Banda Sonora Original

Güei alcuéntrome desveláu a les 4:44 de la madrugada y, fartu de ller, ver la tele y dar volties na cama y, siguiendo los recordatorios de la mio collacia internáutica Natalia, póngome al ordenador a escribir una nueva entrada d'esti blog, que tengo más qu'abandonáu. Son munches les idegues que tuvi mientres d'esti tiempu ensin escribir pa facelo, pero agora que toi a ello, nun me vienen a la cabeza. Métome nel youtube y, ensin dame cuenta, toi escribiendo nel buscador "Vetusta Morla", un grupu madrilanu qu'allá fadrá dos años, sacó un discu que me marcó bastante. Mientres l'añu 2008 foi a trabayar a la ludoteca con sones como "Sálvese quien pueda", "Valiente", "Copenhague" o "La Marea". Ye zarrar los güeyos y veme caminando avenida d'El LLano p'alantre, l'adiós a Ivanín, les ides y venides p'Avilés, les perdíes a Tere y el realcuentru con Mary o la lluvia del día los fuegos.

Paezme curioso como la vida se va faciendo por sí sola, ensin podela controlar en dengún momentu, y la memoria fai por sí, tovía más independiente, y engarza los recuerdos a músiques que, al volver a sintiles, disparen el resorte. Tal paez que fuéramos actores d'una película y tuviéremos banda sonora.

Nun puedo dexar de pensar en Xana si oigo a Ismael Serrano, Aute o a Sabina, nin en Mary al sintir a La Oreja de Van Gogh, Nena Daconte o Beyoncé. Toi fritu a recuerdos d'amores que nun pudieron ser ca vegada qu'escucho la radio.

Los Piratas ye'l mi grupu favoritu dende va tiempu: ye inevitable qu'"Años 80" me tresllade al Soho, un pub de Cimavilla per onde tovía paro, pero al de los recuerdos, bonos y non tan bonos, almacenaos a palaes de tanto dir ellí. La versión de "Teching" del conciertu del "Fin de la segunda parte", a medies con Bunbury, llévame a marzo de 2007 a un vagón del metro de Barcelona enllenu de xente seria que se sorprendía de veme sorreir, deseando como taba de llegar a casa y ver a Eva. Iván Ferreiro en solitario, y la so tema "Turnedo", faénme volver a mirame cara a cara con Ángela na primavera del 2005; "Extrema pobreza" llévame a la seronda del 2006, p'alcontrame con Almudena y, actu siguíu, con tolos malos rollos del iviernu siguiente. "Abrázame", versión de la de Julio Iglesias, llévame de nuevo a Natalia.

A mio güela Lola prestába-y abondo "El Ritmo del Garaje" de Loquillo, pero nunca podré olvidar como vimos xuntos pela tele la cayida de la estatua de Sadam Hussein al ritmu del "Por ahí se va" de Danza Invisible. Mio güela Ramona ye'l ritmu propiu d'Azul y Negro, porque-y gustaba muncho el ciclismu... tamién me vien a la tiesta cuando siento cantar a les monxes que van a los funerales, pero solo si consigo aguantar la risa.

Son munches les canciones, buenes y males, que me traen otros momentos, buenos y malos. Agora, que son les 5:26, toi sintiendo "Pa llegar a tu lado" dende'l gargüelu d'Iván Ferreiro. Ye tamién curioso, porque dende esti blog llego al llau de vosotros, que me lleis y que me pedís que nun dexe d'escribir. Toi seguru de que m'alcordaré d'esti momentu ca vez que la escuche. Van facese interminables los mios títulos de créditu.