L'ochu de setiembre.

Güei yá, martes 8 de setiembre, ye’l día de la Virxen de Covadonga, fiesta patronal d’Asturies. Dende fai 25 años, ye la fiesta oficial de la comunidá autónoma, aprobao nel estatutu nesti afán laicizante del gobiernu socialista d’entós y d’agora por quitá-y importancia a la relixón católica y, d’otra miente, nun intentu por sincretizar la cultura popular cola cultura oficialista. Dicho en plata, dempués del llabor de destruición pa cola cultura asturiana y les sos señes d’identidá –que queden nel pueblu llanu na vaga “asturianía” que se sacaren del bolsiellu traseru del pantalón de pana los progres de la inteligentzia que lleva dominando esti país dende la metá cabera’l Franquismu: sidra, fabada, gaita y Covadonga-, el xuntar la fiesta oficial cola Santina yera l’única forma de que tuviera éxitu. Ensin embargu, nun lu tuvo índa: anque cada vez más xente llama al día 8 de setiembre Día d’Asturies, la mayor parte de los asturianos celebren el Día de la Virxen de Covadonga.

Pero la mentira va espardiéndose. Hasta nos sectores que, en razón a lo que defienden, tendríen que tar más atentos a les sos propies reivindicaciones d’identidá cultural. Baxo’l nome “S.O.S. Asturies”, un ensame d’organizaciones de calter asturianista va facer una marcha pela capital, aprovechando’l “Dia de la Nación Asturiana” pa ello. El poder establecíu contra’l que lluchen vuelve a salir vencedor con esti plantegamientu, ya que-y dan cobertoria a la laicización oficial d’una fiesta relixosa, pero ensin connotación política o histórica que permita xustificar el nome de Día d’Asturies y, muncho menos, de la nación asturiana.

Ye cierto que se pue dicir que’l Día de Covadonga conmemora'l fechu milagrosu de la intermediación de la Virxen na batalla de Cuadonga del añu 714, onde Pelayo venció a los moros nos Picos d’Europa. El problema ñaz cuando, tras pasar por alto que fue un fechu míticu y que nun pasó d’escaramuza, estudiamos que nin Pelayo yera asturianu nin la población astur-romana tuvo na que ver col mesmu, ya que’l dux taba apoyáu polos nobles cántabros de la zona. Nun resto importancia al puntu xerminador de la Monarquía asturiana, pero estrémola muncho del pueblu asturianu, salvando la devoción, que ye lo que se habría celebrar nesti día.

Ensin embargo, hai una fecha, escaecía de forma escandalosa polos diferentes Gobiernos y Parlamentos asturianos de la democracia, que fundamentada en fechos históricos, sociales y culturales fala del valor y de la disposición pola so llibertá ya independencia del pueblu asturianu: el 25 de mayu. Esti día de 1808, tres díes dempués de que’l Conceyu de Xixón fuera’l primer ayuntamientu d’España en declarar de facto la guerra a Napoleón, celebróse la primer Xunta constituyente del Principáu d’Asturies con miembros de diferentes comunidades de la xeografía asturiana cola fin d’organizar un exércitu regular asturianu que, formáu por voluntarios nos batallones de Gozón y Carreño, alcanzaron la victoria na batalla de Bailén, primer derrota d’un exércitu napoleónicu en campu abiertu. Dízse que la valentía de los soldaos asturianos puso en fuga a una compañía de Dragones, les fuercies d’elite del exércitu republicanu, y, nel so correr, dexaron los tambores de guerra qu’atronaben cuando la batalla: ye esta la desplicación de por qué los tambores tradicionales asturianos presenten los colores de la bandera francesa.

Pero, lloñe del refalfiu militarísticu, del fervor patrioteru que se pue golfatiar, foron más determinantes les repercusiones polítiques y sociales: nesa primer Xunta aprobóse una regulación provisional a les primeres lleis establecíes pol gobiernu monárquicu francés tres la traición borbónica al pueblu español y miembros d’esta Xunta, ellexíos d’entre los representates de los diferentes conceyos, acudieron en 1812 a Cádiz a firmar la primer Constitución lliberal Española. Anque, ensin dubia, el datu más importante ye que, durante cuatro años, Asturies tuvo gobernándose a sí mesma de manera autónoma con unes polítiques lliberales que consiguieron salvar un períodu de guerra con crecimientu de población, formando un exércitu, reformando’l sistema de midíes y pesos a unu común a tou’l territorio y acuñando moneda propia.

A parte del analfabetismo históricu que presenten los asturianos d’infantería y al más que discutible cuestionamientu nacionalista d’esta fecha, qu’atufó y atufa a los partíos españolistes que lleven años gobernando Asturies, l’escaezu d’esti día marcáu nos llibros d’Hestoria llega’l puntu de que pase desapercibíu, ensin más cellebración qu’una minoritaria fiesta: el Día de les LLetres Asturianes.

Yo, güei, celebraré’l Día de la Santina. Y siguiré cantando la canción de Mecano propia del día anterior, comu llevo faciendo too’l día.