Taibización.

Ayer falaba d’una marcha organizada por un ensame d’organizaciones asturianistes. Ente la veintena d'organizaciones atopábense Andecha Astur, PCPE-Asturies, Corriente Sindical d'Izquierda (CSI), Coleutivu de Mocedaes Comunistes (CMC), Darréu, Cordinadora Antifacista d'Asturies, Partíu Carlista d'Asturies y asociaciones xuveniles y culturales como N'AST, El Roblón, Bilortu, Atenéu Cultural Xuan María Acebal, Riscar Roxu, Ensame Sidreru, Remanecer, L'Ayalga, o la Fundación Asturies XXI y la Fundación Obrera d'Investigación y Cultura.

Cola frase “S.O.S. Asturies” comu cabeceru, l’oxetivu de la movilización taba’n que sirviera de base pal entendimientu ente les mesmes, dexando a un llau diferencies programátiques, pa tirar toos na mesma direición a favor de “los drechos personales y colectivos del Pueblu Asturianu”, según dicíen nel so comunicáu de prensa. La idea ye mui buena… la llástima ye que quede solo n’eso.

L’asturianismu, na so vertiente polítca y social, tien un mal de fondu: la individualidá –por nun falar de la envidia y el cainismu-. Dempués de más de 30 años de democracia n’España, nunca nun foi capaz d’algamar nuna sola corriente l’atención nin l’interés de la sociedá necesarios pa que triunfaren idees comunes a toos los asturianistes, comu ye’l casu l’oficialidá del idioma asturianu. El tirar ca ún pa un lláu en temes menores, el ver quién ye’l que glaya más alto, el que fae la pintada más llamativa, el que convoca al mayor númberu de persones… fizo que les organizaciones asturianistes, lloñe de llegar a un puntu intermediu de comprensión mutua, se llanzaren a una carrera de competitividá que ca día se fae más manifiesta y que fraya más la torga de los oxetivos comunes, dando, amás, una mala imaxen pa la xente axeno a esti contestu, que ve con despreciu y temor al movimiento y inclinase a postures españolistes, úniques que se-y muestren coherentes col so mensaxe. Ye lo que yo llamo “taibización”.

Paco Ignacio Taibo II ye un mexicanu qu’organizó’n Xixón una feria llamada “Semana Negra” y que, al rodiu de la lliteratura policiaca, concentra un ensin fin d’actividaes culturales, lúdiques, gastronómiques y crematístiques que poco o ná tienen que ver ente elles, pero que se presenten comu una sola. Con voces siempre a la contra, esta feria cuenta yá con más de venti ediciones y les que siguirán, porque la mayoría del pueblu xixonés yá la toma comu la so única y llexítima fiesta braniega, sintiendo les fiestes de Begoña como daqué pasao, quedando nos fueos y los conciertos y poco más. Fuera de Xixón, y d’Asturies, la “Semana Negra” tamién tien repercusión, pero atópase comu una fiesta cultural más, que-y da nome a Xixón en xunetu nos telediarios, anque’l so conteníu seya desconocíu en parte. A mou de l’Al-Andalus de taifas, onde los cristianos víen al moru fuerte, ensin atalantar que cada reinu pensaba solo en lo de so.

Al asturianismu pasa-y lo mesmo: ye una amalgama d’organizaciones, con fines diferenciaos anque con puntos en común y el desconocimientu dende fuera ye más bien total, venciendo’l prexuiciu a l’oxetividá. Que les organizaciones asturianistes remaren na mesma direición, fadría poco a poco salir al movimientu d’esti procesu “taibizador”.

Ensin embargu, la semeya qu’encabeza el testu fala de por sí: la idea de xunir al asturianismu cáise al suelu fecha cachinos cuando se peguen carteles anunciadores del eventu nos cristales de la sede d’un partíu políticu asturianista que nun quiso, na so llibertá, firmar el manifiestu nin concurrir a la manifestación, por considerar que’l día 8 de setiembre nun ye’l día de la Nación Asturiana, sinón una impostura del Gobiernu del Principáu.

El problema ye que la semeya tomóse díes enantes de la movilización. Asina que la idea de xunir al asturianismu social y políticu frente unos oxetivos comunes diba ñacer yá muerta. Asina, nun se convence a naide. Otra oportunidá desaprovechada.

ACTUALIZACIÓN: Pa rematar l'esperpentu de la situación nomada equí, la agrupación política UNIDÁ, dueña del local onde foron pegaos los cartelones, denunció el manifestamientu "S.O.S. Asturies" ante les autoridaes diciendo que podía provocar disturbios nel so trescursu. La Delegación del Gobiernu desestimóla, pero quedó a les clares la división dientro del asturianismu políticu.