1100

Esti añu 2010 que tá al llegar, cúmplese un aniversariu especial: fai 1100 años que se creya’l Reinu de LLeón.

A la muerte del rei d’Asturies Alfonso III el Magnu, el territorio del so reinu dixébrase ente los sos tres fíos: Fruela II, el más pequeñu, queda como rei del terruñu; Ordoño II, fáise col territoriu gallegu; y el mayor, García recibe la mayor parte los dominios del pá, LLeón, Castiella y Álava, fundando dafechu el Reinu de LLeón.

Cola muerte de García, Ordoño ye nombráu rei en LLeón en 914, polo que Galicia y LLeón compartirán monarca. Esti fechu ye importante porque, por primer vegada, un rei de la dinastía asturiana entronízase fora d’Asturies. Ensin embargu, la xunión de tolos antiguos territorios del Asturorum Regnum cola capitalidá na ciudá del Torío y el Bernesga nun se produz hasta’l 924, cuando Fruela II incorpora la so herencia al subir al tronu (anque yá enantes sofitó al so hermanu García n’esti empeñu).

Los primeros reis d’esti nuevu reinu, ensin embargu, usen una fórmula distinta a la hora de firmar los documentos, que fala bien a les clares de cómo se compón esti nuevu estáu: rex in legionis, “Rei en LLeón”. Ye dicir, el rei de LLeón, Galicia y Asturies, señor d’Álava y Castiella, tien la capitalidá na antigua Regio VII Gemina reamurallada pol rei Magnu, pero considera diferentes les realidaes de los distintos territorios de la so soberanía, anque’l principal seya’l so dominiu lleonés, polo que, al nun esistir igualad, nun se pue falar de “Corona”. (Asturies nun perderá la dignidá de reinu hasta’l sieglu XIV coles revueltes d’Alfonso Enríquez y la rebaxa a Principáu; Galicia, pela so parte, llegará a ser reinu independiente en bona parte la Edá Media) Más adelante, cambiaríen les fórmules, les dinastíes y los territorios. Pero’l Reinu de LLeón índa se mantién güei, siendo ún de los títulos del Rei d’España y mostrándose nel escudu del Estáu, nel segundu cuartel, los sos símbolos: el lleón púrpura armáu y llinguáu, sobre plata (anque, coses de la téunica, anguaño seya d’un color tan impropiu a la Heráldica como’l rosa).

Varies plataformes lleonesistes, que puxen pola reconocencia de l’autonomía del territoriu lleonés actual, ye dicir, la rexón de LLeón establecida nel repartu provincial del añu 1833, onde s’alcuentren les provincies de LLeón, Zamora y Salamanca, quieren facer d’esti añu de cellebración una atalaya dende onde avisar al mundu de la so situación de discriminación dientro de la comunidá autónoma que los retién anguaño, Castiya y LLeón. Cola capitalidá en Valladolid, LLeón tá viendo cómo’l procesu despoblador tá axigantándose esponencialmente, nun solo na zona rural, cómo’l desarrollu económicu va aposentase na fastera casteyana de la comunidá, subsidiáu pol Gobiernu y la Xunta y, lo peor, cómo la so herencia histórica y cultural va pereciendo al empar que s’imponen términos pa definilos como “casteyanu-lleonés” o, índa más fuerte, “casteyanu” a seques.

Esti procesu d’aculturación nun ye nuevu, claro tá. Pero dende que LLeón tá dientro d’esti ente autonómicu, la situación tá acelerándose. Enantes, al menos, yeren lleoneses, ensin más, y a nadie se-y ocurriere inxamás dici-y a un salmatinu que yera de Castiella.

Nada-y ficiera tantu dañu a la dignidá histórica y cultural d’esti territoriu dende’l Cid, esi saltiador de caleyes casteyanu que tuvo tan bona prensa y que hubo marchar desterráu del so país, el prubitín, por intentar facer un par de güelpes d’Estáu. El Cantar de mío Çid da bona cuenta de lo malos que yeren los lleoneses, que zarraben les sos ciudaes a les tropes llibertaores de Castiella y que traicionaben l’honor y la honra de la familia de so, embaxo la funesta figura de los Infantes de Carrión. Pero los lleoneses, siguíen siendo lleoneses.

Nesta zuna que tengo yo dende va dalgunos años por sofitar les causes de los pueblos que quieren elixir el futuru de so como a ellos-yos pete, súmome de corazón a esta cellebración del 1100 aniversariu del Reinu de LLeón. Nun seya que, dientro d’unos años, cambién el lleón del escudu y pongan a Hello Kitty.