Nun pueo cola cadarma. Llevo unos cuantos díes, dende que cambió la hora a finales del mes de marzu, ensin ser yo mesmu, ensin alcontrar nin rastru de la vitalidá que me lleva a tar optimista énte tolos problemes que tengo y qu’enantes, n’iviernu, paecíenme pequeñucos, insignificantes, y anguaño son enormes cotes d’alta montaña y de categoría especial.
La primavera fráyame los güesos y los sos trocinos pésenme’l doble de lo normal. Cuéstame abondo’l dormir pela nueche, anque les hores ensin lluz déxenme respirar muncho meyor que les illuminaes diurnes, que m’obliguen a esquivar el sol que me fai estornudar ensin dame fuelgu, teniendo que dir pela cai como un comandu de la guerra de Vietnam, ente les solombres proxeutaes polos edificios, y evitar asina esos rayos que me quemen la piel al mínimu roce. Una fuente dame la vida, desfechu en sudu como llego a elles, reventáu del cansanciu que me produz dar diez pasos siguíos al sol.
La cama nun me val nin pa reposar y trés hores echáu n’ella déxame’l llombu esfarrapiáu pa tol día, ensin poder doblar la cintura nin el cuellu, quedándome’l cuerpu ríxidu como’l de C3PO, el androide doráu de “
Meto fruta, agua bien d’ello, rebaxo’l chocolate y los colacaos, nun como ente hores y a les hores cuéstame un mundu xintar un chuletón... Y ye que nun alcuentro alimentu que me dé les enerxies necesaries.
Nin les rapaces me dicen ná. Agora que’l calor fai allixerar de ropa a la xente, yo subo de les pienres qu’enantes me llamaben tanto l’atención a los cuellos. Toi empezando a tener fixación pseudo-fetichista polos gargüelos.
La médica dizme que ye “astenia primaveral”, pero yo tengo miéu tar convirtiéndome en vampiru.
Tú lo que necesitas es tomar jalea real!!!
ResponderEliminarElena Luna Salinas