Se busca

Como si d’una película del Oeste se tratare, finó la selmana pasada col espardimientu d’una imaxe infográfica del enemigu númberu 1 del Occidente bien pensante. Tres unos años ensin semeyes de so, el FBI decidió facer un retratu robot de Osama Bin Laden, onde apaecía más aveyentáu, con unes güeyeres marrones tremendes y cola barba y el pelo cañosos. Fízome gracia, porque, según lu vi, paeciome un dibuxu tan mal fechu, en plan “curtia y pega”, que bien pudiere pasase por un xuegu de Fisher Price: Mr. Potato Talibán.

Pero la gracia (pa mín) nun finó ellí. Al día siguiente saltó la noticia realmente curiosa: el pelu y les patilles canoses qu’usaren pa facer el collage yeren de Gaspar LLamazares, voceru d’Izquierda Xunida nes Cortes.

Gaspar Llamazares ye bien conocíu pa nosotros. Anque casteyanu de nacimientu, la so infancia vivióla en Salinas, asina que se considera d’Asturies, tierra onde se convirtió en personalidá política dempués de ganar a Gerardo Iglesias el puestu de Secretariu Xeneral y Coordinaor Xerenal d’Izquierda Xunida d’Asturies. Siempre polémicu, rompió varies veces coles directives de collaboración col PSOE, tanto na Xunta del Principáu comu nel Parlamentu, una vez que foi escoyíu Coordinaor Xeneral d’IU nel 2000, sustituyendo a Julio Anguita. Pero les sos midíes a la gueta d’una identidá d’izquierda alternativa al conservadurismu socialista fueron somorguiándose fracasu ellectoral tres fracasu popular. Fracasáu dempués de les últimes ellecciones, onde la coalición tuvo los sos peores resultaos con solo dos diputaos, escusóse nel sistema ellectoral inxustu que favorez el bipartidismu, pero hubo retirase del puestu de Coordinaor, anque siga siendo parlamentariu.

Y paecía qu’equí diba finar la carrera política d’esti ciruxanu, hasta que’l diariu El Mundo destapó la polémica del pelo del “potatu”.

Gaspar, en principiu, tomólo a guasa. Yo vi unes declaraciones de so el mesmu día, na cai, onde se carcaxaba cola noticia, diciendo que menos mal que nun tenía en vistes marchar pa los Estaos Xuníos.

Pero, a la nueche, hubo sintir dalgunos comentarios na tele: por una parte, contertulios de llargu alcance falaben de la gravedá del tema, de la caza bruxes al comunismu européu que los conservadores autóctonos diben ver sofitada dende América, neses trames de conspiraciones xudeomasóniques a la inversa; por otru, otros contertulios d’igual alcance facíen mofa de la figura del pim-pim Llamazares, despoxáu de tol valor moral que nun supiere defender nes urnes hasta’l puntu de que’l FBI nun lu consideraba capaz de quexase.

Y Gaspar saltó pela mañana, viendo la so última oportunidá d’algamar dalgún tipu de triunfu. Volvió a pensar que’l victimismu ye una bona mena de trabayu y tiró del filu. Nun-y valieron la retirada de la semeya de la web del FBI, nin la protesta formal de Zapatero a los Estaos Xuníos, nin les disculpes del embaxaor n’España (tacháu de “funcionariu menor”). Quería más: quiciás el facese güecu de nuevu onde nun lu tien, el facese cabezaleru del movimientu revolucionariu socialista o el mantenese. En definitiva, pretender tristemente que lu atope dalguien, ensin falta de buscalu.

Gaspar, solu delantre’l mundiu, sigue erre qu’erre defendiendo’l so derechu a poder dir a Marruecos ensin que lu detengan. Pero la noticia yá pasó y convirtióse en chiste de Buenafuente. El FBI tá de vueltes preocupáu por Bin Laden, ya que los comunistes ensin futuru nun son problema, Zapatero tá hasta enriba trabayu cola sa presidencia europea y l’embaxaor americanu n’España, descoyonándose mientres ve Intereconomía pela nueche hinchándose a Ferreros Rocher.