptura del equilibriu ecolóxicu, degradación del paisaxe y escaezu de costumes y tradicionaes). Pero naide nun da denguna propuesta de solución.

El día 11 apaecía na mesma publicación otru artículu sobre la tema (más bien una apliación más téunica) "Uno de cada cinco pueblos de la región corre el riesgo de despoblamiento inmediato", falando equí de entidaes "inviables" y d'aries perifériques que "tienen una significativa importancia en la identidad asturiana".

Pero, ¿cuála ye esa "identidá asturiana"? ¿La d'una vida fundamentada nos tiempos de la naturaleza, nuna casería ente pites y vaques y semando maíz y fabes? ¿O la d'una vida urbana, con trabayu d'ochu hores a cuenta ayena, a ser posible como funcionariu l'Estáu, con pisu en propiedá, coche, fútbol los domingos y botellines de sidra?

Pa mín, esti ye'l puntu que desplica'l por qué principal d'esta despoblación: si la xente marcha del llugar onde nació, ye a la gueta d'un futuru más baurosu, que s'acomode meyor a los sos criterios de calidá de vida. Desaniciao dende va tiempu polos poderes políticos el primer modelu, la xente asturiano nun quier nin saber del trabayu nel campu, más que pa les fines de selmana na segunda residencia (que ye mui "chick" tener güerta).

Nel campu asturianu queda la xente vieyo que nun s'apuró por marchar a trabayar a la mina o pa Bélxica y unos cuantos soñadores mozos que tienen idegues emprendedores o, simplemente, testerones de siguir colo de los pas pa que nun muerra. Estos son los que caltienen les andeches, les caleyes abiertes y llimpies, les fuentes curioses y les biesques ensin amburar. Les polítiques de sovención, como a la cuota láctea, por exemplu, feches dende un despachu Bruxeles y alministraes tan torponamente dende otru/otros d'Uviéu, son les que propicien desastres como les d'El Valledor y, sobre too, el desaniciu d'una cultura tradicional autóctona n'ares d'una Ciudá Astur.

Habría que favorecer la instalación de persones n'estos pueblos, ayudando a la creyación de puestos de trabayu a distancia más qu'acumulando empreses en centros, obligando a los propietarios a la conservación de les sos posesiones y del tarrén llendante o bien espropiando direutamente, ufiertando esenciones d'impuestos a cambiu de compromisos d'habitabilidá, permitir la participación activa nes tomes de decisiones comunitariesa los vecinos... polítiques que se tan desendolcando y dando resultaos n'otres partes del Estáu, como Teruel, Güesca o Lleida.

Pero equí n'Asturies va ser complicao camudar la tendencia: los asturianos tamos a una na zuna de competir colos de fuera coles armes de los de fuera, dasaniciando les propies. Y tenemos les de perder, con una xeneración nueva que ta recibiendo una educación orientada a ser competitivu fuera d'Asturies. Paez que tamos emperraos en convertir Asturies nun cortil al estilu San Adrianu.

__________________________
La imaxen d'enriba ye del caseríu abandonáu de Santu Adrianu'l Monte. Ta sacada del blogue "Las rutas de monte de Santos".

Propósitos d'añu nuevu

Cuando escomienza un añu, tol mundiu se propón el faer coses prestoses pa les que nunca nun se tien tiempu, ponese manos a la obra con coses nueves que-y camuden la rutina o retomar dalgunes actividaes que dexaren pa práu n'otru momentu de la so vida poles circunstancies que fueren. Toes estes proposiciones escomiencen con munchu puxu, a midía que les uves van cayendo pol galgüelu p'abaxo. Pero dempués, l'enfotu va baxando, les idegues fainse complicaes de sofitar, cada vez más pesaes en comparanza coles coses que siempre faemos y que nos resulten llixerines y gayoleres y, col pasu'l tiempu, ún echa la cuenta de nun mirar p'atrás y convéncese de que la falta de memoria ye un mal menor.

Pa evitar esti tipu de debilidaes tan propies d'un ser humanu como yo, voi dexar los míos propósitos pa esti añu qu'acaba d'escomenzar por escrito y asoleyaos nel mío blogue de siempre. Y, de pasu, meto otra boluca más nuna piscina que, col tiempu, afronta'l so cuartu añu de vida con más de cien dientro.

PROPÓSITU NÚMBERU 1: la cosa pa la que nunca nun tengo tiempu.

Escribir. Nunca nun tengo tiempu pa escribir. Faigo cien mil coses enantes de poneme al ordenador y abrir el word o sacar una llibreta y da-y al bolígrafu. Y nun pue ser, porque me presta asgaya, faime sintir mui bien ver cómo les mi coses pasen de la mio tiesta a los güeyos d'otres persones. Y más tovía ver como saquen una sonrisa con ello. Tengo idegues pa enllenar tou un añu de lletres. Y toco-y al 2012 lleer lo que nun lleeron los pasaos.

PROPÓSITU NÚMBERU 2: la cosa nueva que camuda la rutina.

Uiquipedia. La enciclopedia llibre n'asturianu. Una de les reivindicaciones que tien el movimientu de recuperación del asturianu ye que se faiga útil, pa que la xente lu use ensin prexuicios. Con esi empeñu me llanzo yo a enllenar de calidá los artículos espublizaos nella. La mío idega ye xenerar artículos completos sobre temes asturianos, pa que la xente que s'avere a buscar información del país alcuentre la información más granible y detallada n'asturianu. De na nun sirve faer munches entraes incompletes: hai más de 15.000 entraes pa una ferramienta que naide nun usa, porque los artículos homónimos n'otres llingües son más completos, enllenos d'información, semeyes y enllaces d'interés.

Toi acabando col proyeutu del atlas dixital de les parroquies d'Asturies, subiendo al blogue parroquies.blogspot.com los mapes parroquiales de los conceyos, que llibero de drechos al subilos toos a la rede gracies a la ferramienta wikicommons. El siguiente pasu va ser desendolcar los artículos de cuantes parroquies rurales asturianes puea na uiquipedia, como ya fice, pa poner un exemplu, cola entrada de la parroquia carreñina d'Albandi.

PROPÓSITU NUMBERU 3: la actividá a retomar que quedare pa práu.

Liriu. Tol enfotu que tuve estos últimos años pola creyación d'una cadarma organizativa y normativa pa esti xuegu tradicional asturianu, desinflóse a mediaos del añu pasáu énte la pasividá del restu de persones que taben al mío lláu. Yá tenía falao con más d'ún dellos que yo colgaba la machorra si nun alcontraba dengún tipu de compromisu na xente. Bueno, camudé d'opinión. El liriu préstame pola vida, pol xuegu en sí, pola forma como nos rellaicionamos cuando conseguimos axuntanos y, sobre too, polo que significa como trabayu de recuperación d'una estaya de la cultura asturiana y, amás, faciéndolo ensin sofitu institucional dalgún y cola llingua asturiana como idioma vehicular. Si tengo que tirar yo solu del carru, tiraré; pero sería una pena que se perdiere tolo que tenemos fecho yá.

Tres propósitos. Ná nun más. El restu de coses, que vengan elles y yá les diré acarando. Esti 2012 tien pinta de que va ser mui pero que mui interesante.