Isinbáyeva, principiega.

Dempués de varios años sintiéndose el so nome comu candidata p’algamar el Premiu Príncipe d’Asturies de los Deportes, la rusa Yelena Isinbáyeva foi galardonada al fin esti añu. Y, pa munchos, tratóse d’una auténtica sorpresa.

Acostumaos a nun parar de oyír falar de Cristianos Ronaldos, Messis, Raúles y Kakás, qu’abarquen los minutos dedicaos al tiempo deportivu nes notices televisives y radiofóniques y páxines enteres y a tou color nos diarios, pasen de puntines poles nueses retines y tímpanos los braeros campiones que faen de les competencies el so sentíu de vivir.

Asina, esti branu pude disfrutar del campionatu más prestosu que me puean ufiertar –quitando, quiciás, los grandes premios de la Fórmula 1-: el Campionatu del Mundu d’Atletismu, allugáu’n Berlín. N’esta cita, celebrada cada dos años, danse llugar les competencies más diverses que se puean alcontrar, siendo los atletas de físicos tan variaos como les sos especialidaes. Nun ye raro alcontrar a una mole de casi 100 kilos nomada Valerie Vili facese con una medalla d’oru y, faciendo lo mesmo, ganar, a un saquín de güesos que respuende al nome de Linet Chepkwemoi Masai. Claro tá: una en llanzamientu de pesu y otra nos 10.000 metros. (Tamién tá el casu de la samoano-americana Savannah Sanitoa que, nun pudiendo inscribise nel llanzamientu de pesu, atrevióse a participar nos 100 metros, con 95 kilos d’atracción gravitatoria.)

De toa mena, nun pasaron desapercibíos estos campionatos en los medios de comunicación españoles, gracies a la portentosa figura del xamaicanu Ussain Bolt –que´l sábado tuvo nel Santigo Bernábeu faciendo’l saque d’honor-. El fenómenu mediáticu ganó tres medalles d’oru y batió dos récores mundiales nes sos especialidaes: 100 y 200 metros. Tamién foi sonada la, pa mín, inxusta descalificación de l’atleta española Natalia Rodríguez nos 1.500 metros, acusada d’empuxar a la barrullera etiope Burka.

Pero la nuesa protagonista de güei, Yelena Isinbáyeba, tamién participó, nel concursu de saltu con pértiga. Saltó tres veces y falló-y la garrocha, quedando descalificada por tres nulos. Les llárimes de la rusa dieron la voltia’l mundu. Y non como imáxenes d’esfuerciu deportivu o d’ilusiones rotes, como pasa n’otres ocasiones. Sinón porque yeren les llárimes de la, sin dubia, meyor atleta femenina de tolos tiempos.

Nun ye falar por falar. Los datos yá dicen bastante: actual campiona olímpica’n Pekín, tras repetir l’oru d’Atenes; dos veces campiona del Mundu (Helsinki y Osaka); una, d’Europa; y cuatro títulos Indoor ente mundiales ya europeos. Pero, amás, batió la plusmarca mundial en cubierto 12 vegaes y n’aire llibre, 15. La última, nel mitín de Zúrich disputáu’l 28 d’agostu, una selmana dempués de fracasar nel concursu mundial.

La meyor deportista femenina del 2007 y 2009, cuando consiguió el Premiu Laureus, y la meyor atleta elexía pola I.A.A.F. nos años 2004, 2005 y 2008, yá tien el premiu principegu. Y muncha xente verá la so cara por primer vez cuando’l principín y dea’l diploma.