Les campanines

Nun son munches les veces qu’un documentu me fai aclariar dalguna cosa qu’enantes nun me cuadraba. Pero, cuando me pasa, siéntome satisfechu, como si alcanzara’l conocimientu braeru d’unidá colo supremo. Ye’l mi “om” particular.

Hai un añu pasóme cola desplicación del Big Bang fecha nel programa Redes, onde se falaba de la teoría de los múltiples universos y se desplicaba esti actu primeru de la cosmoxénesis a traviés de la termodinámica. Quedóme clara la idega de que, siguiendo eses teoríes, de la nada puen surdir materia y antimateria a partes iguales, siempre que’l resultáu de la suma de les partes seya cero. Sonóme la campanina y dexé d’entrugame daquello de “y, enantes del principiu, ¿qué había?”.

Esta selmana golví a sintir la campanina cuando apeacieron un par de pieces d’un puzzle que tenía incompletu dende que estudiara la carrera. Y ye que nunca nun me cuadraron les tesis oficiales que consideraben Asturies una provincia más de los diferentes reinos medievales. Nun cuadraba que, siendo asina, estes dómines tuvieren plaguaes de señores feudales llevantiscos pa coles Corones que los sofitaben nel so puestu, como Alfonso Enríquez, conde de Noreña, que se sublevara al so hermanu tres vegaes, siendo’l caberu enfrentamientu l’orixe del Principáu. Tamién m’estrañaba a modu’l caltenimientu del sistema feudal asturianu, tan estremáu del vasalláticu sistema lleonés y castellanu. Y, sobre too, nun sabía onde quedara’l títulu de Reinu d’Asturies, que dengún rei de LLeón o de Castiella, salvo dos exceiciones, usara na so nómina de títulos, como facíen col restu de les sos posesiones.

Cayó nes mios manes el númberu 102 de “LLetres Asturianes”, espublizaes pola Academia de la LLingua Asturiana y, nuno de los sos trabayos d’investigación, el xurista Xurde Blanco firmaba “L’analís del drechu políticu nel Fueru Xulgu afita una tapecida tesis dela Ilustración asturiana: la de la independencia política d’Asturies na Edá Media”. Trátase d’una refundición d’un artículu espublizáu pol Aconceyamientu de Xuristes pol Asturianu na so páxina web nel añu 2007. Mui valiente, porque tira a la contra del estamentu intelectual oficial d’una forma tayante, va desplicando l’interés xurídicu del Fueru Xulgu, desaniciando con argumentos firmes y razonables prexuicios que sobre esti documentu s’establecen como válidos anguaño y desendolcando una teoría coherente sobre’l escaeciu Primero Títolo, que-y otorga validez total a les idees que sofitaben la hipotesis del orixe de la Xunta Xeneral del Principáu del ilustre Xosé Caveda y Nava. Esti trabayu respuende a les mios entrugues por completo.

Prestaríame asgaya tener la capacidá de síntesis que me permitiera resumir el testu de Blanco cola fin de desplicar estes rempuestes qu’algamé, pero nun la tengo. Toi seguru que fadré referencia a esti artículu más alantre, n’otres entraes, porque toi entusiasmáu con elli. Dexo equí l’enllaz p’hacia l'artículu espublizáu pol AXA.

Ensin embargu, soi consciente de que vivo n’Asturies y la realidá nun va ser mui buena pa esti artículu. Xurde Blanco ye académicu de la llingua ya destacáu activista pola oficialidá y la normalización social del idioma asturianu. Eso, págase y toi seguru que l’estudiu d’esti xurista va ser desaniciáu pola intelligentzia que rixe’l correutu buen pensar de los asturianos, como antaño lo foi’l de Caveda. Y pa exemplu de como los prexuicios contra l’asturianu y los sos defensores, valme el mesmu personaxe.

Foi protagonista l’últimu mes d’una polémica xudicial: el Tribunal Constitucional revocaba la decisión d'un tribunal contenciosu-alministrativu onde falaba de la inconstitucionalidá de varios artículos de la LLei de Promoción y Usu del Asturianu del añu 1998, dándo-y la razón a Xurde Blanco que denunciare a la Conceyería de Xusticia d’Asturies por nun-y dar validez a una petición d'un permisu llaboral por solicitalu n'asturianu. Resolvía'l TC , por 9 votos a 1, que tolos asturianos tienen el drechu d’usar esta llingua pa dirixise a les instituciones autonómiques asturianes y que la llei en dengún puntu contraría la Constitución Española.

L'autu foi mui cellebráu poles persones que defienden la igualdá en drechos de tolos asturianos. Ensin embargo, duró poco la gayola. El xuez, Miguel Ángel Carbajo Domingo, acoyéndose al votu independiente, golvió a refugar el so recursu, al considerar que los funcionarios nun tienen el drechu confirmáu pol anterior autu del tribunal superior, valorando que'l lletráu paez que fai eso a mala fe, col enfotu d'entorpecer el bon funcionamientu de l'Alministración, perversa actitú que había ser correspondida con una correición disciplinaria.

Ta claro que, nun nuevu recursu al TC, Xurde Blanco recibirá de nuevo la razón, porque si tolos ciudadanos asturianos tienen esi drechu, los funcionarios asturianos nun van dexar de tenelu por selo.

Pero nun dexa de ser curioso como una vulneración tal de los drechos del home nun Estáu de drechu como ye España, pasa tan desapercibida.

Tal vez, dalgún día atope un documentu que seya capaz de desplicame por qué les idegues d’unes persones con intereses concretos y egoístes recueyen más atención que les d’otros que busquen la igualdá en drechos pa toos. De toes formes, tengo la esperanza de que la xente que sofita, activa o pasivamente, esta mena d’apartheid llingüísticu, sientan la campanina que-yos faiga entender del dañu que faen colos sos prexuicios.