La tarde desti sábadu cuandu escribo, punxeron una película en Cuatro: Midnigth Run, que fuera traducida al español comu Huída a Medianoche. La trama d'esti filme de 1988 ye simplona: un cazarecompenses tien que llevar a un administrador, qu'estafó a la mafia y tá buscáu pol F.B.I., dende Nueva York a Los Ánxeles. El protagonista ye Robert de Niro, que va acompañáu por James Grodin.
En diez minutos pueden vese les artimañes de les que son capaces los guionistes norteamericanos pa enganchate al filme, faciendo que'l mocín de la película se convierta n'un castrón con pintes, pero simpáticu, capaz de montar un tirotéu en medio la cai, pegái una paliza a un negru, abusar del tráficu d'influencies, robá-y la identificación a un deteutive del F.B.I. y falsificala pa ponese elli, d'espiar les llamades telefóniques que ficieren falta y de forciar una puerta p'allanar una morada (anque la casa yera d'otru color).
Anguaño, bien se pudiere ver una película d'estrenu con similar argumentu y guión. Ensin embargu, venti años más tarde, nun taríen permitíes ciertes llicencies que se tomaron nel so momentu y que, n'esos diez primeros minutos de película, tamién se pudieron ver. Porque, ¿a quién se-y puede ocurrir que los detectives federales fueren ensin enganchar el cinturón de seguridá? ¿En qué vuelu van permití-y a un pasaxeru que se ponga a recortar una foto, anque seya pa falsificar un carné na más y por más que les tisores seyan de prescolar? ¿Qué guardia urbanu nun multaría a un conductor xintando un bocadiyu al volante? Y, sobre toes les coses, ¿cómu va dir el protagonista d'una película fumando ca dos fotogrames, nuna escena, incluso, na entrada d'un edificiu públicu?
Los años foron pasando y esta película tá desfasada. Más-y hubiere valido a Cuatro haber puesto un debate sobre'l escote de Soraya enantes qu'estes coses de mal gustu.
No hay comentarios:
Publicar un comentario