Ensin anuncios.

Yá tamos en tiempos navideños. El soniquete de los escolinos de San Ildefonso dio’l pistoletazu de salida a estes feches enllenes de tradiciones, dalgunes ensin sustancia, otres relixoses, les más, pa’l mío pensar, prestoses. El mensaxe’l rei, les fartures de los díes señalaos y les refartures de los díes siguientes, el conciertu Raphael, la misa’l gallu, les campanaes, el conciertu d’Añu Nuevu y los saltos d’esquí, la cabalgata, el bollu y los regalos… y esti, por última vez, el misteriu de saber cuál ye l’últimu anunciu del añu en TVE.

La petición de los canales televisivos privaos qu’emiten n’abiertu n’España de que la radio-televisión pública dexara d’emitir espacios publicitarios y pasara a financiase esclusivamente colos caudales públicos yá foi escuchada dende fai dalgunos años, con iniciatives disfrazaes de axustes presupuestarios, como la tan emprobeceora política de rescisión de contratos a profesionales mayores de 55 años, que nos desanició a todos de las voces y los comentarios de braeros mayestros del mediu como José Ángel de la Casa, Luis Miguel López o Antonio Gasset Bubois, ente otros.

Nestes s’alcontraba l’antiguu direutor del ente públicu Luis Fernández cuando, al presentar el borrador presupuestariu de la entidad al Gobiernu esti chistó de forma negativa la boca. La conversación tuvo de ser daqué asina:

“-Los dineros.

-Uy. Esti añu nun hai pa tanto, ¿eh?

-Yá, yá sé que tamos en crisis. Pero tán muy axustados, los más baxos dende fae años. Abrí-ylos polo menos.

-Nun se trata de la crisis.

-¿Entós?

-Que te quito la publi, ¡ea!

-Pues nun llega.

-Pues pagámoste pa que llegue.

-Pues marcho.

-Pues slitz bay.”

Y el 11 payares llegó un señor mui mayor, pero cola cabeza mui bien puesta y con esperiencia política y na alministración como pa emular a Krusty’l payasu y facese’l mesmu una cadena de televisión 24 hores con una cámara, una batería de coche y un escorpión del desiertu de Mohave o, nel su defeuto, por si se va de presupuestu, con ún de plásticu. Nómase Alberto Oliart Saussol y foi ministru de Sanidá, d’Industria y Enerxía y de Defensa cola UCD y con 81 años, aceutó’l retu. En mes y mediu sacóse del gorru unos presupuestos inesperaos, que presentó ayer, día 21, ante la comisión mista de control de la corporación pública, y que considera xustos pa producir una televisión de calidá –anque pedía una partida de más pa poner en marcha una televisión pública n’alta definición-.

Un mes y diez díes y este home camudó’l panorama televisivu: el “nun llega” conviertióse nun “ye más que suficiente”. Tá claro que Oliart sabe facer el so trabayu. Porque esto nun ye otro que facer que les perres lleguen. Lo de menos ye que TVE mantenga su liderazgu, atopáu otra vuelta después de cinco años de primacía de Telecinco.

Pero ye que, ehí va la paradoxa, volvió a tirar del gorru y estos díes podemos ver una campaña publicitaria pa defender les virtudes de la televisión pública essin publicidad. “Hai escenes que merecen ser vistes de principiu a fin. A partir del 1 de xineru, la to televisión ensin cortes publicitarios. Porque dalguien lo quier asina. TÚ. TVE”. A mín atrápame la idega, la verdá. Yá fai años Canal+ vendíase igual y convirtióse nuna cadena magnífica, con unos conteníos culturales y d’entretenimientu n’abiertu sensacionales.

Espero que nun quede too en cubrir el tiempu sobrante con cuñes d’autopromoción o allargando los espacios informativos hasta lo que se pueda.

Yo nun soi públicu de La Primera, aunque sí dalgo más de La 2. Pero nun m’importaría volver. Mientres, toi deseando ver cuál ye l’últimu anunciu de TVE.