Esti mes de xunu pasáu, prodúxose una noticia que pasó casi de puntiyes pelos diarios y les televisiones mundiales: la revuelta uigur.
Los uigures son un pueblu musulmán ya altáicu, ye dicir, de los que s’espardieron a les órdenes del Gran Khan poles estepes d’Asia, llegando dende Seúl hasta Estambul nel más extensu imperiu de la Hestoria la Humanidá. Munchos son los pueblos que, entroncaos pola fala de raigón altáicu, tienen anguaño Estáu propiu: turcos, azerís, cosacos, uzbecos, tayicos, turcomenos o mongoles, gocen del estatus del reconocimiento internacional a la so independencia. Otros munchos, formen minoríes étniques importantes ente los Estaos independientes de los sos hermanos. Y unos cuantos, queden repartíos dientro de les repúbliques de la Federación Rusa o de les rexones de la República Popular de China. Los uigures alcuentrénse dientro de la Rexón Autónoma Uigur de Xiajian, nome xinu oficial del hestóricu Turquestán Oriental.
La chispa foi un malentendíu nuna fábrica de la ciudá xina de Xinhua: una trabayadora de la etnia han -la mayoritaria del país con un 91% de la población- entró confundida na habitación de dos trabayadores uigures. Asustada, salió glayando y los compañeros, pensando que aquellos quisieren forzala sexualmente, los lincharon. Quiciás la reacción fuere de los compañeros la mesma si los dueños de la habitación foren han, por nun ser mal pensáu.
Pero la gasolina onde cayó la chispa llevaba munchu tiempo acumulándose pa que se pudiere evitar l’españíu: les condiciones llaborales de los uigures son peores que les de los han ante igualdá de responsabilidades, amás de tener preferencia la contratación d’un han antes qu’un uigur. Por otra parte, el so pesu políticu dientro de la República Popular vióse reducíu pola masiva emigración de han nos últimos 60 años, pasando esta población d’un 6% a un 40%, asina que los sos representantes, enantes casi toos uigures, reduxéronse hasta la metá. Por último, tolos intentos de facer que la voz del pueblu uigur se sientan, tanto dientro comu fuera’l país, vénse frayaos pol control férreu del Gobiernu xinu que abusa de les lleis de traición a la soberanía popular –comu ye’l casu de la líder uigur Rebiya Kadeer, que vive nos Estaos Xuníos- o del simple control policial-militar.
Asina, los uigures decidieron salir a les cais de Urumqi –capital de la rexón- en protesta por too. Anque pacifiques, una masa de han de la llocalidá –que sumen un 75% de los más de dos millones y mediu- respondió con violencia, asaltando el barriu de la comunidá uigur –el 12’8%-. El resultáu fueron cerca de 200 muertos y la intervención del Exércitu Popular de LLiberación, que cercó’l barriu y incomunicó a la población uigur col exterior, según diz el Gobiernu, pa la so preoteición, mientres se producen les investigaciones pertinentes pa condengar a los culpables del asaltu.
Ensin embargu, y anque les propies autoridades xines punxeron de manifiestu que foi’l peor enfrentamientu dende los asocedíos de la Plaza de Tian’anmen de 1989, el Presidente de la República, Hu Jintao, culpó públicamente a la minoría uigur de los altercaos.
China ye’l principal mercáu n’expansión del mundo, comu quedó claro na reunión del G8 a onde foi invitada d’exceipción. Nun creo que dengún país occidental quiera ver peligrar les sos inversiones y mirarán pa otru llau. Si lo faen col Tíbet y l‘archiconocíu Dalai Lama, ¿qué nun farán col Turquestán Oriental?
La respuesta ye perclara: lo que se tá faciendo. Ná.
No hay comentarios:
Publicar un comentario