¿L’añu la marmota?

Estos díes caberos, anque primeros del añu, tán enllenándome d’una sensación estraña que nun se bien cómu definir. Les coses que me dicen, les noticies que me lleguen paécenme, les actitudes que siento paécenme, como na película Groundhog day (traducida al español como El día de la marmota o Atrapado en el tiempo), repetíes.

Esta película del 93 cuenta la historia d’un meteorólogu encarnáu por Bill Murray que vive y revive toles mañanes el mesmu día 2 de febreru, cuando la marmota del pueblu de Punxsutawney (Pennsylvania, EE.XX.) despierta pa ver si finó’l inviernu o non, hasta que consigue resolver la so vida, que taba fecha una yaceria, enllenándola d’amor y felicidá.

A mín nun me pasa eso esautamente, porque soi consciente de que yá pasó un añu y tamos a 2010. Pero les sensaciones son les mesmes qu’en xineru del añu pasáu. Repasando les nueves...

... Asturies quedó otra vegada incomunicada pol mal tiempu de ñeve y fríu, como’l restu d’España y Europa tá ateutáu pol frente polar;

... les rebaxes vuelven a imponese a los robines que l’añu pasáu asaltaben los supermercaos franceses, qu’agora, como tolos xineros de la que fina la Navidá, vénse perturbaos por pertubaos cola tarxeta créditu na mano;

... los fumadores ven cómo cá vez-yos queden menos sitios onde alcontrar aliviu pal so viciu;

... los políticos españoles anden llocos por quedar a tomar el café con Obama, como daquella andaba tol mundiu llocu por ver cómo ganaba Barack les eleiciones y solucionaba la crisis;

... y el común de los mortales intenta evadise de los problemes cotidianos, propios y del mundiu, embobándose con fútbol, fútbol y más fútbol, bálsamu que vuelve multimillonarios a los ensalmadores y atopáos a los que cura.

Y yo sigo viéndome obligáu, cá vez de meyor gana, a escribir una entrada tres d’otra, anque los temes seyan los mesmos siempre, nesti blog enllenu boles al que me llancé de cabeza fai un añu.

Renuevo’l compromisu otru añu. Anque teamos como marmotes (l’añu y yo), espero que-vos preste.