El colapsu.

Esti añu casi nun puen llegar los Reis Magos a España. Un temporalón de ñeve, xelu y frío asoló tola xeografía peninsular, faciéndonos tiritar en toles llingües del territoriu, yá fueren oficiales o non. Dalgún, inclusive, tembló n'arameo cuando se llevantó de nueche al serviciu y s'encontró cola rasca nel pasiellu casa.
Pero lo más grave de too foi, ensin dubia y polo que se pudo ver nos noticieros de toles televisiones -qu'abríen l'informativu con intrépidos reporteros fechos de carámbanos de carne xelao-, el tremendu colapsu na capital del Reinu. La Castellana taba fecha una pista de hóquei, los taxistes tuvieron a puntu de facer un equipu de bosleig comu'l de Xamaica y cuenten que, nel aeropuertu de Barajas, viéronse a dos esquimales faciendo un furacu n'a T4. La cosa foi bastente seria y los políticos de turno -véase María Teresa, Esperanza y Gallardón- punxiéronse firmes como calipos y echáronse les culpes unos a otros, como bien siendo normal, de que ñevara más de la cuenta. El casu ye que Madrid -o, lo que vien siendo lo mesmo, España entera- quedó incomunicada col esterior. Y si llegaron los Reis Magos foi única y exclusivamente porque ñevó más tarde de la so venida.
Fáime gracia que daqué paecido pasó n'Asturies enantes de la Navidá Navidá. Ñevó tanto que tuvieron que cerrar los cuatro puertos de montaña que-mos unen a la Meseta que-mos da la vida. Fizo un vientu tal que les oles del Cantábricu nun dexaron barcu sanu. Y, tras varios argayos nel Oriente, solo podíemos salir del terruñu por Ribadeo. Foi simpático hasta que la mi hermana llegó del supermercáu con dos barres de pan y ensin lleche, porque yá nun quedaba. Llega a durar la situación un par de díes más y comémos-mos unos a otros, comu en Viven. Pero del tema, dengún políticu se quexó. Total, qué más-yos da que quedasen aislaos los asturianos si, cuando nun lo tán, tampoco nun dicen ná. Asina, siendo bueninos, tenemos aseguraos la llegada de los Reis en xineru y de los Príncipes n'ochobre. Eso sí, mientres nun ñeve'n Madrid.