Asturianos en casa Dios.

Con esti título nomaben una sección del humorísticu programa Terapia de Grupo de TPA. Venía a ser una parodia de los programes de Telemadrid y Canal Sur (Madrileños en el mundo y Andaluces en el mundo, respeutivamente), que buscaben madrilanos ya andaluces pol mundo, pa facer reportaxes sobre la so vida. Dempués fadríen otros programes a nivel nacional, comu Españoles en el mundo –qué orixinal TVE- o Dutufrí, protagonizáu por Javier Sardá. Siempre que los viera, facíame gracia que, detrás del madrilanu o l’andaluz, siempre ya invariablemente hebía un asturianu pol mediu.

Esti domingu pude ver en Cuatro el programa Callejeros en el mundo, que amesta’l formatu anterior col que tantu éxito y tá dando la nueche de los vienres. Taben en Las Vegas y, nun faltare más, ellí apeció l’asturianu cantando’l “Asturias, Patria querida” dende una discoteca-áticu exclusiva de la ciudá del neón y les tragaperres. Por cierto: yera Las Vegas de Nevada, nun la de Corvera.

Yo sabía que’l asturiano fuere, ye y sedrá un pueblu emigrante, pero nun sabía que llegare hasta esti puntu. Por daqué ta en Colombre el Muséu de la Emigración. Val que’l 60% de les asociaciones, grupos y centros de comunidades españoles en el mundo sean asturianes; que, dende 1850 hasta 1936, emigraren d’Asturies 300.000 persones y que, na década de los 60, salieren a Centroeuropa cerca de 50.000 asturianos (lo que ye chocante, puesto qu’Asturies taba industrializándose y recibía inmigrantes castellanos, extremeños y gallegos a tutiplén); val que la mocedá asturiano d’anguaño seya una “leyenda urbana” que vive en Madrid y Barcelona deseando que llegue un puente p’agarrar un ALSA… pero comu la fama d’emigrante la teníen los gallegos… (Anque esto tien una desplicación clara: los barcos de pasaxeros que diben a América zarpaben del puertu de Vigo. Asina que nun pa arxentinos, uruguayos y demás, tolos españoles yeren –y son- gallegos. Salvo en México, que yéramos gachupines)

Lo que nun sabía yo, ye que siempre que pasa daqué nel mundu, tenía qu’haber un asturianu pol mediu. Pongo exemplos alcontraos en noticies d’estes últimes selmanes:

- Terremotu n’Italia. Un extranxeru heridu grave. Asturianu.

- Primer casu de la gripe porcina n’Europa, Inglaterra. Asturianu. (Lluego descubrióse que nun taba afectáu)

- Detienen en Méxicu a José Pérez Díaz (Pepe’l del Popular), que estafó 6.000 millones de pesetes en 1991 na sucursal del Banco Popular de Santander y que yera ún de los fuxitivos d’oru de la xusticia española. El delitu prescribió, asina que lu ponen en llibertá. Asturianu.

- Carla Bruni visita España xunto al so marido (por si dalguien nun lo sabe, l’actual Canciller de la República Francesa) y protagoniza un duelu de estilu y moda con Letizia Ortiz, Princesa de Asturias. Asturiana. La princiesa, non la Bruni.

Asina, pudiere siguir hasta cansar porque, seya onde seya y pase lo que pase, ellí habrá siempre un asturianu.

Pero, pa que esto nun quede en teoría, nin se me tome por un desaxeráu por falar ensin motivu, propongo un experimentu.

Pasu 1: Búsquese una bola del mundo y densé-y volties. Cierren los güeyos y apárese col deu índiz la bola.

Pasu 2: Apúntese el nome del sitiu que señala el deu.

Pasu 3: Búsquese n’internet “Telephon Guide of (nome del sitiu)”.

Pasu 4: Marque´l quintu númberu qu’apaezca (o’l sextu; o’l séptimu… da igual)

Nun se sorprensan al sintir una voz diciendo: “¿Qué pasa, ho?”.