Perros

Yá se fai vieyu'l dichu de que'l perru ye'l meyor amigu l'home. Anguaño, como un de los resultaos del procesu deshumanizador que bien axuntáu a los tiempos que cuerren, los perros pasaron de ser animales que compartíen xeres colos humanos a ser un productu prestosu que, por supuestu y como cualisquier otru productu, tien más importancia que les persones d'alrodiu. Asina, la xente, por regla xeneral de civismu ya urbanismu actual, enantes pregunta pol perrín a la so vecina que pola enfermedá de la fía; dase más priesa n'apartase del camín del perrucu qu'en dexar pasu a una vieya cargada de bolses; primero acaricia al sacu pulgues que se llambe los güevos delantre'l contenedor que crucia la mirada cola rumana que ta sentada a la puerta l'Alimerka.

Nun pueo dexar de sintir les quexes de los dueños de perros polos pocos sitios qu'esisten nes ciudaes pa que les sos mascotes puean salir a correr en llibertá o poles xeneralizaciones que dalgunos ciudadanos cuspien cuando quedó un escrementu na cai. Enllenénme ensin dexar capacidá pa otres coses, muries de facebook y carpetes d'entrada de correos llectrónicos pa qu'adopte perrinos, pa que vaya a carreres benéfiques o a concentraciones en repulsa polos maltratos que sufren o pidiéndome'l sofitu en forma robra pa que'l parque tal seya destináu al esfrute los perros. Y, finalmente, mírenme con cara d'incomprensión cuando-yos digo que los perros nun me presten un res.

L'otru día lleía una entrada nun blogue bien prestosu d'un collaciu, Pablo, "una defensa a los cánidos", qu'entiendo ta mui na llinia d'esta deshumanización de la sociedá. Falaba d'un paisanu que se dedicara a matar cachorrinos como venganza polos escrementos que dexaben y, exaltáu por eso, pasaba a numberar repudiables casos d'incívicu proceder de persones (condones na playa, botellones, escrementos humanos en parques) pa quexase de normatives urbanes como'l non dexar entrar a perros en sitios públicos (dicía qu'anantes sí se podía) o llevalos a la playa, hasta finar diciendo que "Los perros y sus dueños parecemos unos delincuentes que cuando salimos a pasear tenemos que tener nuestra documentación en regla, por si nos la piden. Y nuestra zona exclusiva para perro suelto (no os recuerda el ghetto de Varsovia?)".

Toca la tema del maltratu animal, que ye daqué que me pon los pelos de punta y soi, quiciás, una de les persones menos permisives que conozco al respeutu. La xente quédase en denunciar al paisano que mató a los cachorrinos y yo, amás, afeo-yos la conducta a toos aquellos que lleven a los guah.es al circo pa que vean los tigres, que viven 20 hores del día en tres metros cuadraos, a los qu'esfruten colos delfines alienaos nel acuariu o a los que nun se muerren de pena colos búfalos semiconxelaos de Cabárceno.

Pero ye que tamién me paecen maltratadores daquellos qu'anteponen el so bienestar al de los perros ya seya por pena (adoptar perrinos anque nun tengan capacidá p'atendelos), por distraición (cuidando'l perru, tiénse daqué que facer), por modes (tá de moda tener determinaes races de perros, anque seyan aberraciones xenétiques que s'afueguen si corren 30 metros porque tienen el focicu demasiao curtiu, lo que ye'l símbolu del pedigrí), por banalidá (anque se los dixebre'l so hábitat pa que muerran de calor en branu por ser de races polares o de friu n'iviernu, por ser propies de climes cálidos) o, la pior de toes, por status (porque con un perru, socialízase).

Hasta fai bien poco, los perros nun entraron nes ciudaes: yeren usaos pa xeres del campu (caza, vixilancia, pastoréu). Dalgunos perros sí yeren domésticos, pero'l so tamañu yera pequeñu y, siendo una boca más qu'alimentar, quedaben pa les clases altes o medies. Los qu'había, yeren perros vagabundos que podíen desapaecer en momentos d'hambruna.

Cuando yo yera pequeñu, yera imposible ver grupos de xente paseando colos perros pela cai como se fai anguaño. Más tovía, velos nuna cafetería. Si entrabes nun chigre y había ún, yera de xuru del dueñu. Si daquién diba con perru, quedaba a la puerta y ensin mover una ceya. Había perros, claro. Pero la xente teníalos en finques o en barrios nuevos del estraradiu les ciudaes, onde había descampaos pa soltalos. Porque los perros, poles sos necesidaes naturales y pol so usu como animal domésticu, nun yeren pa la ciudá.

Ye más: si daquién tenía perros en casa, mirábaselu mal, porque asociábase a suciedá, ruiu y mal golor. Esta ye la razón pola que la mayor parte de les comunidaes de vecinos nun dexaben tener perros nos pisos.

Poco a poco, foi poniéndose de moda meter perros en pisos, como se veía na televisión. Pero tovía cuando, a finales de los 80, l'Ayuntamientu de Xixón punxo un Pipi-can en Begoña, la xente protestó pol gastu polémicu (anque los mexos de los perros de tol centru quedaren pegaos a la Biblioteca Infantil). Pueo dicir que yo, nel añu 94, foi'l primeru de mio clas que tuvo perru en casa. Causé sensación, porque naide nun lu tenía (los que teníen mascotes yeren gatos, hamsters, tortugues, peces). Y, al baxalu a la cai, tropezábame con cuatro vieyines, con perros más pequeños que'l de mío, porque mui pocos perros grandes había pel Centru.

Anguaño camudó'l sintir de la xente y ún pue cruciase pela cai con cualquier especie de perru del mundiu, seya del tamañu que seya, tenga les necesidaes que tenga. Pero mui pocos tan educaos, porque pocos dueños lo tan y nun se paren a pensar si'l perru ta bien asina y si ye bueno pa la xente d'alrodiu que lu tenga.

Asina, la comodidá de tener el mayor númberu de sitios averaos a casa o el menor númberu de responsabilidaes pa colos demás, fai que la xente proteste cual víctima del holocaustu nazi (realmente creyo que Pablo nun pensó bien este pallabres), nuna confusión ente los conceutos de drechu y llibertá (como na polémica pola llei del tabacu), productu d'escaecese de los demás por dar más valir a lo de so.

Pero sí, tendrán que camudar tamién les lleis y los reglamentos y la división de los espacios públicos, porque ye'l sintir mayoritariu de la xente y porque, no fondero, hai un negociu detrás que mueve dende la venta, cría y educación del perru, hasta la comida especial pa cada raza, pasando polos xilecos pa chihuahuas. Los perros son agora un oxetu más que tener en casa, que necesita unos cuidaos, como si fuera un Tamagotchi. Por eso, tristemente, cada añu hai más abandonos, como s'abandonaron los tamagotchis cuando pasaron de moda.

Siempre dende la parcialidá que me da ser dueñu d'un perru, paezme que tamién ye un maltratu tener a un perru de más de 20 kilos nun pisu de 60 metros cuadraos. Soi consciente qu'eso ye mui impopular dicilo, pero nun por eso dexa de ser una realidá.

Dame llástima que l'home nun seya yá'l meyor amigu'l perru.

(Na semeya ta'l mio perru, Rubio. Cumplió 17 años en mio casa el 7 de febreru)

Soap

Nos años 70, la serie de televisión "Soap" escomenzaba los sos capítulos resumiendo l'enguedeyu que se formare nos anteriores. La hestoria de los llíos d'esta familia peculiar fizo que'l so nome se tornara al español como "Enredos". Y el so pintorescu tema musical ye referente siempre pa cuando se fala de temes enrabilaes. Asina que, anantes de siguir la llectura, pido que piqueis nel enllaz siguiente, pa metevos n'ambiente.

(Soap)

Güei voi falar de politica asturiana, porque a finales de mayu van ser les elleiciones a la Xunta Xeneral del Principáu (tamién pa los conceyos, pero tien munchu menos interés) y yá toi un pocoñín fartu de que me pregunten sobre ello. Escomienzo l'analís.

(Dái al play)

Vicente Álvarez Areces foi l'últimu Presidente de la Xunta del Principáu, pero déxalo, y el so partíu noma como candidatu al so Presidente, Juan Fernández, que quier tomar como modelu de referencia económica a Sama de LLangréu pa faer d'Asturies un destinu propiciu pa que la xente trabaye, pero que nun desplica por qué nestos 30 años la xente asturiano tenía que colar d'equí o facese opositor pa tener un futuru.

Dende'l PP ufiértase una alternativa ensín proxeutu y parten como favoritos gracies a la crisis. Pero l'eternu aspirante Ovidio Sánchez desoye'l paecer de les sos bases y acepta de buen gráu la candidata de Madrid, Isabel Pérez Espinosa y pierde casi la metá de los sos afiliaos n'Asturies, que marchen con Francisco Álvarez Cascos, el desapaecíu, que tenía la intención de volver a la política porque nun tien un duru. Como non lu dexaren, creya unu nuevu pa de so y nómalu, inspiráu na personalidá de Xovellanos, Foro Asturias, montando un revuelu tremendu cuando se-y ocurre dicir en público qu'Asturies ye un país. Critica la falta de democracia interna del PP, pero escaez qu'eses carencies yá taben presentes cuando él mesmu se negó a sofitar al primer y únicu Presidente del Principáu del PP, Sergio Marqués, que se fixo rexonalista y montó la URAS (Unión Regionalista Asturiana) y qu'anguaño ta mano a mano col Partíu Asturianista de Xuan Xosé Sánchez Vicente.

Pal otru lláu del asturianismu alcontramos dos coaliciones: Compromisu por Asturies, que ye la mestura del Bloque por Asturies, que naciera del maxín de Valledor nel sen d'Izquierda Xunida pa da-y al partíu una vertiente más asturiana y que tien agora un diputáu nel Parllamentu, Roberto Colunga, y de la Unión Nacionalista Asturiana, con Yolanda Huergo a la tiesta, que ye, a la so vez, l'aconceyamientu de la antigua Izquierda Asturiana (IAS), xunto a un grupu de dixebraos d'Andecha Astur y un grupu de verdes asturianos; al lláu, y nos tribunales con parte de la UNA, Andecha Astur preséntase a elleiciones baxo'l nome Conceyu Abiertu (índa nun tien candidatu). Encabritaos los unos colos otros, ensín solución, la cuestión ye si algamarán más votos en total que los Verdes.

(Si terminó'l tema d'Enredo, vuelve a dái al play. Esto nun acaba equí)

Enantes falé d'Izquierda Xunida, tercer fuercia parllamentaria n'Asturies y que formó Gobiernu col PSOE. Ye una mestura de diferentes fuercies d'izquierda. Pero ún dellos, el Partíu Comunista d'Asturies, rebeláu poles polítiques de marxinación que bien sufriendo dientro la organización, esti añu va presentase en solitariu, con nome nuevu, por supuestu: Frente de la Izquierda. Esta marca ya ta muerta dafechu, porque'l PCE, el que dicta les coses pa toa España, yá dixo que nun diba permitir presentase a naide del partíu fora d'Izquierda Xunida. Lo que güel a un nuevu cisma.

Pero, pesie a esto, n'Izquierda Xunida, les coses nun pinten bien. Les sos reivindicaciones polítiques y sociales queden ensin llexitimación porque lleven años sofitando al Gobiernu socialista. Y metiéndose en campañes poco midíes, como la del apoyu al malográu direutor del Muséu Etnográficu de Grandas de Salime, Pepe'l Ferreiro, que lo agradeció metiéndose nel Foro Asturias de Cascos, que acaba desbancar les probes ilusiones de UPyD n'Asturies, Democracia Nacional y les diverses Falenges, que lluchaben pol mesmu nichu de votos.

Asina les coses, güelme que la escasa capacidá d'autocrítica de los ciudadanos asturianos, enfotaos en que venga daquién a salvalos de los sos apuros (llámese Merkel, Rajoy o Preciado), aguantarán al Partido Socialista Obrero Español en el Gobierno, que tien por voceru al señor Fernández Lastra, el mesmu que s'atrevió a dicir que "sentirse orgulloso de ser asturiano es signo de ser de extrema derecha" y tovía nun corrixó. Eso sí, Cascos va llevar unos cuantos diputadinos que-y van vinir de perles pa xubilase nun cargu.

Soap ye xabón n'inglés. ¿Dalgún voluntariu pa da-y una manina de xabón a la política asturiana?

Bipolar

Perdonáime. A veces pásenme pela cabeza coses tan rares como esta. Mírome dende fuera y abluco, porque son más propies de David Lynch que de mío. Pero acaben pasándoseme, anque seya dempués de meses.

Parte 1 (de mayu a xineru)

La última entrada que subí a esti blogue fue en mayu, dempués de dicir en xineru que diba a comprometeme a siguir escribiendo otru año enteru más, pola xente que quiero y que tien la paciencia de siguime y d'insistime. La señaldá paez que pue conmigo y enlléname de desgana.

Nun alcuentro temes que nun me faigan cayer na repetición del día la marmota. Fíxome nes entrades antigües y siguen pasando les mesmes coses de siempre nesti mundiu que me rodea. Pero tamién n'aquella entrada me comprometía busca-yos nueves perspectives.

¡Ay! Paezme qu'esto ye un cuentu chinu (mayu'10). Los váteres qu'usaren na investidura del gloriosu nobel Obama (xineru'09/ochobre'09) yá desbordaren y esti home que diba a camudar el planeta enteru, y a nosotros con elli, paez otru vendedor de fumu más, a semeyanza del gamberru de Berlusconi y del perdedor Florentino (xunu'09). Pasare'l 1100 anversariu del Reinu de LLeón (avientu'09) de la mesma forma que pasó la moda pol Haití (xineru'10), como caerán nel escaezu López Vázquez (avientu'09), Rodríguez de la Fuente (marzu'10), Crémer (xunu'09) o'l mío almiradísimu Alexandre (marzu'09). Porque lo de la memoria, paez que nun val igual pa toos, por más hestórica que seya (ochobre'09) o inventada al gustu (setiembre'09) nuna tierra esta mía, Asturies, onde se tresplanten tradiciones (abril'10) qu'acaben matando a un pueblu que tien qu'emigrar (mayu'09), si les condiciones climátiques lu dexen (xineru'09). Los temes, como veis, repítense na plena actualidá marmotil (xineru'10) porque non, los problemes nun s'igüen solos (marzu'10).

Asina que, ¿pa que siguir escribiendo si too sigue igual?

Parte 2 (dende febreru)

Pero, no más fondero, sé que les coses siempre puen camudar.

Y como pallabreru nun me falta y idegues, tampoco, voi proponevos unos cambios pequeños nesti blogue, a ver qué vos paecen.

Ensín dexar de falar de daquellos temes que me choquen, voi centrame un pocoñín más n'aquellos que m'esmolecen. N'estos meses dime cuenta que ca día me duelen más coses qu'anantes dexaba pasar. Doime cuenta que nun pueo colos prexucios de la xente y voi usar la mío piscina de boles pa calmame xugando a retrucalos. Toi fartu de babayaes pero, como nun quiero ser yo'l primeru que caiga nelles, pídovos la vuestra collaboración, comentando. (Yá que queréis qu'escriba, yo quiero lleevos).

Amás, como la culiebra que camuda la camisa pa crecer, tamién quiero cambiar l'aspeutu del sitiu, poniéndo colorinos nuevos y, sobre too (y espero que me comprendáis) escribiendo solo n'asturianu. L'español sigue prestándome y toi seguru que dalguna vez me dexaré cayer equí usándolu. Pero cada vez lu sientu más inútil pa espresar lo que siento y si voi poneme por escrito, tien de ser de forma sincera.

Si vos peten los cambios, sí, comprométome a volver (d'una forma índa más intensa que l'alcordada na cabera conversación cola mio amiga Natalia, que de xuru taba yá estrañada de que nun escribiera ná). Y fáigolo porque tolos cambios válenmos pa medrar, anque seya un migayucu.