Teatru nacional asturianu

Cayó nes mios manes l'artículu ¿Un teatru nacional asturianu? de Lluis Antón González, espublizáu na revista "La ratonera" de setiembre del 2002, qu'alderica sobre'l teatru nacional asturianu. Fai un recorríu pola hestoria del teatru n'asturianu dende Marirreguera, poles idegues de profesionalización del gran Pedro Granda,-actor llangreanu del sieglu XIX-, pol intentu del pincipiu del XX, pol Surdimientu de los 70 y pol rescate del monólogu asturianu d'anguaño. Siendo ñegativu al respeutu, acaba apuntando una serie de condiciones pa la creyación del mesmu.

Llega a les míos manes nuna selmana onde tamién llegaron les conclusiones d'un alderique sobre la tema (específicamente, trataba del monólogu), que vienen coincidir na necesidá de cumplir eses mesmes condiciones. En resumen, pues dalgunes idegues densendólquense en varios puntos, González fala de la necesidá d'un mayor apoyu instititucional, sofitu d'una escuela (supongo que teatral) asturiana averada a la realidá cultural del pueblu y a les nueves téuniques y tendencies creatives, mayor interrelación entre grupos y compañíes, usu del asturianu en toles estayes, profesionales que vinculen el ser asturianu col universal y que nun tengan les mires na emigración y, en definitiva, un teatru asturianu que gane l'apoyu'l públicu.

Entiendo que yeren solo unos apuntes, porque'l testu ye mui reduccionista respeuto a los problemas que sufre'l teatru n'Asturies, nun solo l'asturianu. Nin denuncia los prexuicios esistentes nesti mundillu (incluso los recalca, al desmarcar a les clares la idega de teatru asturianu contra'l costumista y nin siquiera citar la Compañía Asturiana de Comedias, anque lu reconoza como primer intentu de creyación de teatru nacional, al nomar autores y actores de la mesma al falar del intentu de Melás, Pría y Verde, ente otros). Nin ye realista coles condiciones sociales de la xente involucrada col teatru n'Asturies al pidir compromisos ensin cimentalos con idegues válides que solucionen los problemes (por exemplu, los pocos profesionales viven d'ello, nun d'aire, como pa dexar pasar ufiertes).

Pero'l mayor erru vien de querer sofitar esti tipu de teatru nel apoyu institucional. La idega ye que los poderes públicos sovencionen la publicación de testos, grupos de teatru, escenarios, propuestes teatrales ya escéniques y creen escenarios onde representar. Esto, yá se bien faciendo, pero pídese una mayor implicación. Más perres, supongo. Paez que la xente nun s'acaba d'enterar qu'esti tipu de teatru, el sovencionáu, dexa de ser independiente, na midía en que recibe l'apoyu d'unos gobiernos que respuenden a unes inquietudes específiques que, llexitimaes nel númebru de votos, intenten reforciase coles perres de les sovenciones. N'otres pallabres: el políticu busca los réditos ellí onde puea y sofitará les sos idegues y les de los sos averaos, porque eso ye lo que quier la xente que lu escoyó. Pensar que n'Asturies d'anguaño, les instituciones van sofitar un teatru de reivindicación nacional asturiana ye, cuando menos, d'un buenismu ablucante.

Dende dientro, ensin perres, ensin escenarios y promotores privaos, ensin públicu averáu, ensin repercusión nos medios de comunicación, calteniendo prexuicios y ensin componentes comprometíos dafechu, un teatru nacional asturianu ye imposible.

Índa más complicada ye la visión dende fuera. N'Asturies, la cultura teatral ye mui probe, como la cultural xeneral, frutu de desaniciar unes raíces propies dende onde espardise pa comprender les demás. Nesti árbol esbarrumbáu, que s'empodrez, surde mofu de tou tipu ya orixe, que medra un poco, parásitu, ufiertando conteníu pero non sustentu, nin pa elli mesmu siquier. El fracasu de Laboral Escena fala d'ello. Y predigo'l del Centru Niemeyer porque carez de les mesmes circunstancies: el puxu cegaratu de les instituciones escoyíes pol pueblu cegáu. Amás, l'espectador de teatru tipu ye una paisana de más de 50 años de poder adquisitivu mediu que va, principalmente, a pasalo bien cola obra, nun a comese la cabeza. Falai de "nación asturiana" y pensará, na mayor parte les veces, que yes un infiltráu d'ETA.

La cuestión tien difícil solución. Pueo apuntar delles idegues (cooperatives de producción teatral, rebaxa del caché pa empresarios que favorezcan la creyación d'una rede de sales privaes ya independientes, búsqueda d'escenarios y propuestes situacionales alternatives, revisión de la idega "teatru costumista/teatru de baxa calidá"...) pero diben ser solo parches porque la xente del teatru nesti país (y ye mal de munchos, pal mío desconsuelu), sigue esperando que l'ayuda caiga del cielu, en forma sovención.

Logopitos y lletrines

Fai un mes, l'alcaldesa de Xixón inauguró un nuevu monumentu, donáu por Femetal, nos Xardines de la Reina. Trátase de la plasmación en metal del caberu logotipu del Ayuntamientu, que consiste nes lletres del nome de la ciudá, pero solo n'español.
Desdexando a un lláu los gustos estéticos y les severes faltes d'ortografía (los nomes propios escomiencen en casteyanu por consonante), prestaríame comentar dos coses al respeutu: la primera, la falta de criteriu del Ayunamientu de Xixón pa sofitar un diseñu únicu y perdurable como logotipu pa la ciudá; la segunda, clara ta, ye denunciar la desvergoña d'esti consistoriu pa colos falantes de llingua asturiana del conceyu, qu'índa queda puesta de manifiestu.

Logopitos
El nuevu logotipu, una cursiva en minúscules ensín más, ñaz d'un saleru, o seya, de l'anovadora idega de faer publicidá de la ciudá baxo la fórmula "Gijón, Asturias con sal" qu'enllenó de puntos de papel blancos, al paecer representaben cristales de sal, les aceres de les zones más turístiques de la villa los primeros meses del añu pasáu, hasta que les primeres lluvies los llevaron pa consigo al alcantariyáu, dexando retazos de saleros del mesmu material, repuestos una y otra vegada.
Paez qu'anunciar Xixón d'esta forma ye la más normal, porque yá se ficiera enantes. L'anterior logotipu volvía usar les cinco lletres, nuna ramplona arial blanca sobre fondo coloráu, tamién en minúscules, pero esta vegada, al llau o embaxu l'Elogio del Horizonte. La obra de Chillida venía de ser utilizada como símbolu la ciudá, nun procesu con dos oxetivos: primeru, ufiertar Xixón como una ciudá multicultural y, segundu, algamar ciñu pa'l váter de King-Kong. Del primeru, índa nun se sabe na, porque Xixón ta bien lloñe de dexar de ser una ciudá de provincies d'espalda a la so cultura y ensín capacidá de rempuesta social pa faer frente a la universialidá que-y urxe; el segundu consiguióse xusto cuando l'Ayuntamientu decidió desanicialu como símbolu, pa comprar un anagrama coles iniciales AG enxertaes.
Toos estos logopitos d'escasu recorríu, vienen emplegándose, col centenariu escudu de la ciudá que, con escases modificaciones ye: en plata, el rei Pelayo calteniendo la Cruz de la Victoria, timbráu con corona real española. Índa s'usa anguaño, coles lletres "Ayuntamiento de Gijón" al lláu, como si ficera falta, como si la Heráldica, esi arte de ller el simbolismu de les pieces y figures, nun fora suficiente pa falar elli mesmu de la ciudá.
Ta claro que'l dibuxante nun va vinir del sieglu XV o XVI a pidir perres pol trabayu y hai que da-yosles a los diseñadores de conceutos d'anguaño, una y otra vegada, nun chollu inacabable y poco bien desplicáu. Porque val que cada nuevu equipamientu de la ciudá heba tener un logo, pero camudalu cada poco, nun ye de razón. Tovía menos cuando'l tradicional sigue en vixencia.

Lletrines
Volvemos colos drechos de los ciudadanos de Xixón. Sí, el nome ye Xixón y yá ye oficial. Pue usase Gijón tamién, pero nos documentos oficiales han usase estes dos fórmules: Xixón o Xixón/Gijón. Pola mesma que se diz A Coruña, Donostia o LLeida, l'alministración ha poner Xixón tamién nos sos escritos, seya cual seya esa alministración. Foi decidío pol conceyu de Xixón en plenu.
Asina, resulta chocante que, cuando l'Ayuntamientu de Xixón se refier a la ciudá, nun lo faiga pol so nome, sinón por ún inventáu: Gijón. El nuevu monumentu de chapa urbana, asina lo fai (insisto, con faltes d'ortografía). El diariu La Voz de Asturias titulaba la noticia como "Gijón, con todas las letras", escaeciendo que faltaben dos xes, una i, una o tildada y una ene, pa dicir, nun ataque de fantasía y ramplonería léxica, "La escultura, como no podía ser de otra manera, ya ha sido bautizada de esa manera grandilocuente y orgullosa de los gijoneses: las letronas".
La tema'l nome (nun el rollu patateru de La Voz de Asturias) yera pa denunciar, si nun fuera pola xusticia poética, que ye la queda nesti país onde se pasen los drechos de la xente pol forro. El sitiu onde los non más de 300 xixoneses que votaron na páxina web elixieron allugalu, los Xardines de la Reina, ye pasu migracional de borrachos y fiesteros de les nueches de la fin de selmana xixoniega. Asina que "las letronas" bien se van convertir en "les lletrines", minxitorios onde divertise apuntando col chorrín.

Pallabres que lleva'l vientu
Onde les tos pallabres, xorrecía,
medraba al son les tos sonrises,
respiraba del to aliendu frescu
y pelos tos güeyos veía.
Llevábesme de la mano
siguiendo les buelgues nueses nel sable,
creyando nuevos caminos pa nos,
ufiertándome vides y suaños.
Surdíes nel horizonte, col Nordés,
na borrina qu'anuncia l'orbayu,
enllenabes de salitre'l mundiu
y, a facete sol y lluna. tornabes.
Tuvísteme sollerte pela anuncia
pero, al glayalu al aire,
volviste camudar el nome
y, otra vuelta, en na quedaste.

¡Prueba superada!

Escomenzó'l sábadu la intervención militar occidental na guerra de Libia. "Amanecer d'odisea" ye'l nome d'esta aición de les Naciones Xuníes escontra'l réximen de Gadafi, escusándose en crímines pa colos Drechos Humanos.

La guerra civil en Libia surde del espardimientu de los movimientos democratizantes del mundu islámicu, que triunfaron en Túnez y Exiptu y que tan siendo frenaos duramente n'otros como Bahrein o'l Yemen. Los opositores a Gadafi foron conquistando tarrén. El resultáu fue que Francia reconoció'l gobiernu rebelde y el preciu'l petróleu subió poles nubes. Pero, fai dos selmanes, el contraataque del coronel desarmó a los sos contrarios, a base de fuercia militar y perres procedentes del petróleu y el gas del so país. Y la ONU decidió intervenir.

La coalición militar, onde tamién s'alcuentra España, intervién sofitada por una resolución de les Naciones Xuníes pa creyar un espaciu d'esclusión aérea cola fin d'evitar que'l exércitu libiu ataque a la población civil. Niéguense les acusaciones de que los oxetivos seyan acabar col gobiernu de Gadafi o controlar la producción petrolífera.

Pero la cosa nun cuadra bien y la opinión pública ta roceana, porque se plantega entrugues que nun cuadren, dempués d'otres intervenciones similares: por qué Francia sofita'l gobiernu llevantiscu y arranca'l compromisu d'intervención de les Naciones Xuníes; por qué Rusia y China s'abstienen; por qué se permitió que la Libia de Gadafi presidiera la comisión de los Drechos Humanos na ONU; por qué nun s'intervino enantes, dempués de 42 años de gobiernu del coronel; por qué nun yera malu Gadafi cuando-y regaló un caballu a Aznar o cuando acampó nos xardines del palaciu'l Pardo de Madrid, los días de la so visita oficial a Zapatero.

Nun cuadra que les Naciones Xuníes intervengan nun país que, en payares de 2010, yera miembru de númberu de la mesma, colos mesmos drechos que'l restu, pero que se sabía dictadura militar, precisamente, contra la que se sublevó la población. Y la ONU acepta'l réximen, desoyendo les quexes d'esos mesmos libios qu'agora ayuden. Como tampocu nun cuadra qu'España, principal suministrador de munición y proxeutiles pesaos de Gadafi, lo ficiera de buena fe. ¿Escontra de quién los diba usar? Asina lo denunció la plataforma Armas bajo Control, en febreru.

Amás, la resolución ye mui enrevesada: atacar oxetivos militares dende'l cielu pa que Gadafi nun ataque a la población. Pero non se trata de derrocalu, porque les Naciones Xuníes nin quiten nin ponen gobiernos. Lo que quier dicir que se caltendrá'l drechu illexítimu de Gadafi a permanecer nel gobiernu dempués, si vence a los rebeldes a los que nun pue atacar, porque son civiles. Pero, nel casu de vencer, nun se fala d'intervención terrestre posterior, o seya "cascos azules", pa protexer de posibles consecuencies contra los drechos humanos de los perdedores. Vamos, quieren dexar les coses como taben: faciendo la vista gorda.

Asina, nun ye difícil comprender los enguedeyos diplomáticos: Estaos Xuníos diz que nun quier siguir comandando la operación; Italia que nun va siguir si non ye la OTAN quien lidere y Francia y Alemania, que quieren siguir de cualisquier forma, pero dende un segundu planu; la Liga Árabe faciéndose la longuis; y el gobiernu d'España unviando aviones y barcos enantes de que'l Parlamentu lo apruebe (hasta güei martes, nun lo fizo).

Entrúgase a la ministra de Asuntos Esteriores cuánto va durar la intervención y diz que la fin va ser cuando Gadafi faiga un altu al fueu. Val que yá lu fizo, a les dos hores de la resolución, pero como ye tan bichu nun lu creyeron y atacaron igual. La rempuesta del exércitu libiu pa escontra la intervención fala a les clares de que ficieron bien siguiendo. Asina que nun se sabe cuando acabará. Esto pasó por faer les coses apriesa y corriendo.

Porque, nun mundiu amenazáu pol accidente radiactivu más importante dempués de Chernóbil y col lobby nuclear, visto que yá taba saliendo na tele más de la cuenta, trabayando pa acoyonar a los gobiernos occidentales (plutocracies de partíos que nun presenten clares les cuentes coles que se financien), a una Rusia nerviosa pa nun remover la mierda que tuvieron antaño y a una China amenazada por si llega o non una nube radiactiva qu'afecte a les sos esportaciones (lo de menos ye la xente), corría priesa esta resolución.

Nun ye difícil caciplar una cortina de fumu nel casu libiu: metiendo en Libia la puntina na más, la opinión pública distraise de Fukushima ensin quemase muncho colos gobiernos como pasare n'Irak o Afganistán. Y, si de pasu, el petróleu baxa'l preciu, facemos gastu militar y quitamos del mediu un malón pa poner un títere, meyor. Asina que, dempués de munches llargues y vueltes (la revuelta de Libia y les amenaces de Gadafi vienen de fai más d'un mes), aprobóse en dos díes, cuando más revueltos taben los átomos nel país del sol naciente.

El casu ye que'l desastre'l Xapón pasó a segundu planu de los informativos yá. Y la cantidá d'información respeutu a la central nuclear siniestrada pasó nel Canal 24 Horas de TVE, por exemplu, de ser única noticia, cola cadena xaponesa NHK conectada de continuo con un intérprete, a tener cinco minutos detrás de la retafila noticies de Libia.

Cuando los partidarios de la enerxía nuclear falaben de dexar pa más tarde l'alderique sobre lo afayadiza o non que ye, sabíen bien lo que dicíen.

Agora esto sedrán conspiraciones. Pero nel Foro Nuclear tienen que tar pensando, dempués de lo putes que les pasaron y de tantes mentires vertíes les últimes selmanes, y viendo que la cosa tampoco nun ta tan mal, que: ¡PRUEBA SUPERADA!

Musashi y la serpiente

Yera inevitable esta entrada porque vengo dando-y vueltes dende'l vienres, día cuando un terremoto y, de secute, una ola xigante, arrasaron la parte oriental de la islla de Honshu, la mayor del archipiélagu, xaponés tan acostumáu a los movimientos sísmicos que los guah.es nos colexos reciben preparación quincenalmente, metiéndose nunos ponchos de fieltro de colores con capucha, que los tranquiliza al sintise más protexíos.

Pero esti nun fue un temblor normal: con 9,2 grados na escala Richter y epicentru a 120 kilómetros de la costa, llevantó una ola qu'esnaló hasta los 10 metros d'altura al tocar tierra, a una velocidá de 600 kilómetros por hora, llevando por delantre pueblos, ciudaes, puertos y carreteres. Falóse de 80.000 desapaecíos nun principiu y la cifra esnaló; cinco díes dempués, les cifres de la catástrofe nun son definitives, pero yá se llegaron a los 4.000 muertos. La serpiente d'agua, que tantes lleendes xaponeses nomen, volvió atacar. Una auténtica traxedia, por sí solo.

L'amenaza d'un desastre nuclear, frutu del colapsu de cuatru de los seis reactores de la central elléctrica de Fukushima, pue facela más grave tovía, porque condergará amás a les xeneraciones futures. El debate sobre la enerxía nuclear, que tocaré más alantre como ya fice otres veces, ta abiertu y de nuevu salen falacies nel so favor como lo de qu'España ye deficitaria enerxéticamente y esti tipu d'enerxía axuda a ameyorar la balanza o, la pior de toes, que la enerxía nuclear ye la más barata, dexando pa prau'l fechu de que la xestión de residuos nucleares nun ye gratuita, lo que pasa que los gastos son socializaos y, poro, les empreses nun les sumen a los gastos. Fecha la llei... Ensín embargu, la desgracia, de por sí, yá ye termenda.

Nun ye la primer vez que'l Xapón se llevanta d'un desastre. Fízolo dempués de la II Guerra Mundial y dempués del francimientu de les sos estructures medievales a fines del sieglu XIX, cuando Estaos Xuníos, na so primer gran intervención fora de les sos fronteres, amenazó con bombardear Tokyo si l'emperador nun abría'l país a los sos comerciantes, dempués de 300 años zarráu a Occidente. Dos revoluciones industriales, ficieron del Xapón el segundu páis más industrializáu del mundu (esti añu, tres una crisis de 30 años, adelantolu Xina).

Y volverá a facelo, porque'l sistema de valores tradicional, mestura de moral sintoísta y budista, adáutase xeneración tres xeneración, suponiendo un finxu onde toos s'alcuentren. Asina, tenemos una sociedá cooperativa y solidaria de por sí, que ta a la gueta del orden social como reflexu del orden espiritual internu y, sobre too, trabayadora, onde ca persona ye referente pa la d'al llau.

Güei, nun documental d'una cadena especializada nellos (nun recuerdo'l cual), falaben de Miyamoto Musashi, héroe nacional, samurái invencible del sieglu XVI, que se retiró a una cueva a escribir les conclusiones qu'algamara na so vida guerrera, un par d'años enantes de morrer. Cuenta la lleenda que saliere del so esiliu al alcuentru de los sos discípulos, qu'entregara El llibru de los cinco aniellos (Go Rin No Sho) a ún y que, arodiyáu cola espalda firme y la espada na mano, morriera. Esti llibru ye una serie de másimes morales pal guerreru, que perfeccionaba'l bushido o códigu d 'honor de los guerreros nobles, al facelu más entendible. Anguaño, la so adautación, úsenla los homes de negocios como forma de proceder ente la competencia financiera y los escolinos nel colexu, pa preparase pa la vida competitiva que se-yos va desixir dempués. Enantes, foi usada como modelu d'aición pol exércitu imperial na II Guerra Mundial y la sociedá civil, en xeneral, al reconstruyir el país, dempués.

Musashi, como más tarde Yamamoto Tsunetomo col so A la solombra les fueyes (Hagakure), fundamentábase nes siete virtudes del bushido: Rectitú, Corax, Benevolencia, Respetu, Honestidá-Sinceridá absoluta, Honor y Llealtá. Esta mañana, dempués de casi 30 años ensín facelo, dende qu'ascendió al tronu, l'emperaor Aki-Hito faló al pueblu recordando que, nos momentos difíciles, los xaponeses acuden a estes virtudes.

Nun tengo dulda denguna de que'l Xapón saldrá p'alantre de nuevo como sociedá independiente culturalmente, adautándose a les circunstancies difíciles que tan sufriendo (y temo que sufrirán) y manteniendo'l sistema de valores propiu.

Musashi volverá a ganar la batalla a la serpiente.

Trípoli - Xixón

Véome tirando piedres
a la estatua d'Augustu:
Delantre, paisanos bien pensaos,
paseantes correutos que ven
solo la mano abierta,
pero non los dientes
mordiéndose unos a otros,
apretándose pa nun dexar
pasu a un cuspiazu direutu
a los güeyos mirones.
"¡Pregunte, si quier saber,
enantes d'apedriame
o marche del mio camín!"
Los deos les vieyes
y les sorises les moces,
col so histerismu nerviosu,
apuntábenme a la nuca,
p'agachar les yemes
y les comisures los llabios,
si daba la vuelta.
"¿Pasa dalguna cosa?
¿Dalgo pa preocupamos?
Pos marchái del mio camín"
Ruíu de sirenes y botes,
glayíos llamándome l'atención
como si tuviera sordu
a les gorres, les pistoles,
la porra y les esposes,
plántense ente la estatua
y la mio mano empedrada.
"¿Ye pior esto que quedar quietu?
¿Van deteneme, axentes
o van quitar del mio camín?"

Y caciplo:
Probe del pueblu
qu'entiende meyor
tener la mierda na tiesta
qu'a un llocu tirando piedres
cargaes de razones.

(Canciu averáu al poema raru pa tantos)

Perros

Yá se fai vieyu'l dichu de que'l perru ye'l meyor amigu l'home. Anguaño, como un de los resultaos del procesu deshumanizador que bien axuntáu a los tiempos que cuerren, los perros pasaron de ser animales que compartíen xeres colos humanos a ser un productu prestosu que, por supuestu y como cualisquier otru productu, tien más importancia que les persones d'alrodiu. Asina, la xente, por regla xeneral de civismu ya urbanismu actual, enantes pregunta pol perrín a la so vecina que pola enfermedá de la fía; dase más priesa n'apartase del camín del perrucu qu'en dexar pasu a una vieya cargada de bolses; primero acaricia al sacu pulgues que se llambe los güevos delantre'l contenedor que crucia la mirada cola rumana que ta sentada a la puerta l'Alimerka.

Nun pueo dexar de sintir les quexes de los dueños de perros polos pocos sitios qu'esisten nes ciudaes pa que les sos mascotes puean salir a correr en llibertá o poles xeneralizaciones que dalgunos ciudadanos cuspien cuando quedó un escrementu na cai. Enllenénme ensin dexar capacidá pa otres coses, muries de facebook y carpetes d'entrada de correos llectrónicos pa qu'adopte perrinos, pa que vaya a carreres benéfiques o a concentraciones en repulsa polos maltratos que sufren o pidiéndome'l sofitu en forma robra pa que'l parque tal seya destináu al esfrute los perros. Y, finalmente, mírenme con cara d'incomprensión cuando-yos digo que los perros nun me presten un res.

L'otru día lleía una entrada nun blogue bien prestosu d'un collaciu, Pablo, "una defensa a los cánidos", qu'entiendo ta mui na llinia d'esta deshumanización de la sociedá. Falaba d'un paisanu que se dedicara a matar cachorrinos como venganza polos escrementos que dexaben y, exaltáu por eso, pasaba a numberar repudiables casos d'incívicu proceder de persones (condones na playa, botellones, escrementos humanos en parques) pa quexase de normatives urbanes como'l non dexar entrar a perros en sitios públicos (dicía qu'anantes sí se podía) o llevalos a la playa, hasta finar diciendo que "Los perros y sus dueños parecemos unos delincuentes que cuando salimos a pasear tenemos que tener nuestra documentación en regla, por si nos la piden. Y nuestra zona exclusiva para perro suelto (no os recuerda el ghetto de Varsovia?)".

Toca la tema del maltratu animal, que ye daqué que me pon los pelos de punta y soi, quiciás, una de les persones menos permisives que conozco al respeutu. La xente quédase en denunciar al paisano que mató a los cachorrinos y yo, amás, afeo-yos la conducta a toos aquellos que lleven a los guah.es al circo pa que vean los tigres, que viven 20 hores del día en tres metros cuadraos, a los qu'esfruten colos delfines alienaos nel acuariu o a los que nun se muerren de pena colos búfalos semiconxelaos de Cabárceno.

Pero ye que tamién me paecen maltratadores daquellos qu'anteponen el so bienestar al de los perros ya seya por pena (adoptar perrinos anque nun tengan capacidá p'atendelos), por distraición (cuidando'l perru, tiénse daqué que facer), por modes (tá de moda tener determinaes races de perros, anque seyan aberraciones xenétiques que s'afueguen si corren 30 metros porque tienen el focicu demasiao curtiu, lo que ye'l símbolu del pedigrí), por banalidá (anque se los dixebre'l so hábitat pa que muerran de calor en branu por ser de races polares o de friu n'iviernu, por ser propies de climes cálidos) o, la pior de toes, por status (porque con un perru, socialízase).

Hasta fai bien poco, los perros nun entraron nes ciudaes: yeren usaos pa xeres del campu (caza, vixilancia, pastoréu). Dalgunos perros sí yeren domésticos, pero'l so tamañu yera pequeñu y, siendo una boca más qu'alimentar, quedaben pa les clases altes o medies. Los qu'había, yeren perros vagabundos que podíen desapaecer en momentos d'hambruna.

Cuando yo yera pequeñu, yera imposible ver grupos de xente paseando colos perros pela cai como se fai anguaño. Más tovía, velos nuna cafetería. Si entrabes nun chigre y había ún, yera de xuru del dueñu. Si daquién diba con perru, quedaba a la puerta y ensin mover una ceya. Había perros, claro. Pero la xente teníalos en finques o en barrios nuevos del estraradiu les ciudaes, onde había descampaos pa soltalos. Porque los perros, poles sos necesidaes naturales y pol so usu como animal domésticu, nun yeren pa la ciudá.

Ye más: si daquién tenía perros en casa, mirábaselu mal, porque asociábase a suciedá, ruiu y mal golor. Esta ye la razón pola que la mayor parte de les comunidaes de vecinos nun dexaben tener perros nos pisos.

Poco a poco, foi poniéndose de moda meter perros en pisos, como se veía na televisión. Pero tovía cuando, a finales de los 80, l'Ayuntamientu de Xixón punxo un Pipi-can en Begoña, la xente protestó pol gastu polémicu (anque los mexos de los perros de tol centru quedaren pegaos a la Biblioteca Infantil). Pueo dicir que yo, nel añu 94, foi'l primeru de mio clas que tuvo perru en casa. Causé sensación, porque naide nun lu tenía (los que teníen mascotes yeren gatos, hamsters, tortugues, peces). Y, al baxalu a la cai, tropezábame con cuatro vieyines, con perros más pequeños que'l de mío, porque mui pocos perros grandes había pel Centru.

Anguaño camudó'l sintir de la xente y ún pue cruciase pela cai con cualquier especie de perru del mundiu, seya del tamañu que seya, tenga les necesidaes que tenga. Pero mui pocos tan educaos, porque pocos dueños lo tan y nun se paren a pensar si'l perru ta bien asina y si ye bueno pa la xente d'alrodiu que lu tenga.

Asina, la comodidá de tener el mayor númberu de sitios averaos a casa o el menor númberu de responsabilidaes pa colos demás, fai que la xente proteste cual víctima del holocaustu nazi (realmente creyo que Pablo nun pensó bien este pallabres), nuna confusión ente los conceutos de drechu y llibertá (como na polémica pola llei del tabacu), productu d'escaecese de los demás por dar más valir a lo de so.

Pero sí, tendrán que camudar tamién les lleis y los reglamentos y la división de los espacios públicos, porque ye'l sintir mayoritariu de la xente y porque, no fondero, hai un negociu detrás que mueve dende la venta, cría y educación del perru, hasta la comida especial pa cada raza, pasando polos xilecos pa chihuahuas. Los perros son agora un oxetu más que tener en casa, que necesita unos cuidaos, como si fuera un Tamagotchi. Por eso, tristemente, cada añu hai más abandonos, como s'abandonaron los tamagotchis cuando pasaron de moda.

Siempre dende la parcialidá que me da ser dueñu d'un perru, paezme que tamién ye un maltratu tener a un perru de más de 20 kilos nun pisu de 60 metros cuadraos. Soi consciente qu'eso ye mui impopular dicilo, pero nun por eso dexa de ser una realidá.

Dame llástima que l'home nun seya yá'l meyor amigu'l perru.

(Na semeya ta'l mio perru, Rubio. Cumplió 17 años en mio casa el 7 de febreru)

Soap

Nos años 70, la serie de televisión "Soap" escomenzaba los sos capítulos resumiendo l'enguedeyu que se formare nos anteriores. La hestoria de los llíos d'esta familia peculiar fizo que'l so nome se tornara al español como "Enredos". Y el so pintorescu tema musical ye referente siempre pa cuando se fala de temes enrabilaes. Asina que, anantes de siguir la llectura, pido que piqueis nel enllaz siguiente, pa metevos n'ambiente.

(Soap)

Güei voi falar de politica asturiana, porque a finales de mayu van ser les elleiciones a la Xunta Xeneral del Principáu (tamién pa los conceyos, pero tien munchu menos interés) y yá toi un pocoñín fartu de que me pregunten sobre ello. Escomienzo l'analís.

(Dái al play)

Vicente Álvarez Areces foi l'últimu Presidente de la Xunta del Principáu, pero déxalo, y el so partíu noma como candidatu al so Presidente, Juan Fernández, que quier tomar como modelu de referencia económica a Sama de LLangréu pa faer d'Asturies un destinu propiciu pa que la xente trabaye, pero que nun desplica por qué nestos 30 años la xente asturiano tenía que colar d'equí o facese opositor pa tener un futuru.

Dende'l PP ufiértase una alternativa ensín proxeutu y parten como favoritos gracies a la crisis. Pero l'eternu aspirante Ovidio Sánchez desoye'l paecer de les sos bases y acepta de buen gráu la candidata de Madrid, Isabel Pérez Espinosa y pierde casi la metá de los sos afiliaos n'Asturies, que marchen con Francisco Álvarez Cascos, el desapaecíu, que tenía la intención de volver a la política porque nun tien un duru. Como non lu dexaren, creya unu nuevu pa de so y nómalu, inspiráu na personalidá de Xovellanos, Foro Asturias, montando un revuelu tremendu cuando se-y ocurre dicir en público qu'Asturies ye un país. Critica la falta de democracia interna del PP, pero escaez qu'eses carencies yá taben presentes cuando él mesmu se negó a sofitar al primer y únicu Presidente del Principáu del PP, Sergio Marqués, que se fixo rexonalista y montó la URAS (Unión Regionalista Asturiana) y qu'anguaño ta mano a mano col Partíu Asturianista de Xuan Xosé Sánchez Vicente.

Pal otru lláu del asturianismu alcontramos dos coaliciones: Compromisu por Asturies, que ye la mestura del Bloque por Asturies, que naciera del maxín de Valledor nel sen d'Izquierda Xunida pa da-y al partíu una vertiente más asturiana y que tien agora un diputáu nel Parllamentu, Roberto Colunga, y de la Unión Nacionalista Asturiana, con Yolanda Huergo a la tiesta, que ye, a la so vez, l'aconceyamientu de la antigua Izquierda Asturiana (IAS), xunto a un grupu de dixebraos d'Andecha Astur y un grupu de verdes asturianos; al lláu, y nos tribunales con parte de la UNA, Andecha Astur preséntase a elleiciones baxo'l nome Conceyu Abiertu (índa nun tien candidatu). Encabritaos los unos colos otros, ensín solución, la cuestión ye si algamarán más votos en total que los Verdes.

(Si terminó'l tema d'Enredo, vuelve a dái al play. Esto nun acaba equí)

Enantes falé d'Izquierda Xunida, tercer fuercia parllamentaria n'Asturies y que formó Gobiernu col PSOE. Ye una mestura de diferentes fuercies d'izquierda. Pero ún dellos, el Partíu Comunista d'Asturies, rebeláu poles polítiques de marxinación que bien sufriendo dientro la organización, esti añu va presentase en solitariu, con nome nuevu, por supuestu: Frente de la Izquierda. Esta marca ya ta muerta dafechu, porque'l PCE, el que dicta les coses pa toa España, yá dixo que nun diba permitir presentase a naide del partíu fora d'Izquierda Xunida. Lo que güel a un nuevu cisma.

Pero, pesie a esto, n'Izquierda Xunida, les coses nun pinten bien. Les sos reivindicaciones polítiques y sociales queden ensin llexitimación porque lleven años sofitando al Gobiernu socialista. Y metiéndose en campañes poco midíes, como la del apoyu al malográu direutor del Muséu Etnográficu de Grandas de Salime, Pepe'l Ferreiro, que lo agradeció metiéndose nel Foro Asturias de Cascos, que acaba desbancar les probes ilusiones de UPyD n'Asturies, Democracia Nacional y les diverses Falenges, que lluchaben pol mesmu nichu de votos.

Asina les coses, güelme que la escasa capacidá d'autocrítica de los ciudadanos asturianos, enfotaos en que venga daquién a salvalos de los sos apuros (llámese Merkel, Rajoy o Preciado), aguantarán al Partido Socialista Obrero Español en el Gobierno, que tien por voceru al señor Fernández Lastra, el mesmu que s'atrevió a dicir que "sentirse orgulloso de ser asturiano es signo de ser de extrema derecha" y tovía nun corrixó. Eso sí, Cascos va llevar unos cuantos diputadinos que-y van vinir de perles pa xubilase nun cargu.

Soap ye xabón n'inglés. ¿Dalgún voluntariu pa da-y una manina de xabón a la política asturiana?